Рубрикатор

Литературная страница Келенть туртов паро ялга Г. Гребенцовонь од книгадонзо мельть-арсемат
Келенть туртов паро ялга Г. Гребенцовонь од книгадонзо мельть-арсемат

Эрзянь литературась сюпав ламо ёндо. Башка мель эйсэнзэ явови эйкакшонь литературантеньгак. Нолдтневить, видьстэ меремс, куш аволь пек сеедьстэяк, эрьва кодамо ёвтнемань, валморонь пусмот ды лия мезе. Ансяк улить сехте вишкине ловныцяткак, конат ансяк-ансяк теить васенце эскелькст ловномань тевсэнть. Сынст туртовгак минек сёрмадыцятне алтасть эрьва кодамо ловномапельть. Саемга, Юрий Пальтин нолдась «Содакай» валморонь (стихень) азбука (1997 ие). Раиса Щанкина вишкинетнень туртов эрзянь валморосо «Азбуказонзо» (2012 ие) совавты морот, валморот ды пек ламо умонь, стувтозь валт. Теде башка, вишкинетнень туртов вастневить лия сёрмадейтненьгак пусмост. Ды эрьванть эйсэст ули лия ёнов а молиця тонавтомань тешкс.

 

2017-це иестэ Мордовия Республикань валморонь заслуженной сёрмадыцясь Геннадий Гребенцов нолдась «Ёжов азбука» од ловномапель. Сон алтазь сех вишка ловныцятнень туртов, конат, паряк, ловномояк зярс а маштыть. Ансяк тонадомс тенст лезды азбукась ды, нама, тетяст-аваст, покштяст-сырькаест. Неень шкань тонавтомань вешематнень коряс эйкакшонтень эряви максомс тонавтоманть истямо ёндо, сон сонсь арсевель, мезе ланга карми кортамось те эли тона тонавксонть (уроконть) эйсэ. Геннадий Гребенцов тейсь седе ёжовсто. Сон, ловт, кармавтсынзе арсеме-важодеме вишкинетнень пряудемест эрямонь васенце иетнестэ саезь.

«Ёжов азбуканть» ловномсто сельмс сеске каяви мазый ды мельстуиця теевксэсь-дизайнэсь, мезесь пек кенярдовты. Эдь эйкакштнень туртов мазычись – сехте редявикс ёнкс эрьва мезенть ванномсто. Ды икелепелев эряви меремс – те ловномапелесь канды тонавтомань покш смусть. Покштнененьгак ули мезе тестэ саемс. Тесэ, васняяк, максови ламо тюсонь алфавит. Чарькодеви, рузонь ды эрзянь алфавиттнэ вейкеть, секс мекс эрзятне малавиксстэ рузтнэнь марто эрясть вейсэ ламо пингень перть, кой-мезенть саизь эсест туртовгак. «Азбукась» ашти колмо кувтасто: валморот, содамоёвкст ды налксемат. Ловномапелесь панжови «Азбукась лемсэ» мельстуиця валморосо. Седе тов алфавитэнь эрьва буквантень алтави нурькине валморо, кона эрьва ёндо ёвтни те букванть чачодонзо, сонзэ обуцядо. Саемга, «Ж», «М», «С» букватнень Геннадий Гребенцов невти истя:

Женянь кедьсэ унжа тюжа,

Сон прок «Ж», ванноса, ужо.

Марфа кавто пандтнэнь эйстэ,

М мазыйка букванть несы.

Саша сусксь кренделенть эйстэ,

Секень вант, С букванть сэвсы.

Истямо ладсо ветяви сельмень пачк тонавтома, мезесь, нама, шождалгавты содамс алфавитэнть педе-пес. Эряви тешкстамс, весемесь кеместэ кадови эйкакшонть удемсэ ды истямо койсэ тевень ветямось лезды тонавтомс лия букватненьгак. Теке марто сёрмадеесь, мерят, букватнень ды сеедьстэ вастневиця гайттнень тевснолдамост вельде ловныцянзо марто ютавты налксема. Тень парсте невтить валморынетне, козонь совавтозь ламо валт те эли тона букванть марто. Ды вана истя кельяжамкань пачк тагояк ветяви налксема-тонавтома:

Л-сь прок чувтонь кудоконя,

 Мазылгавты кудонть кона.

Ловось пры-певерди верде,

Сон налксеме эйкакшт терди.

