Рубрикатор

«Меремась» вельмевти кезэрень моротнень

Течи те морокурось содавикс республиканть, масторонть келес ды омбо масторонь ламот ёнкстнэсэ. Сонзэ юрс совить эрзянь ды мокшонь культурань ды фольклоронь вечкицятне. Эсь прявт тевекс сынь ловить раськень койтнень-кирдатнень, кезэрень моротнень вельмевтеманть ды ванстоманть. Эсь ловныцятненень минь ёвтнетяно «Мерема» этнографической фольклорной студиядонть ды сонзэ пурныцянть-арсиц янть Екатерина Модинадо.

 – «Мерема» морокурось пурназель-теезель 2010 иень таштамковсто. Сонзэ теемадо мелесь сась апак учне. Мон сестэ ульнинь Н.П.Огарёв лемсэ МГУ-нь Раськень культурань институтонь меельце курсонь тонавтницякс. Весть кода-бути вастовинь «Ладушка» ансамблянь икелень прявтонть марто, кортазевинек. Сон кевкстимим, ули-арась мелем арамс те коллективенть ветицякс? Мон кувать эзинь арсе, сынь. Саранскоень Культурань кудонь прявтокс се шкастонть ульнесь Анна Петровна Чигажёва. Вастымим пек парсте ды мерсь, «Ладушканть» юрсо пурнак эсеть морокуро, – ёвтни «Мерема» этнографической фольклорной студиянь прявтось Екатерина Модина. – Мон чачинь Пенза ёнксонь Сосновоборской райононь Вачелай эрзянь велесэ. Секскак покш мелем ульнесь пурнамс эрзянь-мокшонь морокуро. Вешнинь ёроков од ломанть университетэнь Раськень культурань институтонь студенттнэнь ютксто ды 2010 иень таштамковонь 1-це чинтень пурнавсь од коллектив.

Зярыя шкань ютазь, 2014 иестэ, ансамблясь лемдявсь этнографической фольклорной студиякс. 2017 иестэ «Меремантень» максозель народной лемесь. Составось аволь весть полавтневсь, сеедьстэ сыльть од морыцят,  а полавтовиксэкс свал ульнесь вейкесь – раськень койтнень вельмевтемась ды ванстомась. Неень шкане «Меремасонть» морсить кото морыцят. Весе сынь морамонть ловить эрямонь прявт тевекс. Коллективень прявтось – Екатерина Модина, прядсь А.А.Архангельский лемсэ Пензань музыкальной училища, Н.П.Огарёв лемсэ университетэнь Раськень культурань институтонь дирижёрско-хоровой отделения. Теде башка, сон Н.П.Огарёв лемсэ МГУ-нь Раськень культурань институтонь раськень музыкань кафедрань тонавтыця. Истя жо коллективсэнть Анна Шулугина (сонзэ ловить морокуронь оймекс), Сергей Фудин, Анна Фёдорова, Анастасия Старцева ды Наталья Дворянцева. Малав весе сынь Н.П.Огарёв лемсэ университетэнь Раськень культурань институтонь икелень ды неень студентт.

Кода ёвтни Екатерина, ансамблянть пурнамодо мейле ламо арсемат ульнесть лементь коряскак. Раськень ёнкс марто морокуронтень лемеськак эрявсь истямо.

Ды сон сась апак учо. «Мерема» – сон рузонь келенть мартояк сюлмави ды, васняяк, сон эрзянь. Мерема – ёвтамо. Прязон валось сась, карминь ваномо Интернетсэ сонзэ смустензэ. Ды понгсть сёрмадовкст, эстонтнэнь Меремась – те иневедь чирень Пазаванть лемезэ. Теке марто, истя мерильть Мария Пазонь авантень. Лемесь муевсь ды мельскак весенень тусь, – корты Екатерина Модина.

«Меремась» курок стясь пильге лангс, шождасто муинзе эсь кунсолыцятнень, раськень творчествань вечкицятнень. Тевесь, васняяк, тесэ сеньсэ – коллективесь морась ды нейгак моры эрзянь ды мокшонь кезэрень моротнень, конатнестэ ламот уш стувтовсть, лиятнень жо содасть ды морсесть ансяк сыре ломантне. Репертуарось пек покш ды свал сюпалгавтови од моросо.

Морокуронтень совицятне а аштить ве таркасо, свал тевсэть. Ардтнить эрзянь, мокшонь, шокшонь велетнева, кортнить сыре ломантнень марто ды сёрмадыть раськень кезэрень моротнень. Истят экспедициятнень покш тевекс кармась эрзянь кельсэ кезэрень моротнень марто дискень нолдамось. Те дискесь лиссь уш зярыя иеде икеле, сонзэ юрс совасть сеть моротне, конатнень кезэрень эрзятне морсесть свадьбатнесэ. Кода тешксты «Меремань» прявтось, те дискесь пек паро информационной ёнксонть коряс. Тесэ максови ламо эрявикс информация. Течинь чине морокуронть уш анок материалозо мокшонь кельсэ. Моротне пурназь, студиясо дискесь сёрмадозь, кадовсь ансяк нолдамс сонзэ. Ансяк кода содатано, тень туртов эрявить ярмакт ды аволь аламо. Студиянть сынь зярс арасть.

