Рубрикатор

Литературная страница Поэтэнть марто вастовома
Поэтэнть марто вастовома

 

Сестэ кудов Кулясбуев сакшнынь Троицянень. Омбоце чистэнть эрявсь мекев велявтомс Саранскоев. Кизэсь ансяк ушодовкшнось. Пертьпельксэсь манеель. Отяжелень чугункань кинь станцияв сынь чинькуншкат. Саинь билет, лисинь ушов. Чувтонь ташто вокзалонть икельде неинь озадо, кепе атянь кондямо. Алганзо мезе-бути ацазель. Икелензэ стявтозельть ёзазь-ватксезь кирзань кемть. Лангсонзоль каргоць коцтонь талайдень кандтнезь ашола панар. Молинь ваксозонзо. Та-кода сеске кортазевинек. Сонензэяк молемаль Саранскоев. Учинек Рузаевка – Алатырь ошютконь ломанень усксиця поездэнть.

Совинек вейке вагонс, озынек карадо-каршо. Икелень аштесь а пек сэрей, цють прянь комавтозь, коськаня цёраломань. Чамаловажав, сэрей коня. Варштавксозо сэтьме, виздиця. Сельмензэ овсе олазь, мерят, шлизь-нардызь кислотасо.

– Тонавтнят, – те паро, – мерсь сон. – Монень, од цёра, эзь саво совамс содамочис. Шкатне лият ульнесть. Велесэ прядынь ушодкс школа. Саранскойсэ – реальной училища.

Седе тов те ломанентень савсь печтямс Васенце мировой ды Гражданской войнань стака шкатнень. Мейле Московсо прядсь счётоводонь курсат. Тосо зярыя иеть эрясь. Топавтсь бухгалтерэнь тев.

Килангонь ялгам яла ёвтнесь… Чарькодевсь тень вейке. Косо бу сон аволь уле, мезе бу аволь тее, свал арсесь-мелявтсь эсь тиринь раськеденть, сонзэ историядо, уцяскадо, культурадо… Сестэ мон а содылинь, кие неть валтнэнь ёвтынзе:

Сынь эрильть, эрзят,

Сурань кувалма…

Сынь виевть ульнесть ды

шумбрат ульнесть,

Сынь овто лепштильть ды

верьгиз повильть.

Туильть чийнеме –

сасыльть нумоло.

А эрзянь тейтерть,

Мазый чинь цецят,

Якильть чоледезь,

Ваныльть пеедезь,

Цёра юткова уильть яксяргокс.

Поэзиянь неть рисьметне саезь эрзятнень ды мокшотнень кезэрень пингень эрямодост «Эрьмезь» поэмастонть, конань сёрмадыцязо монь марто ардыцясь.

– Петя, мерят, леметь, – поладызе кортамонть монень сестэ асодавикс поэтэсь. – Паряк, теде ёвтнемскак а эряволь… Ансяк пек уш нарьгасть лангсон, зярдо ветилимизь Московонь НКВД-нь следователентень. Бандитэкс каявиль лангозон: «Видькстак: тон, националист!!!»

– Ды кодамо мон националист? А? Кодамо? Семиянок эрясь пельсвачо, нужасо. Якинек нуласо-валасо…

– Чатьмонть, идемевсь! – мейсэ понгсь вачкодилимим…

Зярыя шкань ютазь ускимизь Куйбышева ошов. Тосо совавтымизь генералнэнь. Кевкстнесь, мекс истя тондавинь стака чумочис. Талнозь-пелезь, апак сёпо ёвтния весементь, кода алкукс сёрмадозь «Эрьмезесь».

– Мон а неян эйстэнк народонь ят, – мерсь сон састо. – Корязот тевенть курок пекстасызь. Нолдатадызь…

– Кенкш удало рангозь авардезевинь… Мейле уш камерасо, весень пингстэ, киштезевинь… Яла пижнинь, пижнинь: «Нолдасамизь! Нолдасамизь!..»

