Рубрикатор

Кеме неже

Тиринь газетасо колоньгеменде ламо иень перть важодезь, кинь марто ансяк эзь савкшно вастневемс. Ютксост: сюронь кастыцят, скалонь потявтыцят, эйкакшонь тонавтыцят, культпросветроботникть, покш заводонь прявтт, строительной организациянь прявтт, велень хозяйствань предприятиянь прявтт, иневедьга укшныцят, военнойть ды истя седе тов. Сынь мельс: се, кие эйкакш поранзо ютавтызе велесэ, покш эрямо кинтень васенце эскелькстнэнь теинзе велестэ, сетне кеме обуцят. Кочкизь вечкевикс тевенть ды сонзэ а кадсызь пенсияс туемазост. Истятнэнь юткс сови «Красный Октябрь» типографиянь главной инженерэсь Владимир Андреевич Моисеев.



В.А.Моисеев чачсь 1959 иень июлень 15-це чистэ Кадошкинань райононь Глушкова велесэ. Эйкакш пингстэ уш кармась содамо кшинть питнензэ. Велень кода лия эйкакштнеяк, сон лездась тетянзо-аванзо туртов кудоютконь тевтнесэ, истя жо вансь ракшат. Средней школаст арасель, ульнесь ансяк начальной. Секс Володя Моисеевнень средней школань прядомадо аттестатонть максызь Кадошкина велесэ. Аттестатсонть малав весе оценкатне «вететь».

1976 иестэ СССР-нь Министрань Советэнть лиссь постановлениязо, косо кортавсь национальной кадрань анокстамодо. Эрявсть журналистт, полиграфической тевень содыцят. Паро кадрань анокстыцятне – Московонь, Ленинградонь (ней Санкт-Петербургонь), Свердловскоень (ней Екатеринбургонь) ды лия вузтнэ. Истя, МАССР-нь Правительстванть кучоманзо коряс Володя Моисеев тонавтнесь «Полиграфической производствань технология» специальностенть коряс Московонь полиграфической институтсо.

Институтсо тонавтнемань иетне ливтязь ливтясть. Владимир Моисеев теевсь диплом марто од специалистэкс. Ков молемс важодеме? Те кевкстемась Владимирэнь эзь талновто. Сон уш тонавтнемстэ кочкизе Саранскоень «Красный Октябрь» типографиянть.

1981 иестэ В.Моисеев кундась важодеме «Красный Октябрь» типографиясо. Сестэнь директорось Н.И.Цыганов лембестэ вастызе од специалистэнть.

– Николай Иванович ульнесь коллективень алкуксонь прявт. Тонавтсь монь технологонь тевентень, ёвтнесь сень, мезе ашти изнявкстнэнь экшсэ. Сон аравтымим офсетной участкань мастерэкс, – ёвтнесь Моисеев.

Сонзэ валонзо коряс, сестэ типографиясонть важодсть пек ламо ветерант, сетне, конатнень кувалма мельспаросоль коллективесь. Ютксост – газетань тевень мастерэсь Б.И.Алексеев, главной механикесь В.М.Венчаков, мастертнэ В.И.Шаранова, Н.Н.Тягушева ды лиятне.

Типографиянь цехтнесэ аштесть линотипть, кивень лакавтомат, конатне пек лавшомгавтсть ломантнень шумбрачист.

– Сестэ нолдынек-печатынек Мордовской книгань издательствань книгатнень, республикань покш предприятиянь кемень газетатнень, – ледстни Владимир Андреевич. – Вана ансяк «Советская Мордовия» газетанть тиражозо ульнесь 81 тёжа экземплярт, «Молодой ленинецэнть» – 50 тёжат экземплярт. Национальной газетатненьгак тиражост сатышкаль. Теде башка, печатынек телевидениянь программанть. Россиянь Образованиянь министерстванть ды рыбной промышленностенть туртов журналт.

Содазь, важодеме эрьва ушодыцянть ули тонавтыцязо. Лиякс меремс, наставникезэ. Владимир Моисеев эстензэ истямокс лови П.Е.Харламовань.

Ансяк В.А.Моисеевнень кувать важодемс эзь удала. 1981 иестэ сонзэ саизь служамо Советской армияв. Понгсь ракетной войскатнес. Васня служась Иркутскойсэ, мейле – Читасо. Тесэ, армиясо, прядынзе офицерэнь курсатнень. 1983 иестэ, Советской армиясо служамодо мейле, велявтсь тиринь ёнксов, самай сестэ, зярдо строявсь Советской ульцясо типографиянь од корпусось. Директорось Н.И.Цыганов од специалистэнть аравтызе оборудованиянь коряс инженерэкс.

– Вант пштистэ од оборудованиянть путоманзо-ладямонзо мельга, – кортыль Николай Иванович. – Аравтсызь парсте, сестэ парсте карми роботамояк.

Тешкстасынек, оборудованиянть усксть Советской Союзонь ламо оштнестэ: Киевстэ, Харьковсто, Ленинградсто, Рыбинскойстэ.

1985 иестэ саезь В.А.Моисеев – типографиянь главной инженер. Од корпусонть нолдамодо мейле, Владимир Андреевич Моисеев эзь ойма. Сон бажась цехтнесэ полавтомс линотиптнень ды высокой печатенть. Тарказост ладямс фотонаборонть ды печатень высокой способонть. Ды мезе?! 1989 иестэ «Красный Октябрь» типографиясо ладяви вейке офсетной машина, кона кармась печатамо Мордкизэнь книгатнень.