Минек, эрзятнень ды мокшотнень, пек мазый, сюпав ды лия ёнов а молиця культуранок. Ды бути сонзэ ланга седе ламо ёвтнемс, содыцятнеде ды вечкицятнеде кармить пек ламо, – тешксты Екатерина.

Тень туртов арсезель «Предания старины» фестивалесь, конань Екатерина Модина ютавты уш аволь вейке ие. Васень шкастонть фестивалень участникекс ульнесть ансяк эсенек республикань фольклорной коллективтне. Ютазь иестэ жо пелькстамосонть эсь раськень творчестваст невтизь Тувасто, Чувашиясто, Удмуртиясто, Архангельской областьстэ коллективтне.

«Меремась» свал тевсэ, свал вешнемасо. Овсе аволь умок морокурось эсь творчестванзо невтизе «Песни России» Весероссиянь XII-це фестивальсэнть-марафонсонть, конань ютавты «Русская песня» народной моронь театрась ды сонзэ ветицясь Надежда Бабкина. Фестивалесь Башкортостансоль.

«Мерема» этнографической фольклорной студиясь ламоксть изнякшнось регионъютконь ды раськеютконь пелькстамотнесэ, конат ютавтневсть Саранскойсэ, Пензасо, Набережной Челнысэ, Самарасо, Саратовасо, Ижевскойсэ, Сочисэ ды лия оштнесэ, истя жо Эстониясо, Суомисэ ды Австриясо. Теке марто, кавто иеде икеле морокуронтень максозь Russian World Music Awards премиясь «Лучший аутентичный коллектив» номинациясонть. Эсь творчестванзо коллективесь эрьва ие невтни Эстониясо, косо сонзэ ули фан-клубозояк. Ютазь иестэ «Меремась» тешкставсь «МИР Сибири» Этнической музыкань ды ремеслань раськеютконь фестивальсэнть, кона ютавтовсь Красноярской ёнксонь Шушенское велесэ.

Те иестэ таго пурнатано невтемс эсь творчестванок «МИР Сибири» фестивальсэнть. Те фестивалентень анокстатано аволь ансяк минсь, анокстатано эсь инструменттнэньгак, – ёвтни Екатерина. – Аволь умок Сибирень вейке кедьчелькев ломань тейсь тенек эрзянь кезэрень волынка. Инструментэсь теезь Николай Бояркинэнь артовкстнэнь-тешкстнэнь коряс, ды сон пек моли кезэренсенть ёнов.

Теке марто, морыцятне эсь кедьсэ теить нюдитнень, кодыть-викшнить оршамотнень-мазылгавтомапельтнень. Ды эрьва экспедициястонть ускить эрзянь-мокшонь кодамояк кедьёнкс. Студиянь те сюпавчиденть пурназь цела музей. Тесэ седикелень оршамот, чакшт-парть, тейтерень мазылгавтомапельть, раськень някинеть ды ламо мезе лия.

Меельце шкастонть этнографической фольклорной студиясь пек кассь-раштась. Течи сонзэ юрс совить «Мерема», «Морама» ды «Жива» фольклорной ансамблятне ды «Меремчата» эйкакшонь ансамблясь. Вишкинетнень марто роботась ветяви пек покш.

Минь касттано эсь тевенек поладыцят, – пейди Екатерина. – «Меремчата» эйкакшонь ансамблясь эсь важодеманзо ушодызе 2017 иестэ. Ды васенце чистэ саезь минь тенст ёвтнетяно эрзянь-мокшонь культурадонть, койтнеде-кирдатнеде. Ды, эряви меремс, эйкакштненень неть ёвтнематне пек вечкевить. Эдь кортамотне ютыть минек музейсэнть-студиясонть, косо неть раськетнень культуранть можна неемс эсь сельмсэть.

Юлия Еремина

 
Зифа Альмяшева: «минек тевсэнть арасть ве ёндонь ломанть»

МВД-нь кинологонь службанть прявт тевезэ – те общественной сэтьмечинть ванстомась кода республиканть келес, истя жо сонзэ томбале. Сотрудникесь ды кискась – те а явовиця пелькс, лиякс меремс, кинологось свал эсензэ кисканть марто вейсэ топавтыть икелест путозь тевтнень. Полициянь старшей лейтенантонть, разведываниянь, служебной кискатнень кастомань, дрессировкань ды тренировкань отделениянь прявтонть Зифа Альмяшевань туртов Мордовия Республикава Кинологонь службань куншкакуросонть важодемась аволь ансяк профессия, те весе эрямонь тев.


Ледстни, васенце киска левксэнть, восточно-европейской овчарканть, эйкакшпингестэ сонензэ казизе тетязо.

