Вторник, сентября 29, 2020
Важное

Малав кемень иеть Саранскоень эйкакшонь 1№ музыкальной школасо важоди этнокультурной центра. Сонзэ юрсо – «Разноцветная палитра» коллективесь.

Музыкальной школасонть тонавтнить кемготово эрьва кодамо раськень эйкакшт. Пурнамс истямо курыне ёвтасть мель сынсь эйкакштне. Сыненст вечкевсь кунсоломс лия раськень морот, ёвкст, ёвтнемат, теевемс содавиксэкс киштематнень марто. Этноцентранть панжомга изнязель грант. Ды тевесь ушодовсь. Этнокультурной центранть ды «Разноцветная палитра» коллективенть вети Светлана Васильевна МАЛЬКОВА. Сон те школасонть важоди теоретической дисциплинань тонавтыцякс.

– А лововияк, зяро ютавтынек концертт, вастовомат ды кенярксчить. Паро коекс теевсь ютавтнемс концерттнэнь эрьва кодамо кельсэ. Кода моросонть видестэ ёвтамс валтнэнь, кодамо эряви оршамопель – теде минь кевкстнинек келень содыцятнень, конат сакшность тенек репетицияв ды макссть лезэв превс путомат. Ояксчинь сюлмавкст кемекставсть минек республикасо украинань, евреень, татаронь, армянонь, азербайджанонь автономиятнень марто, – ёвтни Светлана Васильевна.

Эйкакштне кармасть невтнеме пряст эрьва кодамо пелькстамосо. Сынь якасть весероссиянь ды раськеютконь конкурстнэс, косто сакшность изнямонь тарка марто. Тонавтницятне ульнесть Чебоксары, Новосибирск оштнесэ, Хакасиясо, Якутиясо ды ламо лия таркатнесэ.
Мезесь кецявты, тей сакшныть аволь ансяк 1 № музыкальной школасо тонавтницятне, истя жо дополнительной образованиянь лия таркасто эйкакштне. Саемга, Ромодановской районсто сакшныть армянонь раськень эйкакштне, ардтнить Рузаевкань районсто. Тесэ весень вастыть мельспаросо. Вельмевтить раськень налксематнень, кезэрень койтнень-кирдатнень, тейнить видеоважодемат, конат путозь «Мордовия музыкальная» сайтсэ. Вейкеденть ули меленек ёвтнемс седе домкасто.
«Жемчужина в богатом ожерелье эрзянского фольклора» фильмась алтави сказительницантень С.М.Люлякинанень. Минь арсинек, Светлана Васильевна ульнесь содавиксэкс сонзэ марто. Те аволь истя. Сынь эзть сода вейкест-вейкест. Фильмась – тонавтыцянть ды тонавтницянзо исследовательской покш тев.

– Вейке тонавтницям неизе Люлякинань фотографиянзо ды кевкстсь, кие те. Мон ёвтнинь. Сон мерсь, пек моли бабанзо ёнов. Кудосо тейтернесь ёвтнесь фотодонть. Бабазо кунсолызе ды мерсь, эйдензэ ваномсто свал морыль Люлякинань лавсень морот. Те шкастонть саезь Маша кармась явомо мель Серафима Марковнань творчествантень. Минь а содылинек, мейстэ ушодомс. Мейле ёвтасть тенек, А.И.Полежаевень музейсэ ули пелькс, кона алтави С.М.Люлякинанень. Тосо ванстовить сонзэ концертэнь костюмозо, моронзо, стихензэ марто кедьсэ сёрмадозь тетрадензэ ды – дневникезэ! Теде башка, тосо ули истямо сюпавчи – Анисия Ефимовна бабанзо пельде сёрмадозь морот! Ансяк вана а содатано, кодамо лувсо моравить сынь. Теде мейле карминек вешнеме видеоматериалт. Люлякина ламо морсесь концертсэ, фестивальтнесэ. Эсенек кинофондсо муинек аламо материалт. Карминек содамо, Казанень киностудиясь нолдась «На Волге широкой» киножурнал. Сыргинек Казанень киностудиянь архивев. Ды, алкукс, муинек Люлякинань марто лентатнень. Сыненст эрявсь теемс оцифровка. Расписка вельде максызь. Вете покш бобинатнень ускинь Саранскоев. Лездась тенек «Мордовия» ГТРК-нь прявтось Н.Грановская. Сюкпря тензэ. Пурнынек ламо кадрат. Мейле теевинек содавиксэкс сетнень марто, кить парсте содылизь Марковнань. Саемга, Покш Игнатбуестэ Р.Д.Жегалина. Сонгак тенек лездась ды мерсь сюлмавомс Люлякинань тейтерензэ марто. Зинаида Максимовна тейтерезэ натой сакшнось миненек школав С.М.Люлякинань 95 иетнень тешкстамо. Минь ютавтынек покш концерт, невтинек видеотнень. Уш седе тов арсинек фильма.

