Суббота, сентября 26, 2020
Важное
 
Кемень иеть ютасть, кода 2010 иень июнень 15-це чистэ тусь эрямостонть авам – Ларькина Анастасия Фёдоровна – Симкина велень эрицясь ды школасо тонавтыцясь.
Мон а сёрмадан «кулось». Сон тусь… Ков – а содан, ды мекс-бути кувать а велявты кудов… Мон жо учан. Весе, мезе теян, теян истя, штобу авам шнавлимим, меревель тень «Чивалдынем, тякинем, сардынем»… Авань марто вейсэ мольтяно эрямо покш кинть ланга. Авань превтне, авань чевтесь максы тень вий ды уцяска.


Мекс сёрмадан авань ланга? Арсян, паро валсо ледстясызь сонзэ кулома чистэнзэ Симкинань эрицятне ды весе, кинь сон тонавтсь. Ниленьгемень иеть Симкинань школасонть ветясь «химия» ды «биология». Ульнесь пек виде ды валдо ломань. Минек, эсензэ колмо эйдензэ, тонавтсь: «Зярдояк верьга иля кандо прят. Эрьва ломанесь эсензэ коряс сехте паро. Ломанть эйстэть иляст аварде. Эсь кельстэ велявтыцясь – пек берянь ломань…. Куломозот эряк ломанькс»… Авань «философиясь» нурькинестэ ёвтави истя: ульть тонсь ломанекс, вакссот каст-кепедть паро ломанть. Паряк, те улияк «национальной» идеясь.
Авань эрямонь тонавтоманзо ланга сёрмадынь аволь пош ёвтнема.
Те ёвтнемась тонеть, авай.

ЛАУЖА КЕЛЬ

Омбоце «Б» классонть нилеце урокось ульнесь «математика». Карматано сёрмадомо контрольной робота иень прядоманть коряс. Тонавтыцясь Мария Фёдоровна переменань перть досканть лангс сёрмадсь примерт ды задачат. Мейле аламос лиссь оймензэ таргамо. Паряк, эйстэнек куломазо сась. Пси, остатка урок, минь а кунсолотано.
Звонок уроков арасель. Мон вальмава неинь: школань покш крыльцянть лангсо дежурной учителесь (течи ульнесь дежурноекс авам) кирди кедьсэнзэ баягине, штобу максомс уроков звонок. Сон ветясь покш классонь тонавтницятненень «химия» ды «биология». Мезе «биологиясь», мон содылия: тикшенеть, эрьва-кодат сукст, чеерть… Авань вейке книгасонть мик штапо ломанть ульнесть, мон визделгадынь ды книганть пекстыя. Паряк, миньгак истят тевть карматано тонавтомо – мейле а содан, кода доска икеле штапотнень ланга ёвтнемс? Кадык «кавто» путыть.
А химиясь уш а содан – мезе. Кувать ваннынь 8-це класстнэнь туртов книганть – мезеяк эзинь чарькоде. Зярдояк эряви авань кевкстемс химиядонть …

Арсинь истя ды эзинь чарькоде, мекс доскасто сёрмадовкстнэ ёмасть. Абунгадынь, кода неия, што досканть икеле Сергей – мартонок тонавтницясь – кишти ды юхаи поров нулынесэнть. Весе, мезе сёрмадсь Мария Фёдоровна, сон нартнинзе. Мейле озась тарказонзо. Ютамсто монь лавтов ланга вадяштымим: «Кенярдт, отличница, контрольной а ули». Сергей классонок сехте сэреель ды сехте мазыель. Тейтерькатне вансть лангозонзо кургонь автезь. Сон, паряк, арсесь: монь мельскак тукшны. Ансяк мон беряньстэ тонавтницятнень ды озоровицятнень пек а вечкелинь. Секс кенярдынь, зярдо Сергеень сэрензэ кувалт озавтызь остатка партас. Кадык тосо эсензэ «кавтотнень» кундси.
Те шкастонть совась Мария Фёдоровна. Монень марявсь, што сонзэ черензэ дубушки стятсть, зярдо неизе ванькс досканть. А буквине, а цифрыне – мезеяк прок эзь сёрмалияк. Ансяк кувалт ды трокс рудазов кикст. Тонавтыцясь якстерьгадсь. Вейс педявтынзе сельме чирькензэ ды кежейстэ турвань пачк тошкстась: «Кие нардтнизе?» – сонсь сурсо невтсь доскать ёнов.

Весе чатьмонсть. Мон аштинь тандадозь. Мези ней карме улеме? Мейле прязом сась, кода Мария Фёдоровна ёвтнесь тенек Павлик Морозовонь ланга. Те пионерэсь-героесь пек мелезэм тусь. Сон Советской властенть кисэ тетянзо ды покштянзо эзинзе жаля. Невтизе, козо неть верень потицятне кекшнизь сюрост. Мездеяк эзь пеле. Мон мезде пелян? Кепедия кедем, стинь ды састыне, прок вайгелем ёмась, меринь: «Сергей». Фамилиянть ёвтамс вием эзь сато.