Мон куватьс тетянь-авань кедьстэ вешинь киска, пурнынь азортомотнень, ансяк кудов сынст саемадост эзть мере. Зярдо монень топодсь 11 ие, тетям кандсь тень казнекс киска левкс. Превсэнзэяк арасель, казсь тень аволь ансяк покш мельспаро, истя жо редизе сы шкань профессиям, – корты Зифа Альмяшева.

Ниле пильгсэ оянть мельга якамось пек вечкевсь тейтерькантень, ды сон сайсь мель совамс Россиянь ДОСААФ-нть юрсо кискань кирдицятнень-трицятнень вейсэндявксонтень, косо кискатнень марто важодеманть истя жо топавтсть кинологтне. Сон сеедьстэ яксесь МВД-нь кинологонь куншкакуронтень, яла ламолгавтсь кискатнень коряс содамочинзэ. Зифань кисказо эрясь 8 иеть, теде мейле сон пек ормалгадсь. Тейтеренть арасельть виензэ лездамс ялгантень, эзть сато содамочитне медицинанть коряс. Секскак эсензэ туртов арсизе, школанть прядомадо мейле моли тонавтнеме аграрной факультетэв. Истя лисськак, Зифа «ветес» прядызе ветеринаронь специальностенть. Практиканть свал ютась кинологонь службань куншкакуросонть. Дипломонть получамодо мейле Зифа Альмяшева сась служамо тей. Васняяк важодсь ветврачокс, мейле – младшей кинологокс-инспекторокс. Течинь должностьсэнть вейсэндинзе весе содамочинзэ – левксыявты, касты киска левкстнэнь, ваны шумбрачист мельга, покш мель яви дрессировкантень, тонавты сынст.

Седейлембе марто авась корты профессиянь тевентень совавтыцядонзо, превс путыцядонзо, неть – Александр Мудров ды Александр Бойков. Неень шкане сынь поладыть вечкевикс тевест, куншкакуросонть важодить инспекторокс. Кискатнень вечкемась, сынст дрессировамо маштомась – неть ёнкстнэ вейсэндить весень, кить тесэ важодить.

Зифа Альмяшева 30 иеть важоди кинологонь куншкакуросонть, видькстась, сон а неи эсензэ эрямонзо кискавтомо. Ней питомниксэнть 48 кискат, ды эрьванть марто мусь «кель-вал».

Весть сонензэ гайневтсь Московсто ялгазо ды пачтясь, фабрикасонть, косо тонась важоди, эри киненьгак а эрявикс киска. Авась, куватьс апак арсе, сыргась Московов. Истя сонзэ ды Тимур цёранзо кармась од ояст – сырнень ретриверэсь.

Кискась эрясь мартост сисем иеть, те шканть перть кармась семиянь пелькскекс. Сонзэ куломадо мейле, Зифань валонзо коряс, кудось чамсь. Зярыя шкань ютазь сынь вастовсть Бакара марто. Те ульнесь Чебоксары ошсо, ков Зифа якась инжекс ялганстэнь. «Мон ансяк варштынь сельмезэнзэ: раужот, налксицят, ды сеске чарькодинь, те монь эйдесь». Киска левксэськак сеске редизе од азоронть, чокшнень перть аштесь кедь лангсонзо. Зифа кортызе ялганзо максомс кисканть сонензэ. Ды эзь маняво, фокстерьерэнть пек вадря профессиональной ёрокчинзэ, сынь кармасть службань коряс напарникекс – вейсэ важодить уголовной тевтнень панжомаст коряс.

 Зифа истя жо теевсь ялгакс Белла немецень овчарканть марто, сеедьстэ сайни эйсэнзэ кудов. Мартонзо вейсэ ванстыть общественной сэтьмечинть, важодить преступлениятнень ды правань коламотнень профилактиканть ды а нолдамонть коряс.

Кинологось истя жо ледстизе Лайма овчарканть, сон уш кулось. 2012 иестэ те кискадонть кармасть содамо республикань келес, сон идесь ломанень эрямо. Зыянов тевесь лиссь «Силовик» гаражонь вейсэндявкссонть, конась ашти Саранскоень Строительной куросонть. Зифа кисканть марто мольсть ушова, ваксозост чийсь сыре ломань ды пачтясь, вейке гаражсонть ацетонь чинеденть лепиясть кавто цёрат.

Монь гаражось ашти каршост. Неинь, сыре ломанесь красясь гараж  потмонть. Ванан, сон куватьс а лиси, зярыя шкань ютазь гаражонтень совась цёразо. Тонаськак ёмась. Молинь варштамо мезе тосо лиссь. Неинь, каськань кенкшесь панжадо ды тосо (1,5 метрань сэрьсэ) празь кавто ломанть, – ёвтнесь цёрась.

Гаражонтень совамсто Зифа редизе, седе сыре цёрась уш кулось, омбоцесь эштё лекси. Авась истя жо чарькодсь, верев сонензэ ськамонзо сынь а кепедевить, ацетононь чинеськак пек виевель. Гайневтсь мартонзо важодицятненень, тердсь медицинань куроконь лезксэнь служба. Врачтнень самс цератнень кепедизь верев. Од цёрантень Зифа явсь медицинань лезкс. Колмо минутань ютазь тонась сась ёжос. Врачтне мейле толковизь, бути лезксэсь а максоволь шкастонзо, цёрась куловоль… Тетязо уш эзь идеве. Весе те шканть перть Лайма ульнесь азораванзо вакссо.

