Ютазь иестэ топодевельть бу 100 иеть Ине Отечественной войнань участникентень, республикасонок содавикс фотожурналистэнтень ды художникентень Иван Андреевич Бояркиннэнь.
Ледстясынек, сон ламо иень перть важодсь фотокорреспондентэкс «Эрзянь правда» ды «Советская Мордовия» газетатнесэ. Покш путовксозо 70-це иетнестэ тиринь газетанть историянзо ванстомасо ды республикань эрямонть невтемасо.
Те ломанесь ламо тейсь эсензэ раськень ундокстнэнь сы поколениянтень кадомга, эйстэдест домкасто ёвтнемга. Иван Андреевич парсте сёрмадынзе эсензэ ды тетянзо Андрей Афанасьевичень эрямо кист. Теде башка, сонзэ бажамонзо вельде пурназель сюпав фотоархив, косо домкасто невтеви се шкань эрямось: паро полавтоматне велень хозяйствасо, промышленностьсэ, культурасо.
И.А. Бояркинэнь тетязо, Андрей Афанасьевич, чачсь 1889 иень сундерьковсто Покш Березникень райононь Шугурова велесэ. Теке велесэнть прядсь колмо класст. Зярдо сонензэ топодсть кемголмово иеть, тетязо телень якшамо вестэ кельмесь… Авазо, Екатерина Васильевна, довакс кадовомадо мейле цидярдсь ламо стакачить, кувать сельведень валомадо мейле сокоргадсь. Андрей семиясо покшоль, ульнесть эштё кавто вишка сазоронзо. Теде башка, мартост эрясь Ненила бабаст. Неда бабань, кода мерсть тензэ велесэ, вечкилизь весе. Сон пек ламо содась, обуцянь коряс чевтель ды весенень бажась лездамс: маштсь ломанень лецямо, чачтовтомо. Нуцькатнень перька весе мелявкстнэнь саилинзе эсензэ лангс.
Сеть стака шкатнестэ кезэрень Шугурова велестэ сокицятне-видицятне целковой мельга тукшность важодеме Сибирев ды Рав леенть малав. Зярдо Андрейнень топодсть кеветее иеть, сон энялдсь аванзо икеле нолдамс сонзэ васов стака тевень топавтомо.
Андрей Бояркиннэнь савсь тонавтнемс ламо профессияс, ушодокшнось баржасто ведень пештицянь лездыцякс. Велень цёрынесь стака шкатнестэ эзь пеле туемс Мордовиянь томбалев ды ушодомс аволь ансяк эсензэ прянть трямо, истя жо лездамо малавиксэнзэ туртов.
Мольсь 1918 иесь. Сон сёрмадстызе прянзо доброволецэкс Якстере гвардияв, 24-це кшнинь (руз. железная) дивизиянть ютксо олякстомтсь белогвардеецтнэнь эйстэ Симбирскоенть, Екатеринбургонть, ульнесь виев тюрематнесэ Юденичень армиянть каршо. Гатчинасо революциянь шкастонть ванстсь Петроградонть.
Гражданской войнанть ушодовомсто ульнесь васенце активисттнэнь ютксо, кооперациянь прявтоль. Вейсэ посёлканть теемстэ вейсэндявсь васенце кемень активисттнэнь юткс. Кодамо ответственной тев ансяк эзь саво топавтомс те эрзянь цёрантень. Ве шкасто колхозонь прявтоль, важодсь Дубёнкань райисполкомонь аппаратсо (сестэ Шугуровась совавтозель те ёнксонтень), тосто ильтизь тонавтнеме Самарань комвузов. Теде мейле прядызе Саранскоень ВПСХШ-нть (те ульнесь васенце выпуск), важодсь парторгокс тиринь Шугурова велесэ, колмо иеть колхозонь прявтоль Тазина велесэ, 1936 иестэ саезь роботась Шугуровань средней школань прявтокс. Самай те шкастонть ульнесть школань васенце прядыцятне.
Войнадо икеле ламо эйкакшонь триця тетясь заочна прядызе Мордовской педагогической институтонть. Сон тонавтсь историянть, покш путовксозо од школатнень теемасо. Эдь се шкане эрьва велесэнть тёжадо ламо тонавтницят ульнесть, тонавтыцятнеде – ансяк ведьгемень. Андрей Афанасьевич ламо тейсь неть школатнесэ тонавтнемань пособиятнень, эрявикс оборудованиянть улеманзо коряс, библиотекатнень келейгавтомга.
