Рубрикатор

Литературная страница КУЛЯЗБУЕНЬ ЦЁРА
КУЛЯЗБУЕНЬ ЦЁРА

 

Июнень 18-це чистэ филологиянь наукань кандидатось, эрзянь содавикс писателесь П.А.Ключагин тешкстызе 80 иень юбилеензэ. Эряви меремс, П.А.Ключагинэнь республикасонть содасызь аволь ансяк кода писателенть, но и содавикс учёноенть. Сон ламо иень перть важодсь Н.П.Огарёвонь лемсэ МГУ-нь филологиянь факультетсэ. Пётр Андреевич эсензэ творчествасонзо покш тарка явсь эйкакштнень туртов произведениятнень сёрмадомантень. Течи минек ули меленек лоткамс эйкакштненень алтазь сонзэ сехте паро произведениянзо лангс

П.А.Ключагин сеть писательтнень ютксто, конатнень эйкакшпораст ютась войнань стака шкастонть. Сон покштнень марто вейсэ печтясь зыянтнэнь-майсематнень. А стяко ламо произведениянзо алтазь войнань шкань ды войнадо мейлень эйкакштнень эрямост невтемантень. Сёрмадозь сынь виевстэ, маряви, сёрмадыцясь эрьвантень путызе оймензэ.

