Рубрикатор

Литературная страница Войнань килей
Войнань килей

Зяро тундот-кизэть, телеть-иеть ютасть войнадонть мейле?! Зяро ведь чудсь Пор, Утомо ды Штырма лейтнесэ?! Ансяк кодаяк а стувтови тень Кулясбуень Тюжарькень кудонть удало, пире песэ, мазыйдеяк мазый килейнесь…

Паряк, тозонь кие-бути озавтокшнызе, эли уш тезэнь правтызе мазыйканть видьмензэ ливтиця нармунь. Кода ашти цёракаень мельсэнь, сон тосо войнанть ушодовомсто прянзо невтизе шкерьгень сэрьсэ. Мейле аламонь-аламонь кассь-кепететсь, сисемшка иень ютазь рунгонзо венстизе теке шумбра-паро, галой умарь чама тейтерь. Ашо парсеень руцясо, сияждыця пиже пацяcо.

 

Малаванзо чинек-венек эрязасто чийсь ды нейгак чии шешкезь яннэ икелень «Од эрямо» вельхозартелень сюронь утомтнень вакска, вандора тарканть алга – Пор пандов. Сонзэ эзга ламо иень перть валске марто ды чинзэ прядовомга якасть Кулясбуень од аватне ды тейтертне, конань мирдест ды кирдаж цёраст-алужост эзть велявто войнасто. Сынь войнань шкастонть ды седе мейлеяк малав пелепинге Пор пандостонть таргасть пор кезэрень кедьёнкстнэсэ, ломсо, киркасо ды лиясо мейсэ…

Ашо покш кевтнень-покольтнень яжавтсть дробилкасо, машинанть мельга вансь Городской Иван. Истя тейсть кудонь строицятненень белямс поронь почт ды пандос чувозь домка каштомсо пултасть известка. Ловныцянтень чарькодеви, истямо важодемась стакадояк стакаль, мезенть кис дова аватненень, тейтертненень пандыльть целковойть-трёшникть. Важодицятнень прявтсоль Весянь Ваня. Нама, сон вансь майсицятнень эрямост лангс мелявтозь-ризнэзь, ансяк допрок мейсэяк эзь лездаво тенст. Эрявсь пеень сускозь, ине кажонь канстонть кандозь, цидярдомс войнань валсо а ёвтавикс кажонть-зыянонть. Кияк эзь пеняця, кияк эзь кувсе-аварде, умок уш авардезельть сельведтне сельмтнень коськемс-оламс.

Окойники, эряви меремс видьстэ, историянть икеле, неть тылсэ важодиця тейтерь-аватне, конатнеде СССР-сэ ульнесть ламо миллионт, – ёмазь ломанть. Пайстомотне пингест печтизь мирдевтеме, эйкакштомо, нуцькавтомо…

Эрямост педе-пес максызь Ине Изнямонть лезэс. Сынтемест душман ятось а изняволь. Седе мейлеяк паро ладсо апак ярсне, лиясто пельсвачодо, берякшке, шождыне оршамопельсэ оршазь, кой-зярдо нуласо-валасо, стявтсть пильге лангс войнасонть янгазь-калавтозь, пултазь эрямо таркатнень. Войнасто велявтозь солдаттнэнь марто вейсэ ошсо ды велесэ стявтсть од кудот, заводт-фабрикат, ветясть чугункань, автомобилень кить-шоссеть, сокасть мода, кастсть сюро, озавтнесть умаринань-атямарень садпиреть.

Теке марто вейкень пес тонавтнесть школасо, ВУЗ-со, аспирантурасо, покш мельспаросо эрьва косо, эрьва мейсэ бажасть парочинтень, мазычинтень. Эйстэст лиссть покш учёнойть, васень писательть, космонавтт, искусствань пек содавикс ломанть.

Ды ней… кодаяк а чарькодеви, превс а саеви се, войнань шкань эйкакштнень эль стувтызь, Изнямонь чистэнтькак а ледстнить эйстэдест, ды бути ансяк кой-косто – чуродо весть. Те кода истя?! А?!

Те истя цивилизованной масторсо?! Войнань эйкакштненень, эсь раськень, тиринь масторонь вечкицятненень, умок уш эряволь Московонь куншкакурос стявтомс комсь метрань сэрьсэ кеврунгонь монумент. Кадык содавольть весе, кодат масторсонок эрясть алкуксонь ломанть. Арсян, тевтеме неень ды сы шкань од эрийтнень мельсэ-превсэ а сыреми-кирвази се патриотизмась, кона ульнесь ютазь войнань шкастонть ды седе мейлеяк…

Эдь неень ламот од ломантнень корс а кирдевиця коест теке, совестенть-видечинть мейгенерть ёртозь, эрьва кодамо пежетьс-кажос совазь, эрьва кода бажить шожда, тантей эрямос. Сыненст овсе а эряви улемс эсь масторонь гражданинэкс-патриотокс, мезесь мезе-бути пек сэрей, парочинь-питнейчинь, валдо, вельть смустев уцяска-часия.

Секс, нама, ледстнян Тюжарькень пире песэ ськамонзо кадозь кудряв килеенть. Сон алкуксонь ине видечи – символ Кулясбуень ды минек масторонь войнань шкань весе тейтерь-аватнеде, конат апак жаля максызь эрямост минек мирной эрямонть кис. Ней уш ламотне эйстэдест тусть эрямостонть, тусть апак майсе эсь совестенть кис, Пазонь койсэ, валдо оймень смустенть марязь.

Секс яла онстон некшнян пире песэ уроз килеенть. Ды мекс-бути свал вейкетьстэ, цють сюморозь-нусмакадозь…

…Тундонь валске. Пертьпелькссэнть а куш-а каш. Зорясь эль ластоты: чилисеманть эзга таргавсть якстере, ожо ды лия тюст-тешкст. Кулясбуенть велькссэ: тусто сэняжа, викшнезь бриллиантокс цивтёрдыця покш ды вишкине тешттьсэ менель. Пандо прясо вирьстэнть эль марявозь уи экше, цецянь-балягань валсо а ёвтавикс тансть.

Ды, кода свал, кудряв килеенть прятёкшсто гайгезеви веленть келес куконь вайгель. Кукось кукорди апак капша, натой кувать, эрьва гайтесь кайсезь кайсети… Монень маряви, те нармунесь истя лови войнань ды сондензэ мейлень сельведьсэ ды ливезьсэ валозь, ней уш допрок стувтовозь стакадояк стака иетнень.

Пётр Ключагин

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...