Рубрикатор

Спорт «Улемс виевекс ды шумбракс – покш уцяска»
«Улемс виевекс ды шумбракс – покш уцяска»

Аволь умок Ицялонь райононь кенярксчинть тешкстамсто прась уцяска теевемс содавиксэкс масторлангонь келес содавикс спортсменканть, минек ёнкссо чачозенть-касозенть М.Т.Шубина марто. Тешкстасынек, Мария Тимофеевна – 1960 иестэ Римсэ XVII Олимпийской налксемань байдаркасо укшномань коряс чемпионка, мирэнь ламоксть чемпионка ды мирэнь чемпионатонь кавксть сиянь призер, нилексть лиснесь Европань чемпионкакс, СССР-нь ламоксть чемпионка, спортонь заслуженной мастер, медицинань наукань кандидат.

Спортонь коряс неть покш изнявкстнэнь лангс апак вано, сон чевте обуця, ламонь содыця ды лиятненень паронь арсиця ломань. Аютко шканть лангс апак вано, Мария Тимофеевна (Мордовиясоль а кувать) мусь шка кортнемс минек редакциянь корреспондентэнть марто.

– Мария Тимофеевна, инескеть, ледстинк эйкакш пингенк, арсиде-арась вишка порасто сюлмамс эрямонк спортонть марто?

– Чачинь-касынь Ицял ёнксонь Протасова веленть эйстэ авасоло Красный Угол поселкасонть ламо эйкакшонь триця семиясо. Тетям, Тимофей Григорьевич, се шкане ульнесь аволь ансяк сёрмас чарькодиця, истя жо важодсь главной бухгалтерэкс Ицялонь МТС-сэ, Елена Тимофеевна авань кедь лангсо ульнесть сисем эйкакшт, сень ловозь, тетям чинь-чоп важодема таркасоль. Виде, эште школасо тонавтнемстэ мелезэнь тукшность физкультурань уроктне, тень лангс апак вано, сы шкань профессиям арсинь сюлмамс медицинанть марто. Эрямосо истя лисськак, важодемань ким ушодыя Кемля поселкань больницясо медсестрань тевень топавтомасто.

– Лисни, вишка пингень арсеманк целанек топавтовсть?

– Сеть иетне ульнесть весень туртов а шождат. 1944 иестэ, 9-це классонь прядомадо мейле, документэнь максынь Саранскоень фельдшерэнь-акушерэнь школас. Сонзэ парсте прядомадо мейле туинь важодеме тиринь ёнксов. Кавто иень перть Кемля поселкань райбольницясо ульнинь медсестракс. Чарькодинь, неть содамочитне тень а кармить сатномо, секс тонавтнемам поладыя Казань ошонь Мединститутсо. Стака тонавтнеманть лангс апак вано, ютко шкам ялатеке максыя спортонтень. Варчнинь виень эрьва кодат пелькстамотнесэ, сехте пек мелезэнь тукшность чийнемась, сокссо кирякстнемась. Меельце видэнть коряс макссть тень спортонь мастерэнь разряд. Байдаркасо укшномо ушодынь апак учо. Тенень, нать, улема. Эрьва факультетэнть ульнесь эсензэ командазо, минексетнень ютксто вейке тейтерькась пелькстамонь чинть каршо ормалгадокшнось, тарказонзо кучимизь монь. Нама, сестэ изницякс эзинь лисе, но укшномась мелезэнь тусь.

– Мария Тимофеевна, 1960 иестэ Римсэ Олимпиаданть ютавтома шкастонть кодат стакачи марто вастовкшныде ды мезесь сехте пек Тенк лездась лисемс изницякс?

