Рубрикатор

Домашнее хозяйство Сынь лиякс а маштыть
Сынь лиякс а маштыть

Аволь васоло се чись, зярдо эсь кенярксчист кармить тешкстамо ветеринарной службасо важодицятне. Лиякс меремс, республикань ветеринаронь врачтне. Сынст покш таликаст республикань скалонь стадатнень ламолгавтомасо ды ванстомасо. Сынь весементь теить – скалонь стадась улевель шумбра. Ды, апак сёпо мертяно, те тенст удалы.

– Эрьва чистэ, эрьва валске эсь важодема таркас лиснить тёжадо ламо ветеринаронь врачт, – ёвтни МР-нь государственной ветеринаронь службань прявтось А.Н.Кечайкин. – Сынь ванстыть аволь ансяк республикань велень хозяйствань предприятиянь, крестьянонь-фермерэнь хозяйствань, велень эрицятнень скалтнэнь, истя жо ванкшныть велень хозяйствань продукциянть, кона микшневи рынкатнесэ, ярмункатнесэ. Кода вейке учёноесь мерсь, келя, врачтне ванстыть ломантнень, ветеринаронь врачтне – человечестванть. Минек службасо мельде-валдо важодицят арасть. Сынь – алкуксонь специалистт. Се, кие кундась ветеринаронь врачонь тевентень, сонзэ топавты пингензэ перть. Те корты седе, неть ломантне вечкить ракшатнень марто важодеманть, сынь пиить-палыть велень эрямонть вадрялгавтомасо, веленть виевгавтомасо.

МР-нь государственной ветеринаронь службань прявтонть А.Н.Кечайкинэнь валонзо коряс, иестэ иес вадрялгавтыть эсь тевест Ицялонь райононь ракшань орматнень каршо бороцямонь коряс станциянь важодицятне, конатнень прявтсо прявт ветеринаронь врачось В.Н.Афанасьева.

– Минек станциясо важодить 33 ломанть, – ёвтни Вера Николаевна. – Весе сынь эсь тевень алкуксонь специалистт. Арась истямо ломань, кие бу беряньстэ топавтоволь ветеринаронь врачонь тевенть.

Тешкстасынек, В.Н.Афанасьева 1978 иестэ Ульяновскоень велень хозяйствань институтонь ветеринаронь факультетэнть прядомадо мейле кундась ветеринаронь врачонь тевень топавтомо Рождествена велень «По заветам Ленина» колхозсо. Кавто иеть вансь колхозонь скалонь стаданть мельга. Мейле ютась важодеме райононь лабораторияв. Топавты мясоконтрольной станциянь прявтонь тевтнень. 2002 иестэ кунды лабораториянь прявтонь тевтнень топавтомо. Ды тевенть топавтсь колоньгемень иеть. Те шканть перть Вера Николаевна теевсь аволь ансяк эсь тевень вадря специалистэкс, истя жо пек паро прявтокс, вадря тевень ушодыцякс. Сонзэ пингстэ лабораториясонть кодат ансяк исследованият теезь арасельть! Сынь эрьванть ванкшность домкасто.

Содазь, эрьва ломаненть эрямосо вастневить истят, кить лездасть тензэ эрямонь покш кинтень эскельксэнь теемасо. Истямокс мон лован Анатолий Николаевич Шагановонь, ракшань орматнень каршо бороцямонь коряс станциянь икелень прявтонть, – ёвтни В.Н.Афанасьева. – Сон монень ульнесь алкуксонь тонавтыцякс. Тонавтсь аволь ансяк ветеринаронь врачонь тевенть вечкеме, истя жо кода мукшномс кель-вал важодицятнень, велень эрицятнень марто. Сон зярдояк кинь лангскак вайгель эзь кепсе. Мурнесь ансяк тевень кисэ. Анатолий Николаевичнень 85 иеть. Тень лангс апак вано, сон ёроков, сеедьстэ вастневи минек специалисттнэнь марто. Ёвтни, мезе эряви теемс те эли тона тевенть топавтомсто. Кодак сы станцияв, сеске кевксти районсонть эпизоотической кошттонть. Зярдо мари, а талновты, вадря, сон пек кецязеви.

