Пятница, марта 29, 2024
Важное



НЕЕНЬ ШКАСТО ОД ЛОМАНТНЕНЬ КАСТОМАСО ВАСЕНЦЕ ТАРКАСО АШТИ ТИРИНЬ МАСТОРОНТЕНЬ ВЕЧКЕМАНТЬ ВИЕВГАВТОМАСЬ, СЕДЕЙСЭСТ ПАТРИОТИЗМАНЬ ОЙМЕНТЬ КЕПЕДЕМАСЬ. ТЕНЬСЭ ПОКШ ЛЕЗКС МАКСЫ АРМИЯСЬ. КОДА СОНДЕНЗЭ ЛЕДСТНИТЬ ЦЁРАТНЕ, КОНАТНЕ СЛУЖАСТЬ, ЛОВНОДО МИНЕК МАТЕРИАЛСОНТЬ.



Виктор Степанович КАЗАКОВ, рядовой:

– Даволковонь 15-це чистэ масторонь келес тешкставсь Воинэнь-интернационалистэнь чись. Масторонть икеле долгонть савсь тень топавтомс Афганистансо. 1986 иень сёксня 1,5 ковонь перть ялгам марто васня ульнинек тонавтнемасо, мейле ильтимизь омбо масторов. Сеть шкатнеде стака тень течи ёвтнемс ды ледстнемс. Койсэнь, эрьва цёрантень эсь шкастонзо служама армиясо, бути эряви, эрямоськак тень кисэ максома, штобу ванстомс маней менеленть ды малавикстнэнь ятонть эйстэ, кода тейсть минек покштянок, лелянок Ине Отечественной войнанть шкасто. Виде, сеедьстэ а савкшны вастневемс ялгатнень марто, ялатеке армиянь ояксчись сехте кеме ды алкуксонь. Те шкас кирдян сюлмот ялгам Анатолий Николаевич Алешкин марто, кие эрямонзо алтызе медицинантень.

Владимир Петрович АНОШКИН,
отставкасо полковник:

– 1965 иестэ, Покш Березникень райононь Шугурова велень средней школанть прядомадо мейле, тердезелинь служамо погранвойскатнес. 1970 иестэ прядыя тонавтнемам Московонь высшей пограничной училищасо. Теде мейле Закавказской пограничной округсо, поладыя тонавтнемам М.В.Фрунзе лемсэ Военной академиясо. 1980 иестэ саезь ламо иеть важодинь Алма-Атинской пограничной войскань институтонь военной историянь ды военной искусствань кафедрань прявтокс. Весе од ломантненень арсян а пелемс стакачиде, кемекстамс шумбрачинть, улемс анококс масторонть икеле куш кодамо шкасто долгост топавтомо.


Иван Викторович ПИВКИН, «Эверест» сетень лавкатнень торгово-холодильной оборудованиянь механик, БМА ротань старшина:

– Монь эрямосо сехте уцяскавокс ды ледстневицякс кадовсть 1988-1990 иетне. Самай се шкастонть прась уцяска служамс армиясо. Неть кавто иетнень перть ульнинь тонавтнемань подразделениясо (Германиясо Советской войскатнень анокстамонь таркасонть). Койсэнь, армиясь эрьва цёрантень максы пек ламо кода физической, истя моральной обуцянзо кемекстамонь коряс. Бути ломанесь бажи содамочитнес, вети прянзо кода эряви, сестэ тень редясызь аволь ансяк ялгатне, истя жо прявттнэяк (командованиясь). Истя, парсте служамонь кисэ монень прась уцяска кавксть самс отпусков тиринь велев. Ледстневи, весть те ульнесь кизна, омбоцеде – февралень 23-це чистэ, ды кудосо эринь мартонь 8-це чинть самс. Кодашка кеняркс кандынь малавиксэнь, сехте пек авань Раиса Алексеевнань туртов. Те шкас сельме икелень, кода кувать сон вансь мельган туемстэ ды салава нардтнесь сельведензэ.
Армиясь казсь тень ламо ялгат, кинь марто ояксчинь сюлмось ванстовсь те шкас. Неть: Саранскойстэ – Сергей Сафонкин, Отяжелень Аловелестэ – Виктор Карпов, Украинасто – Сергей Солдатов. Минь эринек ояксчисэ ды мелявтынек вейке-вейкень кисэ прок вейке покш семиясо. Армиясь ламо максы ды ламос тонавты эрямонть ушодовомсто эрьва цёрантень.

Валентина ЮДИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».