Пётр Андреевич Ключагин чачсь 1936 иень июнень 18-це чистэ Отяжбуень Кулязбуе эрзянь велесэ. Тетязо, Андрей Степанович, ульнесь тестэнь, авазо, Акулина Фёдоровна, Дубёнкань райононь Кочкурова велестэ. Аванзо малавикс раськекс ульнесь М.И.Наумкин эрзянь учёноесь, эсь раськень школатнень туртов книгань сёрмадыцясь. Войнань шкасто Петя цёрынентень савсь печтямс ламо стакачить. Тетязо войнань васенце иетнестэ чавовсь Смоленск ошонть маласо. Авазо кадовкшнось колмо эйкакш марто. Акулина Фёдоровна чинек-венек важодсь чугункань ки лангсо, а Петя ялаксонзо-сазоронзо марто лездась кудоютконь тевтнень топавтомасо. «Свал вельть училинек тундонть, – сеедьстэ ледстни писателесь. – Ансяк солы ловось – пижелгады нарось. Васня сэняжасто панжовить шукшторовтне, мельгаст парсеень ашо пацят пряваст каить лёмзеркстнэ, вельтявить цецянь лопинесэ атямартне, мерят, лангозост валгить ашо нимилявонь пувозт. Теке басом цють якстердиця цюцёвт понгавтыть тарадгаст бояркурось ды пизёлксось. Талай сёксня, зярдо лопатне весе прыть, апак учо умаринанть тёкшсто мазыйстэ кивчкади меельце тантей умаресь ды кази а ёвтавикс кеняркс. Умарь пиресь монь туртов свал ульнесь мелень витицякс-оймавтыцякс». П.А.Ключагин эсь произведениятнесэ одов ды одов велявтни се тундонтень, козонь кадовсь, куш стака, ялатеке валдо эйкакшпоразо. 1944 иестэ ушодсь тонавтнеме Кулязбуень начальной школасонть. Тонавтнесь покш мельсэ. Свал мельсэнзэльть тетянзо валтнэ: «Тонавтнек, Петя, каст превей цёракс, ванстык авать, лездак ялаксот-сазорот туртов. Сындест питнейть тонеть мастор лангсо арасть». Неть валтнэнь Андрей Семёнович ёвтынзе цёранстэнь войнадо икеле. Седеезэ теке марясь: а сави одов вастовомс семиянть марто, а несы Петя цёранзо, конань эйстэ, васняяк, несь эсь тевень поладыцянть. 1955 иестэ Петя прядызе Станциянь (истя мерильть Отяжеле посёлкань школантень) ды сась тонавтнеме Мордовской государственной университетэнь филологиянь факультетэнь национальной отделенияв. Те факультетэнть П.А.Ключагин кочкизе а стяко: школасо тонавтнемстэ терявтсь виензэ газетас сёрмадомасо, салава тешкстась зярыя стихотвореният. Арсесь седе парсте тонавтнемс раськень келенть ды литературанть. Тесэ, уцясказонзо, понгсть ламо паро ялгат ды тонавтыцят. Университетсэ тонавтнемстэ покш мельсэ кунсолось М.М.Бахтинэнь, М.Н.Колядёнковонь, Н.Ф.Цыгановонь, Н.И.Черапкинэнь, И.Ф.Петербургскоень, А.И.Маскаевень, И.Д.Воронинэнь лекцияст. Теке шкастонть сеедьстэ инжекс тенст сакшность А.К.Мартынов, К.Г.Абрамов, С.Е.Вечканов, А.С.Малькин, М.А.Бебан, А.С.Щеглов эрзянь ды мокшонь писательтне. Ловность тенст эсест од стихест, басняст, ёвтнемаст. Сеть иетнестэ филологиянь факультетсэ важодсь Артур Матвеевич Моро эрзянь содавикс писателесь. Сон ветясь тесэ тонавтницятнень туртов литературной кружок. Сеедьстэ «Мордовский университет» газетасонть яволявтневсть сехте паро произведениянь коряс пелькстамот. Вейке истямо пелькстамосонть изницякс лиссь П.А.Ключагин. Ловныцятненень вечкевсь сонзэ «Цярахман» ёвтнемазо. Те ульнесь писателенть васенце покш изнявксозо, кона макссь тензэ сёлмот. Бажась седе товгак сёрмадомс прозасо, поэзиясо ды публицистикасо. Секскак неть иетнестэ вейке-омбоце мельга произведениянзо лисить «Сятко» журналсо ды «Эрзянь правда» газетасо. А стяко университетэнть прядомадо мейле, кода газетань сехте паро корреспондентэнть тердизь тей важодеме. Зярыя иеть П.А.Ключагин важодсь «Эрзянь правда» газетань корреспондентэкс. Мейле уцяскась пачтизе Казахстанов, косо ульнесь «Хлебороб Приишимья» ды «Лениногорская правда» газетатнень корреспондентэкс. Мейле тонавтнесь аспирантурасо, идизе филологиянь наукань кандидатонь диссертациянть ды пенсияс лисемазонзо важодсь тонавтыцякс университетэнь журналистикань кафедрасо. Литературасонть янонзо муизе а сеске. Журналистэкс важодемстэ кармась чарькодеме эрямонь зэменть. Газетас сёрмадсь вадрядояк, маштсь сялдомояк, мезень коряс а свал вечкевсть сёрмадовксонзо. Сонзэ пек ацирьгавтсть апаро ломантнень раужо тевест-валост. Се шкастонть фельетононзо вейке-омбоце мельга лиснесть газетатнесэ (сехте содавиксэсь «Тувонь бунт»). Истя аламонь-аламонь кармась чарькодеме-марямо сонзэ обуцянь ёнкстнэнень ладиця жанранть – пеедькшнемань-згилямонь нурька ёвтнеманть. Истямо жанрань ламо произведениянзо совасть «Од пингес кить-янт» (1977), «Пирявкс» (1979), «Меельце кулят» (1990) сборниктнес.