Марявомо кармась, кода классканть ливтни карво. Весе нолдызь пряст. Эсь пачканзо эрьвась арсесь: «Ну, переменасто Сергей невти тонеть, кувака келеть аламодо нурькалгавтсы.

Те чистэнть контрольной арасель, учителесь сонзэ кадызе валскес…
Урокто мейле цопадия портфелем ды напустинь покш школанть ёнов. Крыльця лангсо авам якстере сюлмавксонзо марто ильтясь тонавтницятнень кудов. Сон чарькодсь, мезе-бути лиссь аволь вадря. Мон кекшинь сонзэ удалов. Кижнэзь чийсь Сергей ды лоткась авань икелев. «Анастасия Фёдоровна, – серьгедсь сон, – тынк Люся – ябеда». Мейле пельс авардезь ёвтнизе, мезе ульнесь классонть арифметикадонть икеле. Ёвтнесь ды яла монень невтнесь мокшнат ды сеересь: «Ябеда, ябеда, ябеда…».

Мон арсинь: авам шнасамам, эдь паро тев теинь. Эзинь пеле чавомадон, ёвтыя, кие нардызе доскасто контрольноенть. Авам монь лангс эзь варштаяк, сон Сергейнень мерсь сыргамс кудов, а монень коня алга ванозь мерсь: «Эзинь арсе, што тейтерем – лаужа кель».
Ламо иеть ютасть се маень чистэнть, авам кулось, ансяк мон содан: лаужа келесь – берянь ломань. Лиясто чатьмонемась седе вадря. Аволь весе ёвтазесь сырнень вал.


АВАНЬ ЛЕМБЕ

Бути зярдо апарось
Седеезэть кунды,
Иляк потмонь паломат
Киненьгак ёвтне.

Эли кияк чарькоди,
Мекс нурьги потмот?
Эли кияк арсесы,
Кодат неят онт?

Мекс чаминеть раужо
Кие берянь тейсь?
Ёвтнемс кинень-бути
Арсят: «Тете мейс?»

Ансяк чачонь кудосо
Муят лембе тол,
Ават тонь ванстомо
Верьгиде ёндолкс.

Неждят ёжинезэнзэ,
Марят паро валт.
Те чисэ жалятанзат
Тонь ансяк ават.


ЛАЙШЕМА

Авай, авай, авай!
Састь тонеть эйдеть.
Мекс пазава алов
Оймсеме мадить?

Мекс конить сельминеть?
Кургинеть пекстазь?
Кодаяк а кеман,
Што шкат тонь сась.
Чиить цела пинге,
Яла тейнить тевть.
А ней тон прок инже
Эйдеть икеле.

А пурнат тенст стольне,
Овсе а кецят.
Содан, аволь кольнят,
Секс а пеняцян.

Авай, кува якат,
Кодат ютат кить?
Мекс тон кадыть тякат?
Ды васов туить?


МЕЛЕМ МОЛЬСЬ…

Эх, оят, кемемизь:
Пек уш мольсь мелем,
Улевельть сёлминем –
Ливтявлинь велев.

Умок, оят, туинь
Велестэ ошов,
Ансяк эрьва тунда
Туевлинь кудов.

Тосо чокшне ланга
Цёковтне морыть,
Лёмзёр чувтнэ цецькасо
Ацыть каршом кинть.

Учи эйсэм кудось
Ды учи пиресь.
Ки сонзэ сокасы?
Путомс, чай, кенерсь?

Весе китне-янтнэ
Чиить монь пелев.
Курок кутмордасамизь –
Сайсамизь велев.



АВАНЬ ОЗНОМА

Кизэ, тундо, теле –
Монь седейсэ тол…
Паз Аванть икелев
Кирвазтян штатол.

Икелензэ пульзядо
Озномо карман:
Кадык эйдем туртов
А кучи варма.
Кадык эйднень-тиринень
Максы уцяска,
Ды сынст пингень кияванть
Сон ацы руця.

Кадык максы сёлмот,
А кучи ёндолт.
Кадык кист валдомты
Палыця штатолт.


РАЗГОВОР
С МАМОЙ

Повторяю снова, снова:
«Мама шутит так…
Ведь вернётся она скоро
И что смерть – пустяк!»

День проходит, месяц скачет,
В доме тишина.
Слова мне никто не скажет –
Я теперь одна!

Мама, мамочка, МАМУЛЯ!
Тяжело одной!
Не нужна такая воля –
Посиди со мной.

Посиди, и мы обсудим
Наши все дела,
Как живут в деревне люди,
Новости села…

Погрустим, что мои дети
Очень далеко,
Что трудны разлуки эти,
Что им нелегко…

И за стол мы сядем, мама,
И заварим чай…
Ты куда ушла так рано?
Ведь и здесь был рай.

Согласись, моя отрада,
Что-то здесь не так…
Не могла ты дочь оставить…
Правда, смерть – пустяк?

Людмила ЛАРЬКИНА (ПЯТАЙКИНА),
РФ-нь Просвещениянь отличникесь, Саратова Ош
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».