МР-нь Някань государственной театрасо школань тонавтницятнень туртов невтезель «Певец народной красоты» спектакля. Сон алтавсь МАССР-нь народной художникенть Федот Сычковонь 150 иетненень. Артыцянть ледстнемга те васенце истямо невтема. Инсценировкань авторось ды режиссёрось – МР-нь заслуженной артисткась Лилия Шахова.
Федот Васильевич Сычков чачсь 1870 иестэ Ковылкинской райононь Кочелаево велесэ. Семияст эрясь аволь сюпавсто. Ранаяк кадовсть тетявтомо. Цёрынесь прядсь эсест велесэ колмо классонь земской школа. Вишка шкасто саезь пек вечксь артомо. Школань тонавтыцясь П.Е. Дюмаев макссь превть артомань тевсэнть. Сычков артсь велень эрицятнень портретэст, сёрмадсь живопись ды пазават.
И.А. Арапов генералонть вешеманзо коряс артсь «Закладка станции Арапово» картина. Тона невтизе Петербургонь Рисовальной школасо. 1892 иестэ Сычков тусь эрямо Петербургов, кармась тонавтнеме Рисовальной школасо. Ламо лездась тензэ Арапов генералось. Мейле сон тонавтнесь Художествань академиянть юрсо Высшей художественной училищасо.
Нинзэ Лидия Васильевнань марто эрясть Петербургсо. Ардтнесть Европав, тосто артыцясь усксь ламо пейзажт. Сонзэ важодеманзо невтевсть минек ды омбо масторонь покш выставкатнесэ. 1917 иестэ, революциянь шкане, сонзэ мастерскоензэ Петербургсо салызь. Ламо важодеманзо ёмасть.
Спектаклясонть невтеви, кода Сычковтне састь эрямо Кочелаевав. Тесэ артыцясь полады вечкевикс тевензэ. Сон покш мельсэ арты велень ломантнень, сынст эрямост, кенярксчитнень. Сычковонь роленть налкси МР-нь заслуженной артистэсь Евгений Пулов. Нинзэ – МР-нь заслуженной артисткась Галина Максутова. Парсте налксить трактористкань рольтнень Ирина Рахманова ды Мария Лошкарёва. Сынь теке алкукс Сычковонь картинасто! Мазыйть, пейдицят, оршазь раськень оршамопельсэ. Сцена лангсо прок вельместь художникенть картинатне.
Койсэнек, те путовксонть паро ули невтемс минек республикань школань весе тонавтницятнень туртов. Эряви меремс, «Певец народной красоты» спектаклясь тешкставсь театральной искусствасо МР-нь Прявтонь премиясо. Сычковонь роленть налксицясь Евгений Пулов казевсь «Цёрань сехте вадря роль» номинациясо, режиссёрось Лилия Шахова – «Режиссёронь сехте паро важодема» номинациясо. Истя жо ваныцятнень вайгелест максомань коряс путовксось тешкставсь дипломсо «Спектакль года для детей 2020» номинациясо.
Татьяна Маторкина
Фототне Някань театрань