Рубрикатор

Спорт Эрямованть – спортонть марто!
Эрямованть – спортонть марто!

Сонзэ аволь ансяк Покш Березникень районсо парсте содасызь, республикань томбалеяк. Эсь 72 иетнень лангс апак вано, эрьва чистэ чийни 5 вайгельпеть, виевгавты пекекиськензэ, телень перть ардтни сокссо пиче вирьга. Пётр Семёнович Прокин неень шкане важоди «Большеберезниковская ДЮСШ» ДО МБУ-нь прявтокс. Те школась ушодсь важодеме 2011 иестэ. Панжозель Пётр Семёновичень ушодксонзо коряс. Школасонть эсь спортонь ёрокчист эрьва кодамо видэнь коряс кастыть-кемекстыть малав колмосядт эйкакшт. 

 

Те школанть секцият важодить райононь велетнесэяк. Вана Шугур велесэ эйкакштне покш мельсэ сакшныть волейболсо налксемань секцияв, конань вети физкультурань тонавтыцясь Николай Манин, Рузонь Найман велесэ эрямос кеместэ совасть футболсо ды волейболсо налксематне, Починкасо – шожда атлетикась ды сокссо чийнематне, Марьяновкасо эйкакштне вечксызь волейболсо налксеманть, Покш Березникень велень эйкакштне парсте налксить шахматсо. Теньсэ, нама, покш таликазо 1 № средней школань директоронть И.А.Кулагинэнь. Шахматсо налксемань секциянть вети малав эрьва чистэ. Тень кувалма Покш Березникень шахматисттнэ – республикань эрьва кодамо пелькстамонь изницят.
Покш Березникень велень 2 № средней школасо эйкакштне покш мельсэ тонавтнить сокссо чийнеманть ды шожда атлетиканть. Тенень тонавтыть М.Н.Белоглазов ды И.С.Никонов.
– А мезть сёпомс, меельце иетнестэ райононь школатнесэ покш мель кармасть явомо физкультурантень ды спортонтень, – ёвтни спортонь ветеранось П.С.Прокин. – Те, нама, пек вечкеви шумбра коень ладицятненень. Минь весементь тейтяно, кода седе ламо од ломанть ояксчисэ эрявольть физкультуранть ды спортонть марто.
Сонсь Пётр Семёнович физкультурантень ды спортонтень покш мель явомо кармась 1956 иестэ, зярдо тонавтнесь Низовкань сисем иень школасо. Сон ёрокчинзэ невтизе икелень Козловкань райононть кисэ пелькстамосонть ды лиссь изницякс.
П.С.Прокин чачсь 1946 иестэ Отяжелень райононь Вере Чукало эрзянь велесэ.
– 8-10 класстнэсэ тонавтнинь Ламбаське велень средней школасо, – ледстни П.С.Прокин. – Тесэ карминь чийнеме, вечкеме сокстнэнь. Тенень монь тердсь физкультурань тонавтыцясь Михаил Васильевич Сироткин. 9-це классо тонавтнемстэ ульнинь чийнемань ды сокссо кирякстнемань коряс Отяжелень райононь чемпионокс.
П.С.Прокин Ламбаське велень средней школанть прядомадо мейле сась тонавтнеме Саранскоев. Документэнзэ максынзе Ламповой заводонть юрсо важодиця технической училищав. Училищанть прядызе парсте. Заводсо важодсь зярыя иеть.
– Тетям, Семён Алексеевич, чачсь 1917 иестэ. Сон ульнесь Ине Отечественной войнань участникекс. Эсь шкасто прядызе Козловкань педучилищанть, – ледстни Пётр Семёнович. – Тень мерекшнесь: «Поладык тонавтнеманть Мордовской пединститутсо».
П.С.Прокин арсезевсь: «Мекс эсь вийтнень а варчамс?!» Ды мольсь пединститутов. Кочкизе химиянь-биологиянь факультетэнть. Те ульнесь 1964 иестэ. Пётр Прокин сеедьстэ эрсиль аволь ансяк пединститутонь библиотекасо, истя жо спортонь залсояк. Пек вечкилизе шожда атлетиканть. Тенень сонзэ тонавтсь А.Г.Коровин. Од цёрась малав кавто иес таштась чийнемань коряс вадря результатт: Мордовиянь первенствасонть саизе 1-це тарканть 10 вайгельпетнень чиемстэ ды 2-це тарканть – 5 вайгельпетнень чиемстэ. Сонзэ невтевкстнэнь рединзе 50 вайгельпес спортонь якамонь коряс Олимпиадань сиянь призёрось Е.И.Маскинсков. Сон Пётр Прокинэнь совавтызе Мордовиянь сборной командас. Ды ушодовсть Россиянь пелькстамотнес анокстамотне. Ардтнесь Кисловодскоев, тосо кармась котоцекс. Мордовиянть ды Россиянть спортонь честензэ идесь эрьва кодамо пелькстамотнесэ. Пётр Прокин спортонь ёрокчинзэ невтизе Весесоюзонь студентэнь пелькстамотнесэ, конат ютавтозельть Московсо. Тесэ сон весемеде эрязасто чиинзе 20 вайгельпетнень.
– 1968 иестэ виевстэ анокстынь Олимпийской налксематнес, совавтозелинь Олимпийской сборной командас кандидатокс, – ёвтни П.С.Прокин. – Ормалгадынь ды командас эзинь понго.
