Рубрикатор

Литературная страница МЕЗЕ ВЕШНЯТ, СЕКЕНЬ МУЯТ
МЕЗЕ ВЕШНЯТ, СЕКЕНЬ МУЯТ

Кода кортыть, эрьва шканть эсензэ героензэ. Меельце иетнестэ масторсонок истят «геройтнеде» куш сёлт прудяк. Сынь пек ламолгадсть. Ды мезе ацирьгавты – истят «геройтнень» ютксо вастневить од ломанть: школасо, техникумсо-косо тонавтницят. Аволь умок Интернетс понгсь видео-роликесь, косо «героекс» теевсть Ульяновской областень Карсунскоень технологиянь техникумонь студенткатне. Общежитиясо пелеветь покш курсонь колмо студенткатне чавсть васенце курсонь студентканть. Чавсть апак жаля: кедьсэ, пильгсэ. Чавсть кува понгсь. Ды зярсыя. Кардыця арасель. Ков-бути ёмакшнось общежитиянь воспитателеськак.

Кинь чавсть, се пек пижнесь. Марицянзо арасельть. Мерят, общежитиясь чаволь. Течи тесэ азортнэ ульнесть сынь, «геройтне». Ванат видеороликенть эйсэ ды арсезеват – зяро кеж од ломантнесэ. Ды кить тюрицятне?! 16-18 иесэ тейтерькат.

Тесэ сти кевкстемась: мезень кисэ чавсть 16 иесэ уроз эйкакшонть? Видеороликсэнть теде эзть ёвтне. Карминек содамо ансяк сестэ, зярдо Центральной телевидениянь 2-це каналсо, «Прямой эфир» передачасонть, эштё весть невтезель те видеороликесь, ды конань коряс эсь мелест-арсемаст ёвтызь передачас сыцятне, ютксост ульнесть юристт, общественной деятельть, артистт, РФ-нь Госдумань депутатт. Тердезельть  чавицятнеяк. Эйстэст вейкесь ульнесь аванзо марто. Кода учневськак, авась шнась эсь тейтерензэ. Кодамо сон вадря, седеймариця, ялганень лездыця.

– Монь семиясь покш, трян вете эйкакшт, – корты авась. – Зярдояк эзинь арсе – тейтерем кепедьсы кедензэ лиянь лангс.

«Героесь» ней тесэ чевте седей. Вайгелезэ овсе а маряви. Сельмензэ а кепеди, ваны кияксос, мерят, нейке вановтсонзо варя пели.

– Кодамо чумондома максовлиде эсь тейтеренк туртов? – кевкстизь аванть.

А содан, келя, паряк, понгсь берянь ялга юткс. Тюреманть ушодыцясь аволь сон.

Лия «героесь» прянзо эзь чумондо. Передачас сыцятнень кевкстемаст лангс отвечась ланга-прява.  Келя, васенце курсонь студентканть чавомань тувталокс ульнесть прячерьсэнзэ сийтне. Сынст истожамс сон эзь бажа. Кода мейле карминек содамо, кодаткак сийть тейтерьканть арасельть. Те ансяк тувтал.

– Тон авакс бажат улемс? – кевкстизь тейтерьканть.

– Бажан.

– Мелезэть туевель, нарьгавольтькак истя жо эйкакшот лангсо?

– Аволь туе.

– Мекс жо тон кедеть нолдыть, тюрить, чавить кува понгсь.

…Чатьмонема.

Течи минек од ломантне «превейть». Сынь содыть, аволь совершеннолетнейтнень истямо тевень кисэ а пекстасызь тюрьмас. Секскак истятнэ салыть кинь понгсь,  вельть пенсионертнэнь. Паряк, Ульяновскоень областень «геройтне» арсесть истя жо, тюреманть кисэ тенст чумондома а ули. Арась, карми. Ульяновскоень областень прокуратурасо Карсунскоень технологической техникумонь общежитиясо тюреманть кисэ колмо тейтерькатнень лангс панжозь уголовной тев. Сынст пекстасызь тюрьмас.

Истя эрявияк. Мезе вешнесть, сень муизьгак. Тосо, паряк, тонавтсызь кода эрямс, кода вечкемс малавикстнэнь, кода кеняркшномс эрямонтень, мезесь паро, мезесь берянь.

Абунгадат, течи од ломантне овсе а арсить вандынь чиде. Книгат-мезть а ловныть. Содыть ансяк Интернетэнть. Компьютер экшсэ анокт аштемс чинек-венек. Тесэ сынь налксить эрьва мейсэ: тюрить лия планета лангсто сыцятнень каршо ды истя седе тов. Мейле те тюремась лиси алкуксокс. Невтемга, маныть Московонь вейке средней школань тонавтницясь саизе кудосто тетянзо ружиянзо ды школасо ледизе тонавтыцянзо ды полицейскоенть. Те арази тев?!  Ней те «героесь» прянзо леци психиатрической больницясо. Лисни, тюрьмас сон а понги.

А стувтови тень эштё вана мезесь. Мелят масторсонок келейстэ тешкстынек Ине Изнямонь 70 иетнень. Эрьва косо трудонь ды войнань ветерантнэнь марто ютавтозельть вастовомат, косо сынь ёвтнесть войнань толсо палыця китнеде-янтнэде.

