Рубрикатор

Домашнее хозяйство Нумолонь кастыця
Нумолонь кастыця

А мезть сёпомс, Сурвелесь ашти мазыйдеяк мазый таркасо: лушмосо, вирь потсо.  Веленть удалга чуди Сура леесь. Сонзэ чиресэ аштить спортонь лагерть, оймсема кудот… Тесэнь эрицятне седеймарицят, панжадо ойметь. Сынь анокт лездамс весенень, кие пшкади тенст. Велень ломантне трудонь вечкицят. Сурвелесэнть важодсь вейсэндявкс, косо трясть букат. Вейсэндявксонть ульнесть эсензэ моданзо, козонь виднесть ракшатненень тикше, люцерна. Те хозяйствасонть виевстэ важодсть велень эрицятне. Истя уш лиссь, предприятиясь аволь умок каладсь. Сурвелесэ теевсь од крестьянонь-фермерэнь хозяйства, кона касты нумолот. Сонзэ прявтсо Сергей Павлович Караулов.

– Видькстан, крестьянонь-фермерэнь хозяйстванть панжомадо кевкстемась превсэнь умок чарась, – ёвтни Сергей Караулов. – Ульнинь республикань малав весе районтнэсэ. Прынь Кочкуровань райононь Сурвелентень. Велесь аволь васоло Саранскоенть эйстэ, вечкевсть тень пертьпельксэськак, ломантнеяк. Улемс фермерэнь хозяйствань азорокс мелем шнызь МР-нь Велень хозяйствань ды продовольствиянь министерствасо, Кочкуровань райононь администрациясо. Ды тевтне ушодовсть.

Тешкстасынек, Сергей Караулов аволь Мордовиясто. Сон чачсь-кассь Красноярской краень Лесосибирск ошсо. Тосонь эрицятне важодсть ды важодить чувто марто.

– Минек семиясь аволь вишкинель, – ледстни Сергей Караулов фермерэсь. – Кирдинек скалт, тувот, реветь, саразт. Нурькинестэ, кардазсонок ульнесь се, кода велень лия эрицятненьгак. Школанть прядомадо мейле тонавтнинь промышленной колледжсэ. Мейле прядыя Красноярской государственной торгово-экономической институтонть. Мордовияв сынь 2013 иестэ. Важодинь «Рузхиммаш» заводсо прявт инженерэкс.

Мейле натой семиянть туртовгак апак учне, косо низэ ды ниле цёранзо, арсесь теевемс крестьянонь-фермерэнь хозяйствань азорокс. Ферманть лемдизе «Солнечный кролик».  Сергей Караулов строясь эсь ярмак лангс производственной кавто корпуст. Ней тесэ кирдевить кавто тёжадо ламо нумолот. Фермерэнть Сергей Павловичень прявт бажамосонзо – строямс эште кавто корпуст ды иезэнзэ пачтямс нумолонь сывелень саеманть 300 тоннас.

– Кизна кедьсэнек ульнесь МР-нь Прявтось Владимир Дмитриевич Волков, – ёвтни крестьянонь-фермерэнь хозяйствань азорось Сергей Караулов. – Энялдынь лездамс тень корпустнэс сэнь уштомапелень ветямосо ды производстванть келейгавтомасо. Тень теемс эрявить 28 миллионт целковойть.

Ансяк лиссь, В.Д.Волковонь республикасо нумолонь васенце трицянть лангс лият аравтлувонзо: «Тынь вештядо вейке, а мон мерян теемс лия. Паряк, тынк ферманть юрсо теемс промышленной покш производства?! Истя   жо тесэ теемс переработка?»

С.П.Караулов те меленть-арсеманть каршо а моли. Эдь сон важоди покш мельсэ, вандынь чиде арсезь.

МР-нь Велень хозяйствань ды продовольствиянь министерствась Сергей Караулов фермерэнтень макссь 6,3 миллионт целковоень покшолмасо грант. Неть ярмактне, нама, варма мельга эзть туе. Хозяйствань азорось С.П.Караулов ютавтынзе тевс: рамась оборудования, лия-мезе.

…Минь ульнинек корпуссонть, косо клеткатнесэ трявить-кастовить нумолот. Сынь – фермерэнть мельспаронзо. Сергей Павлович тенек ёвтнесь, эрьва аваканумолось ниленьгемень чис весть левксыи. Среднейстэ эрьвась максы 10 левкст. Кавто недлянь перть оймсемадо мейле «авась-героинясь» таго юты осеменениянь процедура. Ды истя иень перть. Те шканть перть нумолось канды фермерэнтень 100 килограммат сывель.

– Тесэ весемесь моли эсензэ лувсо, – толкови Сергей Павлович. – Эрьва пондельникесь моли ютазь пондельникенть ёнов, овторникесь – овторникенть ёнов ды истя седе тов.

Тесэ кода а ледстямс вана мезенть. Корпустнэсэ чинь-чоп налкси музыка.

«Мезень кисэ?» – кевкстинек фермерэнть.

– Нумолотне тонадыть свалшкань кашторкстнэс, ды сынь эрьва кашторксто а тандадыть, – отвечась Сергей Павлович.

Фермерэсь важоди аволь ськамонзо. Тензэ лездыть цёранзо. Вана Андрей Мордовияв сась 2014 иестэ Сибирской университетэнь экономической факультетэнть прядомадо мейле.

– Монень тесэ, Сурвелесэ, весемесь пек вечкеви, – ёвтни Андрей Караулов. – Ломантнеяк, тевемгак. Нумолотнень мельга якан мельспаросо. Топавтан осеменаторонь тевентькак. Тевенек седеяк парсте туить, зярдо тевс нолдасынек печкемань цехенть. Ды те шкась аволь уш васоло.

Тешкстасынек, Андрей Карауловнень 25 иеть. Сон важодемадо а пели. Мекевлангт, тевтеме а аштеви. Тетянзо валонзо коряс, од цёрась парсте важодсь кавто корпустнэнь стявтомсто. Покш мелезэль – кода седе бойкасто строямс нумолотненень эрямо таркатнень. Ды те удалась. Тезэнь оборудованияськак аравтозь куроксто.

Сергей Караулов нумолотнень рамсесь Интернет вельде аволь ансяк Россиянь, омбо масторонь фермертнэнь пельдеяк. Истя жо ташты нумолотненень коромонтькак.

Сергей Павлович кеме ояксчисэ эри райононь ветеринарной врачтнень марто. Сынь сеедьстэ тейнить ракшатненень прививкат-мезть.

Ловныцятнестэ кияк кевксти: фермерэсь ков теи нумолотнень? Ёвтасынек, С.П.Караулов сынст явши малавикстнэнень, микшни Пензань, Ульяновскоень, Нижней Новгородонь областтнень нумолонь трицятненень-кастыцятненень, кинь улить печкемань цехест. Интернет вельде сюлмавкшны мартост. Вант, секе чистэнть ферматнес ардыть покш автомашинат.

– Нумолонь микшнемась монь овсе а майсевти, – видькстась С.П.Караулов. – Нумолонь сывелесь – диетической. Сон чевте, пек вадря. Истямо сывеленть рамицятне иестэ иес ламолгадыть.

…Сурвелесэ крестьянонь-фермерэнь хозяйствань азоронть С.П.Карауловонь кедьстэ кудов сыргамсто вастынек «Тавла» велень хозяйствань предприятиянь прявтонть Н.А.Ширманкинэнь. «Монгак сынь Сергей Павлович Карауловонь важодеманзо тонавтнеме», – мерсь Николай Андреевич.

Пётр Зиновьев.

Кочкурбуень ёнкс

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...