… Учан, учан, учан… Ютась ков, омбоце, колмоце… Вейке иенть полавтсь омбоце… нилеце. Ды ансяк стяко… Коми Республикань, мейле Новгородонь, Джамбулонь тюрьматнесэ аштемстэ, важодевтсть эйсэнек урекс-ракшакс, керинек вирь, топавтынек лия пек стака тевть. Истямо эрямо печтинь комсь иеть.

Вагононь чарытне секе-тев гайтевстэ эшксевсть рельсань петнева, теке ловсть, зяро чить, ковт, иеть те ломанесь майсесь уречинь острогсо.

Килангонь содавиксэм цють нусмакадозь вансь вагононь вальмава ушов, кона экшелязь экшелявсь кизэнь манейдеяк маней чисэнть. Сэрейдеяк сэрей сэнь менельганть мельга-мельцек састо мацейкс уйсть вельть ашола шожда пельть. Чугункань кинть чирева тусто, пиже нарось пикстердсь  эрьва кодамо балягань панжовкссо. Ды вана… та-кода сеске чамаликезэ валдомгадсь-мазылгадсь. Састо, састо уставась стихень ловномо:

Гой ты, Русь, моя родная,

Хаты – в ризах образа...

Не видать конца и края –

Только синь сосет глаза.

– Вечкса Есенинэнь. Те Пазонть пельде питнейдеяк питней казне.

Ванса, мартон ардыцянть сельмензэ сельведиясть. Прянзо комавтызе, виздесь мерсь:

– Простямак лавшочинть кис.

Сестэ васенцеде дивазь арсезевинь: «Вантая… Кодат… неть… поэттнэ…»

Те ульнесь, нама, Яков Яковлевич Кулдуркаев. Саранскойс пачкодезь, сон мерсь тень:

– Ульть шумбра, валдо ойме, эрзянь аля-диголя! Зярс одат, зярс виеват, иля нузялдо, тейть паро тевть, тейть эсеть ды минек раськенть туртов.

 

Меельце вал

Омбоцеде поэтэнть марто вастовомс эзь саво. Ялатеке, сонзэ меельце а шожда уцяскадонзо карминь содамо ламо-мезе.

Тюрьмасто олякстомтызь 1958 иень декабрясто. Нолдамстонзо мерсть тензэ: сон а чумо ды истямокс зярдояк арасель. Вана истя… сонзэ комсь иетне тюшумбар нолдазельть. Велявтсь тиринь велев – Ламбаськев. Чаво таркас. Арасель а кудо, а  мезе. Пенсияяк сеске эзть максо, яла вешсть конёвт «лагерень важодема таркатнестэ». Кодат тосо справкат се шкане…

Яков Яковлевич кандтнесь седейшкавань мель-арсема: чачома таркас путомс куш вишкине кудыне. Тень коряс кучокшнось сёрма МАССР-нь Верховной Советэнь Президиумонь прявтонтень С.Николаевнень. Сеяк энялдоманзо эзизе топавто, вирь-чочкот эзь яво. Вана истя (В.Белинскоень мереманзо кувалт) Россиясо кой-кона чиновниктне «мелявтсть» ды нейгак «мелявтыть» талантливой ломантнеде.

Минек икелень содавикс сёрмадейтнень кудост икеле стенатнес аравтнезь мельс ледстнемань лазт. Ансяк истямо невтемка а козонь путомс Кулдуркаев поэтэнтень, конань арасель эсензэ кудочизэ, кона меельце иензэ-чинзэ ютавтынзе васолдонь раськензэ ланга яказь-эрязь. Савкшнось тензэ удсемс эрьва косо: кудыкеле, латало, банясо, сенекасо… Ёвтнесть… кинь а вастыль – кевкстиль: «Зяро шказо?» Бульчом, истя учось, пек учось тюрьмасто лисеманзо.

Поэтэсь кулось 1966 иень июлень 28-це чистэ. Калмозо Отяжеле ёнксонь Ламбаське велень калмазырьсэ. Яков Яковлевич Кулдуркаевень эсензэ вельть сияждыця тештезэ, кона свал карми валомо поэзиянь мазыйдеяк мазый валдонть.

П.Ключагин,

 

МАССР-нь культурань заслуженной роботник, Россиянь Писателень союзонь член.

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...