Рубрикатор

Литературная страница Эзь пеле куломадо
Эзь пеле куломадо

 

Декабрянь 1-це чистэ топодсь ие, кода чавовсь Донецкойсэ Григорий Сурайкин. Те эрзянь од цёранть  парсте содылия. Сон чачсь-кассь Ицял велесэ. Зярдо тонавтнесь заочна Мордовиянь госуниверситетэнь историянь факультетсэ, сессиятнень шкасто свал эрсесь монь кедьсэ. Вейсэ ярсылинек, эрьва мезде кортнилинек. Гриша пек превеель, ламо содыль эрямонь тевтнеде. Обуцянь коряскак а потыль удалов. Бути  максыль вал – тевенть топавтылизе шкастонзо. Мон ламоксть кортнинь сонензэ: «Гриша, мекс туят тиринь таркастот? Тесэяк муят важодемань тев. Васняяк университетсэ тонавтнемат прядык, мейле вансак…» Чатьмонсь. Тусь Московонь областень Клин ошов. Мельсэнзэ-превсэнзэ свал ульнесь Донецкоесь. Мольсь война. Донецкой ды Луганской республикатнесэ  сезневсть бомбат. Ломантнень лангс леднесть миномётсо ды лия орудиясто. Палсть кудот, производствань ды культурань учрежденият. Эрьва чистэ чавовсть ломанть.

Зыянонь кандыцятнень каршо муевсть истят, конатне эзть тандадо ды ушодсть лездамо бороцямонь тевсэнть. Сурайкинэньгак эзь кирде седеезэ. Кармась содамо, Ростовонь областьсэ пурнавсть зярыя эсь олясост тюреме молицят (ополченецт).

Григорийнень теке эрявкшноськак. Сон сынст муинзе ды зярыя ополченец марто сыргась Донбассов. Гришань, кода ВДВ-нь частьсэ служицянть, аравтызь разведротас группань командирэкс. Те тевесь а шождыне. Эрявсь ветькак ды читькак лиснемс ошонь куринкатнес, лия объекттнэс ды ваномс, мезе тееви ошсонть. Эзть са ли Майданонть пельде кодаткак ятт, конатне чавныть ломантнень. Гриша парсте содась, ошсонть эрицятне аволь ансяк рузт, тосо улить эрзяткак, мокшоткак ды лия раськень ломанть.

Сынст лангсо нарьгить, маштыть ды пултыть кудост. Кие жо тенст лезды? Нама, Гришань кондятнэ. Нацисттнэнь ды сиведезтнень марто тюрематне эрсесть сеедьстэ. Кода ёвтнесь Гришань ялгазо Чуркин Олег, Украинав боевиктне састь эрьва ёндо. Сыненст ярмактнень пандсть США-нь военной частной компаниятне.

Сурайкин Гриша содась, кода мелявтыть кисэнзэ тетязо-авазо, бабазо ды ялаксозо. Сынст стака шкастояк эзинзе стувтне. Эрьва чистэ гайневтнесь телефонсо. Алтакшнось самс Од иенень кудов. Мезе арсекшнесь од цёрась, эзь лисе. Декабрянь 1-це чистэ эзизь маря вайгелензэ. Мелявтозь арсезевсть: «Мекс чатьмони, нать, прядовсть ярмаконзо сотовойсэнть? Эли аютко тензэ?..» Тарка-эзем эзть муе малавикс раськензэ. Омбоце чистэнть кармасть содамо, Интернетсэ пачтясть: Мордовиянь ополченецэсь Самурай чавовсь. Уловонзо ялганзо вешнесть вень перть ды муизь ансяк валске малав.

– Се чистэнть пракшнось лов. Сурайкин отрядонзо марто молильть Мариуполев. Сон мольсь сехте икеле, – ёвтнесь Олег Чуркин боецэсь. – Эзизе нее растяжканть, конадонть аволь ансяк сонсь чавовсь, ранязельть ялгатнеяк. Зярдо марясть те кажодонть Украинань нацисттнэ, кенярдозь пеедькшнесть Самураень  чавомадонть.  Сёрмадсть эрьва кодат яволявтомат ялганзо туртовгак: «Вана кода минь сонзэ, тынкак истя жо!..» Рамидизь, келя, ярмакто… Аволь истямоль Гриша Сурайкин. Сонензэ эзть эрявкшно ярмактне. Тов тердизе чевте седеень ризксэсь, эрзянь обуцясь. Мон сеске чарькодия сонзэ мелявксонзо. «Кода тосо ансяк цидярдыть ломантне, истямо тол потсо», – ледстниль  сон.