– Те вейке машинась полавтынзе высокой печатень вете машинатнень, – ёвтни Владимир Андреевич. – Книгатнеяк вадрялгадсть, мазылгадсть. Аволь «рудазовт». Теке шкане тонавтнинек книгань эрьва кодамо тюссо печатамонть. Тень кувалма якинек-ардтнинек Тверень полиграфиянь училищав, тосто ускинек од специалистт. Ютксост – Света Чичкина, кона течинь чис важоди типографиясо. Теде икеле эрьва ков тердематнень-мезтнень печатынек Пермьсэ, эрьва тюссо газетатнень – Чебоксарсо.  Те, нама, минек пек талновтсь,– ёвтни В.А.Моисеев.

В.А.Моисеевень покш таликазо оштё оно мейсэ, 1990 иестэ «Красный Октябрь» типографиянть ды районной кемень типографиятнень юрсо теезель полиграфиянь вейсэндявксось. Связень каналтнэнь коряс редакциятнестэ типографияв максовсть районной газетань материалтнэ, конат печатавсть офсетэнь лувсо. Тенень рамазель газетно-офсетной машинась (РО-62). Сонзэ нолдыцязо – Индиясь. Од машинанть ваномо типографияв сакшнось МР-нь Правительствань икелень Председателесь В.Д.Волков.

В.А.Моисеев мельспаросо. Ней республиканской ды районной газетатне лисить эрьва кодамо тюссо печатазь лопа марто. 1994 иестэ весе газетатнень ушодсть печатамо офсетэнь лувсо.

– 2005 иестэ типографияс ладинек эрьва кодамо тюссо газетань печатамс машина, – ёвтни главной инженерэсь В.А.Моисеев. – Сонзэ ускинек Рыбинскойстэ. Течи минек типографиянь цехтнесэ ашти неень шкань оборудования. Тонавтнинек кондитерской изделиятнень туртов упаковкань нолдамонть.

В.А.Моисеевень республикасонть асодыцянзо арасть. Сон ламонень лездась полиграфической тевень тонавтнемстэ.

– Владимир Андреевич – монь кеме нежем, – тешкстась «Красный Октябрь» типографиянь генеральной директоронь тевень топавтыцясь М.А.Напалков. – Сон эсь тевень содыця, ёроков, прянь а покшкавтниця.

Владимир Андреевич – трудонь ветеран, МР-нь промышленностень заслуженной роботник, казезь МР-нь Почетонь грамотасо.

Елена Петровна нинзэ марто трясть-кастсть кавто эйкакшт. Антон кочкизе тетянзо кинть. Тейтерест, Екатерина, эсь тевень алкуксонь специалист. Сынст кавто нуцькаст.

Мон уцяскаван вадря ломаньсэ, – видькстась Владимир Андреевич.

Ды сонзэ весе эрямозо тень кемевти. Вакссонзо эрить ды важодить ансяк истят. Паряк, те весемесь сень эйстэ, сон сонсь – паро, трудонь вечкиця ды мелень витиця ломань.

… В.А.Моисеевнень пры юткошка, Юрий ды Алексей ялаксонзо марто ардыть тиринь велев аванзо Анна Васильевнань содавтомо. Сонензэ 83 иеть. Пингензэ перть тиринь велесэ тонавтсь эйкакшт. Тесэ сынь кудосот, тестэ сынь саить вандынь чинтень вийть!

Тешкстасынек, «Красный Октябрь» республиканской типографиянь главной инженерэсь В.А.Моисеев кеме ояксчисэ эри минек «Эрзянь правда» газетань теицятнень марто. Сон лезды газетанть седе мазыйстэ нолдамосонть. Ёвтни мелензэ-арсеманзо те эли тона лисиця номерэнть коряс. Мезесь ацирьгавты сонзэ, сень толковасы вейсэ газетань нолдыцятнень марто, теде мейле печатасызь «Эрзянь правда» газетанть. Владимир Андреевич тенень яви покш мель. Ансяк печатасызь газетанть, В.А.Моисеев таго кедезэнзэ сайсы «Эрзянь правданть», ванкшносы  сонзэ педе-пес ды мереви: «Парсте лиссь!» Ансяк теде мейле ойми.

2019 иень июлень 15-це чистэ Владимир Андреевич Моисеевнень топодсть 60 иеть. Оянзо, малавиксэнзэ ёвтасть юбилеенть кувалма ды нейгак ёвтыть пси поздоровт ды лембе валт, конатненень вейсэндятано миньгак, «Эрзянь правда» газетань теицятне. Арсетяно тензэ кеме шумбрачи, уцяска, важодемасо од изнявкст!

                     

 Пётр Зиновьев

 
Эрзянь койтнень-кирдатнень ванстозь

Кочкурбуень Сурвелесэ ули морокуро, конась кандтни «Сурань Зорюват» лементь. Морыцятнеде тесэ аволь ламо, ансяк эсь тевенть ветить эрзянь койтнень-кирдатнень ванстозь. Те иестэнть аватне пурнасть шкинемань од состав. Ансяк кода икелеяк, сынь эрьва покшчистэ кенярдовтыть райононь ды эсь велень эрицятнень – морсить эрзянь кезэрень морот.

Ансамблянь аватне куш кодамо кенярксчисэ явовить лиятнень эйстэ эсь мазый, сельмс каявиця, эрьва кодамо тюсонь палятнесэ. Ды кода сынсь кортыть, те аволь ансяк сцена лангс лисема оршамопель, ней те уш вечкевикс ды ойментень малавикс оршамо. Аватненень, конат аволь пек умок пештизь-одкстомтызь морокуронть, палятне сатотсть мик васенце морыцятнень пельде.