Теке кувтасонть максовить содамоёвкскеть, песэст – каршо валось се, кона ушодови те эли тона тонавтневиця букванть лангс:

Саразонок яла свал,

Кадны пизэс лембе…

(Ал)

Аволь лато, аволь лато –

Пизементь вельксэнь лоткавты.

(Зонтик)

Авам яла кеци,

Зярдо казян …

                     (Цецят)

Чинек-венек тики-таки,

Налнэть кужинева якить.

                     (Част)

 Содамочинь келейгавтомга теке жо буквас максови валкске. Сех ламо валт путозь «П», «С», «Т», «Ч», «Э» ды лия букватнень лангс: панжакай, письмар, поза, пурцуз, пустачей, сакало, скал, суре, сэль, сялго, сятко, талика, толкун, туляка, турва, тутушка, чарамка, чечена, човаля, човарка, чочко, эйгажа, эйкакш, эрзя, эрьба, эрьге ды лият. Улить эрзянь кельсэ чуросто вастневиця валткак: ужо – угол, чельке – пуль, сэль – сажень,
нерята – калонь кундамонь лездамопель, тарадсто кодазь кептерне.
Вастневить истямо букват, невтемга, «Ф», «Х», конатнень лангс эрзянь кельсэ валт а вастневить. Сынь ютасть рузонь ды омбо масторонь лия кельтнестэ: факел, флаг, фото, футбол, фуфайка, халат, хобот, хоккей, хор, хутор. Неень шкасто, саемга, «футбол» валось эрзянь кельсэ нолдави кода «пильгеоска». Седе сеедьстэ вастневи Интернетсэ, аламонь-аламонь кемекстави. Ансяк шкась невтьсы те ды лия од валтнэнь эрзянь кельсэ тевс нолдамост.

Од содамочинь тонавтнемакс эряви башка тешкстамс сёрмадозь авань ды цёрань лемтнень: Александра, Алёна, Борис, Варвара, Вероника, Инна, Ирина, Иван, Игорь, Ксения, Кирилл, Константин, Лариса, Лидия, Людмила, Светлана, Сергей, Тамара, Тимофей ды лият. Теке марто Геннадий Гребенцов максы ламо лия раськень лемтькак: Агния, Ада, Аза, Альбина, Абрам, Аким, Артур, Белла, Богдан, Борислав, Венера, Влас, Генрих, Дина, Ева, Жан, Жак, Жоржета, Ида, Ираида, Никон, Рената, Ренат, Роберт, Руслан, Тимур, Христина, Эльвира, Эмма ды лият. А вана эрзянь лемтне мекс-бути овсе а вастневить. Тия-тува сынь ансяк улить вишка валморынетнесэ: Дрига дедай (лопась 16-це), Ларька атя (л. 27-це), Олдай (л. 32-це),  Олда ды Онта (л. 33-це), Проска сырькай (л. 35-це), Яхим (л. 56-це); тевс нолдазель Онгай (л. 53-це) кискань лемесь. Чарькодеви, неень шкасто тетятне-аватне чачозь эрзянь эйкакшост кода ансяк а лемдить, ансяк аволь эрзякс. Лия раськетне – татартнэ, ветькетне, башкиртнэ, маритне – бажить максомс эйкакшост туртов эсест раськень лем. Те кувалгавты раськенть эрямонзо. А минек мезе? Раськень ёжось лавшо. Лемть арасть эли вастневить пек чуросто. Ванстовсть, ловт, ансяк фамилиятне. Весемесь те мелявты арсематнень эрзянь раськенть вандынь чинть кисэ. Эдь эрзянь лемтнедеяк минек пек ламо. Сынь улить. Сынст эряви нолдамс тевс. Маризь Кемаль ве шкасто «Чилисема» эйкакшонь журналонть лопатнесэ (2004 ие, 4-це №, 5-це №) макснесь авань ды цёрань эрьва кодамо лемть: Анге, Вияна, Виринея, Кемаль, Ламзурь, Лияна, Миянза, Сияна, Эряна, Эрьгела, Арис, Видяз, Видяй, Гарай, Иневат, Кичай, Оло, Мельседей, Сурай, Юртай ды лият. Самай сынсткак эряволь путомс лия лемтнень ваксс. Ды те тонавтомапеленть питнезэ улевель седеяк покш. Паряк, эрзянь тетятне-аватне аламонь-аламонь тонадыть лемдямо эсь эйкакшост эрзянь лемтнесэ. Нейгак истят лемдязь ломанть вастневить: Лияна Бакайкина, Вияна Адушкина, Мельседей Чевтаев… Лемтне ванстовсть минек ламо фамилиятнесэ. Секскак лемень путомасояк эряви невтемс ёжовчи. Те улевель паро ёнксокс.