Центральной телевидениянь «ТВ-центр» каналсонть ули журналист, лемезэ Роман Бабаян. Сон вети «Право голоса» программанть. Вейкенть алтызе Ине Изнямонь 70 иетненень. Студияс сакшность трудонь ды войнань ветерант, политологт, журналистт ды средней школань прядыцят. Студиясонть коштось вадряль. Ветерантнэ ёвтнесть китнеде-янтнэде. Передачань ветицясь кевкстинзе школань прядыцятнень: «Ёвтадо миненек масторонь военачальникть».

А куш, а каш. Мейле ледстизь  Жуковонь! Ды весе.

Вана истя. Эдь сынь, од ломантне, – минек масторонть, Россиянть, вандынь чизэ. Кодат сынь патриотт, виевгавтыцят, зярдо а содасызь эсь масторонть историянзо?! Ды мезе ацирьгавты, тенень а бажить явомс покш мель.

Ды целанек Россиясо образованиясь пек пупорькшни. А кецявты эрицятнень. Вейке покш промкссонть, кона алтазель образованиянтень, сонзэ виевгавтомантень, вейке ученикесь видькстась: советэнь  шкастонть од ломантне эрьва кодамо раськеютконь олимпиадатнесэ, конкурстнэсэ, лиясо-мейсэ сайнесть васенце, омбоце таркат. Ней а понгонетяно сехте виев кементнень юткскак. Те мезде корты? Масторсонок эряви допрок полавтомс образованиянть. Тень коряс проект анокстась КПРФ-сь. Маласо шкасто те проектэнть толковамс макссызь РФ-нь Государственной Думас.

Тешкстасынек, а мерят – масторсонок весе од ломантне казямо седейть, эсь прянь вечкицят, содамочис а бажицят ды истя седе тов.  Улить истят, кить эсь содамочисэст, эсь ёрокчисэст славить вишка тиринь ёнксост, Мордовиянть, Россиянть. Сынст кувалма мельспаросот малавиксэст, эрицятне. Тесэ кода а ледстямс минек лицеень тонавтницянть Иван Утешевень. Сон кармась масторлангонь сехте вадря астрономокс. Сон – масторлангонь олимпиадань изниця. Тесэ эсь ёрокчист невтизь малав 20 масторонь школань тонавтницят: Армениянь, Грециянь, Таиландонь, Китаень, Южной Кореянь ды истя седе тов. Олимпиадась ютавтозель Латвиянь Вильнюс прявт ошонть эйстэ аволь васоло.  А стяко МР-нь Прявтось В.Д.Волков Иван Утешевень казизе Славань III степенень орденсэ.

Мельспаросотано спортсменэнть Евгений Швецовонь кувалма. Сон аволь весть лиснесь паралимпиадань чемпионокс.

Кода а шнамс Оренбургонь областень полицейскоенть Данил Максудовонь. Сонензэ 24 иеть, уш теевсь алкуксонь героекс. Оренбург – Орск трассасонть ломантнень, конатне понгсть сэрей лов потс, идемстэ патрульно-постовой службань старшей сержантось Данил Максудов эйкакшонтень максызе эсь фуфайканзо, чувтомозь тейтерентень – варьганзо. Од цёрась эсь прядонзо эзь арсе. Бажамозо вейкель – кода седе бойкасто лов потс понгозь ломантнень ильтямс лембе таркас.

Ризксэнтень, од цёрась кедензэ кельмевтинзе, теезель операция. Врачтне бороцясть цёранть кедензэ ванстомга. Мезеяк а теят: цёранть керш кедесь кадовсь кавто суртомо.

Лисни, парось ды берянесь молить рядсек...

 

Пётр Зиновьев

 

Новости

Чувашиясто – казне марто

 

Мартонь 24-це чистэ И.Я.Яковлев лемсэ Чувашиянь государственной педагогической университетсэ ютась этнопедагогикань ды поликультурной образованиянь коряс студентэнь Весероссиянь олимпиада. Сон алтавсь РАО-нь академикенть Г.Н.Волковонь 90 иетненень.

Подробнее ...
 
Од ломанень ассамблея

 

Мордовия Республикасо теезь «Молодежная Ассамблея народов России «МЫ – РОССИЯНЕ» Общероссийской общественной движениянь региональной отделения. Республикасонть од ломанень движениянь теемась карми общероссийской гражданской идентичностень формированиянть коряс ушодкстнэнень, раськетнень ютксо ояксчинь кемекстамонтень ды  межкультурной вейсэнь важодеманть келейгавтомантень лездамонь площадкакс.

Подробнее ...
 
Диктантось – эрявикс тев

Те иень апрелень 8-це чистэ Саранскойсэ малав 400 ломантне кармить «Тотальной диктантонь» участникекс. Мероприятиянь ютавтомань меленть шнызе Мордовиянь Прявтось Владимир Волков.

Подробнее ...
 
Сценанть лангсо Ицялбуесь...

 

Неть оймсема читнестэ Республикань Культурань Кудосо ютасть «Шумбрат, Мордовия!» народной творчествань фестивалень меельце концерттнэ. Кадовсь ансяк Гала-концертэсь, кона карми декабрянь 11-це чистэ. Сценанть лангс лиснесть Ицялбуень, Ковылкина ёнксонь ды Саранск ошонь округонь артисттнэ.

Подробнее ...
 
Мамаева омбоце

 

Ноябрянь васенце пельксстэнть евтазельть Россиянь республикатнень государственной кельтнень коряс школасо тонавтницянь ды студентэнь Весероссиянь васенце олимпиадань итогтне.

Подробнее ...