Понедельник, октября 18, 2021
Важное

Ютазь номерсэ минь пачтинек Орданьбуень Пиксяська веленть эрямодо. Субутасто эрзянь велесь тешкстасынзе 350 иензэ.  Течи содавттадызь Пиксяськасо эриця паро ломантнень марто.

Светлана Александровна Королёва сась тей 33 иеде икеле. сон чачсь Отяжбуень Сабанцелесэ. Школань прядомадо мейле тонавтнесь Н.П. Огарёв лемсэ МГУ-нь филологиянь факультетсэ. 1994 иестэ ушодсь важодеме Пиксяська велень вейксэ классонь школасо. Вете иеть ютасть, кода пекстызь школаст. Ульнесть весемезэ кемень эйкакшт. Ней вете тонавтницяст ды кавто тонавтыцятне ардтнить Низовкав. Важодема таркавтомо киньгак эзизь кадо. Колмо тонавтыцят ардтнить Чукалов.

– Сюкпря, Низовкасо вастымизь парсте. Тонавтыцятнень уш содылинек. Школань прявтось Ю.Г. Бедин эсенек тонавтницянок. Коллективесь вадря. Стакачить арасельть, эйкакштне превейть, кунсолыцят, пек вечкевсть. Пиксяськасо минек класстнэсэ сехте ламо ульнесть сисем ломанть. А тозо кода молинек – 13 ломанть. Классось марявсь покшокс. Тень кевкстьсак, тонань. Пек вечкан тонавтомо 5-це классонь эйкакштнень. Сынь эштё вишкинеть, мельспаросо аштить уроктнесэ, бажить ламонь содамо, кевкстнить эрьва мезде, кунсолыть. Тонавтомань учебникть улить эрьва кодат, программатнеяк сатыть. Анокстатано эйкакштнень олимпиадас. Тонавтницятне сайнить изнямонь таркат, – ёвтни Светлана Александровна.

Тонавтыцянть валонзо коряс, Пиксяськасо педколлективесь виевель. Прявтось парсте ветясь тевензэ. Секскак сынь эзть пеле молеме лия школав.

Низовкасояк эйкакштнеде ансяк 78. Усксить тей вете велестэ. Светлана Александровна вети эрзянь кель 5, 6, 7-це класстнэсэ. Недлязонзо эрзянь келесь ансяк вейке час. Мезе кенерят? Мезес тонавтови эйдесь? Икеле ульнесть кавто част. С.А. Королёва ризны тень кувалма. Келесь састыне ёми. Эрзянь велесэ эйкакштне кортыть рузонь кельсэ. Низовкасояк, Пиксяськасояк ламо семиятнесэ кортыть эйкакшост марто рузкс. Те мень истямо шка сась? Мекс истя тейнить? Чумось тетятнень-аватнень.

Юткошкасто Светлана Александровна човалясто викшни картинат. Ламо мель яви тенень тельня. Пек тукшны мелезэнзэ викшнемс пертьпельксэнь мазычи. Ожоковсто саезь чадыковс якси ялго скандинавиянь палка марто. Эрьва чи колмо вайгельпеть. Кизна ардтни велосипедсэ.

Пиксяськасо эриця сехте сыре ломанесь – Мария Тимофеевна Королёва. Сонензэ 96 иеть. Те С.А. Королёвань ававтозо. Сон 45 иеть важодсь начальной классонь тонавтыцякс. Чачомань коряс Отяжбуень Пилезелестэ. Нейгак ломантне паро валсо кортыть эйстэнзэ ды ёвтыть сюкпрянь валт.

– Зяро кедьганзо эйкакшт ютасть, сон кидеяк зярдояк а кортыль беряньстэ. Весенень вейкетьстэ явсь мель. Киньгак эзь кепеде верев, киньгак эзь сялдо ды покорда. Беряньстэ тонавтницят сонзэ арасельть. Минь кото иеть вейсэ эринек. Кода ансяк карминь тонавтомо – сон ламосо лездась, макссь превс путомат. Тейтерезэяк тонавтыця. Сон эри Англиясо. Нуцьказояк, монь тейтерем Мария Юрьевна, кочкизе тонавтыцянь тевенть. Важоди Саранскоень 24 № школасо завучекс ды англань келень тонавтыцякс, – ёвтни С.А. Королёва.