2017 иень медьковонь 29-це чистэ 95 иень юбилеенть тешкстынек Самара ёнкссо, Похвистневской райононь Нижнеягодное велесэ, ков Люлякина сась эрямо семиянзо марто войнадо мейле. Ардтнинек мон ды кавто тонавтницян: Маша Загороднова ды Алина Гусенкова. Тосонь Культурань кудосо ютась концерт, ды минь невтинек фильманть. Васняяк ёвтаса, залось пешксель, кинень эзь сато тарка, аштесть стядо. Ламот содызь эсь пряст фильмасонть, косо сынь эштё эйкакшт эли од ломанть. Сакшность Марковнань тейтерензэ Зинаида, Елена ды Тамара. Фильмасонть ули тетясткак. Те ульнесь истямо кеняркс! Ломантнень эзть кирдеве сельведест. Вастовомась лиссь лембе, виев, паро ёжонь казиця. Тов якась Р.Д.Жегалина, Ульяновск ёнкссто сакшнось Александр Бурлаков, кона истя жо содылизе Люлякинань ды эрясь кедьсэнзэ. Ней те фильмась ули Интернетсэ, кинь ули мелезэ, ванынк. Тосо Люлякина ёвтни эсь прядонзо, моры, лайши…

– Светлана Васильевна, ёвтнеде тенек школадонк.
– Мелят Саранскоень музыкальной 1 № школась тешкстызе 80 иень юбилеензэ. Минек республикасо сон ушодызе эйкакшонь музыкальной образованиянть. Ине Отечественной войнань иетнестэ сонзэ прявтокс важодсь З.В.Киушкина (весемезэ 40 иеть важодсь). Сон ванстызе коллективенть, покшолгавтызе, эрьва ие тей пурнасть тонавтницят. Войнань иетнестэяк школась важодсь ды ютавтсь концертт. Школанть историязо сюпав. Васенце прядыцянзо тонавтнесть консерваториясо, теевсть содавикс профессорокс. Минек ули паро кой – школанок прядыцятнень эйстэ ламотне сыть тей важодеме, весе эрямост сюлмасызь школанть марто. Те зданиясонть пек паро акустикась. Весе маряви микрофонтомо натой меельце рядтнэсэяк. Секскак тесэ ютавтовить эрьва кодат пелькстамот. Ней школасонть тонавтнить малав 500 эйкакшт. Педагогтнень ютксто пеледест ламо прядызь теке школанть. Минь аштетяно каштанчисэ тень кувалма. Кецявты, ули сюпав инструментариенек. Ушодынек тонавтомо ударной ды медно-духовой инструменттнэнь коряс. Ламонень вечкеви гитарань коряс тонавтнемась. Панжинек академической ды эстрадной морамонь коряс отделеният. Юбилеень иентень эйкакштне ёвтасть мель ютавтомс 80 концертт. Ды ютавтынек! Ардтнинек республикань келес.
Тешкстаса, чачсть вадря проектт. Школань прядыцянок И.В.Конева ней важоди начальной классонь тонавтыцякс 12 № гимназиясо. Сон ёвтась мель максомс тонавтницянзо туртов эстетической воспитания. Весе классонзо ветизе минек музыкальной школав. Сонзэ лангс ванозь, истя жо тейсь лия тонавтыцяст. Ды вана пурнынек кавто класст.
Эштё вейке паро ушодксось – «Культура моего народа» регионъютконь пелькстамось, конань музыкальной школась ютавты кавто иес весть. Сонзэ вельде невтеви раськень творчествась. Эсь ёрокчист, виест ды превест невтить музыкальной, художественной, искусствань школань тонавтницятне. Сынст туртов улить ламо эрьва кодамо номинацият. Кие моры, кие арты, кие кишти, кие теи видеоважодемат… Саемга, «Сырнень кедть» номинациясонть эйкакштне ёвтнить тонавтыцятнеде. Ёвтнить артыцятнеде, скульптортнэде, викшницятнеде ды седе тов. Пелькстамось лия ёнов а молиця, тосо кавто жюрить: профессиональной ды эйкакшонь. Эйкакштне сёрмадыть мельть-арсемат, путыть баллт. Пелькстыцятнень туртов кавто наградат.