«Сурань Зорюват» ансамблянть вадрясто содасызь аволь ансяк эсь велесэнть ды районсонть, весе республиканть келес. Шкинемань эрямо кист ушодовсь ютазь пингень вейксэньгеменце иетнестэ. Ды морамонь кезэрэнь коесь Сурвелесэ ванстови течинь чис.

– Минь вельмевттяно эрзянь кезэрень моротнень. Эдь эрзянь келесь – те тиринь, вечкевикс ды мазый кель, – ёвтни «Сурань Зорюват» ансамблясо морыцясь Галина Латышева. – Мон вана монсь мокшаван ды зярдо карадо-каршо аравтан эрзянь ды мокшонь кельтнень, эрзянсесь тень маряви седе мазый, седе моравикс. Зярдо васенцеде мария, кода Сурвелень эрицятне кортыть, пек дивинь, мекс сынст эйкакштне виздить кортамс тиринь кельсэ. Эрзянь келесь пек мазый, весемесь неяви карадо-каршо аравтомадо мейле. Монь койсэ, эрьва раськенть келесь – покш сюпавчи ды сынст эрявить ванстомс, тонавтомс эйкакштнень кортамо тиринь кельсэ ды ванстомо покштятнень-бабатнень койтнень-кирдатнень.

«Сурань Зорюват» морокуросонть аватне зярс морсить ансяк ниленест. Вейкесь эйстэст – Татьяна Владимирова. Кадык сонсь рузава, эрзянь моротнесэ тонавтни седейшкава. Корты: кодамояк теньсэ стакачи арась. Койсэнзэ, сон теи вадря тев – лезды велень аватненень ванстомс келенть.

Сурвелень шкинемань кудосонть моронь гайгемась а лоткси. Тесэ морсить зярыя вейсэндявкст. Эрьвась ловови веленть чачокс, самай ломантнень туртов алтазь весе сынст шкинемаст.

– Минь эсь тевсэнть бажатано кандомс ломантненень паро ёжомарямот, – корты Сурвелень Культурань кудонь важодицясь Александр Юркин. – Эрьва покшчис анокстатано концерт, теке марто иезэнзэ зярыяксть ютавттано покш вастовомат-концертт. Ды «Сурань Зорюват» морокурось минек свалшкань лездыця.

Меельце шкасто ансамблясь аноксты ды невти эсь ёрокчинть морамонь эрьва кодамо пелькстамотнесэ. Кадык аватне аволь ламонест, оймень толост сатышка. Алтыть – икеле од тёкшт!

 

Анокстызь: Юлия Еремина,

Юлия Мамаева

(НТМ телеканалось).

 

 
Зярдояк илязо коське Эрзянь лисьмапрясь!

Россиясо, маряви, арась истямо тарка, косо авольть эря эрзят.  Ламо пингень перть эрьва кодамо тувталонь кувалма сынь срадсть весе модамасторонть келес.  Превсодыйтне те шкас пря яжить, косоль минек покштятнень-бабатнень эрямо юртост.  Веенст эрзятне эрямо юртокс ловить Обран  ошонть  ды сонзэ перька таркатнень.  Сон, паряк, истя улияк.  Теде кортыть оштнень, велетнень, лейтнень-эрькетнень, пандотнень-латкотнень леместкак.  Неть таркатнес понгозь, эрьва  косто  вастат «лей», «кужо», «биё» вал марто лемть. 

Эрзянь вал марто велеть весемеде ламо Лукоянова буень модатнень лангсо. Тесэ, келя, 68 велеть. Икеле сындест седеяк ламольть.  Кода эрьва косо, ков ие сынь чамить ды чуролгадыть.  Кадовозтнень ютксто эрзянь велетнеде ней тосо – 14. Неть: Атиньбиё, Салманьбиё, Аоре (Шандрова), Иваньбиё (тесэ чачсть эрзянь содавикс ломантне Д.Т.Надькин, Н.Ф.Мокшин), Чирьгужо, Пичингуши (те велестэнть лиссть превсодыйтне З.И.Клементьев, М.И.Сумгин, тонавтыцясь А.А.Куманев), Николаевка. Ёвтазь велетнесэ эрямось зярс эзь лотка. Производствась тосояк  эно икелень коряс пек седе лавшомсь, велетне ялатеке  пря а максыть,  кыжнэзь-выжнэзь  «лексить».  Тосонь эрицятне трить-андыть эсь пряст кода маштыть. Лия велетнень   – Кельдюшвеленть, Килей Веленть – учи секе уцяскась, кодамос пачкодсть Мессингась ды Пандасось. Васенценть таркасо ней касы тусто вирь, омбоцесэнть эзь кадово вейкеяк эриця.  



Ули таго вейке веле. Сонзэ лемензэ рузтнэ полавтнесть ды аволь вестькак. Васня мерсть тензэ Вере Пичингуши, мейле лемдизь – Ново-Архангельскоекс. Ней содасызь кода Новоселки веленть. Сон ашти Трокспал пандочиресэ. Веленть эйстэ аволь васоло «Лукаш» кужось, козонь ламо пингень перть эрзятне пурнавкшность Пазнэнь озномо. Сонзэ куншкасо – покштояк покш кев, конань лангсо кирвазтнесть штатолт, ютавтнесть кизэнь озкст. Те тарканть эйстэ лия ёно чави лисьмапря кувака лем марто: Кельмелисьмалей. Ведезэ эрексиядо ванькс ды  кельме. Самай сонзэ перька кужось кочказель  озксонь ды «Эрзянь лисьмапря» фестивалень  ютавтнема  таркакс.  Васенце фестивалесь ульнесь вейксэ иеде икеле. Тедеденсесь – вейксэцель. Сон ютась медьковонь 20-це чистэ.