Эштё вейке ялганть, Каста овчарканть марто, конась важодсь кулявтомо ёмазтнень вешнеманть коряс, сынь идизь куломадо сыре бабанть. Тевесь лиссь Рузаевка ёнксонь Хованщина велесэ 2017 иень сундерьковсто. Авась сыргась шабра велев ды ёмась. Ветявсть вешнемань виев тевтеемат, тердезельть волонтёрт. Ниле чинь перть ванновсть веленть маласо весе таркатне. «Меельце метратнень ванномсто, Каста кармась онгомо ды чийнеме ве таркасо, – корты Зифа. – Мон чиинь малазонзо ды коське сэрей тикшенть потсто неия празь сыре аванть, сон ульнесь ёжосо, ансяк овсе вийтемель, кельмезь ды вачоль. Куроксто ваксозонок састь ломанть, аванть оршавтынек, тердинек медицинань куроконь лезкс ды пачтинек больницяв».

Те тевденть Зифа натой ёвтнесь Россиянь МВД-нь министрантень Владимир Колокольцевнень – Тейтерь-авань раськеютконь чинть каршо сон тердезель Московов, тосо сонензэ ёвтасть лембе поздоровт ды тешкстызь покш казнесэ.

Неень шкань кодамояк техникась ды аппаратурась а полавтсы кискань судонть. Куш кодамо техникась калады, максы аволь виде куля. Кискатне жо тень коряс пек кемевикст. Служебной кискатнень таликаст преступлениятнень панжомасо покштояк покш. Те ракшанть судозо – лия ёнов а молиця инструмент, конась ломанень судонть коряс реди кементь тёжадо седе ламо эрьва кодат чинеть, – ёвтни Зифа. – Эрьва чистэ зярыя часонь перть кискатнень марто ютавтовить тренировкат, якатано мартост ошонь куротнева, ламо ломанень пурнавома таркатнева, лавкатнева, усксетяно транспортсо – истя ушодтано анокстамо службантень. Те – тевс совавтомань пелькс. Зярдо жо кискантень топоди ие, сестэ ушодови виев дрессировкась.

Сынь теке ломанть, эрьванть эсензэ обуцязо, секскак дрессировканть шкасто тевс нолдан важодемань башка ёнкстнэнь – веенст вечкить налксеме, омбонст тантейстэ ярсамо. Кискатне редить монь ёжом, марить эйсэнь. Видестэ мартост важодемась – те цела искусства. Бути сёвнат кисканть, эряви алкукс кежейгадомс лангозонзо, рангомс, сон чарькодезэ: азоронтень мезесь-бути мельс а тукшны. А уш бути шнамс, сестэ седейшкава, кискась седеяк вадрясто карми важодеме. Паряк, секскак минек службасонть арасть ве ёндонь ломанть.

 

Анокстызе

Татьяна  Аксенова

 
Горяйновка веленть маласо...

 


Июнень 28-це чистэ панжозель Сокамонь коряс Россиянь 8-це чемпионатось, конасонть эсь ёрокчист невтизь Россиянь 39 регионсто 49 трактористт. Почетной инжетнень ютксо ульнесть РФ-нь Велень хозяйствань министерствань растениеводствань, механизациянь, химизациянь ды касовкстнэнь ванстомаст коряс департаментэнь директорось Роман Некрасов, Сокамонь весемирэнь организациянь председателесь Колин Миллер.  Теке чистэнть РФ-нь Госдумань аграрной кевкстематнень коряс комитетэнь председателесь Владимир Кашин, РФ-нь велень хозяйствань министрань васенце полавтыцясь Джамбулат Хатуов, «Росагролизинг» АО-нь генеральной директорось Павел Косов, РФ-нь Госдумань депутаттнэ, МР-ва главной федеральной инспекторось М.С.Сезганов,  велень хозяйствань техникань содавикс нолдыцятнень представительтне МР-нь Прявтонть В.Д.Волковонь марто ванкшнызь выставкатнень, конат теезельть Саранск ошонь округонь Горяйновка веленть вакссо.

Тесэ инжетне ванкшнызь велень хозяйствань техниканть ды оборудованиянть, республикань муниципальной районтнэнь, пищевой ды перерабатывающей предприятиятнень ды лиятнень продукцияст. Весень мельс пек тусь «Березниковский» велень хозяйствань перерабатывающей кооперативенть продукциязо. Сынь нолдыть ансяк паро сосискат, сарделькат, эрьва кодамо сортонь колбаса, колмо видэнь тушенка – тувонь, скалонь, куркань сывельстэ, мраморной сывельстэ шашлык ды лия мезе. Кооперативесь, косо лововить 10 ломанть, важоди уш кавто иеть. Сонзэ прявтсо ашти М.В.Струёнков.

