Рубрикатор

Литературная страница Садсо одс моры цёковось
Садсо одс моры цёковось

Анатолий Устимович Эскин чачсь 1937 иень июлень 10-це чистэ Кочкурбуень Семилей велесэ. Школань прядомадо мейле тонавтнесь Мордовской госуниверситетсэ. Сонзэ марто вейсэ тонавтнесь П.А.Ключагин сёрмадеесь. Вана кода ледстни сон сеть шкатнеде:



«Мельспаросо ледстнян сеть а стувтовикс иетнень. Минек – велень цёратнень ды тейтертнень – вейсэндясь вейке покш мель-бажамо: парсте содамс рузонь ды эрзянь кельтнень, минек ламо раськень литературанть. Тень пингстэ башка мель явинек эрзянь ды мокшонь поэттнэнь ды прозаиктнень творчестваст тонавтнемантень. Сестэ филологиянь факультетсэ лисьмапрякс чавсь ёроков од сёрмадыцянь кружокось, конань ветясть эрзянь содавикс поэтэсь Артур Моро ды учёноесь-литературоведэсь Леонид Васильев. Тесэ ушодызь кист-яност истямо содавикс литератортнэ, кода С.Кинякин, Ю.Кузнецов, Н.Учватов, А.Ежов. Сынст ютксто творческой виень коряс сехте пек явовсь А.Эскин, кона университетсэ тонавтнемстэ уш кенерсь сёрмадомо кементь вадря стихотвореният ды поэмат. Од поэтэсь весе смустьсэнзэ-ёжосонзо маризе войнадо мейлень шканть кенярксов лувонзо, зярдо минек ломантне, малав вете иень перть ине ризксэнть, майсематнень цидярдозь, азарсь душманонть изнямодо мейле покш бажамосо кундасть мирной эрямонть кемекстамо-вадрялгавтомо.

Ней минек велькссэ

      одс ванькс кошт,

Прок тундонь сад ней

         масторсонок,

Секс седейсэнек

       кеняркс покш,

Секс истят весёлат

               моронок.

Изнинек минь»)

Теке марто Эскин эзь стувтне раужо пельсэ копачазь эйкакшчинзэ, кона войнань иетнестэ ютась Семилей велесэ. Тов эрьва чи фронтсто сакшныльть сельведьсэ валозь стака кулят.

Мон эзинь юта

        войнань киява,

Но марсинь мон ды

     некшнинь а весть,

Кода лайшесть

  мирдест кисэ ават,

Цёраст кисэ

  прячерест раздесть.

Тетянок киява»)

Кода алкуксонь гражданин-патриот, А.Эскин весе седейсэ кеми минек масторонть валдо сы шкантень. Те мелесь-арсемась парсте ёвтазь «Кить» стихотворениясонть:

Тердить келей китне

                 икелев,

Чинь манейсэ

     валдомтозь кить.

Эскеляк, ялгай,

              апак пеле,

Неть китне

    од чинтень ветить.

Мезде аволь сёрмадо А.Эскин, эрьва произведениясонзо неяви чачома ёнксонтень певтеме вечкемазо, кона, прок зорювань валдо ды шольниця лисьмапря, эрьва кодамо мазый тюссо викшни-гайгевти сонзэ моротнень.

Келей паксят, лугат,

        кить певтеме,

Маней чи ды

        сияждыця лей,

Мезе мон бу теевлинь

            тынтеменк,

Кодат морот

  моравлинь бу ней?

Тиринь масторонтень ды тиринь аванстэнь ине вечкемась Эскинэнь туртов – вейке аявовикс чарькодема, мезесь, прок кинь невтиця теште, терди ломантнень улеме алкуксонь гражданинэкс:

Эрямо макссть

        тенек аванок,

Сынь сехте пек

мелявтыть сень кис,

Штобу цёраст

      улевельть анокт

И паро тевс,

           и стака кис.

Од седейть»)

Чачома ёнксонь природань седейс токиця картинатне, тюстнэ сонзэ произведениятнесэ нучк-пачк сюлмавозь мирной эрямонть кенярксов лувонть-ладонть марто:

…Чипаесь пейди ванькс хрусталь менельсэнть,

Кенярдозь цитни сиясо лугась.

Од чи! Тонь самот марто паро мельсэ

Эрьва ломанесь паро тевс кундась…

Чачома велесэ» поэмастонть)

Поэтэсь ёроков мастерэкс невтизе прянзо покш произведениятнень сёрмадомасояк. Теньсэ сонензэ лездасть эсь раськень устно-поэтической творчествась, эпосонь складямонь паро койтне ды художественной опытэсь. Сон пек вечкилинзе ды вадрясто содылинзе рузонь поэттнэнь-классиктнень творчестваст, тень пингстэ сехте малавиксэкс ульнесь тензэ С.Есенинэнь лирикась.

1962-1975 иетнестэ А.У.Эскин важодсь «Сурань толт» журналсо, «Эрзянь правда» газетасо литсотрудникекс, Мордовской книжной издательствасо, телерадиокомитетсэ редакторокс. 1976-1977 иестэ – «Сятко» журналсо ответственной секретарь.

«Оят-ялгат» стихень васенце пусмозо лиссь 1963 иестэ. Теде мейле лиссть «Сюкпря» (1966), «Чадыть цецят» (1969), «Паро ёжо» (1973), «Тундонь пиземе» (1977), «Умарькс тарад» (1992) сборниктне. Эряви меремс, весе сынь сёрмадозь профессионалонь ёрокчисэ. Поэтэнть сюпав, образной кель-валозо, сонзэ эсензэ эпитетэнзэ, метафоранзо, сравнениянзо. Стихень складямонь техниказо эрзянь ды мокшонь поэзиясонть те шкас ловови вадрятнестэ вейкекс.

Неть ёнкстнэнь невтемаст туртов сайсынек «Тундо» стихотворениянть:

Лейс сяворсь домка

              менелесь,

Ведесь весе сэнь,

Ашо мацейкс шожда

                 пелесь

Экшели лейсэнть.

Сырнень сеелькс

          эрькинесэнть

Налкси тундонь чись.

Пандо чирентень эжнеме

Луганарнэ лиссь.

А.Эскин эрясь аволь кувать. Сон кулось 1977 иень февралень 25-це чистэ.

 

П.Ключагин,

МР-нь культурань заслуженной роботник.

 

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...