Рубрикатор

Литературная страница Г.Д.Маскаев: «Пертьпельксэнть эряви вечкемс»
Г.Д.Маскаев: «Пертьпельксэнть эряви вечкемс»

Пертьпельксэнь ваньксчиденть ашти весемесь, мезевтеме а ванстови ломаненть эрямозо. Кодамо мода лангсо минь кастано эмежть-фруктат, кодамо коштсо лексетяно, ванькс-аволь ведте симтяно, нурькинестэ, весемесь токи минек шумбрачинть. Нать, а стяко 2017 иенть РФ-нь Президентэсь В.В.Путин лемдизе Экологиянь иекс.  Мордовия Республикань сехте мазый таркатнестэ вейкесь – «Национальный парк «Смольный» Федеральной Государственной бюджетэнь учреждениясь, конась теезь РФ-нь Природной ресурстнэнь ды экологиянь министерстванть  юрсо. Течи минек редакциянь инжесь  – сонзэ прявтось Г.Д.Маскаев.

 

– Геннадий Данилович, ледстинк «Смольный» Национальной парконть историянзо?

– Минек паркось теезель 1995 иень март ковсто, кода Мордовия Республикань пертьпельксэнь питнейчитнень, виртнень ды эйсэст улиця чуросто вастневиця тикшетнень, идем ракшатнень ванстомаст ды тонавтнемаст туртов. «Смольный» паркось сравтовсь минек республикань Ицялонь ды Покш Игнатбуень ёнкстнэва Ратор леень керш чиреванть, весемезэ 53 гектарт лангсо.

Минек учреждениянть лангс путозь ламо эрьва кодат тевть, конатнень ютксо сехте эрявиксэсь – кода покштнень, истя вишкинетнень пертьпельксэнь ванстомо ды алкукс вечкеме тонавтомась. Койсэнь, те тевесь ушодома вишка  порасто, эйкакшонь кужосто.

– Геннадий Данилович, территориянк аволь вишкине, сатыть-арась виенк ванстомс вейсэнь сюпавчитнень?

– Алкукскак, минек лангс путозь покш ответственность «Смольный» Национальной парконть аволь ансяк ванстоманзо, истя жо свал  сонзэ одкстомтоманзо коряс .

Парконть панжомань васень читнестэ, теезель ванстомань отделэсь. Сонзэ кемекстамсто ды кастомсто ламолгавтовсть эйсэнзэ важодицятне, кепедевсть сынст квалификацияст. Течи ванстомань отделэсь – те вейке таркасо а аштиця, свал одонтень бажиця подразделения, конась сови государствань инспекциянтень эсь ведомствань территориясонть госнадзоронь ютавтыцятнень юткс.

Порядоконть ванстомга эрьва инспекторонтень максови башка тарка, (обход), конань мельга сон пштистэ ваны.

Обходокс минь лемдятано парконь башка тарканть, косо весе уликсэнть кисэ, ков совавтовить строениятнеяк, эрьва инспекторось канды ответственность. Эсь тевест топавтомадо башка ванстыця отделэсь кеместэ важоди учреждениянь лия подразделениятнень марто, вийтнень вейсэндязь, ютавтано ламо эрьва кодат мероприятият. Невтемакс, инспектортнэ свал лездыть наукань отделэнтень маршрутонь учетнэсэ, ютыть вейсэ наукань экспедициятнень ды туристэнь группатнень марто. Истя жо государственной инспектортнэ лездыть ваномань (наблюдениянь) тевтнесэ ды парконь территориясонть уликс идем ракшатнень ды нармунтнень ловомстост.

– Кизэнь шкасто парксо важодицятнень тевест седе ламолгадыть?

