Неть читнестэ Л.П. Кирюков лемсэ Саранскоень музыкальной училищасо ютавтовсь МР-нь Культурань, раськень политикань ды архивень тевень министерствань коллегиянь келейгавтозь промкс. Вастовомась пурназель училищань концертной покш залсонть санитарно-эпидемиологиянь весе вешематнень кирдезь.
Музыкальной училищань фойесэнть невтевсь архивень документэнь ды фотографиянь выставка. Сон алтавсь республикань содавикс ломантненень, конат тейсть покш путовкс культурань ды искусствань виевгавтомантень. Тесэ жо ульнесть Ф.В. Сычков лемсэ Саранскоень художественной училищань студенттнэнь важодевксэст.
Коллегиянтень тердезельть культурань ды образованиянь государственной учреждениятнень, муниципальной районтнэнь культурань управлениятнень прявттнэ, районтнэнь культурань кудотнень ды библиотекатнень прявттнэ, «Культура» национальной проектэнть тевс нолдамонзо коряс важодицятне, аволь коммерческой организациятнень прявттнэ.
Пленарной промксонть панжизе МР-нь Культурань, раськень политикань ды архивень тевень министрань тевтнень топавтыцясь С.Н. Баулина. Сон пачтясь 2020 иенть перть топавтозь тевтнеде ды кемекстась аравтлув 2021 иентень ды касомань-виевгавтомань ёнкстнэде 2025 иенть самс.
Светлана Никитовна ламо кортась республикасонть «Культура» национальной проектэнть тевс нолдамодо. Сон тешкстызе, 2021 иестэ проектэнть юрсо республикантень явовить 380 миллиондо ламо целковойть. Неть ярмактнень лангс арсеви стявтомс кавто культурань кудот республикань кавто районтнэнь велетнесэ. Теде башка, тедеде арсеви прядомс витнемань тевтнень Рузаевкань А.В. Ухтомский лемсэ Культурань кудосонть. Тесэ карми неень шкань куншкакуро, конань юрс совавтовить культурань зярыя учрежденият.
Истя жо Светлана Баулина тешкстызе, неень шкане витнема-вадрялгавтома учить республикань 69 культурань кудот, конатнестэ 16 арсеви одкстомтомс 2024 иенть самс.
Кортавсь эйкакшонь искусствань школатнедеяк. Течинь чине республикасонть истятнэде лововить 62, конатнесэ тонавтнить 11 тёжадо ламо эйкакшт. Истя, 2021–24 иетнестэ арсеви вадрясто витнемс эйкакшонь искусствань школатнень, кавксотнес рамамс эрявикс инструментт.
Промксонть лувсо С.Н. Баулина токизе кадратнень коряс кевкстемантькак. Весемезэ отраслясонть важодить 4361 ломань ды ансяк 9 % – 30 иес од ломанть.
– Эряви теемс истя, штобу культурань сфератнес савольть важодеме од, ёроков ды превей ломанть. Тень коряс эряви важодемс ды анокстамс кадратнень. Тень туртов тевс нолдави «Школа кадрового резерва» проектэсь. Чадыковсто карматано пурнамо васень тонавтницятнень, – тешкстызе Светлана Никитовна.
Истя жо ванновсь виртуальной концертной залтнэнь коряс кевкстемась. Течинь чине истят важодить ансяк кавто – Ковылкинасо ды Саранскоень Л.П. Кирюков лемсэ музыкальной училищасонть. Тедеде истямо зал арсеви панжомс Рузаевкасо. 2024 иенть самс жо виртуальной концертной залт панжома республикань эрьва ошсонть.
Кортавсь грантонь проекттнэсэ культурань учреждениятнень участиядояк. Те ёнксонтень явома седе покш мель. Башка мель явовсь республикань библиотекань системань важодемантень.
Седе тов министрань тевтнень топавтыцясь пачтясь юбилеень сеть мероприятиятнеде, конат арсевить 2021 иестэ. Сынст ютксо: «Шумбрат, Мордовия!» 25-це фестивалесь, «Равось – ояксчинь лей» этнокультурной 20-це экспедициясь, тешкставить Сурань рубежень теемань ушодовомань 80 иетне ды лиятне.
Теде мейле эсь важодемань тевдест пурнавозтненень пачтясть Сыре Теризморгань Раськень культурань центрань ветицясь С.А. Видясова, А.С. Пушкин лемсэ раськень библиотекань прявтось А.В. Бакулина, С.Д. Эрьзя лемсэ изобразительной искусствань музеень прявтось Л.Н. Нарбекова, Покш Березникень райононь Парынзэлень «Коень-кирдань кудо» музеень-культурань центрань прявтось Е.Е. Ледяйкин.
Коллегиянь келейгавтозь промкссонть ульнесь МР-нь Правительствань Председателень полавтыцянь тевтнень топавтыцясь Г.А. Лотванова. Пурнавозтненень пшкадемстэ сон тешкстызе, эряви тешкстамс аравтлув кода карми важодеме отраслясь ды культурань объекттнэ маласо вете иетнень перть. Вейке иес ней кияк а арсекшни.
– Курок ие, кода минь ветятано бороцямо коронавирусонь кезовонть каршо. Ломантне весе сизесть тень эйстэ. Миненек эряви ванстомс эсь прянть, ванстомс эсь коллективтнень. Теньсэ ули вейке ки – вакцинациясь. Эряви путомс ливкс ды ушодомс важодеме весе вийсэ, – мерсь Галина Алексеевна.
Г.А. Лотванова истя жо тешкстась, меельце иетнень перть культурань объекттнэнь витнеманть-тееманть лангс ютавтозь пек ламо ярмакт.
– Видестэ теинек эли аволь? Ярмактне ютавтозь ламо, культурань учреждениятнень важодемасо жо арась системность. Зярдо сынь кармить важодеме кода эряви? Зярдо карми результат? Маласо кемень иетнес миненек эряви содамс, кода карматано важодеме? Ков ютавтомо ярмактнень? Ды, прявт тевесь, кинь туртов важодеме? Стяко ярмаконь ютавтомо кияк а карми, – кемекстызе Галина Лотванова.
Меельцекс Галина Алексеевна тешкстызе, те недлясто весе залтнэ панжовить ломантнень туртов.
Седе тов коллегиянть важодемазо поладовсь секциятнесэ.
Юлия Еремина