Рубрикатор

Домашнее хозяйство КОЧКУРБУЕНЬ КОММУНАЛЬЩИКТНЕ СТАКАЧИТНЕДЕ А ПЕЛИТЬ
КОЧКУРБУЕНЬ КОММУНАЛЬЩИКТНЕ СТАКАЧИТНЕДЕ А ПЕЛИТЬ

 

«Кочкуровожилсервис» ООО-сь Кочкуровань райононь ЖКХ-нь сферантень сась аволь умок. Сон панжозель 2013 иестэ, зярдо икелень ламо квартирас кудотнень мельга ваныця ды якиця компаниясь ловозель банкротокс. Коммунальной службанть районсонть савсь вельмевтемс одс ды седе куроксто.

– Ушодомс савкшнось, кода мерить, чаво таркасто, – ёвтни «Кочкуровожилсервис» ООО-нь прявтось Виктор Александрович Войнов. – Эрявсь вешнемс од здания, од кадрат, муемс ярмакт материально-технической базантень.

Виктор Александрович Войнов – жилищно-коммунальной сферасонть ломанесь содавикс. Сон чачсь-кассь теке ёнксонь Од Турдаки велесэнть, прядызе Саранскоень кооперативной институтонть, вете иеть важодсь Кочкуровань райпосо. Мейле тусь роботамо Саранск ошонь горводоканалов. Ушодызе тосонь трудонь биографиянзо мастерстэ, прядызе прявтонь полавтыцякс. Те организациянтень макссь 28 иеть. Зярдо Кочкуровань районсто сась тензэ энялдома велявтомс мекев ды саемс эсь «сёлмо алов» од жилищно-коммунальной организация, васняяк талнось. Содыль ды неиль Горводоканалсо важодемстэ, зяро мелявкс марто савкшны «бороцямс» коммунальщиктненень. Ялатеке тевесь тензэ ульнесь содавикс, ды Войнов ушодсь пурнамо од команда. Эряви меремс, муемс вейке а покш районсто паро, чарькодиця кадрат – а шожда. Эдь ламот ней бажить туемс важодеме велестэ ошов, тосо седе ламо ярмакт пандыть. Од ломанть жо овсе стака муемс тестэ. Сынь велесэ важодемадонть Московов-ков орголить.

Виктор Александровичнень удалась пурнамс организациянь юр. Ней тесэ важодить 44 ломанть: слесарть, диспетчерт, урядыцят, контролёрт, бухгалтерт, машинань ветницят. «Кочкуровожилсервис» ООО-нть васенце задачазо – максомс ламо квартирас кудотнес кельме ведь. Уштоманть мельга сынь а ваныть, эдь весе квартиратнес путозь индивидуальной уштомань системат. Зярдо азоронтень якшамо маряви, сестэ ушодсыяк «уштомань сезононзо». Организациясь ванкшны 2-5 этажсо 37 ламо квартирас кирьпецень ды панелень кудотнень мельга Кочкуровасо, Булгаковасо, Красномайскойсэ ды Семилейсэ. Кудотнень вейсэнь площадесь 38 тёжадо ламо кавонзазь метрат. Неть кудотнень витнематнеде, ведень максомадо, канализациянть мельга ваномадо ды ванськавтомадо башка, коммунальщиктне эштё саить ды ускить полигонов шукшпрятнень Вирь ало Тавласто, Од Пурнясто ды Воеводскойстэ. Аволь умок «Кочкуровожилсервис» ООО-сь панжсь эсензэ шукшпрянь ускома тарка, сайсь тень коряс эрявикс лицензия, ды ней весе шукшось валяви эрямо таркадо васоло аштиця полигононтень.

Эрьва чистэ диспетчерэнь службантень телефонсо гайневтить зярыя эрицят. Сехте ламотне пеняцить кудонь латотнень лангс, пиземе шкане сынь ушодыть кольгеме. Ды мезть дивсемс, эдь сехте од кудонтень, конась ашти те организациянть «сёлмо ало», топодсть 24 иеть, сехте таштось стявтозель 1968 иестэ.

Нама, неть кудотнесэ мелявкстнэде ламо.  Эрицятнень энялдомаст коммунальщиктне бажить топавтомс седе куроксто. Вете кудотнес теезель капитальной витнема: артозельть подъездтнэ, витнезельть фундаменттнэ, латотне, крыльцятне, валязельть кудотнень икеле покш латкотне. Кочкуровань весе ламо квартирас кудотнесэ полавтозельть ведень трубатне. Тень кувалма седе паролгадсь веденть танстезэ ды ваньксчизэ. Ялатеке улить мелявксост сынсест коммунальщиктненьгак. «Кочкуровожилсервис» ООО-нтень государстванть пельде кодамояк лезкс (а ярмаксо, а мейсэ) а максови, ды секскак коммунальщиктне ней зяро важодить, зняро тенст пандовияк. А весе бажить шкастонзо ды седе куроксто пандомс квартираст кисэ сыця квитанциятнень. Виктор Александрович Войнов пеняци, кой-кить зярыя иеть долкт пурныть. Нетнень лангс сави макснемс судс, кодаткак лия ёнкстнэ а лездыть. Ламот эрицятнестэ тукшныть важодеме покш ошов ды чуросто сакшныть тиринь ёнксов, сыньгак яла стувтнить ЖКУ-тнень кисэ шкастонзо пандоматнеде.

