Рубрикатор

Спорт ФУТБОЛОНЬ ВАНЫЦЯНЬ ФЕСТИВАЛЕСЬ САРАНСКОЙСЭЛЬ
ФУТБОЛОНЬ ВАНЫЦЯНЬ ФЕСТИВАЛЕСЬ САРАНСКОЙСЭЛЬ

Истямо фестиваль Мордовиясо эште арасель ды маласо шкасто, неяви, а улияк. Согласядо, масторлангонь футболонь чемпионаттнэ аволь сеедьстэ ютавтневить  аволь ансяк Саранскойсэ, Россиясояк. Паряк, тень чарькодезь, эрзя-мокшонь прявт ошось те кенярксчинтень анокстась кода эряви. Июнень 26-це чистэ Тёжат иетнень площадьс 13 чассто 30 минутасто пурнавсть фестивалень участниктне. 14 чассто  Футболонь коряс масторлангонь чемпионатонь участникень командатнень парадось сыргась Советской площадь ёнов. Те шкастонть тезэнь пурнавкшность ошонь ламо эрицят.

Васенце группасонть ютасть Бразилиянь, омбоце – Алжирэнь, колмоце – Бельгиянь, нилеце – Южной Кореянь ды ветецесэнть Россиянь командань участниктне. Эрьва группанть икеле ютась национальной оршамопельсэ од тейтерь. Сындест мейле ютасть ёвтазь мастортнэстэ актёронь группатне. Футболонь болельщиктнень марто вейсэ мольсть Мордовиянь содавикс спортсментнэ – О.Каниськина, В.Борчин, С.Бакулин, А.Мишин, А.Юфкин ды ламо лият. Кись таргавсь Большевистской ульцяванть. Тесэ участниктне седеяк ламолгадсть. Ошонь ламот эрицятне вейсэндявкшность колоннанть марто. Зярыя шкань ютазь, парадось пачкодсь Советской площадьс. Тесэ теезель футболонь импровизированной стадион. Стявтозь трибунатнень лангсо – эйкакшонь командатнень ютксо футболонь турнирэнь изницятне, сынст тетяст-аваст, тренерэст. Волонтертнэ невтсть эсест программаст.

Ушодовсь командатнень-призёртнэнь чествовамось. Болельщикень фестивалентень алтазь, Саранскойсэ ютавтозель эйкакшонь командатнень ютксо футболонь первенства. Неть читнестэ сон прядовсь. Итогтнень коряс васенце тарканть саизь Саранскоень 28 № общеобразовательной школань вишка футболисттнэ. Сыненст максозь казнекс футболсо налксемань оскат, дипломт, медальть ды кубок. Омбоце таркань саицятне тонавтнить Саранскоень 32 № школасо. Сыненст максозь дипломт ды медальть. Истят жо казнеть получасть колмоце таркань саицятнеяк. Те – ошонь 33 № общеобразовательной школань футболисттнэ. Турнирэнь сехте паро вратарекс ёвтазь 33 № школасто Данила Алешин.

Казнень максомадо мейле ламо поздоровт ёвтазельть «Мордовия» командань вишка составтненень. Сынь а весть изнякшность эрьва кодат турниртнэсэ. Футболисттнэнь чествовамодо мейле налксема паксянтень лиснесть минек содавикс спортсментнэ. Фестивалень ветицясь а весть тешкстакшнызе, келя, Мордовия Республикась – Россиянть туртов спортсменэнь кузниця. Сынст чествовамодо мейле кенярксчись поладовсь «Старт» стадионсо. Тесэ вастовкшность икелень «Светотехникань» ды Московонь «Спартаконь» ветерантнэ. Налксема паксянтень лиснесть икелень содавикс футболисттнэ: Юрий Гаврилов, Георгий Ярцев, Андрей Пятницкий, Василий Кульков. «Светотехниканть» пельде налксесть Сергей Дикарев, Виталий Никулкин, Фёдор Татюшев ды лият. Зярдо-бути неть футболисттнэ эсь налксемасост а весть славакшнызь Мордовиянть.

Кавто таймень перть атакатне кавто ёндольть. Ортасо аштицятненень  тевтеме майсемс эзь савкшно. Те разнэ изнясь ояксчись, счётоськак ульнесь 4:4.

«Спартак» командань главной тренерэсь Олег Романцев тешкстызе, келя, Мордовиясь – алкуксонь спортонь республика. Сон эрзя-мокшонь ёнксонтень арсесь  весе паронть ды од изнявкст «Мордовия» командантень премьер-лигасо.

Седе тов фестивалесь таго поладовсь Советской площадьсэнть. Тесэ спортонь содавикс комментаторось Дмитрий Губерниев ёвтнесь пурнавозтненень, конатнеде те шкантень кармасть эштёяк ламо, сеть мастортнэде, конатнень футболонь командатне теевкшнесть масторлангонь чемпионокс. Футболонь коряс масторлангонь сехте васенце чемпионатсонть участия примасть весемезэ 9 командат, ды финальной матчсонть масторонь кубкась максозель Уругваень сборноентень. Площадьсэнть аравтозь покш экрансонть невтевсь слайд-шоу те чемпионатстонть. Седе тов Дмитрий Губерниев содавтынзе пурнавозтнень  Бразилиянть марто, масторлангонь сехте титулованной футбольной державанть марто. Сон ёвтнесь сехте вадря матчтнеде, теке марто Мараканасо СССР-нь сборноень изнямодонтькак, ёвтнесь содавикс налксицятнеде – Пеледе, Вавадо, Дидиде, Гарринчадо. Весемесь невтевсь экрансонть: сехте вадря голтнэ, трибунасо аштиця болельщиктне ды изниця командатнень кецямост. Эряви меремс, футболдо башка, Бразилиясо пек мельстуицякс ловови карнавалось. Секскак мастордонть ёвтнемадо мейле сценанть лангс лиссть Бразилиянь артисттнэ, ды зярыя шкас ваныцятне кармасть карнавалонь участникекс. Тесэ толгасо мазылгавтозь киштицятне невтизь самбанть ды лия мазый киштематнень.