– Олимпиадантень анокстамось а шождаль. Иень перть ульнесть ламо пелькстамот Даниясо, Швециясо, ФРГ-сэ, ГДР-сэ. Пек тенек лездасть раськеютконь ламо пелькстамотне, эрьва чинь виев анокстамотне. Олимпиаданть ушодовомадо икеле иестэнть Тренерэнь советэсь арсесь варчамс ве шкасто кавоненек Середина марто. Минь сонзэ марто лиснинек  изницякс раськеютконь малав кемень пелькстамотнесэ. Виде, стакачитькак ульнесть. Стартонть миненек максызь шкадо мейле, тувталтнэнь тенек эзизь ёвта. Тень ловозь, тенек савсь сасамс кинь марто пелькстынек.

– Мария Тимофеевна, кода теевиде содавиксэкс Юрий Константинович мирденк марто ды лездыде-арась вейкенк-вейкенк туртов вейсэнь тевсэнк?

– Юрий Константинович марто малавгавтымизь спортось. Васенцеде мартонзо вастовинек сбортнэнь ютавтомсто. Мейле карминек кучнеме сёрмат, поладовсть вастовоманок. Мирденень лисинь 1955 иестэ, эште институтсо тонавтнемстэ. Сонзэ прядомадо мейле уш колмоненек, се шкастонть чачсь цёрыненек, туинек Дальней Востоков. Тосо се шкане пурнавсь команда байдаркасо укшныцятнень ютксто. Юрий Константиновичненьгак муевсь тренерэнь тев.

– Содазь, спортонь пингесь аволь кувака, кода поладовсь седе тов важодемань кинк?

– Дальней Востоков самодо мейле мон сеске ушодынь важодеме специальностень коряс, санитарной врачокс. Важодемадо икеле ды мейле бажинек ютко шканок максомс вечкевикс тевезэнек – спортонтень. Ламо иес ледстневицякс кадовсть весе пелькстамотне,  сыненст анокстамотне. Якшамо читнень лангс апак вано, тельня лиснинек минек базанть эйстэ авасоло уликс ведень ванстома таркантень, эйзэнзэ сон чудсь электростанциясто. Бажамонок стяко эзть ёмакшно, пелькстамотнесэ а весть лиснинек изницякс.

– Мария Тимофеевна, Тынк эйкакшонк сюлмизь-арась эрямост спортонть марто?

– Покш цёранок, Константин, – СССР-нь спортонь мастер, идесь кандидатской венчсэ укшныцятнень анокстамонь силовой тренажёрной специальностень коряс, важоди тонавтыцякс Лесгафт лемсэ физкультурань, спортонь ды шумбрачинь Санкт-Петербургонь университетсэ. Омбоце цёранок, Михаил, – медицинань наукань кандидат, Волгоград ошонь эйкакшонь поликлиникань главной врач. Мельспаронок колмо нуцьканок: Юра – инженер, ютко шкасто налкси хоккейсэ, Ксения прядсь кавто факультетт: экономикань ды аграрной. Михаилэнь тейтерезэ, Анастасия, тонавтни Медицинской институтонь 4-це курссо. Аволь умок чачсь правнуцьканок Александр.

– Мария Тимофеевна, Мордовиясо умок араселиде, Тынк варштавксонк лангс, кода полавтовсь тиринь ёнксось?

– Алкукс, икеле минь седе сеедьстэ сакшнылинек тиринь  велев, Саранскоев. Мон покш мельспаросан Кемля поселканть ды целанек Ицял ёнксонть паро полавтоманзо коряс. Сон теевсь мазыекс ды седеяк вечкевиксэкс. Ёвтан покш сюкпря Ицялонь муниципальной райононь администрациянь важодицятненень, кить явсть тень истямо покш мель кенярксчинть ютавтомсто. Сехте пек прявтонть В.Г.Дмитриеванень ды А.В.Пугачеванень. Саранскоеськак допрок полавтовсь, ульцятне келейть, покшт, ванькст. Тунь асодавиксэкс теевсь монь тиринь ёнксом. Арсян, тесэ паро полавтоматне поладовить икелепелевгак. Минь жо, ве ёно эрицятне, тенень ансяк кенярдтано.

В.Юдина

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...