Эйзэнзэ, кода свал, пурнавсть ламо ломанть аволь ансяк эсест областень буетнестэ, састь лия таркастояк: Татарстансто, Башкортостансто, Самарасто, Чувашиясто ды, нама, Мордовиястояк. Ладявозь коень коряс, инжетне васня андозельть теске пидезь ямдо, куярсалведте. Кинь мелезэ ульнесь симемс пси чайде, сон лакавтозель, седикеле ладсо, лезэв тикшестэ.

Кода икелеяк, фестивалесь ушодозель Россиянь масторкоцтонь кепедемасто. Тедеде Пазнэнь ознома коесь ютавтозель эсест вийсэ. Озатянь таркас Мааронть лангс кузнесь Нижегородской ёнксонь национально-культурной автономиянь прявтось М.И.Безаев. Превс путома валт ёвтась Лукояновасо эрзянь музеень прявтось Н.И. Аношкин. Мейле весе сыргасть Мааронть перька. Виде, сонзэ лангс од мода кияк эзь кая. Улема, ломантне стувтсть сонзэ саемс эсест эрямо таркасто ды кандомс Мааронть лангс. Апаколь озно покштянь-бабань кшись-медеськак.

Тень лангс апак вано, сонсь вастовомась ютась лембестэ ды седейшкава. Лембе валт, пси поздоровт ёвтасть Мордовиясто сазь покш инжетне: МР-нь Культурань, национальной политикань, архивень тевтнень коряс министрась А.М.Чушкин, Регионъютконь мокшэрзянь раськень общественной вейсэндявксонь прявтось Ю.А.Мишанин, исполкомонь прявтось А.С.Лузгин, тосонь прявттнэ-азортнэ.

Мейле кужось пешкедсь мазый ды гайтев мородо. Вейке омбоце мельга кужонть куншкасо ладязь сценанть лангс лиснесть  эрьва ёндо сазь ансамблятне, ськамост морыцятне. Весень туртов пародояк паро казнекс ульнесть моротне, конатнень серьгединзе Дзержинск ошсто морыцясь Мария Попова.

Сонсь кужось, кона истякак мольсь менель ало музей ёнов, мазылгавтозель од скульптурасо, конатнень теизь Н.И.Аношкин цёранзо марто. Те – эрзянь «Ковкерькс» скульптурань композициясь. Зярс сон педе-пев апак прядо. Кемгавтово скульптуратнень эйстэ теезь ансяк сисемтне. Кода алтась Н.И. Аношкин, сынь улить анокт «Эрзянь лисьмапря» кеменце фестивалентень, кона карми улеме сы иестэ. 

Мекев сыргамодо икеле, Кельмелисьмалеенть ванькс ды тантей ведтензэ симезь, кода моньгак, истя лиятненьгак превс, секень вант, састь истят мельть: кадык зярдояк а коськи  Эрзянь лисьмапрясь, кадык сон карми чавомо пингеде-пингес!

 

Раиса Щанкина

 
Нолдак вайгель, «Эрзянь ава»!

 Ломанень оймесь сюпав шкинемасо…

Ламоксть арсекшнинь те кевкстеманть лангсо: мезекс Пазось максы сонзэ ломанентень? Те уцясканть – лия сельмсэ-вановтсо ваномс весементь лангс, ды лия, седе пшти ды редиця неемасо неемс пертьпельксэнть? Домка, смустев  валсо, эрьва кодамо тюссо-артсо невтемс мазычинзэ, ашо локсеекс оймес валгиця вайгельсэ тешкстамс гайгеманзо,  ёроков кедьтеевкссэ-челькссэ кецневтемс лиянь седейть…

Улема, тень лангс сеске каршо вал а муяткак. Ды кинь иля кевксте, мелензэ ёвтасы эсексэнзэ.  Эрьвась сонсь содасы эсензэ потмонзо ды лиянень а неявиця неевтьсэ ваны весементь лангс. Эсень койсэ ёвтаса вейкенть: шкинемань чанстенть марто ломанентень седе шожда улемс масторлангсонть, цидярдомс весе варматнень-даволтнэнь каршо…

Паряк, Пазось истя шождалгавты эрямонок?

 Паряк…



Республикасонок ламо эрьва кодат ансамблят, лиякс меремс, моронь кужот. Ламо истяткак, конат каштансто кандыть эсь тиринь кельсэ путозь лемест, кеме пирявтокс аштить раськенек ванстома тевсэнть, а мерить куломс тензэ, стувтомс кэзэрень койтнень-кирдатнень, туемс эрзянь раськентень аулемас.

Те истя. Леместкак неть кужотнень виде смусть мартот – эрзякс гайгицят: «Эрзянь тейтерь», «Эрзянь ава», «Литова», «Килейне», «Дигаля»… Ды ялатеке, тиринь ёнкссто-велестэ,  зярдо содасак эрьва морыцянть, кода лангс ваномс, истя кудолемень ды коронь коряскак –  те седеяк питней ёжомарямось – алкуксонь, седейшкавань, седеймалавиксэнь.

 Меельце ёвтамось алтави Дубенка ёнксонь Кочкурвелень, монь тиринь Кочкурвелень «Эрзянь ава» ансамблянть лемс! Морыцянь кужонть чачома шказо – ютазь пингень кавксоньгеменце иетне.