П.С.Прокинэнь эрямонзо перть уцяскась ков илязо кандо, спортонть ды физической воспитаниянть эзизе кадно. Чийнесь ды чийни.
П.С.Прокин М.Е.Евсевьев лемсэ МГПИ-нть прядомадо мейле тусь эрямо Покш Березникень районов. Сестэнь РОНО-нь прявтось Н.И.Кеняйкин Пётр Семёновичень кучизе важодеме Рузонь Найманонь средней школав. Тонавтсь эйкакшт вейке, кавто иеть. Апак учне сась тензэ сёрма райононь военкоматсто. Сонзэ тердить служамо Советской Армияв. Тесэяк Пётр Семёнович ёрокчинзэ невтизе спортонь пелькстамотнесэ. Ульнесь полконь, дивизиянь, Армиянь, Дальне-Восточной округонь чемпионокс.
П.С.Прокинэнь валонзо коряс, спортсменэнть пек кадовтсть служамо седе товгак. Алтасть тензэ «сырнень пандот». Арась, велявтсь Мордовияв, важодеманзо поладызе Рузонь Найман велесэ. Ней Пётр Семёнович – завуч.
Тешкстасынек, П.С.Прокин косо ансяк эзь важоде! Ульнесь КПСС-нь райкомонь инструкторокс, Покш Березникень 2 № школань директорокс, завучокс, 13 иеть топавтсь Покш Березникень райононь образованиянь отделэнь прявтонь тевтнень. Спортонть марто жо свал эри ояксчисэ.
2014 иень мартсто Пензасо ютавтозель ветерантнэнь ютксо Россиянь чемпионатось. Тесэ ёрокчинзэ невтизе спортонь ветеранось Пётр Семёнович Прокингак. Финишентень сон сась колмоцекс. Мейле тусь Россиянь чемпионатов Смоленскоев. Тесэ саизе бронзань медаленть.
– Мельсэнь Россиянь чемпионатось, кона ютавтозель Чебоксарсо, – ёвтни П.С.Прокин. – 5 вайгельпетнень чиемстэ финишентень сынь омбоцекс, 10 вайгельпетнень чиемстэ ульнинь истя жо омбоцекс ды 800 метратнень чиемстэ колмоцелинь.
2016 иестэ П.С.Прокин участвовась Россиянь чемпионатсонть, кона ютавтозель Московсо – ЦСКА-нь физкультурань-шумбрачинь витемань комплекссэнть. Тесэ Пётр Семёнович весементь тейсь, штобу невтемс пек вадря результатт. 3 вайгельпетнень чиинзе весемеде эрязасто. Саизе васенце тарканть. Омбоцекс лиссь 800 метратнень чиемстэ.
2017 иестэ П.С.Прокин лиссь Россиянь чемпионокс. Сон весемеде вадря результат невтсь 10 вайгельпетнень чиемстэ. 800 метратнень чиемстэ сайсь «сия», 5 вайгельпетнень – «бронза».
– 10 вайгельпетнень чиемстэ мартон пелькстась масторлангонь ветексть чемпионось Анатолий Романов, – ёвтни спортонь ветеранось П.С.Прокин. – Меельце кругсонть сонзэ икельдия. Тенень сон истя абунгадсь! Кодамо-бути ветеран сонзэ ютызе. Теде мейле мартонзо оякс теевинек.
Аволь умок Пензасо ютавтозель ветерантнэнь ютксо Россиянь чемпионатось, ков сакшность спортсмент Россиянь 62 регионтнэстэ. Тосо эсь ёрокчист невтизь минек республикань «Мордва» спортклубонь спортсментнэ. Ютксост – Пётр Семёнович Прокингак. Истя, сон саизе 1-це тарканть 800 метратнень чиемстэ, 1500 метратнень – «бронзанть», 3000 метратнень чиемстэ истя жо изнизе «бронзанть».
Неть изнявкстнэнь экшсэ, нама, спортсменэнть виевдеяк виев анокстамось, эрьва чинь тренировкатне.
– Россиянь ды Мордовиянь чемпионаттнэсэ пелькстамотнес молемс косто ярмакт сайнетядо? – кевкстнян спортонь ветеранонть П.С.Прокинэнь.
– Республикань томбале пелькстамотнес пачкодемс тень лездакшность райононь Администрациянь прявтось Иван Иванович Игонов, МР-нь Госсобраниянь депутатось Виктор Александрович Кипаев, «Кировское» ООО-нь прявтось Михаил Владимирович Струенков. Ялатеке мон кеман ансяк эсень лангс, эсень пенсиянть лангс, – каршо валсо мерсь Пётр Семёнович.
2018 иень январень 27-це чистэ Санкт-Петербургсо ютавтозель Россиянь панжадо чемпионатось, кона алтазель Ленинградонь блокаданть прядовомантень. П.С.Прокин неть пелькстамотнес анокстакшнось кеместэ. Ды а стяко. 1500 метратнень чиинзе весемеде куроксто, саизе васенце тарканть.
…Россиянь ветексть чемпионось, ламоксть сиянь ды бронзань призёрось П.С.Прокин течияк а соды оймамо. Сон аноксты пелькстамотнес, конат ютавтовить маласо шкасто Россиясо. Пётр Семёнович эрямованть моли спортонть марто!
Пётр Зиновьев