Ине Отечественной войнанть ушодовомань васенце читнестэ сон саезель армияв, ковонь перть Саранскойсэ тонавтсь боецтнэнь. А.А. Бояркиннэнь 1055 стрелковой полконть марто савсь ванстомс ятонть эйстэ Московонть, ульнесь ротань прявтокс. 1941 иень ожоковонь сехте стака читнестэ масторонь ванстомсто сон маштовсь. Евдокия Дмитриевна низэ кадовсь ськамонзо ламо эйкакш марто, пингень перть важодсь колхозсо. Сон казезь «Материнская слава» васенце степенень орденсэ. Те эрзянь тейтерь-авась, кода ламо лия Вейсэ посёлкань доватнеяк, трясь-кастсь ськамонзо вейксэ эйкакшт. Сонсь ансяк содась, кодат стакачить ды вачошка прасть тензэ войнань иетнестэ.
Андрей Афанасьевичень малавикс ялгатнень ютксо ульнесть истят содавикс писательтне, кода: Василий Коломасов, Никул Эркай, Василий Радаев ды ламо лият, кить войнань прядовомадо мейлеяк эзизь стувто семиянзо.
Тешкстасынек, эсензэ ланга сёрмадовкстнэде Иван Андреевич кадсь аволь истя ламо, кода малавиксэнзэ коряс. Эйкакшпингедензэ ёвтнемстэ, конась ютась Покш Березник ёнксонь Вейсэ посёлкасо, сон пачтясь, кодамо эрямонь виев урок савсь тензэ цидярдомс. Кеветее иесэ а покш чумондомань кисэ сон сайсь мель оргодемс кудосто Оренбургонь ёнксов, косо чарькодизе эрьва целковоенть питнензэ. Мезе ансяк эзь саво тензэ теемс: ульнесь учётчикекс, плугарекс, трактористэкс ды мик ветеринарокс – конезаводсо. Ютась алкуксонь школа. Теде мейле кармась парсте тонавтнеме ды ансяк «ветес» прядызе 10-це классонть. Прась тензэ уцяска улемс студентэкс Ленинградонь фармацевтической институтсо. Лисевель бу эйстэнзэ паро провизор, ансяк апак учо ормалгадсь. Операциядо мейле савсь кадомс институтонть ды велявтомс одов Мордовияв. Кудов самодо мейле кармась тонавтыцякс Шугуровань средней школасо, вейсэ эйкакштнень марто тонадсь парсте артомо.
1939 иестэ саизь армияв ды куроксто понгсь фронтов… Ине Отечественной войнань васень читнестэ васня воёвась финнэнь границясо, мейле Калининской, 1-це Прибалтийской, 2-це Белорусской фронттнэсэ Краснознаменной артиллерийской 43-це полксонть. Ульнесь наводчикекс, радистэкс, топографистэкс. Войнанть прядызе Берлинсэ, «Якстере Теште» орден марто.
Теде мейле сон тонавтнесь В.И. Ленин лемсэ Московонь военно-политической училищасо, служась Грузиясо аэродромонь батальонсо, ульнесь клубонь прявтокс.
1957 иестэ, демобилизациядо мейле (тагояк стака орма куродокшнызе), сась тиринь ёнксов. Кажось ськамонзо а эрси, палсь кудост… Иван Андреевичнень савсь вешнемс важодема тарка Саранскойстэ, вешкасто ульнесь фотокорреспондентэкс ды художникекс-ретушёрокс «Эрзянь правдасо», истя жо лия газетатнесэ ды журналтнэсэ. Шкань ютазь шумбрачинзэ коряс савсь туемс эрямо Ялтав, косо поладызе вечкевикс тевензэ. «Массандра» виноградно-винодельческой ПО-со ульнесь фотографокс ды художникекс.
Теде мейле Ялтасо ульнесь пионерской лагерень, мейле «Жемчужный берег» пансионатонь прявтокс.
И.А. Бояркинэнь ламо артовксонзо, фотографиянзо, плакатонзо, карикатуранзо печатазь Ялтань, Киевень, Кишиневонь, Ленинградонь се шкань газетань ды журналонь лопатнесэ, сехте ламо жо Саранскойсэ. Ояксчинь артовкстнэнь (шаржатнень) марто книгазо лиссь тиринь Мордовиясо. Истят ломантне зярдояк а стувтовить, сынст важодевкстнэ свал кармавтыть ледстнеме паро тевдест.
Валентина Юдина