Ютазь иенть прядовомсто аволь весть савсь улемс Покш Березникень муниципальной райононь Парынзэлесэ. Неть вастовоматне, конат сюлмавозь «Од веле» велетнень кастомань-виевгавтомань Мордовиянь общественной вейсэндявксонь «Моё село: от культурных традиций к гражданским инициативам» проектэнть марто, лездасть теевемс содавиксэкс те велесэнть важодиця кедьчелькев ломантнень марто.

Вейкесь эйстэст – Дубенкабуень Поводелень эрицясь Дмитрий Василькин. Сон важоди Парынзэлень «Парго» ремеслань центрасо. Од цёрантень колоньгемень иеть, машты эрьва мезень тееме, кода эсенек, истя омбо масторонь оборудованиянть вельде.
Васенце кевкстеманок од цёрантень ульнесь нурькинестэ ёвтнемс эсензэ ланга.

– Чачинь-касынь эсенек республикасо, Поводеле эрзянь велесэ, – ушодсь ёвтнеме Дмитрий Василькин. – Вишка пингстэ вечкилинь тетянь вакссо аштеме, зярдо кедьсэнзэ ульнесть чувтосто керсемань эрьва кодат кедьёнкст. Сон маштсь тееме чувто ланга эрьва кодат артовкст-керсевкст. Эштё сестэ сон тень кортыль: «Тонавтнек, цёрынем, мазычинь тееме, те пек маштови эрямосот». Виде, сестэ эштё эзинь чарькоде неть превс путоматнень лезэвчист. А вана ней, зярдо сон умок уш тусь эрямосто, свал ледстнян паро валтнэнь, превс путоматнень.

Седе тов Дмитрий Василькин пачтясь, кода омбоце пель иеде икеле теевсь содавиксэкс «Од веле» общественной куронь прявтонть Евгений Ледяйкин марто. Неть кавто эрзянь цёратне, кода кортави валмеревкссэнть, «вешкасто ульнесть вейке таркасо». Нать, эрявсь Пазонтень сынст теемс содавиксэкс ды икелепелев вейсэ важодемс кезэрень ремеслатнень вельмевтемань тевсэнть.

Апак учонь вастовомасонть васенцекс пшкадсь Евгений Евгеньевич. Эрзякс кортамонть марязь, сон мерсь: «Тон, эрзянь цёрась, Дубенка ёнксонь, истя тень марявсь кортавксот коряс?»
Вейке-вейке марто содавиксэкс теевемстэ Евгений Ледяйкин тердизе од цёранть варчамс виензэ Парынзэлень Василий Лакеев лемсэ «Парго» ремеслань центрасо.
Дмитрий Василькин невтизе ёрокчинзэ васень шкастонть. Цёрась а капшиця, тевензэ педе-пев прядыця.

Тиринь кудоськак ков седе маласо Саранскоенть коряс. Оймсема читнестэ сон тевтеме а ашти. Умок тейни эрьва кодамо кудоютконь ули-парот. Васня ушодсь эстензэ столень ды стулонь лаксеме, мейле шабратне-малавикстнэ кармасть тензэ пшкалеме.
Истя аламонь-аламонь сон тонадсь чувтосто седе покш ды паро ули-паронь тееме. Кой-конатне натой тунь а явовить лавкатнесэ микшневицятнень эйстэ. Лиятне мик седе парт.

Од цёрантень ёрокчись ютась кавто ёндо, аволь ансяк тетянзо Николай Петровичень пельде. Истя жо парсте машты кодамо-викшнеме авазо, Антонина Петровна. Сонзэ кедьсэ мазылгавтозь викшневкстнэ-кодавкстнэ кенярдовтыть аволь ансяк сынст семиянть, истя жо весе малавикстнэнь, ялгатнень, конатненень свал эйсэст кази.

Тешкстасынек, те эрзянь авась пингень перть тевтеме а ашти. Од порасто мирдензэ Николай Петрович марто Поводелесэ путсть паро кудо, мейле перьканзо кастсть покш сад-пире. Трясть кавто паро эйкакшт. Аволь ансяк Дима цёраст эрьва мезень тееме тонавтызь, истя жо Марина тейтересткак машты викшнеме-кодамо ды тантей тортонь панеме. Марина Николаевна профессиянь коряс кондитер. Мирденень лисемадо мейле кармась эрямо Дубенкабуень Кочкур велесэ. Эштё вишка пингстэ ламонь тееме тонадсь аванзо Антонина Петровнань пельде. Вана истя ёрокчись юты покштятнень-бабатнень, тетятнень-аватнень эйстэ. Эдь зярдо-бути Антонина Петровнаяк тонадсь цюлкань ды варьгань кодамо аванзо Татьяна Ивановна Суродеевань пельде. Эрзянь аватне икеле эрьва ков кенерильть.

Кода пачтясь тенек Антонина Петровна, кие ламо иень перть важодсь тиринь колхозсо, аволь ансяк эсест ёнкссо кенерильть якстерькаень мотыжамо, истя жо Отяжелевгак пачколесть. Теде башка, кардаз потмо ракшат свал трясть ды кодамо-стамо шкаяк мукшность. Тень эйстэ сехте питнеесь – сынь тонавтсть весементень, мезес маштсть, эйкакшост ды нуцькаст. Самай истят ломантне ванстыть кезэрень койтнень-кирдатнень.

Эрзянь цёрась Евгений Ледяйкин неть паро койтнень ушодсь вельмевтеме. Сон кармась пурнамо перьканзо Покш Березникень райононь ды весе республикань кедьчелькев ломантнень, кить кармить тонавтомо одтнэнь минек покштятнень-бабатнень сюпавчитнес.

Валентина ЮДИНА