Рубрикатор

Литературная страница Ледстясынек ёроков сёрмадыцянть лемензэ
Ледстясынек ёроков сёрмадыцянть лемензэ

Эрзя-мокшонь содавикс писательтнень ютксто вейкесь – В.А.Аношкин. Сонзэ чачома-касома ёнксось – Покш Березникень Шугур велесь, шкань ютазь тусь эрямо те ёнксонь Вейсэ посёлкав. Сон Ине Отечественной войнань участник. Ламо бу сёрмадоволь, ансяк эзь саво тензэ велявтомс войнасто. Василий Антоновичень ёвтнематнень, юморескатнень вечксть ловномо ютазь пингень колоньгеменце иетнестэ, нейгак эзизь ёмавто актуальностест. Сонзэ ёвтнематне печатавкшность «Сятко» журналсо, «Эрзянь коммуна» ды «Сталинэнь киява» газетатнесэ.


1912 иестэ прядсь церковно-приходской школань 2 класст ды тусь Астраханев. Важодсь матросокс баржа лангсо. 1917 иестэ велявтсь тиринь велев ды 1920 иес важодсь тетянзо хозяйствасо. 1920 иестэ саезь ульнесь Якстере Армиясо. Алатырь ошсо прядсь полковой школа. Служась Казаньсэ. Воёвась Врангелень каршо. Стакасто ранязель. 1924 иестэ велявтсь Мордовияв. Важодсь Политпросветсэ. 1939 иестэ сонзэ лемесь сёрмадозель РСФСР-нь Наркомпросонь ды Мордовиянь Почётонь книгатнес. Василий Антонович войнадо икеле важодсь Шугуровасо колхозонь прявтокс. Войнань васенце иетнестэ тусь масторонть идеме. Маштовсь ятонть каршо тюремстэ.
Шугур велень средней школань музеень прявтось Валентина Михайловна Арапова тосо ванстовиця документтнэнь ютксто пурнась башка папка, косо ёвтневи Василий Антоновичень эрямодонзо ды творчествадонзо. Течи минь макстано ловныцятненень В.А.Аношкинэнь ёвтнемастонзо вейкенть, конась лемдеви «Волчок».


Василий Аношкин


Волчок

 

Роштува. Якшамо. Кальтне, прок мазый одирьват, аштить сиянь оршамосост. Велесь вельтязь качамопельсэ.
Волчок сорновтынзе кутьмерьстэнзэ олгонь сюватнень, озась пулонзо лангс.
Цят якшамо. Волчок сорнозь кепси лапанзо, цийнезь автни кургонзо.
Те шкане чикордозевсь кудокенкшесь – пар потсто лиссь Матя баба. Волчок венстизе нерензэ, учи ярсамопель. Кода неизе Матя бабань кедьстэ сюкоро марто ваканонть, сельгезэ чудезевсь. Алкукскак, икеле ливтнесть тензэ пельспидезь модарькат, ней мик оно зяро…
Матя баба эзь варштаяк Волчок лангс, лиссь ортава, тусь церьковав.
Волчок, сюкоронь чиненть марязь, сормсизе судонзо, тусь Матя баба мельга. Моли, икельдясы Матя бабань, варшты сюкорваканонть лангс: маласот, ансяк автордамс а сави – тапарязь руця потс.
Матя баба церькованть икелев лоткась, чекась-покась, витизе пацянзо.
– Кенеринь… Осподи!
Волчок озась Матя бабань удалов, ваны цивтордыця сельмесэнзэ сюкорваканонть лангс. Тантей чинеденть нолштынзе турванзо, мольсь седе малав.
Матя баба нарвицькакс кузсь кузтембес, Волчок мельганзо. Улезэ мезе ули.
Кискань уцяскас, церьковань кенкшесь пекстневсь сонсь, секскак совамсто Волчоконь кияк эзизе нее. Кияк эзь фатя эйзэнзэ. Сехте паро тарканть Волчок муизе чинева – эцесь кшинь-салонь морганть алов, оймась, мерят, араськак тосо.
…Дёма атя службанть ушодовомс уш оршизе мазый оршамонзо, перьканзо карксась цёко марто кушак. Те оршамось тусь мелезэнзэ, яки ломантнень юткова – невтни эйсэнзэ. Текень кувалма вейке цёконзояк ёмавтызе атясь. Пиземепелекс теинзе раужо сельмечирькензэ, тулкаи бабинетнень, кежейстэ пшкали:
–Ужодояк, нолдамизь, цёком ёмавтыя…
Аватне пелезь ваныть лангозонзо, айгить ве пелев. Дёма атя яла вешни:
– Цёко, цёкине эзиде нее? – эшкси аватнень: – Эли ёжот арась, а эшкеват! Аламодо икелев арак! Ават, цёкинем эзинк нее?..
Дёма атя велесэнть ульнесь сех озныця ды сех кроиця ломань. Секс тесэяк, кода пачкодсь штатолонь микшницянть ваксс, эзь кирдеве, кроязевсь:
– Секень вант, кияк кепедизе ды а ёвты… Мезекс тензэ, эх, мать-та!..
Волчоконь судос кайсети сюкоронь тантей чинесь. Кувать учось, кияк эзь кая тензэ кшисускомо, цийнезевсь.
Матя баба тандадозь чеки:
– Осподи, Сусе… Те истя мезе?..
Волчок кецясь: марясь содавикс вайгель, гавк тейсь.
Морганть маласо аштицятне тошказевсть, дубордозь ношкстасть омбоце пелев.
Волчоконь эзь кирдеве набойчизэ, лиссь морганть алдо, сускизе Охима бабань суманде. Истя кольниксэль, бажась чевтемтемс Охима бабань седеензэ. Охима баба сельведь марто энялды:
– Осподи, кирьминецькем… Нечистоесь… у–у, нехристь…
Дёма атя покш апаросо витни удало оршамонзо, ваны кежейстэ. Маризе кискань онгоманть, ёртозь ёртовсь морганть ваксс.
– Косо? Косо? Мезе?..
Неизе Волчоконь, кроязевсь церьковань келес:
– Ах, мать, окаянной дьявол…
Бабинетне пульзясть, озныть.
– Те апарс истя, Осподи…
Озатясь лоткась моравтомодо, ваны.
Дёма атя автордызе Волчоконь, тона гавкадсь ёнонзо, менсь. Атя – мельганзо, ды истя виевстэ ношкстась – ветешка авинеть сявордсь.
– Кундынк! Кундынк нечистенть! Маштса!
Кепететсь церьковасонть шалт. Аварди пакшине.
Волчок а муи кекшема тарка – эрьва косо кучкорить эйсэнзэ. Менсь икелев – каршонзо стясь дьяконось, пижни:
– Куда, куда, антихрист?! Дементий, бери его! – Сонсь кодак ахолдась кадиласонзо – весе пси тонолтнэнь чукадинзе бабинень пряс.
Дёма атя меельце вийсэнзэ ношкстась Волчоконь мельга, прась лангозонзо, лепштизе кисканть мештезэнзэ. Капшамонь пачк пильгезэ понгсь кенкшпоровтс – прась ней уш кисканть марто. Волчок сускизе атянть судос, гавнозь ношкстась кедьстэнзэ. Мельганзо ниле пильге лангсо чии Дёма атя:
– Ну, ладна, менить… Кавто пильгеде церьковань косякс вачкодевлитинь…
Кшитне-салтнэ весе човорявсть, бабинетне апаркстомсть, вешнесь эрьвась эсензэ ваканонзо. Лоткавтынзе Дёма атя:
– Бачкась мерсь, коли човорявсть кшинк-салонк, илинк сае: антихрист човоринзе сынст.
Ломантне нуваргадозь тукшность кудов.