В.Н.Афанасьева райононь ракшань орматнень каршо бороцямонь станциянь прявт ветеринаронь врачонь тевтнень топавтомо ушодсь 2011 иестэ. Кодаткак талномат, кодаткак ёжонь коламкат арасельть. Вера Николаевнань парсте содылизь районсонть. Текенень, сон кель-вал сеске мусь важодицятнень марто. Тень кувалма станциясо важодемань васенце иетнестэ сон полавтомо мезеяк эзь карма.

Течи райононь ракшань орматнень каршо бороцямонь коряс станциянть лувсо важодить Гуляевань ветеринаронь лечебницась, конань прявтсо М.В.Родионов, Тархановань ветеринаронь участкась, конань прявтсо Н.П.Кормушкин, Б.Сыресинь ветеринаронь лечебницась, конань прявтсо В.П.Князева, Ладань ветеринаронь лечебницась, конань прявтсо В.А.Осипов.  Сынь станциянть кеме нежензэ, – ёвтни В.Н. Афанасьева. – Эрицятнень пельде лангозост зярдояк пеняцямот арасельть. Мекевлангт, сынст ансяк шныть. Ветеринаронь эрьва участкасонть, эрьва лечебницасонть ули неень шкань оборудования. Ветеринаронь врачтне вастневить велень эрицятнень марто, лездыть тенст ракшатнень кастомасо-трямосо, вейсэ бороцить ракшань педиця орматнень а нолдамга: сибирской язванть, туберкулёзонть, тувонь африкань чуманть ды истя седе тов.

Тешкстасынек, станциянть вановтонзо ало велень хозяйствань 10 предприятият, крестьянонь-фермерэнь 22 хозяйстват. Районсонть 11284 скалт, эйстэст 4483 – потявтовицят, 415 реветь, 139 лишметь. «Мордовский бекон» предприятиясонть лововить 14819 тувот.

Станциянь ветеринаронь врачтне покш мель явить частной секторонтень, косо кирдевить 4353 скалт, 2279 тувот.

Ицялонь ракшань орматнень каршо бороцямонь коряс станциясо важодицятне кеместэ ваныть ракшатненень коромонь анокстамонть мельга. Рационсонть улест белок, сахар, фосфор, кальций, клетчатка ды лия компонентт. Те иень январьстэ саезь райононь ракшань лецицятне ютавтсть ламо ванкшномат.

А мезть сёпомс, Ицялонь райононь ракшань орматнень каршо бороцямонь коряс станциянь прявт ветеринаронь врачонть В.Н.Афанасьевань кеме нежензэ – трудонь ветерантнэ. Сынь куш кодамо шкане ды погодане анокт ардомс эсь тевест топавтомо велень эрицятненень, велень хозяйствань предприятиятнес. Ютксост: А.П.Лукьянова, В.В.Клеянкин, В.П.Князева, Л.М.Рубцова, Е.Н. Емельянова, Л.Д.Чибиркина.

Вана С.М.Жбанов станциясо важоди аволь умок, малав омбоце ие. Тей сон сась 2015 иестэ Мордовиянь университетэнь Аграрной институтонть прядомадо мейле. Специальностезэ – ветеринаронь врач. Тесэ С.М.Жбанов эпизоотической отрядонь ветеринаронь врач. Отрядсонть важодить вете ломанть. Сынь тевтеме зярдояк а аштить. Свал тевсэть. Нучк-пачк ютызь райононь велетнень. Сеедьстэ вастневить эрицятнень марто, кить эсь кардазсо кирдить ракшат.

– Мон чачинь-касынь Ицялонь райононь Папулева эрзянь велесэ, – ёвтни С.М.Жбанов. – Тесэ кемекстыя обуцям, тестэ теинь эрямонь покш кинтень эскелькстнэнь. Станциясо вастымизь вадрясто, лембестэ. Теньсэ, нама, покш таликазо прявт ветеринаронь врачонть Вера Николаевна Афанасьевань. Кода од специалистэнтень, тень максозь весе льготатне, конатнень ёвтынзе республикань Правительствась: 100 тёжат целковойть подъёмнойть, зарплатантень башка путовить 8 тёжат целковойть.