Важодсь сеть шкатнестэ Кочкурвелень школасо Нина Николаевна Наумкина од эрзянь авинесь. Важодсь пионерэнь вожатоекс. Сонсь морамос содыця-маштыця, тонавтсь морамо эйкакштненьгак. Те шкас ашти мельсэнь, кодамо мельспаросо эйкакштне якильть морамо «Колокольчик» ансамбляв, «Лошкари» кужов пенчсэ седямо, киштеме. Нина Николаевна пштистэ содась-тешкстась сень, ульнесь-арасель эйкакшонть «вайгельс» марямозо, ды апак маняво кочксесь истят талантовтнень юткстонок. Кочксесь ды явнось вайгелень коряс – васенце вайгельксэвтнень – ве ёнов, омбоце вайгельксэвтнень – истя жо вейс, лияв. Сонзэ пингстэ кармастькак тердтневеме эйкакштне киштемань ды морамонь кужос.

Зярдо велень библиотекаресь тусь пенсияс, Нина Николаевнань аравтызь тарказонзо. Тесэяк Нина Николаевна эзь пота эсь шкинемань обуцядонзо. Кармась тердтнеме ды морсевтеме аволь ансяк эйкакштнень, велень «вайгелев» аватненьгак пурнылинзе морсеме, седей витеме. Маштсь сон пурнамо ломантнень вейс. Палсь сонсь, кирвазтсь лиятненьгак. Ды зярдо 1986 иестэ Кочкурвелесэ васенцеде ютавтозель   фольклоронь покшчись, неть аватне вейсэ лиссть морамо «Эрзянь ава» морыцянь кужо лементь ало.

…Эсень мельсэяк ашти, ульнесь Троицянь чи, велень клубонть ваксс пуромсть ламо ломанть.  Гайгсть мазый морот, невтевтсть киштемат, эйкакштне нурсесть нурямосо… Од тейтертне эрзянь оршамосо, «наряжазь» килейне марто ютасть велень ульцятнева, морсесть морот, кодасть каштазт, конань мейле нолдызь лейс. Монгак ульнинь ютксост.

Тусь велень эрицятнень ды буень прявттнэнь мельс те чинь ютавтомась. Кармасть истят покшчить ютавтневеме эрьва иень кизна.

 Ды а стяко! Те мероприятиясонть невтевильть ламо стувтовозь кезэрень койть, морсевильть умок уш а морсевиця морот, ледстявильть кезэрень свадьбань урнемат, ютавтовильть пелькстамот, тешкставильть велень сехте мазый, тевень  вечкиця ды ёроков ломантне...

 А стувтома, велетне сеть иетнестэ ков седе сюпавольть ломаньсэ. Чуросто одтнэ туильть ошка, седе ламотне муилизь таркаст теске, велесэ. Секскак, «Эрзянь ава» кужонь морыцятне весе эсенек велень ульнесть, седе ламотне юткстост важодсть скалонь потявтыцякс. Сынь пижень валскене  моразь сыргильть важодеме, ды те стака тевсэнть лездыцякс тенст ульнеськак – МОРОСЬ! Лемест неть «эрзянь аватнень»: Лидия Ивановна Кияйкина, Вера Леонтьевна Наумкина, Елизавета Михайловна Слушкина, Лидия Яковлевна Наумкина, Мария Петровна Наумкина, Елена Павловна Стволкова, Анна Федоровна Слушкина. Ней ютксост истяткак улить, кить уш тоначисэть.

Ламот вана нейгак седейшкава видькстыть: неть морсемкатне марявсть тенст оймень витицякс – вий макссть, мель кепедсть, кудонь-чинь ды эрямонь сталмотнень лангс кармавтсть ваномо  седе шожда вановтсо.

 Содазь, морыця аватнень уцяскаст а вейкетельть. Эрьванть эрямозо мольсь-ладявсь эсексэнзэ. Нама, ульнесть аватнень ютксо кить ськамост кирдильть раськест-эйкакшост, кандсть довань сталмо. Лиянть эйкакштнеде ламольть, кудонь тевтнеяк сатышкальть. Весе тевтне теевильть кедьвийсэ, неень шкань «автоматикась» зярс эзь пачколекшнеяк велезэнек. Секскак, морось ды морамонь кужосо ялгацек вастовоматне лездасть ды шождалгавтсть авань а шожда чанстенть.

Шкань ютазь неть вастовоматне теевсть паро коекс. «Эрзянь ава» ансамблясь кармась тердтневеме буень эрьва кодамо морамонь покшчис, ды кармась улеме содавиксэкс. А стяко те кужось котоксть ульнесь республикань фольклоронь коряс пелькстамонь лауреатокс. Ды зярдо ютавтовсь Кочкурвелень 300-це иень топодемань чачома чинь тешкстамось, велезэнек пачколесть мик омбо масторонь моронь кужоткак. Сакшность морыцят Эстэнь масторсто, Суомистэ, Чувашиянь Порецкой райононь аватнень марто мик сюлмавсь ояксчинь кеме сюлмо. Седе тов Дубенка ёнксонь Кочкурвелень «Эрзянь авась» кавксть ульнесь кедьсэст инжекс (сеть иетнестэ Чувашиянь Порецкой районсо ульнесь  национальной культурань центра), сеедьстэ сёрмалесть карадо-каршо сёрмат. Неть сёрматне сакшность Н.Н.Наумкинань лемс. Вана мезде сёрмалесть  ве ёндонь оятне:

«Здравствуйте, уважаемая Нина Николаевна! С большим приветом и массой наилучших пожеланий к вам участники Народного хора из села Напольного, а так же работники Дома культуры.