Кодат бу а улевельть мелявкстнэ, сынь весе изнявить, бути организациясонть важодить эсь тевень содыця, чарькодиця специалистт. Виктор Александрович Войнов эсензэ «вить кедекс» лови прявт бухгалтерэнть Вера Максимовна Кудашкинань. Сон тесэ важоди «Кочкуровожилсервис» ООО-нть панжома иестэнть. «Неень шкане бухгалтериянтень вешематне пек кассть, тенст эряви ветямс робота эсенек интернет-сайтэнть мартонок сюлмавозь организациятнень марто, –  ёвтни В.А.Войнов. – Вера Максимовна – весементь куроксто редиця, чарькодиця, содыця, покш профессиональной докачи марто специалист, конась лезды весенень валсояк-тевсэяк».

Эрьва чистэ эсь важодема таркасост коммунальщиктнень сехте эряза роботниктне, конатнень ловить «идемань службакс». Сынь топавтыть эсь тевест шкань апак таргсе, ды тосо важодить эсь тевень вечкиця цёрат. Прявтонть В.А.  Войнов марто минь ардтнинек сынст важодема тарказост. Вана шукшпрянь усксицясь Виктор Рузанкин. Сон ушоды важодеманзо валскень 8 чассто. Викторонь икеле эрьва чистэ путозь задача – ванськавтомс кудотнень икельга путнезь шукшпрянь контейнертнэнь Кочкуровасто ды велетнестэ ды ускомс шукшонть полигонов.

Слесаресь Виктор Бутяев ванськавтсь те шкане канализациянь латкотнень, качаясь эйстэст ЖБО-тнень. Сонзэ вакссо свал спецмашинань ветницясь, од цёрась Алексей Барашкин. Бути мезе, сонгак лезды. Слесаресь Валерий Александрович Чумаков, зярдо минь пачкодинек ваксозонзо, те шкастонть эрязасто ваднесь битумонь артомасо кирьпецень кудонь цоколенть. Те лувось лезды фундаментэнтень а каладомс пиземетнеде ды якшамотнеде.

Кода бу минь а сёвновлинек коммунальщиктнень, ялатеке икелест путозь аволь шожда задачат, ды сынст топавтомась ашти минек эйстэяк. Карматано пандомо услугатнень кисэ шкастонзо, сестэ улить праванок вешемс кедьстэст, мезе тенек эряви, ды куроксто топавтомс, мезе минек мелявтовты. Лиякс а кода!

 

Марина Девятова

 

Новости

Чувашиясто – казне марто

 

Мартонь 24-це чистэ И.Я.Яковлев лемсэ Чувашиянь государственной педагогической университетсэ ютась этнопедагогикань ды поликультурной образованиянь коряс студентэнь Весероссиянь олимпиада. Сон алтавсь РАО-нь академикенть Г.Н.Волковонь 90 иетненень.

Подробнее ...
 
Од ломанень ассамблея

 

Мордовия Республикасо теезь «Молодежная Ассамблея народов России «МЫ – РОССИЯНЕ» Общероссийской общественной движениянь региональной отделения. Республикасонть од ломанень движениянь теемась карми общероссийской гражданской идентичностень формированиянть коряс ушодкстнэнень, раськетнень ютксо ояксчинь кемекстамонтень ды  межкультурной вейсэнь важодеманть келейгавтомантень лездамонь площадкакс.

Подробнее ...
 
Диктантось – эрявикс тев

Те иень апрелень 8-це чистэ Саранскойсэ малав 400 ломантне кармить «Тотальной диктантонь» участникекс. Мероприятиянь ютавтомань меленть шнызе Мордовиянь Прявтось Владимир Волков.

Подробнее ...
 
Сценанть лангсо Ицялбуесь...

 

Неть оймсема читнестэ Республикань Культурань Кудосо ютасть «Шумбрат, Мордовия!» народной творчествань фестивалень меельце концерттнэ. Кадовсь ансяк Гала-концертэсь, кона карми декабрянь 11-це чистэ. Сценанть лангс лиснесть Ицялбуень, Ковылкина ёнксонь ды Саранск ошонь округонь артисттнэ.

Подробнее ...
 
Мамаева омбоце

 

Ноябрянь васенце пельксстэнть евтазельть Россиянь республикатнень государственной кельтнень коряс школасо тонавтницянь ды студентэнь Весероссиянь васенце олимпиадань итогтне.

Подробнее ...