Эпизоотической отрядонть парсте важодеманзо туртов весемесь ули. Вана 2015 иестэ станциясь эсь ярмак лангс рамась скалонь ферматненень, тувонь кардотненень дезинфекциянь ютавтоманть туртов оборудования. Скалтнэнь кенжест керсемс оборудования. Кисэнзэ пандозь 100 тёжат целковойть.

Станциясо важодицятне покш мель явить ракшатнень искусственной осеменениянтень. Те тевенть парсте топавтыть ветеринаронь врачтне М.В.Жбанов, В.А.Осипов, С.Н.Куликов. Сынст велень эрицятне содасызь парсте, кода эсь тевень алкуксонь специалисттнэнь. Арасель истямо тев, штобу сынь киненьгак отказавольть лездамга. Свал тосот, косо лаказь лаки велень эрямось.

Меельце шкасто ламо кортыть тувонь африкань чумадонть. Те апаро ормась токинзе масторонь ламо регионтнэнь. Пачколесь минек республикань шабра регионтнэскак. Республикас апаро орманть а нолдамга Нижней Новгородонть марто границянть вакссо важодсть постт, косо аштесть полициянь представительть ды ветеринаронь врач.

В.Н.Афанасьевань валонзо коряс, тувонь африкань чуманть а нолдамга эрицятнень марто ютавтневить вастовомат, косо ёвтнить те апаро ормадонть. Райононь эрицятнень кармавтыть тувотнень таркас кирдемс вазт, реветь, сеят. Тень тердить теемс республикань прявттнэяк. Ломантне, нама, тень чарькодезь, тувотнень таркас кармасть эсь кардазсо кирдеме вазт. Тень кувалма районсонть тевс нолдазь 3 миллионт целковойть.

– Минь изнявкстнэнь лангс а лотксетяно, – корты В.Н. Афанасьева. – Важодтяно свал виевстэ, тевень содазь, вейке-омбоценень лездазь. Лиякс а машттано!

Пётр Зиновьев.

Ицялонь район

 

Новости

Конституциясь – прявт закон

Исяк, декабрянь 12-це чистэ, тешкставсь Россиянь Федерациянь Конституциянь чись – минек масторонь государственной прявт кенярксчитнестэ вейкесь.

1993 иень те чистэнть минек масторсо кемекстазель РФ-нь Конституциясь. Весе текстэсь максозель «Российская газета» изданиясонть 1993 иень декабрянь 25-це чистэ. 1994 иестэ, Россиянь Президентэнть Указонзо коряс, декабрянь 12-це чись ёвтазель государственной кенярксчикс. Зярыя иень перть те чись ульнесь официальной оймсема чикс. Ансяк 2004 иень декабрясто Госдумась совавтсь полавтомат РФ-нь Трудонь кодексэнтень. Оймсема чись полавтовсь, а сонсь кенярксчись кандозь Россиянь ледстнемань читнень юткс.

Подробнее ...
 
Косто рамамс куз?

Декабрянь 15-це чистэнть республикасонть панжовить кузтнэнь ды пичетнень микшнемань базартнэ. Саранскойсэ тень туртов кемекстасть 22 площадкат (микшнема таркатнеде жо весемезэ 77).

Подробнее ...
 
Краснослободскойсэ – од прявт

Ноябрянь 29-це чистэ Краснослободскоень муниципальной районсо ютась Депутатонь райононь советэнь 13-це  сессиясь. Мордовиянь Прявтонть В.Д.Волковонь кармавтоманзо коряс сессиянть роботасо примась участия Мордовиянь Правительствань Председателесь В.Ф.Сушков. Чинь повесткасонть ульнесь вейке кевкстема: райононь од прявтонть кочкамось.

Подробнее ...
 
Фан-зона

Саранскойсэ Футболонь коряс масторлангонь чемпионатонть ютавтомсто прявт ошонь куншкакуросо карми улеме фан-зона.

Подробнее ...
 
Кочкадо сехте мазый район

Саранскойсэ ютавтови онлайн-вайгелень максома, сонзэ вельде редяви, ошонь кона районось весемеде мазыйстэ наряжазь Од иень кенярксчитнес. Теде пачтясть ошонь Администрациясто.

Подробнее ...