Немного о нашем коллективе. Мы продолжаем петь, веселиться. Ездили в город Чебоксары на фестиваль «Родники Поволжья», в Нижегородскую область на праздник национальных культур, а так же были выезды по району.

Нам так же интересно узнать о вас. Чем занимаетесь, как поживаете. Мы до сих пор вспоминаем наши  встречи с вами. На память о нашем празднике высылаем вам фото. Надеемся, наши встречи будут продолжаться.

Нина Николаевна, если у вас есть возможность, вышлите, пожалуйста, нам любой сценарий на мордовском языке. В настоящее время мы готовим программу полностью на мордовском языке, хотим показать эпизод «мордовской свадьбы», не знаем, как получится, для нас это очень трудновато.

«Народный хор» передает привет всем певицам-дояркам, всему вашему коллективу, баянисту, главе местной администрации и лично вам…

С искренним уважением к вам, Т. Пиняева».

А ютават сень вакскаяк, «Эрзянь аватнень» васенце оршамопелест неенсетнеде пек явовсть. Морыця аватнень васенце оршамкаст малав весе ульнесть эсь кедьсэ стазь-викшнезь, пулайнек-мезнек (мейле сынст максызь музейс ды ставтсть лият – весенень вейкетть, кинь ули мелезэ, пачкодеде ды варштынк, сынь аштить пек питней экспонаттнэнь ютксо Кочкурвелень школань музейсэ).

«Эрзянь ава» ансамблянь аватнень течинь эрзянь мазыйдеяк мазый оршамопельтнеде кортамсто ялатеке тешкстама: нейгак те ансамблясо морыця аватнень оршамкатне а ёвтавитькак кодат парт, ды тюсосткак – чипаекс манейть. Чопода-якстере, атямарень тюссо юбкатнень велькска оршави ожо чипаень кондямо паля, кирьгаваст морыцятнень – човалят-эрьгеть, прясост – цецянь каштазт, карксамгаст карксазь чопода-пиже чурькалопань кондямо икельгапацят.

Улема, тесэяк ули кекшезь смусть?

Мезде морсесть Кочкурвелень «Эрзянь ава» ансамблянь аватне? Кода уш ёвтазь, моронь паргост пешксель кезэрень эрьва кодамо мородо, урнемадо, конатнень нейгак вечки кунсолыцясь.

Ды, алкукс меремс, ней сынь седеяк невтить ды редявтыть питнейчист.

 Мекс истя, мертядо?

Састь шкат, зярдо эрзятнень ютксто кармасть мукшновомо истят алкуксонь «патриотт», конат эрямосткак мик аволизь жаля, максовлизь тиринсенть кисэ. Сынь байгень байге пурныть-таштыть кезэренсенть – ацыть течис тенст ледстнемань-вельмевтемань кить-янт.

Секскак, ванстозь-ванстозь канды эсь питней репертуаронзо «Эрзянь ава» кужось течис. Кода икелеяк, тозонь пуромить велень сехте вайгелев аватне ды ютавтыть тошначист-мелявксост гайтев-лужаня эрзянь моронь морамосо. Оймесь свал веши лекстямо. Кодамо течись илязо уле, оймень эрямось ашти аволь ансяк ули-паросо, сюпавчисэ ды тантей ярсамопельсэ, сонензэ теке кошт эряви – моро, лембе вал ды кеместэ сюлмиця ояксчи.

 Мейле те ансамблясонть ульнесть лия ламо морыцят, сынст лемтне те шкас потсон: Ольга Ивановна Наумкина, Татьяна Михайловна Самаркина, Татьяна Дмитриевна Афонькина, Прасковья Андреевна Кочеткова, Татьяна Яковлевна Наумкина, Нина Николаевна Наумкина, Валентина Васильевна Шлабина, Галина Ивановна Наумкина, Татьяна Александровна Атемасова…

 Течи вана «Эрзянь авань» морыцятне: Елена Николаевна Дырина, Галина Геннадьевна Наумкина, Наталья Ильинична Кочеткова, Мария Николаевна Костригина, Надежда Васильевна Поняева, Раиса Петровна Некрасова ды Кочкурвелень прявтоськак, Людмила Ивановна Слушкинаяк, ютксост. Лемесь вана кадовсь теке – «Эрзянь ава»! Ды те пек паро!

Полавтови шкась, ламонть мезенть лангс ваномсто течи сайтянзат нусманячи – те «ламось» кадовсь ансяк ледстнемакс… Ансяк а полавтови «Эрзянь авань» морамо лувось. Ды гайгить горниповокс «Вирь чиресэ», «Косо, косо да Утяша…», «Кавто цёрат тикше ледить», «Адядо, ялгат…» моротне, свадьбань  лужаня урнематне.   Шкань коряс полавтови морыцятнень репертуароськак. Кезэрень моротнень гайгемаст жо нейгак эждить  кунсолыцянь седей ды витить ойме. Ды кармить витеме свал. Эдь сынь – минек, эрзякс гайгицят, тиринь кельсэ моравикс кезэрень морот, зярдояк аютавтовикст лия, омбо масторонь кельс…

Любовь Дергачева

 
Сынст вейсэндинзе «Инеркась»

«Инерка» эрькенть парсте содасызь аволь ансяк минек республикань, сонзэ томбале эрицятнеяк. Сон ашти мазыйдеяк мазый таркасо, вирь потсо. Тесэ юткошкаст лезэвстэ ютавтнить, шумбрачист вадрялгавтыть республикань эрицятне ды сонзэ инжетне.