 

Новости

Предложенный ЕР законопроект о зачислении в ПФР конфискованных средств коррупционеров принят Госдумой в первом чтении

Госдума приняла в первом чтении законопроект, позволяющий перечислять в Пенсионный фонд Российской Федерации средства от реализации конфискованного имущества коррупционеров. С данным предложением ранее, 20 августа, на совместном заседании Генерального совета Партии и Совета руководителей фракций «Единой России» выступил секретарь Генерального совета Партии, вице-спикер Совета Федерации Андрей Турчак.

Подробнее ...
 
А.С.Пушкин лемсэ библиотекась тешкстызе чачома чинзэ

Сентябрянь 14-це чистэ Мордовия Республикань А.С.Пушкин лемсэ Национальной библиотекантень топодсть 119 иеть. Кенярксчинть кувалма библиотекань важодицятненень поздоровт ёвтась МР-нь Культурань, национальной политикань, туризмань ды архивень тевень министрась Анатолий Чушкин. Сон ёвтась покш сюкпря топавтовиця важодеманть кисэ, арсесь библиотекантень ансяк касомс-кепетемс ды муемс седе ламо од ловныцят.

Подробнее ...
 
Госдума приняла в первом чтении президентский законопроект о защите людей предпенсионного возраста

Рассматриваемый в Госдуме президентский законопроект, которым устанавливается уголовная ответственность за необоснованный отказ в приеме на работу или необоснованное увольнение лица по мотивам достижения им предпенсионного возраста, призван изменить отношение работодателей к сотрудникам старшего возраста. Об этом заявил первый заместитель руководителя фракции «Единой России» Андрей Исаев в ходе рассмотрения Госдумой законопроекта в первом чтении 13 сентября.

Подробнее ...
 
Лиседе чиеме!

Сентябрянь 15-це чистэ Саранскойсэ, Советской площадьсэ, ютавтови «Кросс-нации – 2018» Чиемань весероссиянь чись. Те  мероприятиясь карми молеме «Спорт против терроризма» девизэнть ало. Те тердеманть ало шожда атлетикань стартс лисить малав 4500 ломанть, юткозост совить шабра регионтнэстэ сазь инжетнеяк.

Подробнее ...
 
Ванстынк прянк грипптенть

Республикасонть ушодовсь грипптенть иммунизациясь. Кода пачтясть Роспотребнадзоронь региональной управлениясо, неть тевтнес нолдавить минсенек масторсо нолдазь вакцинатне, конатне ванкшнозельть парочинть ды зыяновчинть коряс. Неть: «Совигрипп» покштнень туртов ды «Совигрипп», конасонть арасть консервантт, эйкакштнень ды пешксесэ аватнень туртов. Вакцинатнень составс совить гриппень вирустнэнь актуальной штаммтне.

Подробнее ...