Пятница, марта 29, 2024
Важное

Маень 18-це чись – Музеень раськеютконь чи

И. Д. Воронин лемсэ республикань краеведениянь музеев свал сакшныть инжеть кода эсенек республикасто, истя жо сонзэ томбальдеяк. Ломантнень эряви мельспаросо вастомс, лембестэ ёвтнемс тенст историядо ды ванстовиця экспонаттнэде, содавтомс эрзянь ды мокшонь культурань сюпавчитнень марто. Вастомс истя – туевель тенст мельс ды савольть тей эштё аволь весть. Вана кодамо лувсо важодить музейтне. Течи – сынст кенярксчист. Минь вастовинек краеведениянь музеень неень шкань историянь отделэнь научной сотрудникенть Галина Самаркина марто.

Галина Сергеевна те музейсэнть важоди 2002 иестэ саезь. Тедеде топодить комсь иеть. Те шкась ливтязь ливтясь. Сестэ музеесь вешнесь ломань, кона соды эрзянь эли мокшонь кель. Галина чачсь эрзянь ине скульпторонть С. Д. Эрьзянь чачома ёнкссо – Орданьбуень Баеньбуе велесэ. Кие, кода аволь сон, парсте содасы келенть? Баеньбуесэ сон прядсь 8 класст, мейле тонавтнесь Тургеневань средней школасо. Седе тов сыргась Н. П. Огарёв лемсэ филологиянь факультетэнь эрзянь отделенияв. Ды кода лиякс, эдь сон – тонавтыцянь семиясто. Авазо, Зоя Георгиевна, важодсь Баеньбуень школасо рузонь ды эрзянь кельтнень, литературань тонавтыцякс. Тонавтнесь сон Ицялонь педучилищасо, заочна прядызе М. Е. Евсевьев лемсэ МГПИ-нть, уш 18 иесэ кармась важодеме тонавтыцякс. Вишка Галя сеедьстэ яксесь мартонзо школав. Пек тукшнось мелезэнзэ аванзо тевесь. Зоя Георгиевна 30-де ламо иеть важодсь школасо. Сон ней уш арась ютксонок. Тонавтницянзо жо нейгак эйсэнзэ лембестэ ледстнить.

Ицялонь педучилищанть истя жо прядызь аванзо ёндо Галинань патязо ды лелязо. Таисия Георгиевна ветясь география Рузаевкань райононь Красное Сельцо велесэ. Владимир Георгиевич важоди Баеньбуень школасо, сон – трудонь учитель. Галина Сергеевна сонськак вузонть прядомадо мейле колмо иеть ветясь эрзянь кель Баеньбуесэ. Мейле лиссь мирденень, кармась эрямо Саранскойсэ. Ды кода уш ледстинек, эрямозо сюлмавсь музеенть марто.

– Музеесь а нолды туемс важодеме ковгак лия таркав. Тесэ важодемась пек мельстуиця. Сакшныть ламо инжеть. Пек вечктяно вастомо эйкакшт. Сынь весе парсте кунсолыть, секе-тев кевкстнить теде-тонадо, бажить эрьва мезде содамс. Теде башка, ветятано научно-исследовательской, выставкань, тонавтомань тевть, пурнатано экспонатт, – ёвтни Галина Сергеевна.

Вейке лия ёнов а молиця экспонат тусь музеев сонгак. Те – ветькень (чувашонь) авань оршамопель. Кеменьшка иеде икеле двоюродной сазорозо лиссь мирденень Чувашияв. Тосо тенст казсть костюм. Баеньбуень эряза ломантне максызь сонзэ музеев, ней сон ванстови краеведениянь музеень запасниксэ.

Музейсэ апак лотксе молить экскурсият, лекцият, музеень урокт, конференцият, ков эряви анокстамс кортамо (доклад), эрьва кодат вастовомат. Башка тарка саить выставкатнес анокстамотне. Меельцесь, конань анокстызе Г. С. Самаркина ды сынст отделэсь, – «Музыка – поэзия души», конась алтавсь композиторонть Г. И. Сураевень-Королёвонь 100 иетненень. Истя жо сон анокстакшнынзе выставкатнень: «Дни тревог и мужества» (Чернобылень зыянонь 30 иетненень), «Народть лемса» (Г. Я. Меркушкинэнь 100 иетненень), «Песни мои – жизнь моя» (Россиянь ды Мордовиянь народной артистканть А. И. Куликовань юбилеентень), «Биографии Саранских улиц», «Династия учёных Ворониных» ды ламо лият.

