* * *

Монь сэредезевсь пеем, молинь поликлиникав. Тосо мерсть, келя, лецямс а кинень: вейке врачось выставкав тусь, омбоцесь – ормалгадсь, садо недлянь ютазь…

Пеесь жо сэреди, савсь молемс лецямо питнеде. Совинь зданиянть потс, кенкшенть вакссо аштиця мазый тейтересь макссь тень конёв панкске, конасонть сёрмадозель телефононь номер, ды мерсь гайневтемс корязонзо.

Мазыйканть сельмс пштистэ ванозь, таргия мобильникем, кочкинь цифратнень. Столенть лангсо гайнезевсь телефонось. Тейтересь саизе трубканть:

– Пеень лециця клиникась, шумбратадо!

Мон каршонзо:

– Шумбракстнинек уш. Монень нейке эряви понгомс врачнень.

Тейтересь сельмезэнь ванозь, поладызе кортамонть мартон телефононь пачк.

– Нама, можна понгомс нейке, ансяк сави учомс.

– Зяро учома?

– Кемень минутат.

– Учан.

Лепштия телефононь кнопканть ды таго меринь тензэ: «Учан».

Кемень минутань ютазь састь кисэнь ды лецизь пеем. Ансяк эзинь чарькоде, мезе те ульнесь…

* * *

Те тевесь лиссь мартон аволь умок. Сась тундось. Ломантне карсесть туфлят, монгак валске марто карсинь одт. Обедэнтень пильге кочкарям ватксевсь. А обедтэ мейле тень эрявсь вастовомс тевень коряс эрявикс ломань марто.

Озынь автобусос. Ардомс эрявсь васов. Таргинь книга, ловнан. Пильгесь жо сэреди. Ломантнеде автобуссонть ардыть ламо ды сынь мельс, што бути каяса пильгстэнь туфлянть, кияк а фати. Каия, ёжом вадрялгадсь, сэредьксэсь потась. Поладыя ловноманть.

Эрявикс лотксема таркантень пачкодезь, пильгсэм шаштыя малав туфлянть ды, сэредьксэнь кирдезь, эвкстыя пильгезэнь. Лисинь ушов, варштынь алов ды ацирьгадынь. Вейке пильгсэнть тонгозель раужо туфля, омбоцесэнть – ашназа-тюжа. Те эштё аламо – кавонест керш пильгень.

Цють эзинь сяворе, ацирьгадозь кундынь палманентень ды састыне «цийнезевинь». Эдь тевесь, конань коряс ардынь, кедьстэнь менсь… Те шкастонть палманенть тона ёндо маринь вайкснемат. Арсян, кинень истя монденьгак берянь? Варштынь, тосо аштесь тейтерь ве пильге лангсо, кедьсэнзэ кирдсь монь туфлянть. Мезе пряван сестэ ютась, валсо а ёвтасак… Цопадия кедьстэнзэ туфлям, нерькстыя тензэ сонзэнть. Валт ёвтамс эзинек муе конанокак…

* * *

Ардтано троллейбуссо. Лотксема таркатнестэ вейкестэнть совась сырькайне. Вейке кедьсэнзэ варяв кескавне, омбоцесэнть – бейсболонь бита. Ды эряви тешкстамс, аволь вишкине.

Ломантне, лангозонзо ванозь, мизолдозевсть. Од ломантне эськаст кортнить, келя, бабанть эрямось «достал». Пеедькшнематнень марязь, сырькаесь кармась музгордеме:

– Мезть пейтядо? Спортонь лавкасто рамия – тосояк пейдсть. Автобуссо ардынь – пейдсть. Тесэяк вана… Мезе тесэ весёлась? Монь нуцькантень валске топодить 20 иеть. Кевкстия, мезе тензэ каземс. Сон ёвтызе – бейсболонь бита, ды седе покшке. Сон эдь спортсмен!

Ломантне сеске чатьмонезевсть. А вейке од цёрась кевкстизе:

– Бейсболсо нуцьканк налкси?

– Ды аволь, кода уш тензэ мерить, а-а-а бокссо! Ней вана монськак арсян: мезекс тензэ битась?..

Троллейбуссонть весе ардыцятне пекень кундазь раказевсть.