– Тундосто саезь сексенть самс ванстыця отделэнть лангс путови покш тев. Те – пожартнэнь а нолдамось ды кирвазематнень каршо бороцямось. Нетнень ютксо аволь  ансяк эрицятнень мельга ваномась, штобу сынь топавтовольть вирьсэ улемстэ пожаронь а нолдамонь вешематнень, истя жо виртнесэ профилактикань мероприятиятнень ютавтомась. Те, васняяк, виртнень коське чувттнэде-куракштнеде ванськавтомась, китнень парсте кирдемась, ведень саемань таркатнень анокстамось, просекатнень сокамось, пожаронь а нолдамонь тешкстнэнь ды невтевкстнэнь (указательтнень) понгавтомась, вирень хозяйствань роботатнень топавтомась.

– Сеедьстэ-аволь лангс ливтевить асатыкстнэ?

– Ванстыця инспекциянть важодеманзо вельде меельце шкастонть киртявить парксонть асатыкстнэ. Зыянов тевтнень ютксто вейкесь, закононь колазь парконь территориясо улемась. Колыцятне, кода свал эрси, масторонь эрьва кодамо таркатнестэ тенек сыця туристтнэ. Ванстыця службась вети мартост профилактикань робота.

Тешкстаса, весемезэ минек парксо важодицятнеде 75 ломанть, 44 эйстэст – государственной инспекторонь тевень топавтыцят. Тешкстаса, ламот важодицянок ютксто кудоютксояк кирдить ракшат. Тень лангс апак вано, виест саты эрьва ков.

Ютазь иестэ пек одкстомтозель минек паркось. Сыре  чувттнэнь таркас озавтозельть ламо од килейнеть ды пичеть.

– Течи кодат вешемат те тевень топавтыцятнень икелев аравтадо?

Ванстыця отделэнь сотрудниктнень икелев аравтовить ламо тевть, конатне, эсь важодемадонть башка, сюлмавить парконть виевгавтоманзо ды сонзэ пертьпельксэнь мазычитнень ванстоманзо марто. Государственной инспектортнэнень вешематнень ютксо: парсте эряви содамс эсь обязанностнень, видестэ тевс нолдамс весе правилатнень. Вадрясто содамс пертьпельксэнь ванстомань законодательстванть, а ёмамс а содавикс таркасо улемстэ. Виде, сехте эрявиксэсь – седейшкава вечкемс пертьпельксэнть ды путомс питне эсензэ ды ялгатнень важодемантень.

– Геннадий Данилович, «Смольный» Национальной паркось ламо иень перть эрси «Марш парков» акциясонть. Вановтонк коряс, кодашка лезэ сон канды эрицятненень?

– Вана уш комсь иень перть минек паркось свал эрси те акциясонть. «Марш парков» – раськеютконь пертьпельксэнь ванстыця покш акция, конась ютавтови эрьва иестэ ды канды общественной смусть. Сон вейсэнди перьканзо весень, кить ризныть-палыть пертьпельксэнь ванстовиця таркатнень (национальной парктнень, заповедниктнень, заказниктнень ды пертьпельксэнь памятниктнень) кисэ.

Акциянть ютавтомань васень тевесь – невтемс весе эрицятненень, пертьпельксэнь ванстомань территориянь башка таркатнесэ уликс стакачитнень, муемс алкуксонь лезксэнь максыцят, минек ломантнень превс-мельс пачтямс покш каштанчи пертьпельксэнь уликс сюпавчинек коряс.

2016 иестэ «Марш парков» акциянть пингстэ «Смольный» Национальной паркось Кемля велесэ ютавтсь покш мероприятия, ков сакшность Ицялонь енксонь школасо тонавтницятне, эйкакшонь ды од ломанень общественной  вейсэндявксос совицятне,  студенттнэ ды весе сетне, кинь ульнесь мелест.

Те чистэнть весе пурнавозтне пертьпельксэнь мазый плакат марто ютасть центральной ульцяванть, верьга вайгельть минек ванстовиця таркатнеде евтнезь, сынст ванстомо тардезь. Ансяк истя ломантнень седейсэ кирвазтеви пертьпельксэнь ванстомань толнэсь.

В.Юдина

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...