Михаил Владимирович видькстась, колбасань-мезень анокстамсто производствас сывельде башка мезеяк а кайсеви. Тень мельга кеместэ ваны технологось Григорий Наумкин.

Мордовиянь инжетне кувать аштесть «Сыродельный комбинат «Ичалковский» предприятиянь палатканть вакссо. Тесэ инжетне ды участниктне ванкшнызь «Пармезан», «Монгал» ды лия сортонь сыратнень.

«Агрофирма «Октябрьская» нармунень фабрикань прявтось И.С.Андин инжетнень содавтынзе продукциянть марто, конань нолдыпредприятиясь, ды, нама, микшневи аволь ансяк минек республикасо, сонзэ томбалеяк. Аволь умок нармунень фабрикась ушодсь нолдамо мороженой. Течи сонзэ нолдыть 11 видэнь.

Джамбулат Хатуовонь валонзо коряс, Россиянь велень хозяйствань министрась Николай Патрушев мель явсь сеть невтематненень, конатнень таштынзе республикась. Региононть а берянь экспортозо. Паро изнявкст таштазь животноводствасо ды растениеводствасо. Переработкасо тевс нолдавить неень шкань технологиятне. Целанек Мордовиянь агропромышленной комплексэсь важоди пек виевстэ.

МР-нь Прявтонть В.Д.Волковонь валонзо коряс, республикань велень хозяйстванть виегавтомасо те турнирэсь лездась теемс эскелькс икелев.

Паро, те площадкасонть невтневи весе вадрясь, мезе ули Россиянь АПК-со. Тесэ ламо од ломанть, конатне карзень кувалма кенярдомс, эдь минь нолдатано весементь, мезе теить велень хозяйствасо масторлангсонть, Россиясо. Ды отраслясь ловови сехте технологичнойтнестэ вейкекс, –  тешкстызе Владимир Дмитриевич.

Истя жо В.Д.Волков ледстизе, «Росагролизингенть» марто вейсэ Дубенкань районсо строяви 6,5 тёжат потявтовиця скалс комплексэсь, кона карми Россиясо сехте покштнестэ вейкекс.

Кода мерсь Владимир Кашин, РФ-нь Госдумань аграрной кевкстематнень коряс комитетэнть республикав самось анокстазель загодь. Аравтлувсост васенце таркасоль Мордовиясо Сокамонь коряс Россиянь чемпионатонть ютавтомась. «Те анокстамонть лувсо теезь ламо, те течи тесэ неяви. Сетнень туртов, кить важодить велесэ, профессиянтень, корьмаентень мелень явома. Техникась, конась нолдави масторсонок, кецявты. Минь толковасынек сень, мезе эряви велентень, штобу парсте, емавкстомо ютавтомс видематнень ды паксянь урядамотнень. Покш меленек – велесэ эрямось паролгадоволь», – тешкстызе Владимир Кашин.

«Росагролизингень» генеральной директорось Павел Косов ледстизе, предприятиясь

ловови АПК-нь рынкасо сехте эрявикстнэстэ вейкекс, истя жо сон – Россиянь велень хозяйствань техникань сехте виев рамиця ды микшниця.  «Мордовиясь – сехте малавикс ды умонь партнёронок.  Секс покш мель явтано республикантень, сонзэ прявттнэнень. Минь тей ламо ярмакт явинек», – тешкстызе Павел Косов.

Тешкстасынек, июнень 28-це чистэ Сокамонь коряс Россиянь чемпионатонть лувсо ютавтозельть зярыя мероприятият, тень ютксо: «Обновление парка сельхозтехники: опыт, практика, перспектива» пленарной конференциясь, Кадошкина поселкасо «Мир цветов» тепличной хозяйстванть ванкшномась, истя жо Ковылкина райононь Кочелаева велесэ РФ-нь Госдумань аграрной кевкстематнень коряс комитетэнь выездной заседаниясь, конань темазо ульнесь истямо: «Сельские территории в пространственном развитии страны: потенциал, состояние, перспективы (на примере Республика Мордовия).

«Обновление парка сельхозтехники: опыт, практика, перспективы» пленарной конференциянть панжомсто, МР-нь Прявтось В.Д. Волков мерсь: «Мордовиянть туртов пек паро, што сон кочказь Сокамонь коряс Россиянь чемпионатонь ютавтомань таркакс.

Те решениянть кис покш сюкпря РФ-нь велень хозяйствань министерствань ды «Росагролизинг» государственной компаниянь прявттнэнень. Минь кецятано, мероприятиясь лиссь пек покшокс, тей састь Россиянь ламо регионсто. Тей пурнавсть государственной ды общественной организациянь прявттнэ, авторитетной эксперттнэ, покш предприятиянь ды фермерэнь хозяйствань азортнэ, сень кисэ, штобу муемс кить-янт аграрной отраслясо талновтыця кевкстематнень изнямосо».