Истямо лем ало ютавтневи Регионъютконь од ломанень образовательной форум. Сон панжтневи Мордовиянь МЧС-нь лагерьсэнть, кона ашти Сура леенть эйстэ аволь васоло. Эйзэнзэ сакшныть од ломанень движениянь, общественной организациянь ды объединениянь, тонавтницянь ды студентэнь самоуправлениянь органонь, аволь формальной од ломанень сообществань, од ломанень парламентэнь ды правительствань, волонтёронь организациянь... представительтне. Нурькинестэ, минек республикань ёроков, превей од ломантне, паро тевень ушодыцятне. Тедеде те форумось ютавтозель вейксэцеде ды эйзэнзэ сакшность сисемзядто ламо од ломанть. Ниле чить республикань вандынь кирдийтне ютавтнесть спортивной пелькстамот, кунсолость лекцият, невтсть эсь ёрокчист нацпроектэнь анокстамосо. Од ломантненень пек вечкевсь ВЦИОМ-нь директоронть Валерий Федоровонь ёвтнемазо.



Регионъютконь од ломанень IX образовательной форумонть пекстамо сакшнось МР-нь Госсобраниянь Председателесь В.В.Чибиркин

Владимир Васильевич ванкшноманть ушодызе «Патриоты России» площадкастонть. Мартонзо ульнесть РФ-нь Федерациянь Советэнь членэсь Владимир Литюшкин, Саранскоень 1941-1945 иетнень войнань ды трудонь подвигень мемориальной музеень директорось Николай Кручинкин. Тесэ теезель Советской ды Россиянь армиянь вооружениянь ды оршамопелень выставка, тесэ жо военно-исторической реконструкциянь фотографиятне. Реконструкциясь алтазель героентень-комсомолецэнтень Игорь Косаревнень.

– Игорь Косаревень чачома ёнксозо – Зубова-Полянань районось, – ёвтни Николай Кручинкин. – Выставкась ламонень вечкевсь. Од ломантне ды инжетне кармасть содамо седе, кода тюрсть минек ёнксонь солдаттнэ немецко-фашистской захватчиктнень каршо.

В.В.Чибиркин покш мель явсь «Бессмертный полконь» фотографиятненень.  Сон лездась понгавтомс карандашсо рисовазь Сергей Терешкинэнь портретэнть, кона Краснослободскоень районсто. Сергей Терешкин Ине Отечественной войнасо рисовась Якстере армиянь солдаттнэнь чачост ды маштсь 80 ятт.

– Од ломантненень, вешницятненень пек лездыть тонавтыцятне Виктор Ермушев, Иван Селеверстов, Сергей Косынкин, Лидия Силиванова, – полады Николай Андреевич Кручинкин. – Минек площадкасонть весемезэ 135 ломанть.

Седе тов МР-нь Госсобраниянь Председателесь В.В.Чибиркин теевсь содавиксэкс тонавтницянь Россиянь движениянь (РДШ) лидертнэнь тевест марто. Сынь важодить вадрясто ды тевесткак молить парсте. В.В.Чибиркин вачкась символической аволь покш пирамида, кона теезь чувтонь зярыя элементстэ ды невти РДШ-нь вейкине команданть, сетнень команданть, кинень виевгавтомс Мордовиясо од ломанень движениянть.

Форумсонть од ломантнень марто ульнесть, кода кортыть, «сиянь» волонтёрткак. Сынст улить эсест проектэст, конатне лездыть аволь уш од ломантненень эрьва кодамо тевсэ важодемстэ.

… Ды ушодовсь проектэнь презентациясь. Вай, зяро тесэ одось ды эрявиксэсь, техническоесь ды инновационноесь! Тесэ тонавтыцятненень лездамопельть, штобу сынь маштовольть тееме уроконь онлайн-картат. Истя жо улить тонавтницятненень лездамопельть, штобу сынь, бути истя можна меремс, «поревельть» научной гранитэнть мельспаросо ды шканть марто велувсо. Нурькинестэ меремс, сась шкась образованиясо совавтомс эрямос од технологиятнень, ды од ломантне кортыть: сынь тенень анокт, а вана тонавтыцятне зярс а капшить.

Тешкстасынек, форумсонть од ломантнень весемесь талновтсь. Невтемга, кода ванськавтомс ульцятнень шукштнестэ.

– Мон тей сакшнынь эрьва чистэ, – ёвтни Покш Березникень школань тонавтыцясь Елена Забатурина. – Эдь тесэ минек школань малав комсь эйкакшт-юнармеецт. Ванан эйкакштнень лангс ды кецян сынст вандынь чинтень. Истят промкстнэ вейсэндить, лездыть таштамс содамочитнень. Паро, ютавтневить истят мероприятиятне, ков тердтневить содавикс ломанть.

Палаткастонть-студиястонть В.В.Чибиркинэнь кедьстэ «Инерка» TV од ломанень каналось сайсь интервью. Тесэ кортасть од специалисттнэде, од ломантнеде… «Республикань предприятиятне пек учить сетнень, кить анокстазь парсте, – отвечась инжесь. – Ламо од перспективной ёнкст. Эряви покшолгавтомс трудонь производительностенть. Ломантне важодевельть тосо, косо тевс нолдави интеллектэсь. Улить класст, косо тонавтыть весементень, мезе вешеви. Оштё весть мерян, минек республикань предприятиятненень эрявить од ломанть, конатне эрить, тевест ладить неень шкань вешематнень лувсо».