Г. Гребенцовонь «Азбукасонть» эрьва буквань тонавтомась прядови
а покш ёвтнеминесэ, ков тагояк совавтозь ламо валт те эли тона тонавтневиця букванть лангс. Ды истямо тонавкст-урокт алкукскак максыть ламо содамочить келенть тонавтнемстэ:

Петянь порозо.

Порось – ашо кев. Пурнась Петя порт ды – кудов. Проска сырькаесь артызе кудонзо порсо. Кудось теевсь валдо, мазый. Кеци сырькаесь: Петя нуцькась – паро лездыця!

Щука.

Щукатнеде покштянок мерильть нучко. Сындест минек лейсэнек ламо. Минь кундынек эйстэст байтяк ды пидинек штюрьба. Истямо тантей кал ямось лиссь! Щукась, нать, – сехте тантей кал.

Юра ды Юля – важодицят.

Юра ды Юля – важодемань вечкицят. Юра теи венч, Юля – сты юбка. Юткошкаст сынь истяко а ютавтыть.

Тонавтомапелень «Содамоёвкст» кувтась явови вете пельксэв:

1) Ломань, оршамот, карсемат, кудоютконь ули-паро, налкшкеть: Эри свал кудосо – кирьгазо ушосо (Каштом); Тулонть марто эрить вейсэ, нардтнян чамам сонзэ эйсэ (Нардамо); Рядсек аштить ламо пейть, эрьва чистэ теить тевть (Сурсеме); 2) Ракшат, нармунть, ёзнэть, калт: Вирьга кевери салмуксов киве (Сеель); Сэрей каленть прясо свал сон сеери «кар» ды «кар» (Варака); Лейсэнть азоркс прянзо мари калось, вишка калнэть кундси, нильни яла (Нучко); 3) Чувтот, куракшт, цецят, эмежть, ярсамопельть: Иля сакшно тей малав, тесэ касы… (Кирмалав); Пидемстэ ямонтень свал минь почолетяно… (Сал); Эрьва косо касы сон, сельмекертне – ашо ловт (Пейделька); 4) Техника: Аволи чувтонь сёлмсонзо, а сыргави таркастонзо (Вармаведькев): Сэрей кудо стявтыть зярдо, лездамо сакшны сырнень карго (Сталмонь кепсиця кран); Ведь потмова, эенть алга мейсэ уить морякт-ялгат? (Ведь потмова укшныця венч); 5) Пертьпелькс: Ашназа-шаршав валскень перть копачась пертьпельксэнть (Сув); Прявтомо, пильгевтеме – сонсь панжи ортат кедтеме (Варма); Ки чирева таргавсь пикскекс, сонсь певтеме валдо кикске (Чудикерькс). Весе содамоёвкстнэ мельстуцият ды сынст содамга сави аламодо арсемс.

«Ёжов азбукас» Геннадий Гребенцов совавты кавто налксемат – «Поладык стихенть» ды «Содасак-арась пертьпельксэнть». «Поладык стихенть» налксемасонть максовить валморонь кавто строчкат, косо омбоце строчкань пентень эряви путомс смустень коряс ладиця вал.
Те налксемась пек лезды валморонь ладсемасо. Паряк, шкань ютазь истямо налксематнень пачк касыть алкуксонь валморонь сёрмадыцят. Тагояк весемесь явови зярыя пельксэв:

1)         Ломань, оршамот, карсемат, кудоютконь ули-паро, налкшкеть:

Ванят-Васят молить ялго.