Районсонть Гришань ламот содылизь. Сон эштё школасо тонавтнемстэ прянзо невтизе вейсэнь тевсэнть. Васенцекс кундась тееме «Поиск» отрядонть. Ялгатнень марто зярыяксть яксесь сеть таркатненень, косо мольсть тюремат фашисттнэнь каршо. Вешнесть ды муекшнесть боецт, конатне чавовсть Ине Отечественной войнасонть.

Вана кодат башка валт ёвтась Григорий Сурайкинэнь калмамсто Военной ды трудовой подвигень 1941-1945 иетнень мемориальной музеень директорось Николай Андреевич Кручинкин: «Гриша ледстневи монень, кода тевень содыця  поисковикекс, конань лангс свал кемат. Максозь тевенть сеске топавтылизе. Дивавтымим эли эзимим монь те – тусь Донецкоев? Григориень обуцянзо, мелензэ-превензэ содазь, арсян, сон лиякс аволь тее. Ярмакто, славадонть эзь арсе. А вана ванстомс, лездамс мирэнь вечкиця ломантненень – ульнесь оймесэнзэ».

Донецкой Народной Республикань Вооружённой виень командованиясь истямо апелемачинть, подвигенть кис Григорий Сурайкинэнь казизе IV степенень Георгиевской крёстсо.

М.Маторкин,

 

журналист, писатель.

 

Новости

Студентэнь Парад

Россиянь студенчествань парадось – те Россиясо ды весе масторлангонть келес студентэкс алтамонь сехте покш, лия ёнов а молиця од ломанень кенярксчи, конась вейсэнди кементь тёжат студентт Россиянь ламот оштнесэ. Студенчествань васенце парадось ульнесь Московсо 2002 иестэ ды кемголмово иень перть ютавтовсь минек масторонь прявтошсонть.

Подробнее ...
 
Кросс

Сентябрянь 16-це чистэ Мордовиясо, кода масторонь лия регионтнэсэяк, тешкставсь Чиемань весероссиянь чись. Тень лувсо ютавтовсь «Нациянь кросс». Саранскойсэ стартонтень лисекшнесть малав 4,5 тёжат эрицят. Ютксост ульнесть виев спортсмент, общеобразовательной школатнесэ тонавтницят, вузонь, ссузонь студентт ды Мордовиянь муниципальной районтнэстэ чийнемантень мелень явицятне. Советской площаденть лангсо пелькстамотнесэ участвовицятненень лембе валт ёвтасть Мордовия Республикань Спортонь ды физической культурань министрась Владимир Киреев, Саранскоень Администрациянь физкультурань ды спортонь управлениянь прявтось Роман Дубровин, пелькстамотнень директорось Михаил Храмов ды прявт судьясь Вячеслав Мочалов.

Подробнее ...
 
Полицейскойтненень – автомобильть

Саранскоень Советской площадьсэ ютась Мордовиянь МВД-нь сотрудникень развод. Торжественной церемониясонть республикань полицейскойтненень максозь 49 од автомашинат. Участникекс ульнесть В.Д.Волков ды внутренней тевень министрась Юрий Арсентьев.

Подробнее ...
 
Ардомань картат

Н.П.Огарёвонь лемсэ МГУ-нь студенттнэнь ды аспиранттнэнь туртов полавтовсь ардомань картань получамонь лувось. 2017 иень сентябрянь 1-це чистэнть саезь сынь максовить справкань коряс, конась кемексты ардомань картань получамонь праванть.

Подробнее ...
 
Ветеранонь хоккей

Ютазь оймсема читнестэ Саранскойсэ ютась хоккейсэ налксема. Вастовкшность «Ветераны Мордовии» ды «Легенды хоккея» командатне.

Налксемадонть икеле участниктненень поздоровт ёвтась Владимир Волков.

Подробнее ...