 

Новости

Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.

 
Ардоманть кис питнетне яла касыть

Саранск ошонь общественной транспортонь частной предприятиятне бажить кепедемс ардоманть кис питнетнень декабрянь 25-це чистэ саезь. Теде сынь пачтясть ошонь администрацияв. 2, 5, 10, 15, 16, 18, 19, 21, 22, 24, 25, 28, 32, 35, 36, 37, 38, 40, 41, 44 ды 45№ маршурттнэсэ питнесь карми 25 целковойть (ней – 20). 23, 34 ды 66№ – 23 целковойть. Мэриясо пачтясть: неень шкане Саранскойсэ важодить кавто ООО-т («Сигнал С» ды «ПАТП»), конат усксить ломанть, истя жо индивидуальной кавксо предпринимательть. Частной усксицятнеде 35%.

Подробнее ...
 
Важоди Якшаматянь почта

Мордовиянь Главпочтамтсо декабрянть прядовомс карми важодеме Якшаматянь Почтась. Сёрмадомс ды нолдамс почтань ящикс телень прявт волшебникентень пачтямо мереви эрьвантень, иетнень лангс апак вано.

Подробнее ...
 
Партийцы ждут от Съезда конструктивных дискуссий

  - Именно в первый день  XVIII  Съезда Партии, который пройдет  7-8 декабря в Москве, состоится работа трех дискуссионных площадок «Обновление», «Открытость», «Партия и выборы», на которых мы сможем обсудить свои предложения и принять  решения, действительно позволяющие   наладить более эффективную и открытую работу партийных структур», -  сказал секретарь  Регионального отделения  «Единой России», Председатель Государственного Собрания республики Владимир Чибиркин.

Подробнее ...
 
В рамках приема граждан Председатель ЕР поддержал социально значимые инициативы

Ряд социально значимых поручений дал Председатель «Единой России», премьер-министр Дмитрий Медведев в ответ на обращения, поступившие в рамках прима граждан, который прошел 30 ноября в Центральной общественной приемной Партии.

Подробнее ...