Галина Сергеевна кирди сюлмавкст республикань СМИ-тнень марто. Музеень кулятнеде, выставкатнеде эрзянь кельсэ ёвтни телевидениясо ды радиопередачатнесэ. Ваныцятне пек вечксызь неть кулятнень. Мордовиянь содавикс ломантнеде статьянзо лиснить минек изданиятнесэ. Сынськак, музеень важодицятне, тейнить эрзянь ды мокшонь кельтнесэ видеот, путнить сынст Интернетс.

Эряви меремс, Г. С. Самаркина кеместэ важоди «Педагог 13.ру» Тонавтыцятнень профессиональной содамочист кастомань центранть марто. Эрзянь ды мокшонь тонавтыцятнень туртов ёвтни музеень эрявиксчиденть, таликадонзо эйкакштнень этнокультурной тонавтомасо-кастомасо. Нейгак, Эрзянь келень чиденть икеле, сон вастневсь тиринь келень тонавтыцятнень марто.

2019 иестэ Галина Сергеевна ульнесь Московсо, косо ютась «Интермузей» музейтнень раськеютконь фестиваль. Тосо сон ютавтсь «Чудесный мир мордовского фольклора» интерактивной занятия ды штердемань коряс мастер-класс.

Краеведениянь музейсэ сон свал ютавтни эйкакштнень туртов мастер-класст. Ламо мель яви сурестэ кодамонтень (эстензэяк пек вечкеви те тевесь). Сынь тонавтнить сурестэ тейнеме някат, сувенирт, налкшкеть. Гофрированной конёвсто цецят, шкатулкат ды лия эрьва мезть. Лишминень теемстэ ули мезе ёвтнемс: кода икеле сонзэ кирдицятне лововсть сюпав ломанекс, кода кезэрень шкане покштятне-бабатне ютавтсть Лишмень озкст.

Музейсэ свал тевть ды ламо важодема. Эрьва ие – «Ночь в музее», «Ночь искусств» вастовоматне. Тедеде ульнесь «Квартал Победы». Сынст отделэсь теекшнесь Ине Отечественной войнань темань коряс фотосалон, косо меревсь теемс фотографият военной оршамопельсэ.

Маень 21-це чистэ карми «Ночь в музее». Тагояк анокстазь покш программа. Ютавтови «Ожившие сюжеты» акция. Тей сыця инжетне кармить истямо жо оршамопельсэ, кода содавикс картинасо-артовкссо, ды теить эстест фотот. Нама, ютавтовить ламо лия паро тевть, мастер-класст.

Парсте важодеманзо кисэ Галина Самаркина казезь аволь весть. Мелят сонензэ максозель изобразительной искусствасо Степан Эрьзя лемсэ премиянь лауреатонь лемесь.

Галина Сергеевна пек вечки тантей ярсамопелень пидеме-панеме. Те вечкемась ды ёрокчись ютасть тензэ Клавдя бабанзо пельде. Сон эрясь мартост. Каштомсо панезь кшизэ тантейдеяк тантеель, кудось ды ушось пешкедильть ансяк паневть кшинь чинесэ. Сон пуштыль алт, паниль эрьва кодамо топо марто прякат. Ней эсь семиянзо – Борис мирдензэ ды Марина тейтерензэ – истя кавани те авась. Свал пани топо ды модамарь марто каймакт, прякат-пачалксеть, пидси салмат, манкань икра – эсенек, эрзянь ярсамопельтнень.

Музейсэ важодицятнень туртов ёвтатано седейшкавань лембе валт! Кеме шумбрачи тенк, валдо мельть-арсемат, паро тевть, кадык сакшныть тенк ламо инжеть, конат экскурсиядо мейле аштить вадря ёжосо!

     Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».