Тедеде эрзянь ды мокшонь кельтнень весероссиянь чинть тешкстызь васенцеде Пензань областень Кузнецк ошсо. Семиянек ловномань библиотекантень пурнавкшность ломанть, конат мель явить эрзянь ды мокшонь кельтненень, культурантень ды койтненень-кирдатненень.
Вастовомантень пурнавозтненень поздоровонь вал марто пшкадсть Кузнецк ошонь прявтось С.И. Лаптев, эрзянь ды мокшонь раськетнень культурной автономиянь председателесь Н.А. Пинясов. Видеопшкадемасонть эрзянь ды мокшонь кельсэ поздоровт пурнавозтненень ёвтасть Пензань областень региононь эрзянь ды мокшонь национально-культурной автономиянь од ломанень отделениянтень совицятне В. Бодина ды Е. Борискина.
Вастовоманть шкасто ловность тиринь кельсэ стихть, эрзянь-мокшонь автортнэнь ёвкст. Ютавтсть эрзянь ды мокшонь валмеревкстнэнь рузонь кельс. Николай Семёнович Незванов ловнось тиринь кельсэ сёрмадозь стихотворениянзо. Тамара Андреевна Тултаева тиринь эрзянь кельсэ морызе «Любэ» группань «Конь» моронть.
Меельцекс Николай Алексеевич Пинясов весе эрзятнень ды мокшотнень тердинзе вечкемс тиринь келенть, кортамс эйсэнзэ ды ванстомс сонзэ.