– Светлана Васильевна, ёвтнеде музыкальной школань прядыцятнеде, сетнеде, кинень тынь максыде сёлминеть…
– Минь бажатано максомс эстетической воспитания. Чарькодеви, аволь весе кочкить профессиональной музыкальной образования (нама, улить истяткак). Весе, кить прядызь школанок – творческой ломанть. Тешкставлинь Катя Доставаловань, Наташа Бибинань. Миненек пек мельспаро, школань прядыцятне эрить мартонок покш ояксчисэ. Сакшныть свал. Мария Стуклова тонавтницянок кочкизе этномузыкологиянть, прядсь Казанень консерватория, ней тосо тонавтни магистратурасо. Важоди Казаньсэ музыкальной школасо, пурнась эсензэ коллектив, кепеди раськень культуранть. Минь пек кецятано сонзэ кис. Алина Гусенкова тонавтни Саранскоень Л.П.Кирюков лемсэ музыкальной училищань 3-це курссо. Сонгак бажи седе тов тонавтнемс этномузыкологиянь коряс.
Светлана Васильевна пачтясь, Этноцентрась кеместэ важоди А.И.Полежаев лемсэ музеенть, Республикань эйкакшонь библиотеканть, А.С.Пушкин лемсэ библиотеканть, В.Ромашкин лемсэ «Торама» ансамблянть марто. Коллективесь лезды тенст, максы превс путомат.
Эйкакштне тесэ сынсь варчить виест музыкальной инструментэнь теемасо: тейнить нудейть. Теде башка, сынсь стыть ды викшнить оршамопельть. Светлана Васильевна невтсь пулай, сюлгамо, конань теизь тейтернетнень марто. Сон ризны, ней а муят ломань, кона бу тонавтоволь одтнэнь эрзянь оршамопелень стамо-викшнеме, превень максомо. Улить татаронь, армянонь раськень оршамост. Сынст натой а косо ванстомс. С.В.Мальковань покш мелезэ пурнамс эрзянь ды мокшонь кезэрень ули-парот. Сон пшкади ловныцятненень ды весенень лезкс мельга. Паряк, киньгак улить велесэ пряхат, кодамонь стан ды лия мезть. Сынст туртов сынь пек эрявить!

Сонсь Светлана Васильевна чачсь Германиясо. Эрямонзо сюлмизе Мордовиянть марто. Тесэ лиссь мирденень. Прядызе Л.П.Кирюков лемсэ музыкальной училищанть. Тонавтнесь М.Е.Евсевьев лемсэ МГПИ-нь музыкальной факультетсэ (сон сестэ ансяк панжовсь). Тонавтсть эйсэст Гнесинкань выпускниктне. Мейле С.В.Малькова ютась стажировка Гнесинкасо. Малав ниленьгемень иеть важоди 1 № музыкальной школасо ды тонавты музыкальной училищасо.

Татьяна МАТОРКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».