Рубрикатор

МАНЯВСЬ

Чапамо велесэ Тарнай Ванянь содасызь весе. Ды кода а содамс?! Кудозо покш, кирьпецень. Ардтни омбомасторонь легковушкасо. Сон, кода ней кортыть, бизнесмен. Машты  каштомонь вачкамо. Меельце шкасто тиринь велев велявтомо кармасть сетне, кить эсь шкасто паро эрямонь вешнеме тукшность веёнов. Сынь строить кудот. Кудотнес, нама, вачкамс эряви голландка эли каштомо. Велесэ вачкицясь ансяк Тарнай Ваня.

Ваня винадо а сими. А кона шкане. Свал тевсэ. Ды эштё ардтни автомашинасо. Тердтнить шабра велевгак, киненьгак а отказы.

Кода-бути шабра Дошага велестэ ардомсто сонзэ лоткавтызе тесэнь полицейскоесь, ГАИ-сэ важодицясь Степань Сега, лиятне тензэ мерить Сергей Иванович.

– Мезе, нать, колынь кинь ардомань правилатнень?

– Правилатнень эзить кола. Тонеть энялдомам ули, – кортазевсь гаишникесь. – Строинь эсь вийсэ кудо. Вана каштомонь вачкамо а маштан. Козяйкам Наста мерсь пшкадемс тонеть. А лездат, Ваня?

– Мекс а лездамс?!

– Тон ёвтак, зяро саят?

– Аволь ламо – ведьгемень тёжат.

Рана валске Тарнай Ваня сась эсь автомашинасо Степань Сеганень. ГАИ-нь инспекторось истя жо эзь удо, вастызе сонзэ.

– Кода пачкодить, Ваня? – кевкстизе Сергей Иванович.

– Вадрясто, – отвечась Ваня.

Кудазорось невтизе тарканть, козонь эряви вачкамс каштомонть, кирьпецтнень, цементэнть, чуваронть.

– Мон течи аволь кувать важодеме карман, – ёртсь Ванянень ды шкань апак таргсе озась эсь автомашиназонзо ды ливтязь тусь кияванть.

Тарнай Ваня важодсь эрязасто. Пек чуросто ойсесь таргамояк. Ськамонзо важодсь. Сонсь тейсь растворонть, сонсь кандтнесь кардазсто кирьпеценть.

– Ваня, адя ярсамо, – тердсь кудазоравась Наста.

– Вана прядса вачкамонть, сестэ озан столь экшс, – мерсь Ваня.

Цёрась вачкась вадрясто. «Эдь вачкан ГАИ-нь инспекторонтень! Друк эстень сави пшкадемс сонензэ», – арсесь эсь пачканзо Ваня.

Аламонь-аламонь каштомось кепедезевсь. Ваняньгак ёжозо вадрялгадсь. Наста яла эсензэ: – Ваня, паряк, цярка  симат?

– Наста, тон мезе, праван бажат саевтемс?! Мон эдь зярдо руль экшсан – цярка кедезэнь а сайнян.

– Вант, вант.

Кизэнь чись валгома лангсоль. Прядовома лангсо Ванянь тевезэяк. Эштё тия-тува ваднема ды весе.

– Наста! Сак тей, ванык монь теевксэнть, – пшкадсь Ваня.

– Мон мезеяк а мерян, кадык кудазорось примасы пельдеть важодевксэнть, – мерсь Наста.

Ваня эзь кенере пильгстэнзэ каямс ташто котатнень, кудо вальмалов ардсь Сега.

– Вантака, Ваня, вейке чис кенерить вачкамс каштомонть. Вадря, вадря!

– Дык, мон стараинь.

– Тень кувалма эряви цяркань цярка симемс.

Кудазорось мерсь нинстэнь столь лангс путомс ярсамопель ды, нама, «кренчень ведь». Ванянень максынзе ярмактнень важодемань кисэ. Мейле Сега тердизе Ванянь столь экшс.

Кудазорось пештинзе цяркатнень ды мери Ванянень:

– Течи тон паро тев теить. Ней минек кудосояк карми лембе. Симтяно, Ваня, тонь вадря теветь кисэ!

– Ужока, Сергей Иванович! Мон а карман симеме, руль экшсан.

– Ужо, Ваня, эдь содат, кинь марто симат. Давай куш цярка!

Ваня эзь цидярдо. Комавтызе цярканть.

– Давай, Ваня, эштё вейкень-вейке, – энялдсь кудазорось.

– Монень эдь озамс руль экшс, – нырнэсь Ваня.

– Тонеть тестэ аволь васов ардомс. Ды эштё ГАИ-нь инспекторт тезэнь а лиснить.

Ваня таго комавтызе пешксе цярканть.

Мейле эштё, эштё…

Тарнай Ваня эсь автомашинань руль экшс озась стамбарнэ. Руленть кирдсь кеместэ. Машинась ардсь аволь уш пек эрязасто. Чапамо велентень ардомс кадновсь малав вейке вайгельпе. Апак учне Ванянь кинзэ лангс стясь ГАИ-нь автомашинась. Ваня абунгадсь, мезе теевсь?

– Старшей лейтенантось Николай Сарделькин. Невтинк праванк!

Ваня невтинзе. Инспекторось праватнень саемстэ мерсь Ванянень:

– Некак, симезят? Эйстэть качады чине!

– Арась, эзинь симе. Мон лездынь тынк ялгантень, Сергей Ивановичнень.

– А содан, кие те истямось. Пандт штраф. Лиякс, сайсынь колмо иес прават.

Тарнай Ваня чукадинзе весе ярмактнень, конатнень максынзе Степань Сега.

Кудов сась чавонь кедть.

«Дуракан, мекс симинь? Те сон кучизе ГАИ-нть», – сёвнось яла эсь прянзо Ваня. Ней ансяк несы Сергей Ивановичень  автомашинанзо – кинзэяк кадсы.

 

Пётр Зиновьев

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...