Рубрикатор

Спорт Ютазь иень сехте паро спортсментнэ
Ютазь иень сехте паро спортсментнэ

 

Коень коряс, эрьва иенть прядовомсто массовой информациянь средстватнень журналисттнэ лангс ливтить республикань иень сехте паро спортсментнэнь.

Истя ульнесь те разнэяк. Спортивной журналисттнэ максызь вайгелест сеть

спортсментнэнь кисэ, кить, мелест коряс, иень перть добовасть сехте

ламо ды покш изнявкст.

Итогтнень коряс сехте ламо вайгельть таштась греко-римской бороцицясь Артём Сурков. Ютазь иестэ сон лиссь масторлангонь чемпионатонь бронзань призёрокс, Европань чемпионокс, масторлангонь Кубоконть кис сиянь призёрокс. Масторлангонь чемпионатсо, конась ютась Лас-Вегас ошсо, сонензэ савсь а шожда. Сиянь медаленть кис бороцямсто сонзэ изнякшнызе Южной Кореянь спортсменэсь. Бронзань медаленть кисэ бороцямс савсь колмо спортсмен марто. Эрьва вастовоманть ютксо оймсема шкась овсе арасель. Кода илязо уле, Артём Сурков мусь вийть изнямс ды саизе бронзань медаленть.

Омбоце тарканть журналисттнэ максызь Евгений Салеевнень. Сонгак греко-римской стильсэ бороциця. Изнясь васенце европейской налксематнесэ, масторлангонь Кубоконть кис сиянь призёр, Россиянь чемпион.

Колмоце тарканть занизе байдаркасо ды каноэсэ укшныцясь Елена Анюшина. Сон – Европань чемпионатонь бронзань призёр, Россиянь чемпионка. Елена Анюшина чачсь-кассь Орданьбуень райононь Кеченьбие велесэ. Иеде-иес спортсменкась паролгавты результатонзо. Покш мелезэ бороцямс олимпийской медальтнень кис.

Нилеце таркасо Европань чемпионось, классической троеборьянь масторлангонь чемпионатонь сиянь призёрось Александр Колбин. Ламо иень перть спортсменэсь невтни паро результатт покш турниртнэсэ. Сонзэ сехте покш мелезэ добовамс медаль масторлангонь чемпионатсо.

Ветеце таркась максозь футболистэнтень Евгений Луценконень. Сон –«Мордовия» футболонь клубонь сехте паро бомбардир. Куш Саранскоень клубось ютазь иестэнть аволь васенце таркатнесэль, минек налксицясь Евгений Луценко совавтозь оскатнень коряс ашти виев клубтнень бомбардиртнэнь вакссо.

Греко-римской бороцицянтень Алексей Мишиннэнь максозь котоце таркась. Те спортсменэнть изнявксонзо ловомс суроткак а сатыть. Ютазь иесь лиятнень коряс Мишинэнь туртов ульнесь сэтьме. Сон а арси прядомс спортонь карьеранть, мекевлангт, снартни понгомс сы иестэ Рио-де-Жанейронь Олимпиадантень.

«Мордовия» хоккеень клубонь нападающеесь, Весероссиянь хоккеень лигань сехте паро бомбардирэсь Павел Медведев ашти сисемеце таркасо. Мордовиянь сехте паро спортсментнэнь юткс хоккеень представителесь совавтозь аволь стяко. «Мордовия» команданть эсь стадионсо налксеманзо свал пурнакшныть ламо ваныцят. Павел Медведев невтизе прянзо кода паро, покш опыт марто налксиця.

Кавксоце таркась максозь классической силовой троеборьянь Европань чемпиононтень, силовой троеборьянь Европань чемпиононтень, пауэрлифтингистэнтень Александр Громовнень. Эштё 2000 иестэ Мордовиянь пауэрлифтингисттнэстэ сон васенцекс топавтокшнынзе раськеютконь классонь спортонь мастерэнь нормативтнень. 2015 иестэ сон изнясь Европань чемпионатсо.

ВМХ-спортонь представительницась, Россиянь сборноень членэсь Наталья Суворова ашти вейксэце таркасо. Ютазь сезонстонть сон невтсь паро результатт раськеютконь пелькстамотнесэ, снартни понгомс 2016 иень Олимпийской налксематненень.

Меельце, кеменце таркась максозь масторонь Кубоконть кис пелькстамотнень изницянтень, Европань сиянь призёронтень Алексей Юфкиннэнь.

 

Н.Евдокимов

 

 

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...