– Моньгак тонавтсь! Сон пек вадряль, зярдояк а сёвныль. Кавто класст тонавтнинек, вейке рядсонть васенце классось, вакссонзо нилеце классось озадольть. Сон цидярдсь кавто класс марто! Ней натой а саеви превс, кода истя сон маштсь. Класстнэ покшольть. Чевте седей. Нейгак минь, тонавтницянзо, ледстнетяно уроконзо, – поладызе кортамонок Пиксяська велень библиотекаресь Нина Яковлевна Карпушкина.

Антонина Николаевна Глухова важоди велень фельдшерэкс. Те таркантень сонзэ ладизь тедеде, даволковсто. Сон умок уш прядызе Орданьбуень медицинань училищанть. Ней дистанционна ютась переподготовка. Нама, васенце шкастонть стакаль тензэ. Мелявтсь. Састыне тонадсь тевентень. Велень эрицятнестэ ламо сыре ломанть, сэредицят. Эрьва чи тей сакшныть кеменьшка ломанть. Ламотнень давленият ды лия ормат. Надобият тесэ улить. Фельдшерэсь яки кудоваяк. Весень ютасынзе, кие пшкади лезкс мельга. Кинень уколт эрявить путнемс, кинь марто кортамс.

Ней моли коронавирусто прививкань путомась. Зярдо ульнинек Пиксяськасо, прививкат путсть 33 ломантненень. Учость эштё вакцина. Путовтыть весе – сыренек-однэк.

Школав тедеде молить ниле эйкакшт. Сынст марто эряви ютамс медосмотра.

Медпунктсо лембе валсо ледстизь икелень медсестранть Мария Степановна Нуштайкинань. Те таркасонть сон роботась 40 иеть. Ней кудосо, оймси. Ды ялатеке ломантне пшкалить тензэ. Сон малав зярдояк а маняви диагнозонь путомсто.

«Важодемам вечкеви, лездамс ломантненень – покш тев. Ули кинь лангс ваномс, саемс пример. Те, нама, М.С. Нуштайкинань пельде», – мерсь А.Н. Глухова.

Весе эрицятне пек ризныть велест кувалма. Сон чами, важодема таркат арасть. Паряк, сы шка ды государствась варшты велетнень лангс?

Веленть историядо

Пиксяськась теевсь 1671 иестэ. Тезэ сась эрямо Пиксай цёрась семиянзо марто. Ульнесть 20 кудот ды 105 эрицят. Ней тесэ 5 курот ды малав 300 эрицят.

Ине Отечественной войнав тусть 184 ломанть. Мекев велявтсть кудов ансяк 37. Ней вейкеяк эзь кадово.

Пиксяськасо церьковась стявтозель 1859 иестэ. Шкань ютазь палсь. Одс стявтозель 1895 иестэ. 1903 иестэ саезь лемдеви Казанень Пазонь авань церьковакс. Ней тесэ комсь иень перть служи Гурий игуменэсь.

 

Содавикс ломанть

Г.А. Громов, важоди Саранскойсэ «МордовАгроМаш» АО-нь прявтокс. Ламо лезды велентень. Саемга, лездась келейгавтомс калмолангонть, теемс пирявкс, рамамс церьковав крёст. Лездась велева ведень ветямсто, проектэнь анокстамсто. Пиксяськасо уш кемень иеть ветязь ведь, сон маштови симемс ды муськемс.

В.И. Давыдкин, хирург, медицинань наукань кандидат, важоди Саранскоень 4 № ошонь больницясо, МР-нь заслуженной врач.

Н.Г. Карпушкин, эри ды важоди Московсо банксо, сонгак лезды велентень.

Анатолий Нуштайкин, Эрзянь ды мокшонь национальной драматической театрань актёр.

М.Е. Дементьева, сон частушкань-моронь ладсиця. Соды легендат, свадьбань койть, одирьвань урнемат ды ламо лия койть-кирдат. Иензэ 80-де ламо.

 

Койть-кирдат

Пиксяськань содавикс коесь – Инечинь вестэ Катя пандопрясто нолдтнить кирвазтезь чарыть. Эйкакштне пурнасызь велева ташто чарытнень, покштне лездыть тенст тракторсо ускомс пандо пряв. Теить тарадонь шалаш. Кирвазтьсызь сонзэ ды чарытнень марто нолдасызь пандо алов. Ней уш эйкакшткак эзть кадово, пурнамс а кинень.

Мекс лемдеви Катя пандокс? Орожиицясь З.Н. Лисина ёвтнекшнесь истямо легенда: од тейтертне сыргасть Дюрькинав – пандось икелест явовсь кавтов, ды Катя тейтересь прась тов.

 

Анокстызе

Татьяна Маторкина

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».