Теде мейле невтевсь Испаниясь. Самай тесэнь командась кармась вейкинекс, конась изнясь Европань ды масторлангонь чемпионаттнэсэ. Те масторонть пельде музыкальной приветэкс кармасть фламенкось ды гитарасо налксемась. Мейле ваныцятне кунсолость Германиянь командадонть ды киштнесть «Ottawan» группанть композициятнень мельга. Седе тов ульнесть ёвтнемат Аргентинань, Англиянь, Италиянь, Франциянь ды Россиянь командатнеде.

Теде мейле сценанть лангс лиссь Мордовиянь Прявтось Владимир Волков. Сон пшкадсь приветствия марто Саранскойсэ ютавтовиця FIFA-нь болельщикень раськеютконь фестивалень участниктненень.

– Ёвтан тенк лембе поздоровт те кенярксчинть коряс. Ды течи вейсэ весе масторонть марто карматано ризнэме минек команданть кис, несынек налксеманть, конань вечксызь масторлангонть келес, – мерсь Мордовиянь Прявтось. – Минек республиканть аберянть невтевксэнзэ, тесэнь эрицятне пек вечкить инжеть ды покш мель явить спортонтень.

– Кода содатано, ниле иень ютазь, минь карматано вастомо Футболонь коряс масторлангонь чемпионатонь участниктнень. Ды неть ниле иетнень перть эряви теемс пек ламо, седеяк вадрялгавтомс минек прявт ошонть: теемс спортивной ды социальной од инфраструктура. Течи жо арсетяно минек сборноентень вадря налксема. Россия – икелев! –  прядызе эсь кортамонзо Владимир Волков.

«Мордовия – чемпион!»  – каршо мерсь Дмитрий Губерниев ды теде мейле республикань Прявтонтень казезельть шарф, «Спартаконь» ды «Светотехникань» футболисттнэнь автограф марто оска ды «Регион-13» номер марто футболка.

Теде мейле, зярс футболонь вечкицятне учость Россиянь ды Алжирэнь командатнень ютксо матчонть, сынст кенярдовтсть эсенек ды томбалень артисттнэ.

Прядовсь кенярксчись мазыйдеяк мазый салютсо.

Ю.Еремина,

 

Н.Евдокимов

 

Новости

Турчак заявил о запуске конкурса социальных проектов первичных отделений «Единой России»
В ближайшее время стартует конкурс социальных проектов первичных
отделений «Единой России», лучшие проекты смогут претендовать на
грантовую поддержку Партии. Об этом сообщил секретарь Генсовета Партии
Андрей Турчак, выступая на пленарном заседании форума первичных
отделений «Единой России» в Северо-Кавказском федеральном округе.
Подробнее ...
 
20 лучших водных ревизоров Мордовии продолжат свою работу в Артеке
Сегодня в Саранске прошло заседание регионального штаба Всероссийской
экологической акции «Вода и здоровье». Там были названы имена 20 лучших
водных ревизоров республики, которые станут участниками федерального этапа
акции «Вода и здоровье»
Подробнее ...
 
Директор спортивной школы попросил депутата ГД Александра Воробьева помочь мордовской биатлонистке
 9 июня депутат Госдумы РФ, член Комитета Госдумы по
аграрным вопросам Александр Воробьев встретился с жителями
Мордовии на личном приеме. Люди обращались по разным вопросам
– в сфере ЖКХ, обеспечения лекарствами, помощи в получении жилья
и другим.
Подробнее ...
 
Молодогвардейцы - победители «Школы парламентаризма«посетили высшие законодательные органы страны
Первым пунктом экскурсии для ребят из Мордовии стал Совет Федерации Федерального
Собрания Российской Федерации, внутренний интерьер и дизайн которого поразил их своей
красотой и величием. Экскурсовод познакомила ребят с особенностями здания, провела по
главным местам Совета Федерации. Ребятам также удалось побывать в большом зале
заседаний, увидеть своими глазами рабочие места сенаторов и кресло председателя
Валентины Матвиенко. Также молодогвардейцы узнали, как проходит подготовка к
заседанию и собственно
сама
работа
заседаний.
Подробнее ...
 
Путин казизе Мордовиясто семиянть «Родительская слава» орденсэ

Июнень 1-це чистэ, Эйкакшонь ванстомань раськеютконь чистэ, РФ-нь Президентэсь Владимир Путин казинзе ламо эйкакшонь триця семиятнень «Родительская слава» орденсэ. Покш казнесэ тешкстазель Мордовиянь Зубова-Полянань райононь Ширингуши велень Урсовтнень кудораськесь. Покш промксонтень истя жо тердевсть РФ-нь ёнкстнэнь прявттнэ, косто састь семиятне, сынст ютксоль МР-нь Прявтось Владимир Волковгак.

Подробнее ...