Рубрикатор

Домашнее хозяйство Кинь лангс кежиявтсь пертьпельксэсь?
Кинь лангс кежиявтсь пертьпельксэсь?

Эйкакш шкам ушодовсь ютазь пингень кодгеменце иетнестэ. Сестэ пароль эрямось Покш Березникень райононь Шугур велесэ. Кодаткак майсемат эзинек сода. Тетянок-аванок важодсть колхозсо. Трясть-андсть тувот, скалт, реветь, кастсть сюро. Мельгаст, нама, якинек миньгак, пакшатне. Важодемадо эзинек пеле.

Телетне ульнесть якшамот, даволовт. Мезе? Эдь теле. Стят рана валске, учат, зярдо кортазеви радиось: «Вечкевикс кунсолыцят, тетят-ават! Течи ушосонть пек якшамо, тень кувалма школасо тонавтнематне 1-10-це класстнэсэ а улить». Арсетядо, тень кувалма эзинек лисне кудосто? Лиснинек. Кудонок эйстэ аволь васоло эрькесэнть налксинек хоккейсэ. Чинь-чоп чавинек шайбанть! Ды мезе кецявты, ормат-мезть тенек кодаткак эзть педякшно. Касынек шумбракс. Эзинек сода ангинанть, куш симилинек кельме ведте.

 

Кой-кить чийнесть сокссо, кирякстнесть пандопрясто. Кодамо мельспаро!!!

Тунда Дожга леесь, кона кизна пек алкиньгадыль, теевиль, мерят, иневедекс. Сон истя покшолгадыль. Троксканзо а ютавилить. Чиде-чис ушось лембелгадыль. Кудо икелькстнэ коськильть, курок прянзо невтилизе пиже лугась. Лангсонзо тагояк пансинек оска, налксинек футболсо.

Минек кудо икеле пиже лугась тингекс тапавиль – тесэ налксилинек эрьва мейсэ, тей пурнавкшность ульцянь весе эйкакштне, ялгатне. Авам яла кортыль: «Моледе шабратнень кудо икелев, тосо кияк а эри». Тетям тензэ мериль: «Тон пельть сень эйстэ, зярдо ломантне ютыть кудот вакска. Теть кияк а сови».

Кизэтне вадряльть, псильть. Юты пиземе, кепе чийнилинек, коштось а ёвтавияк кодамо паро. Лембе ёнкс кодамояк теть а эряви! Чинь-чоп экшелинек. Ды кияк эзь сизекшне. Теде башка, топавтынек кудоютконь тевтнень: мотыжинек модамарть, кочкинек пандят, лединек тикше...

1972 иень кизэсь масторсонок пек псиль. Эзь чачо модамареськак. Секскак Польшасто ускозель. Мартонзо… колорадской унжаськак. Ломантнень туртов те унжась зяро майсемат кандсь! Сонзэ истожамга микшневить эрьва кодамо морямопельть, конатне, нама, кандыть зыян ломанень шумбрачинтеньгак.

Ней тень марто минь миринек. Эрьва иестэ колорадской унжанть морятано ды морятано. Эйстэнек кияк мельс а саи: модантень зяро каятано апаро «надобиядонть».

90-це иетнестэ пертьпельксэсь кармась полавтневеме. Телетне лембелгадсть. Ней уш Саранск ошонь ульцятнесэ, велетнесэ шубасо оршазь ды понань кемсэ ютыцят а неят. Ней тень масторонь учёнойтне ловить истя: моли пертьпельксэнь глобальной лембелгадома. Антарктидасо солыть эйтнеяк. Ансяк тень марто вейс а пратано. Пертьпельксэсь полавтовсь, койсэнек, эсензэ ломаненть тевензэ кувалма. Ванодо: масторонь оштнень ульцятне пешксеть эрьва кодамо автомашинадо. Кияк мери: те вадря. Ломантнень эрямост вадрялгадсь, ярмакост появасть. Вемельс пратано. Ней варштатано тень лангс лия ёндо. А зяро ломанень организмас ёртыть автомашинатне зыянов веществат?! Тень кияк ванкшнызе? Паряк, ванкшнызь, ансяк улавось ашти таркасонзо. Тень кемевтемга, рана валске ютындерят Саранск ошонь кудотнень вакска, понгат… покш автоколоннань территорияс. Кудосто лисемстэ пильгеть путомс а козонь. Машинат, машинат… Сынст выхлопной трубатнестэ качамось козонь-бути токи, сови.