Сынь умоконь паро… (Ялгат)

 

Кстыйс вирькужов минь якинек,

Кснав паксява ютась… (Кинек)

 

2)        Пертьпельксэсь:

Пры-певери эрьва ков

Веленть велькссэ ашо… (Лов)

 

Кизна шольнезь чудесь лей,

Сась телесь, вельтизе… (Эй)

Покштнень туртовгак те налксемась туи мельс. Сонзэ налксемстэ арсяткак, оймсяткак. «Содасак-арась пертьпельксэнть» омбоце налксеманть смустезэ истя жо сюлмазь валморо марто, ансяк ялатеке сон аламодо лия. Налксемадонть икеле сёрмадеесь пшкади эсь ловныцянзо туртов ды ёвтни тенст налксемань лувдонть: «Кадык покш оянк ловны тенк зярыя нурька стихть, тынь парсте кунсолодо ды вейсэ рангстадо: «Неинек, неинек, зоопарксто неинек». Те сестэ, зярдо стихесь вирень ракшадо. Бути кудоютконь ракшадо ды нармунде – валонк улест истят: «Неинек, неинек, минь кардазсто неинек». Теде башка, улить стихть «Умарьпиреде», «Паксядо», «Эмежпиреде», «Лугалангодо», «Вирде». Сехте покш ёжовчись налксемасонть вана кодамо: улить стихть, конатнесэ кортамось а виде. Сестэ тынь неть стихтнень каршо мереде: «Арась, арась, истя а эрси». Кунсолодо ды сеереде вейсэ. Невтемга:

Верьгизт, кискат – паро ялгат.

Якить вейсэ кузтемалга.

 

Пизэстэнзэ апак стякшно

Алт алыякшнось атякшось.

 

Пурнак кенерезь инзейть,

Кодат, оят, сынь тантейть!..

 

Крокодилэсь чувтопрясто

Валги алов састо-састо.

 

Ёрок ур, пондакш ур,

Кирнявтт тенек пенге нурдс.

Теке марто «Ёжов азбукась» пек питней весень туртов, секс мекс сонзэ теицянзо эйкакшт. Сынст артовксост мазылгавтыть эрьва лопанть. Те – Покш Березникень артомань школань тонавтницятне: О.Пунькаева, Н. Чикарова, Д.Андрюшина, Д.Тарутина, С.Семёнова, В.Тапаркова, В. Дёмин, У.Черанёва, Н.Васькова, Д. Шачинова, А.Лепёшкин, К.Лапцева,
А.Оськина, А.Токарева, С.Денисенко, С.Ковалёва, И.Ромашкина,
Т.Паксеваткина, Л. Старцева, Д.Колобухова, Э.Козырева, Е.Бойков,
К.Батракова, Г.Ларькина; ды сынст тонавтыцяст: С.А.Шубина,
Е. Б.Лепёшкина, Т.И.Подгорнова ды А.В.Фалина.

Целанек, «Ёжов азбукась» ловнови шождасто. Эйзэнзэ путозь алкуксонь ойме, вечкема. Сёрмадыцясь вечксынзе масторсонок весе эйкакштнень. А стяко сон алты те ловномапеленть Алисанень – вечкевикс нуцьканзо туртов. Эряви меремс, весе тексттнэ смусть мартот, саезь эрямосто, косо прявт откертне (геройтне) – минсь. «Азбуканть» ловномсто покшось ледстясы эсь эйкакш шканзо, мизолдозеви, вишкинесь – ансяк ушоды эсь эрямонзо, сескак тензэ эряви аламонь-аламонь тонавтнемс, чарькодемс, содамс, лездамс. «Азбукась» лиссь парсте. Сон эряви миненек, минек эйкакштненень, нуцькатненень, весенень. Сон макссь литературантень од эрямо. Неень а шожда шкастонть эрьва лисевксэсь ловови изнямокс, секскак те алкуксонь изнямо. Сёрмадыцясь сонськак ёжов. А ашти таркасо, свал вешнемасо, од тевсэ. Ды те ёжовчись кармавты арсеме од мельтнень-арсематнень лангсо.

«Ёжов азбука» те алкуксонь ялга эрзянь келень тонавтомасо. Неень шкасто сон пек эряви эйдень кужосо, ушодксонь классонь тонавтницятнень туртов ды весе сетненень, кить бажить тонавтомс эрзянь келенть. Паро улевель, бути сонзэ коряс теевель аудиодиск. Те пусмонть лангс нежедезь эряви ютавтнемс эрьва кодамо покш чить ды налксемат. Весе карми. Ульть шумбра, Геннадий Сергеевич! А минь карматано учомо пельдеть валморонь
од пусмот ды кемтяно, кие-кие, а тон, кода свал – кенярдовтсыть весень.

 

ЗИНЁРОНЬ САНТЯЙ

(Александр ДАНИЛЬЧЕВ),

филологиянь наукань кандидат,

     Саран ошонь 26-це лицеень эрзянь келень тонавтыця.

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...