Меельце площадкасонть МР-нь Госсобраниянь Председателесь В.В.Чибиркин тердсь лездамс сыретненень ды шнась сетнень, кить вешнить вирьс-козонь кадовозтнень. Ды те оштё аволь весе. В.В.Чибиркин башка таркасо тейсь ледстнемань ярмак ды кекшизе сонзэ зепес. Ушодовсь форумонь пекстамось. «Оштё весть весенень шумбрачи! Шумбра чокшне! – таго корты Мордовиянь Госсобраниянь Председателесь В.В.Чибиркин. – Минь теевинек содавиксэкс весе площадкатнень марто, сынь эрьва кодат. Тынк ули весемесь ёрокчинк невтемга, кастомга. Покш сюкпря тенк сень кисэ, мезе тейтядо. Тынк лангсто пример саить весе од ломантне. Конкурстнэ а ютнить изницявтомо, но изнявицят арасть. Кеме шумбрачи, уцяска! Се, мезе арсиде, топавтовозо!» Почетонь грамотатне ды шнамонь конёвтне муизь эсь геройтнень, налксезевсь мельстуиця музыкась.

Пётр Зиновьев.

 Покш Березникень район

 
<< Первая < Предыдущая 1 2 3 4 5 6 7 8 9 10 Следующая > Последняя >>

Новости

Единороссы Мордовии провели родительскую приемку школьных зданий
В рамках проектов «Единой России» «Новая школа» и «Крепкая семья» с 20 по
22 августа в Саранске прошла акция «Родительская приемка». Ее цель – проверка
школ на предмет их готовности к новому учебному году. Участниками акции
стали депутаты Совета депутатов городского округа Саранск, родители, члены
партийного актива.
Партийцы посетили школы, находящиеся в Ленинском, Октябрьском и
Пролетарском районах Саранска. Результаты проверки показали, что школы
полностью готовы к началу нового учебного года.




Подробнее ...
 
Турчак: «Единая Россия» предлагает ввести повышающий коэффициент 1,4 для выплат по программе «Земский доктор»
«Единая Россия» готова в короткие сроки внести в законодательство 
необходимые изменения, направленные на повышение качества первичной 
медицинской помощи. Речь идет о введении повышающего коэффициента 
1,4 для выплат по программе «Земский доктор» для особо сложных и 
труднодоступных территорий и законодательном закреплении института 
наставничества для молодых врачей в течение не менее трех лет. Об этом 
заявил секретарь Генерального совета «Единой России» Андрей Турчак.
Подробнее ...
 
В «Единой России» подготовят предложения по освобождению учителей от излишней административной нагрузки
В «Единой России» перед началом учебного года подготовят
предложения по решению проблемы избыточной отчетности педагогов. Свои
инициативы сможет направить любой желающий через сайты региональных
отделений «Единой России» до 28 августа, а 4 сентября планируется
обсудить их с участием всех профильных ведомств, экспертов,
представителей родительского сообщества на федеральной дискуссионной
площадке «Благополучие человека». Об этом заявила первый заместитель
секретаря Генерального совета Партии, депутат Госдумы Ольга Баталина.
Подробнее ...
 
Турчак просит Президента РФ представить к награде бортпроводницу Ан-24 авиакомпании «Ангара»
Вице-спикер Совета Федерации, секретарь Генерального совета 
«Единой России» Андрей  Турчак выступил с предложением наградить 
бортпроводницу самолета Ан-24 авиакомпании «Ангара» Елену  Лапуцкую, 
которая 27 июня спасла 43 пассажира самолета, потерпевшего крушение в 
аэропорту бурятского поселка Нижнеангарск. Соответствующее обращение 
он направил Президенту РФ Владимиру Путину.
«Героический поступок бортпроводницы самолета Ан-24 
авиакомпании «Ангара» Елены Лапуцкой, которая спасла из горящего 
самолета 43 пассажира, рискуя собственной жизнью и имея серьезные 
травмы, достоин награды. Безусловно, такие случаи необходимо отмечать на 
государственном уровне», - уверен Турчак.
«Желаю Елене Лапуцкой скорейшего выздоровления и возвращения в 
профессию», - заключил вице-спикер Совфеда.
Отметим, 27 июня самолет Ан-24 авиакомпании «Ангара» из-за отказа 
двигателя совершил жесткую посадку в аэропорту бурятского поселка 
Нижнеангарск, и врезавшись в здание очистных сооружений, 
загорелся. Бортпроводница Елена Лапуцкая в одиночку сумела быстро 
открыть аварийные двери и помогла людям выбраться из салона. 
Благодаря этому, никто из 43 пассажиров не погиб. Командир корабля 
и бортмеханик погибли сразу, второй пилот покинул самолет через 
аварийный люк горящей кабины.
 
К лету 2020 года в рамках акции «Единой России» по лесовосстановлению будет высажено более миллиона деревьев
В рамках акции «Единой России» по лесовосстановлению будет
высажено более одного миллиона деревьев до лета 2020 года. Первые
лесовосстановительные мероприятия начнутся уже в сентябре-октябре этого
года в регионах, климат которых наиболее благоприятен, и продолжатся
весной. Первыми участниками акции станут лесные регионы Сибири,
Дальнего Востока и Северо-Западного федерального округа: Хабаровский,
Забайкальский, Приморский, Красноярский и Алтайский края, Республики
Алтай, Бурятия и Карелия, Амурская, Иркутская, Омская, Томская,
Новосибирская, Архангельская и Новгородская области.
Подробнее ...