Пертьпельксэнтень, арсян, зыян кандыть васоло тештетненень ливтнематнеяк. Бути икеле пек чуросто ливтиль космосов космонавт марто ракета, течи тенень а дивазеват. Икеле парсте содылинек космонавттнэнь лемест, тетялемест, фамилияст. Течи истя а меревлинь. Телевизорга ёвтыть – космосов нолдазь ракета зярыя космонавтт марто. Ютксост ливти турист…

Чарькодеви, неть ливтямотне, нама, эрявить. Учёнойтне, лиятне тонавтнить масторлангсо эрямонть. Тень кувалма тенек эряви мирямс.

Мельсэнь ашти 2010 иень кизэсь. Саранск ошонь ульцятнесэ а куш-а каш. Псинть эйстэ кекшемс а козонь ульнесь. Масторонь ламо таркатнесэ палсть виртне. Те зыянось токакшнызе Мордовиянтькак. Темниковань районсо виртнень идесть республикань аволь ансяк МЧС-сэ важодицятне, истя жо промышленной предприятиятнесэ, строительной организациятнесэ, лиясо-косо важодицятне, республикань эрицятне.

Велетнесэ модамаресь, нама, эзь чачокшно. Аволь весень садпиресэ касокшность эмежтне, фруктатне. Тень кувалма Саранскоень лавкатнесэ, рынкатнесэ микшнесть модамарь, кона кастозель Египетсэ, Турциясо.

Видькстатано, 2010 иень апаро кажонть печтинек. Вачодо кияк эзь куло. Пожардо мейле кудовтомо кадовозтненень максозь эрямо таркат.

2017 иень кизэнтькак печтинек, ды кадовсь сон ансяк ледстнемакс. Иесь ушодовсь а беряньстэ. Телесь а якшамоль. Пертьпельксэсь мель витсь.

Учинек тундонть. Компьютерсэ пачтясть, сон карми шкадо икеле ды вадря. Алкукскак, ловось солась курок. Васов тусь экше коштось. Ванат, ломантне теке коткудавт «важодить» садпиресэ. Мольсь апрель ковось, сынь уш путыть модамарь. Малавикстнэнь яла кардынь: «Ков капшатадо модамарень путомо?» Каршо марилинь: «Пертьпельксэсь лембе, шабратне-кить уш лиссть садпирес. Эйстэст а эряви кадовомс!»

…Ютась кизэнь вейке, омбоце недлясь. Ушосо лембе арась. Текенень, чинь-чоп валсь пиземе. Ванан, вейке чистэнть помидортнэ кельместь, куяртнэяк а лисить.

Атят-сэрдят! Те мезе истямось?! Июнь ковонть перть пиземесь валсь ды валсь. Республикань ламо велень сёлттнэсэ ведесь кепетевсь, чудсь ульцятнева. Истямо тевтне вастневсть Ромодановань, Лямбирень, Ковылкинань ды лия районтнэсэ.

– Мон уш аволь одан. Ламо кизэть неинь, ансяк кодамоль тедеденсесь, истямо зярдояк эзинь некшне, – ёвтни Покш Березникень райононь Покш Березник велень эрицясь Т.В.Росяйкина. – А совавилить модамарень мотыжамояк. Модась летьке. Пек пелинь, модамаресь илязо наксадо. А мезть уш кортамс лия эмежде.

– Путокшнынь помидорт, видекшнинь куярт – весе ёмасть, – ёвтни Лямбирень райононь Атемарь велень эрицясь Валентина Виряскина. – Кие арсесь, карми истямо берянь кизэ?! Мезе ацирьгавты, лиясто а видестэ пертьпельксэнть ёвтыть минек Гидрометцентрасо важодицятне. Алтыть маней чи, пиземесь жо ведрасо валы.

Истя, тедеде кизэнь перть рынкасо, лавкатнесэ  эмежтне микшневсть пек питнейстэ.

МР-нь Велень хозяйствань ды продовольствиянь министерствань специалисттнэнь валост коряс, тедедень тундось кандсь покш зыян велень хозяйствань предприятиятнень туртов. Кой-косо савсь одс видемс сюротнень, топавтозь лия тевтькак.

МР-нь Правительствань Председателень васенце полавтыцясь – Велень хозяйствань ды продовольствиянь министрась В.Н.Сидоров пресс-конференциятнестэ вейкесэнть видькстась, кизэнь пиземе читне республикань аграрийтненень кандсть покш зыян – 338 миллионт целковойть. Ёмавтозь 1 миллиард 100 миллионт прибыль. Неть ярмактнень учотано федеральной бюджетстэ компенсациянь таркас.