Течи Мордовиясо лововить 3 тёжадо ламо тракторт, вейке ды пель тёжат сюронь ды коромонь урядамонь комбайнат, малав 3,5 тёжат видемань ды велень хозяйствань инвентарь.

РФ-нь Госдумань велень хозяйствань кевкстематнень коряс комитетэнь председателесь Владимир Кашин промкссонть тешкстызе, республикасо эрямос совавтовить паро проекттнэ. Сонзэ валонзо коряс, розень кастомасонть ды сырань нолдамосонть теезь виев эскелькс, АПК-нть виевгавтомасо республиканть опытэсь тонавтневи Россиянь лия регионтнэсэ.

Истя, кавто чить пелькстасть трактористтнэ Сокамонь коряс Россиянь чемпионатсонть. Раськеютконь судьянь коллегиясь, конань составс совасть Европейской сокамонь федерациянь ды масторлангонь сокамонь организациянь члентнэ, изницякс ёвтызе Пензань областень трактористэнть Сергей Захаровонь. Сонензэ максозь главной казнесь – Петербургонь тракторонь заводонь  «К-424» тракторось.

Чемпионатонь призёрокс кармасть Орловской областень трастористэсь Виктор Устинов ды Ивановской областень трактористэсь Сергей Телегин.

Неть пелькстамотнесэ пек бажась изнямс Мордовиянь трактористэсь Сергей Митрофанов, но изницятнень юткс сон эзь понго.

Мордовиянь лия представителесь Алексей Киреев (Покш Березникень район), эсь ёрокчинзэ невтизе «Трактор-шоусо» ды тесэ саизе колмоце тарканть.

 

Пётр Зиновьев,

Саранск ошонь Октябрьской райононь

Горяйновка веле

 
Зярдо вечкат – изнят!

 

Те иень васенце пельксстэнть РФ-нь Президентэнь грантонь пелькстамосонть изницякс лиссть Мордовиянь 18 аволь коммерческой общественной организацият. Сехте ламо ярмакт – 2 миллионт 157 тёжат целковойть макссть «Од веле» велень территориянь виевгавтомань региононь общественной организациянтень, конань прявтсо эрзянь цёрась, МР-нь Общественной палатань членэсь, социологической наукань кандидатось Евгений Евгеньевич Ледяйкин. Неть ярмактне ютавтовить Покш Березникень Паракина велень «Музейно-культурный центр Дом традиций» проектэнть эрямос совавтомантень.


Эрьва ломанесь, кинь эйкакшпингезэ ютась велесэ, зярдояк а стувтсынзе сеть ледстнематнень, конатне сюлмавозь тиринь кудонть ды малавиксэнзэ вечкеманть, ансяк потявтозь ловсонть танстензэ ды луганарганть кепе чийнеманть марто. Неть ледстнематне поладовить эштё ламо эрьва кодат седеень эждиця, мельспаронь кандыця ёжомарямотнень марто. Ошов туезетнень эйстэ аламот, кить алкукс пиить-палыть чачома ёнксонть, покштятнень-бабатнень модаст кувалма. Виде, улить истят, кить а кадныть тетяст-аваст сад-пиретнень, оймсема читнестэ ардтнить оймсеме, кудост одкстомтомо, пирест путомо. А вана истятнэде, кить велявтсть эрямо тиринь велев: путсть кудо ды бажить паролгавтомс тозонь эрямо кадовозтнень уцяскаст – сурсо лововить.

Видькстан, сеске эзинь кеме, зярдо маринь эрзянь цёранть, Покш Березникень Паракина велесэ чачозенть-касозенть Евгений Евгеньевич Ледяйкинэнь аволь ансяк тиринь ёнксов эрямо самодо, эштё тосо эрямонь лувонть полавтомо снартомадо…

Виде, вейсэнь ялгатнень пельде аволь весть савсь марсемс Евгений Евгеньевичень эрямодо, масторлангонь келес ардтнемадо ды масторонь прявт ошсо парсте важодемадо. Лиясь бу сонзэ таркас эряволь ды саевель ансяк эсензэ лезэс весе паронть. Нать, лиякс трязь-кастозь те эрзянь цёрась, конась сайсь мель содамс-ванстомс эсь ундоксонзо.

Ледстясынек, Евгений Ледяйкин Паракинань средней школанть парсте прядомадо мейле, 1994 иестэ ушодсь тонавтнеме Московсо Международной ояксчинь (Дружбы народов) университетсэ инженер-строитель специальностень коряс. Сонзэ прядомадо мейле тоско кадовсь важодеме теке специальностенть коряс. Теке шкастонть ушодсь ветямо общественной покш робота, совась «Эрзянь вайгель» общественной организациянтень, косо Мордовиянь томбале эрицятне бажить ванстомс тиринь келенть, вельмевтемс минек раськень койтнень-кирдатнень. Те организациянть прявтокс сонзэ кочкамодо мейле самай истямо вастовомасо, теевинек содавиксэкс Е.Е.Ледяйкин марто. Виде, сондензэ карминь содамо ков седе икеле, теде пачтян седе тов.

