Рубрикатор

Литературная страница Прок, тиринь велесэм ульнинь...
Прок, тиринь велесэм ульнинь...

 

Улкоть тень истя савсь чийнемс. Эрявсь вастовомс вейке ломань марто, обедтэ мейле – лиянь марто. Кудов пачкодинь, бути истя можна меремс, эль-эль. Озынь коник лангс ды нолдыя телевизоронть. Арсинь марямс течинь кулятнень. Понгсь Мордовиянь 10 каналось. Ванан, тосо невтить, кода тешкстыть эрзятне Роштуванть.

 

– Вере Паз! Те эдь невтить тиринь Шугурова велем?!

Мон сеске полавтовинь. Ков-бути ютась сиземась. Виеминь! Ванан  – тосо содавикс ломанть:  гармошкасо седи икелень трактористэсь Михаил Кулавский, вакссонзо нурька морот морыть Нина Манина, Нина Зиновьева, фермерэсь Юрий Семенов, Раиса Демина, Анна Дудникова.

Нурька моротне кодат кенярдовтыцят? «Пандо прясто ало пев дегодь боцька кевери,  эрьва цёранень вадря тейтерь эряви». Мейле таго киштемань морот.

Художественной самодеятельностень артисттнэ эрзянь оршамопельсэть. Сынь молить велень ульцяванть кудонтень, косо пидезь-панезь сюкорот, пачалксеть.

Вана те кудоськак. Инжетнень кузтембесэ васты Любовь Кулавская, гармонистэнть низэ. Совицятнень каванить сюкородо. Ды таго киштемань морот.

Эх, секень вант, пильгтне сынсь киштеме туить?! Монгак эсь пачкан  серьгединь: Шугурова, тиринь велем, свал тон аштят монь икеле, ков а молян, тон мартон.

…Весе пуромсть столь экшс. Столь лангось пешксе ярсамопельде. Тесэ мезе ансяк арась?! Сывелень прякинеть, сюкорот, пангт ды истя седе тов. Чайде симемадо мейле самодеятельной артисттнэ серьгедсть моро. Сон веледенть, сетнеде, кить эрить тосо течи.

Операторось сними Шугурова велень кудотнень. Нусмакадынь – ламотне кадозь, чавот.

– Минек Шугурова велесэ течис эрить эрзятнень кезэрень койтне-кирдатне, – ёвтни Шугурова велень средней школань тонавтыцясь Нина Манина. – Покштятнень-бабатнень койтнень совавтано течинь эрямос. Велесэнек те тевенть теить художественной самодеятельностень артисттнэ.

Кецязевинь. Шугуровасо эште улить ломанть, кить мелявтыть сонзэ вандынь чидензэ, кить  тонавтыть тиринь ёнксонь вечкеме, кить а стувтнить эрзянь кезэрень койтнень-кирдатнень.

Передачась мольсь кеменде ламо минутат. Сынь эзть марявояк, кода ютасть бойкасто. Мерят, нацяс ульнинь тиринь Шугурова велесэнть. Тень кисэ покш сюкпря ёвтан телевидениясо важодицятненень ды, нама,  Шугурова велень художественной самодеятельностень артисттнэнень.

Петр Зиновьев

 

Новости

Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...
 
Чемпионатонть анокстамга

Мордовиянь Прявтось Владимир Волков декабрянь 16-це чистэ ютавтсь 2018 иень масторлангонь Футболонь чемпионатонтень анокстамга оргкомитетэнь промкс, конасонть важодсть МР-нь Госсобраниянь Председателесь Владимир Чибиркин, Правительствань Председателесь Владимир Сушков, Мордовиясо Главной федеральной инспекторось Михаил Сезганов, Саранск ошонь Администрациянь прявтось Пётр Тултаев, «Оргкомитет Россия – 2018» АНО-нь операционной директорось Дмитрий Годунов.

Подробнее ...
 
Прявтось Московсоль

Мордовиянь Прявтось Владимир Волков декабрянь 18-це чистэ Московсо важодемань коряс вастовкшнось Россиянь Финансонь министрань полавтыцянть Леонид Горнинэнь марто.

Подробнее ...