Ансяк минек республикань аграрийтне кедест зярдояк а нолдтнить. Мордовиянь Велень хозяйствань ды продовольствиянь министерствань меельце невтематнень коряс, республикасо урядазь 370 гектарт сюро. Неть гектартнэстэ саезь 1 миллионт 226 тёжат тоннат сюро. Республикаванть саеви эрьва гектарсто 33 центнерт сюро, мезесь мелень коряс 6 проценттэ седе ламо. «Авольть улеяк пертьпельксэнь кавто аномалиятне, минь эште седе ламо саевлинек урожай, – мерсь МР-нь Велень хозяйствань ды продовольствиянь министрань полавтыцясь И.П.Учайкин. – Арсетяно республикань паксятнестэ саемс 1,5 миллион тоннат сюро».

Пиземе читне покш зыян кандсть шабра республикатненень, областтненень. Вана Татарстан Республикань ламо оштнень ульцятнева автомашинатне аволь ардтнесть – укшность теке венчть. Истя тевтне аштесть Ульяновскойсэяк. Тесэ эште маштовсть кавто ломанть.

Мертядо, истя тевтне аштить минек масторонь келес? Аволь. Иркутскойсэ, Новосибирскойсэ, Красноярскойсэ, нурькинестэ, Сибирьсэ пек псиль. Эйстэнзэ а кекшевилить. Кудотнесэ опаняль. Чинь-чоп важодсть вентилятортнэ. Пек псиль Хабаровскойсэяк.

 А вана Мурманскойсэ, Норильскойсэ мик пракшнось лов. Те арази тев?!

Центральной телевидениянь «Васенце каналсо» сестэнь Андрей Малаховонь «Пусть говорят» передачасонть кортамось мольсь течинь пертьпелькстэнть. Тесэ кодат ансяк мельть-арсемат ёвтазь арасельть: американь учёнойтне тейсть од оружия, кона полавтни пертьпельксэнть, кинь-бути лангс кежиявтсь Пазось ды истя седе тов. Россиянь Гидрометцентрасо важодицятне толковизь, келя, пертьпелькссэнть истямо тевть вастневить. Тенень дивсемс а эряви. Шкань ютазь пертьпельксэсь сови эсензэ лувс.

Миньгак пратано неть мельтнес-арсематнес.

Истя, истя. Пертьпельксэнть лангс а эряви кежиявтнемс. Мекевлангт, эряви примамс сонзэ истя, кодамо ули.

…Моли сёксь. Масторсонок таго а сэтьме. Кой-кона ёнкссо пертьпельксэсь полавтневи, канды зыян. Виев даволтнэ лутыть эрямо кудонь, школань латотнень. Те кажонть каршо ломантне бороцить весе вийсэ. Паро, зярс покш ёмавкст арасть.

Пётр Зиновьев

 

Новости

Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...
 
Апандыцятнень лангс – судс

Саранскойсэ поладовить важодематне жилищно-коммунальной услугатнень кис апандыцятнень марто. Сынст лангс каявить яволявтомат судс. Истя, ошонь Ленинской районсонть судс максозь 1160 искт 56 миллиондо ламо целковойс. Течинь чине эйстэст пандозь малав 2 миллионт целковойть. Кемекстазь 52 договорт долконь реструктуризациянть лангс. Теке марто 116 квартиратнесэ керязь электроэнергиясь.

Подробнее ...
 
Кода уштовить кудотне?

Саранскоень мэрэнть кедьсэ промкссонть кудотнень уштоманть коряс кевкстемась кармась сехте пштикс. Администрациянь прявтонь васень полавтыцянть, Ошонь хозяйствань департаментэнь директоронть Алексей Егорычевень валонзо коряс, Саранскойсэ ламо квартирас весе кудотнесэ ули лембесь. Ансяк улить мелявкст зярыя стояктнень коряс, кевкстемась решави.

Подробнее ...
 
Вадрятнень ютксо

Политикань ды экономикань коммуникациятнень агентствась нолдась РФ-нь субъекттнэнь прявттнэнь рейтинг. Сентябрянь цётамотнень коряс Мордовиянь Прявтось Владимир Волков совась вадря губернатортнэнь юткс ды саизе 19-це тарканть. Меельце ковонть перть сон кемекстызе те тарканть кавто пунктс.

Подробнее ...