Те промксось, конась сестэ ютакшнось масторонь прявт ошсо, мелезэнек пек тусь. Васняяк сеньсэ, сон вейсэндясь эрьва кодамо профессиянь важодицят, Мордовиянь икелень эрицят, кить республиканть эйстэ ве ёно эрязь, тошнакадсть тиринь ёнксонть кисэ, весе седейсэ мелявтсть раськень койтнень-кирдатнень ванстомадо. Ламот юткстост невтизь ёрокчист киштемасо-морамосо, ламонь содамосо.

Од прявтонть самодо мейле, те общественной организациясь поладызе ушодозенть ды ламо од кармась совавтомо эсест вейсэндявксонтень, конань минь свал редятано «Голос Эрзи» социальной сетень сайтстост.

                                           Умонь ледстнематнестэ
Сёрмадыцянь тевенть топавтомсто ледстневи, 2006 иестэ савсь тень улемс Покш Березникень Паракина велесэ ды теевемс содавиксэкс Е.Е.Ледяйкинэнь аванзо, Александра Михайловнань, икелень тонавтыцянть, чевте седей, ламос бажиця тейтерь-аванть марто. Тешкстасынек, сон рузава. Эйкакшпингезэ ютась Тазина велесэ. Паракинав мирденень лисемадо мейле аволь ансяк парсте кармась содамо эрзянь келенть, мик ламо иеть ульнесь эрзянь келень тонавтыцякс, алкукс мелявтсь келенть кис. Нать, ламось те обуцянь ёнксстонть ютась веженць цёранстэнь Евгенийнень. Эштё ламо иес тень кадовсь ледстневицякс истямо тевесь, кодашка покш путовксозо ульнесь Александра Михайловнань Паракина велесэ церькованть кепедемасо, ознома тарканть вейсэ ялганзо марто теемасо. Ледстневи, эрзянь авась седейшкава тень ёвтнесь аволь ансяк эрямодонзо, истя жо ламо превс путомат пачтясь эйкакшонь трямодо-кастомадо. Туемстэ прянь апак шна тень ёвтась, кодамо покш мельспаросо ашти веженць цёранзо Женянь Московсо тонавтнеманть коряс. Нама, содавольгак Александра Михайловна икелепелев цёранзо Женянь тиринь велев велявтомадо, каштанчизэ ков седе покш улевель…

Кода ломань ютксо кортыть, цёрась масторлангонь колмонест покш тевтнень топавтынзе: кудо путсь, цёра кастась, ламо чувтот озавтсь.

Валентина Юдина

Аштемковонь 25-це чистэ эрзянь цёрась Евгений Евгеньевич Ледяйкин тешкстызе чачома чинзэ. Сонзэ лемс ёвтавсть ламо поздоровт ды паронь арсемат, конатненень вейсэндявтано миньгак, «Эрзянь правда» газетань теицятне. Арсетяно тензэ кеме шумбрачи, эрямосо уцяска, весе мелензэ топавтома. Кадык икелепелевгак сатыть виензэ тиринь ёнксонть паролгавтомс, республиканть ды масторонть сюпалгавтомс!

 
Алёна Маскаева: «Виев обуцясь лезды тень изнямс!»

Аволь умок Московсо ютась цёратнень ды аватнень ютксо смешанной боевой единоборствань коряс (ММА) Россиянь Чемпионат. Пелькстамосонть ульнесть 112 спортсмент, конат сакшность федеральной весе округтнестэ. Равчирень федеральной округонть пельде ульнесь М.Е.Евсевьев лемсэ МГПИ-нь филологиянь факультетэнь 1 курсонь студенткась, эрзянь тейтересь Алёна Маскаева. Сон лиссь финалс аватнень ютксо 70,8 кг сталмонь категориясо смешанной боевой единоборствань коряс ды изнясь сиянь медаль. Сонзэ вадря невтевкстнэнь вельде ПФО-нь авань сборноесь общекомандань зачетсо лиссь омбоце таркас.

Россиянь Чемпионатсо изнямонть вельде Алёна тердевсь ММА-нь коряс Европань чемпионатов Италияв, ансяк тов, нама, эрявить ламо ярмакт… Секскак минек спортсменкась апаркстомсь, эзь понго тюреме омбо масторов.

Алёнанень 19 иеть. Сисемеце классто саезь покш мель яви спортонтень, налксесь баскетболсо. Мейле кармась бороцямо. Ней сон ламо шка ютавты вольной бороцямонь ды самбонь коряс тренировкатнесэ, конат ютыть зярыя таркава: «Динамосо», 4№ ДЮСШ-сэ. Тренерэзэяк аволь вейке, неть: В.Б.Ковалёв, Л.Ю.Зинченко, М.А.Чекурков. Сон ёвты тенст покш сюкпря. Алёна невтнизе ёрокчинзэ вольной бороцямонь ды самбонь коряс ПФО-нь соревнованиятнесэ. Аволь весть лиснесь призёрокс ды изницякс.

Паряк, ламот эйстэнек дивазевить, мекс од тейтерь-аватне кочкить истямо тев? Самай те кевкстеманть максынек Алёнанень.