П.А.Ключагин сёрмадсь эйкакштнененьгак. Национальной школань программатнес умок совавтозь сонзэ «Ожо цецят» ды «Цярахман» ёвтнематне. «Ожо цецят» ёвтнеманть литературань ванныцятне ловить автобиографическойкс. Ванька цёрыненть образонзо юрс писателесь ламо путы эсь эрямостонзо. П.А.Ключагиннэнь, кода Ванька цёрынентеньгак, сатотсь а шожда уцяска. Эйкакшпоранзо, ломаненть эрямосо сехте уцяскав шканть, колызе Ине Отечественной войнась. Войнань васенце читнестэ писателенть тетязо, кода Ваняньгак, тусь ятонть каршо тюреме. Ёвтнемасонтькак, а весть Вечкеньбуень велень эйкакштне лиснесть чугункань кинть чирес тетяст-леляст вастомо. «Весть (те ульнесь, зярс мельсэнь ашти войнань колмоце иень тунда), – сёрмады П.А.Ключагин, – валскесь потмураль, экшель. Авань ташто фуфайкасо сынь чугункань кинть чирес. Кувать якинь мекев-васов… Яла учинь… Окойники разъездэнть ёндо лиссь поезд… Друк вейке вальмась панжовсь… Тосто лангозон вансь ранязь солдат. Прязо ды кирьгазо тапарязельть марлясо. Цёрась мизолдозевсь. Ансяк кода-бути мелявтозь-жалязь. Мик моньгак седеем сюморгадсь. Солдатось аламос ёмась ды сеске, прок киносо, таго лиссь вальмантень. Сон капшазь-талнозь венстизе вагонстонть прянзо, мейле – карксамос рунгонзо ды вить кедьстэнзэ цецятнень потс ливтясь кши буханка. Те шкастонть виевстэ увнозевсь паровозонь гудокось, ды пачканзо маринь пиже-ожо вайгель. «Ва-ню-ша-а-а!!!». А содатано алкукс-аволь те ульнесь?! Содатано ансяк вейке: П.А.Ключагинэнь тетязо эзь велявто кирвитолонь паксятнестэ.

«Свал, зярдо ледстнян те ёвтнеманть, – кода-бути панжизе оймензэ тень писателесь, – сельведень туить. Арсинь ёвтнемс те пайстомо эйкакшпорадонть неень шкань пакшатненень. Ды кода-бути сонсь чачсь ёвтнемась». П.А. Ключагин эсь ёвтнемасонть кепедсь аволь од тема. Ансяк писателенть теньсэ покш талантозояк: машты сонзэ од ёндо невтеме. Васенце варштавкссо те васня а редяви, ансяк произведениянть педе-пев ловномадо мейле весементь чарькодьсак. Истя, П.А.Ключагин сайсь Ванька цёрыненть эрямосто вейке невтевкс ды те ульнесь сонзэ эрямосо сехте сэредьксэв таркакс. Чинек-венек учось тетянзо велявтоманть. Сонзэ марто цёрынесь сюлми мастор лангсо уцяскав эрямонть. Те мелесь одов ды одов вети сонзэ чугункань кинть чирев. Васня лиснесь ялганзо марто. Зярдо тонатнень мольс мелест, Ванька, пизементь лангс апак вано, одс сась разъездэв. Писателесь таго невти художественной литературань вадря деталь. Тетянзо цёрынесь неизе се чистэнть, зярдо ульцясонть мольсь пиземе. Пертьпельксэнть маней лувонзо коламось кармавты ламодо арсеме: велявты-арась цёрыненть тетязо. Колавсь пертьпельксэнть лувось, колави цёрыненть уцясказояк. Секскак ёвтнемась прядови нурькинестэ: «Умок прядовсь войнась, умок тетям калмазь Смоленскоень Износки велень школанть вальмалов. Ялатеке сельмем икеле сон нейгак кадовсь истямокс, кодамокс неия эйкакшпингстэ, ожо цецянь панжома шкасто». «Ожо цецят» ёвтнемась совавтозь 2-це классонь «Тиринь кель» тонавтнемань книгантень ды теевсь хрестоматийнойкс.