– Тюремс аволь шожда, тень лангс апак вано, монень пек вечкеви спортонь те видэсь. Тосо невтеви виев обуцясь, а пелемась. Московсо ютазь Чемпионатось макссь тень сёлмот. Эсень сельмсэ неия кода-мезе, кода ютыть истят покш пелькстамотне.

Пединститутонь весе тонавтыцятне ды тонавтницятне аштить каштанчисэ студентканть кувалма. Кецнить ды мелявтыть кисэнзэ малавиксэнзэ. Миньгак арсетяно од тейтерентень ансяк изнявкст ды икелев молемань покш ки!

Татьяна Маторкина

 
<< Первая < Предыдущая 11 12 13 14 15 16 17 18 19 20 Следующая > Последняя >>

Новости

Единороссы Мордовии провели родительскую приемку школьных зданий
В рамках проектов «Единой России» «Новая школа» и «Крепкая семья» с 20 по
22 августа в Саранске прошла акция «Родительская приемка». Ее цель – проверка
школ на предмет их готовности к новому учебному году. Участниками акции
стали депутаты Совета депутатов городского округа Саранск, родители, члены
партийного актива.
Партийцы посетили школы, находящиеся в Ленинском, Октябрьском и
Пролетарском районах Саранска. Результаты проверки показали, что школы
полностью готовы к началу нового учебного года.




Подробнее ...
 
Турчак: «Единая Россия» предлагает ввести повышающий коэффициент 1,4 для выплат по программе «Земский доктор»
«Единая Россия» готова в короткие сроки внести в законодательство 
необходимые изменения, направленные на повышение качества первичной 
медицинской помощи. Речь идет о введении повышающего коэффициента 
1,4 для выплат по программе «Земский доктор» для особо сложных и 
труднодоступных территорий и законодательном закреплении института 
наставничества для молодых врачей в течение не менее трех лет. Об этом 
заявил секретарь Генерального совета «Единой России» Андрей Турчак.
Подробнее ...
 
В «Единой России» подготовят предложения по освобождению учителей от излишней административной нагрузки
В «Единой России» перед началом учебного года подготовят
предложения по решению проблемы избыточной отчетности педагогов. Свои
инициативы сможет направить любой желающий через сайты региональных
отделений «Единой России» до 28 августа, а 4 сентября планируется
обсудить их с участием всех профильных ведомств, экспертов,
представителей родительского сообщества на федеральной дискуссионной
площадке «Благополучие человека». Об этом заявила первый заместитель
секретаря Генерального совета Партии, депутат Госдумы Ольга Баталина.
Подробнее ...
 
Турчак просит Президента РФ представить к награде бортпроводницу Ан-24 авиакомпании «Ангара»
Вице-спикер Совета Федерации, секретарь Генерального совета 
«Единой России» Андрей  Турчак выступил с предложением наградить 
бортпроводницу самолета Ан-24 авиакомпании «Ангара» Елену  Лапуцкую, 
которая 27 июня спасла 43 пассажира самолета, потерпевшего крушение в 
аэропорту бурятского поселка Нижнеангарск. Соответствующее обращение 
он направил Президенту РФ Владимиру Путину.
«Героический поступок бортпроводницы самолета Ан-24 
авиакомпании «Ангара» Елены Лапуцкой, которая спасла из горящего 
самолета 43 пассажира, рискуя собственной жизнью и имея серьезные 
травмы, достоин награды. Безусловно, такие случаи необходимо отмечать на 
государственном уровне», - уверен Турчак.
«Желаю Елене Лапуцкой скорейшего выздоровления и возвращения в 
профессию», - заключил вице-спикер Совфеда.
Отметим, 27 июня самолет Ан-24 авиакомпании «Ангара» из-за отказа 
двигателя совершил жесткую посадку в аэропорту бурятского поселка 
Нижнеангарск, и врезавшись в здание очистных сооружений, 
загорелся. Бортпроводница Елена Лапуцкая в одиночку сумела быстро 
открыть аварийные двери и помогла людям выбраться из салона. 
Благодаря этому, никто из 43 пассажиров не погиб. Командир корабля 
и бортмеханик погибли сразу, второй пилот покинул самолет через 
аварийный люк горящей кабины.
 
К лету 2020 года в рамках акции «Единой России» по лесовосстановлению будет высажено более миллиона деревьев
В рамках акции «Единой России» по лесовосстановлению будет
высажено более одного миллиона деревьев до лета 2020 года. Первые
лесовосстановительные мероприятия начнутся уже в сентябре-октябре этого
года в регионах, климат которых наиболее благоприятен, и продолжатся
весной. Первыми участниками акции станут лесные регионы Сибири,
Дальнего Востока и Северо-Западного федерального округа: Хабаровский,
Забайкальский, Приморский, Красноярский и Алтайский края, Республики
Алтай, Бурятия и Карелия, Амурская, Иркутская, Омская, Томская,
Новосибирская, Архангельская и Новгородская области.
Подробнее ...