«Цёканька» ёвтнемась алтазь инязоронь властень шкасто эрзянь раськенть ды, васняяк, эйкакштнень эрямост невтемантень. Минек койсэ, пек удалась те ёвтнемась аволь ансяк смустензэ, ёвтнемань лувонзо коряскак. Произведениянть ушодкссо маряви: кортамось моли неень шкадо. Сон чудезь чуди ды артозь валдо тюссо. Ёга цёрынесь Проска бабанзо марто сась умарьпирев кшуманень таргамо. Ловныцясь ваны сень мельга, кода Проска баба апак налкставо толкови цёрынентень неть эмежтнеде, кода седе парсте таргамс сынст. «Бути кшумань корёнось керяви, а ванстови, наксады», – корты нуцькантень Проска баба. Кшумантнень таргамсто цёрынесь муи цёканька ды кевкстьсы бабанзо, мезе те истямось? «Те, нуцькинем, цёканзюро, лиякс меремс, цёканька. Кезэрень шкане, зярдо ломантне писть-палсть нужасо-зыянсо, те кшни пелькскесэнть кодыльть карсемапельть – карть. Кодыльть сынст ленгестэ, тон ленгентькак а содасак. Сонзэ теильть пекшень керьстэ, мезенть лутылизь чувтыненть лангсто тунда, тапарилизь кирекс. Тельня коське керенть лопавтилизь ведьсэ, пеельсэ лазнылизь, ваткилизь суронь келесэ, кшнанькарксонь кувалмосо. Бувала, эдь, велень кажов ломантне иень перть яксильть карьсэ. Бути ульнестькак понань эли кедень кемест, сынст тонгонилизь ансяк покш кенярксчистэ, ды допрок пингест перть ванстылизь». Кортамось сырькаенть ды цёрыненть ютксо нурькине. Ды кода тень парсте теи авторось: максы сонзэ карадо-каршо кортамонть вельде ды совавты действиянтень. Те эряви ушодксонть туртов. Сеедьстэ минек литературасонть вастневи те приёмось, зярдо произведениясонть ёвтнемась тееви героенть ледстнеманзо вельде. Секскак Проска баба ёвтнемань герой, аволь ёвтниця. Сон ледстизе седикелень эрямонть аволь шнамонзо, эли сялдоманзо кисэ. Тень а теи писателеськак. Сон ёвтни се шкань эрямостонть вейке тевде, кона кадсь домка тешкс Проска бабань уцясказонзо. Вишка пингстэ сон Ёга ялаксонзо марто якасть бояронь вирев карекс ленге мельга. Лиссь истя, сынст стардызе сюпавонть управляющеезэ. Ёгань пек чавизе ды ёртызе сёлтс. «Сон эль-эль уйсь сюпавонь кудонть ёнов, нать, кемсь, паряк, тона ули седеймарицякс – нолдасы сёлтонть чирес. Эрькенть куншкасо ялакскем овсе лавшомсь: сиземась ды коцтонь понкстнэ-панартнэ рунгонзо усксть потмаксос. Пиштякась меельце вийсэнзэ пулькась вейке таркасо. Кода мон сестэ пря чавинь, буто сёлмовтомо нармунь. Ансяк эзинь лездаво. Ды зярдо Ёга кармась ваямо, а эсь вайгельсэ авардезь пижакадсь, сюпавонь кискась цийнезевсь ды кирнявтсь ведентень. Сон нацяс уйсь ялакскентень ды цопадизе панардо, бульчом, снартнесь идемензэ: «Забавно! Весьма забавно! – ракась Порватов, прок айгор, цяхась. Ёга чопавтнесь яла седе пек ды пек. Кискась кундакшнызе панардо, усксь мельганзо, ансяк менсь пейстэнзэ. Ялакскенть ашо черензэ сравтовсть валдо-сэнь веденть ланга ды састо кармасть новолеме алов». Писателесь а бажи сялдомс се шканть, – сон невти зярыя паро ёнксткак, мезде сеедьстэ стувтнить се шкань сялдыцятне. Сон невти, кода сестэяк ды нейгак, эрямосонть вастневсть паро ды берянь ломанть. Чумо тесэ аволь шкась – сонсь ломанесь, семиясо сонзэ кастомазо.

П.А.Ключагинэнь эйкакшонь ёвтнематнень пек вадря кель-валост. Эрьва валрисьмесь таркасонзо. Писателесь ламо важоди валонть смустензэ лангсо. Кода тензэ удалакшны тень теемс? П.А.Ключагин весть мерсь: «Книгань ловномсто, велесэ улемстэ, писательтнень марто вастневемстэ мон башка тетрадьс тешкстнян чуросто вастневиця валтнэнь. Монь тонавтыцям – эрямось». Теде башка писателесь ламо тонавтни раськень устной творчестванть ды рузонь литературанть пельде. Теньсэ П.А. Ключагинэнь эйкакштненень алтазь произведениянзо виевчист.

Арсетяно П.А.Ключагиннэнь кеме шумбрачи ды од изнявкст эйкакштнень туртов произведениятнень сёрмадомасо.

М.И.Ломшин,

 

Н.П.Огарёв лемсэ МГУ-нь профессор

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...