Рубрикатор

Домашнее хозяйство РАКШАНЬ ОРМАТНЕНЬ ЭРЯВИ РЕДЯМС ШКАСТОНЗО
РАКШАНЬ ОРМАТНЕНЬ ЭРЯВИ РЕДЯМС ШКАСТОНЗО

Прядовома лангсо 2014 иесь. Республикань промышленной ды  перерабатывающей предприятиянь, строительной организациянь, велень хозяйствань предприятиянь ды лия трудовой коллективтне ванкшныть эсь важодемаст: весе-аволь топавтозь аравтлувсонть тешкстазесь, мезе лангс покш мель явомс сы иестэнть. Видькстатано, республикань ламо предприятиятне иенть прядыть вадрясто. Арсезенть топавтызь. Кецявтыть агропромышленной комплекссэ важодицятнеяк. Велень трудий ломантне 1 миллиондо ламо тоннат сайсть сюро, таргасть малав 1 миллион тоннат ламбамо якстерькай. Парсте тевтне молить животноводствасояк. Меленде ламо скалсто потявтозь ловсо, миезь ракшань ды саразонь сывель. Теньсэ, нама, покш таликаст Мордовия Республикань ветеринаронь службань  специалисттнэньгак.

– Минек ветеринаронь службасо важодицятнень васень тевест – ракшань орматнень шкастонзо редямось, – ёвтни МР-нь ветеринарной службань прявтось А.В.Еделькин. – Меельце иетнестэ минь покш мель явинек, виевстэ важодинек ракшатнень ютксо апаро орматнень – сибирень язванть, туберкулёзонть, тувонь африкань чуманть анолдамост коряс. Скалтнэнь ванкшномась парсте ладязель Чаунзань, Темниковань, Краснослободскоень, Покш Игнатовань, Дубёнкань ды лия районтнэсэ. Тесэнь ветеринарной врачтне важодсть ды важодить оймамонь апак сода. Сынь анокт ардомс киненьгак лездамо ракшань лецямсто куш кодамо шкасто, куш кодамо погодане.

– Минек специалисттнэ эрьва иестэ тейнить весе ракшатненень 6 миллионт прививкат, малав 1,5 миллионт диагностикань исследованият, 4,8 миллионт кавонзазь метратнес дезинфекция, –  полады Алексей Васильевич. – Неть тевтнень топавтомась тешкстазель аравтлувсонть. Видькстан, тень теемс а шождатнестэль. Важодемстэ кодат ансяк стакачить эзть вастневе. Ансяк сынст минь печтинек. Те корты седе, специалистэнек пек вечксызь эсест тевест.

Течинь чинтень республикасо ракшань педиця ормань коряс эпизоотической ситуациясь а талновты. Арасель истямо тев – ракшатне ормалгадовольть сибирень язвасо, ящурсо ды лиясо. Неть ды лия орматнень анолдамосонть Республикань ветеринарной службасо покш мель яви ракшань орматнень каршо бороцямонь Республикань ветстанциясь, конань прявтсо А.Н.Кечайкин.

– Тей мон сынь важодеме Н.П.Огарёв лемсэ Мордовской госуниверситетэнть прядомадо мейле, – ёвтни Александр Николаевич. – Васня сынь, кода мерить, аламос. Ды кадовинь оно знярос! Тевем топавтан уш комсте ламо иеть.

Чачинь-касынь Покш Березникень райононь Симкина велесэ. Тесэ тонадынь ракшатнень мельга якамо. Эдь велесэнек малав эрьвань кардазсо ульнесть ракшат.

А.Н.Кечайкинэнь валонзо коряс, ракшань орматнень коряс бороцямонь станциянь специалисттнэ а ёвтавияк кодамо покш тев теить. Ракшатнень апаро ормасо аормалгадомга ютавтневить эрьва кодат мероприятият: ракшань исследованият-ванкшномат, ферматнева тейневи дезинфекция ды лия мезе. Сеедьстэ ютавтневить скалонь, тувонь, ревень, нармунень сывелень, конат анокставить микшнемс, ветеринарно-санитарной экспертизат.

Тешкстасынек, Республикань ветстанциянь специалисттнэ кеместэ сюлмавозь Саранскоень ярсамопелень микшнема рынкатнень марто. Сынь тейнить ветэкспертизат ловсонтень, алтнэнень, эмежтненень, медентень ды фруктатненень.

Тесэ а кода а ледстямс сетнень, кить весе оймест путыть вечкевикс тевезэст, кить ванстыть ломантнень шумбрачист, ракшатнень. Республикань ветеринарной службасонть ансяк паро валсо кортыть Ицялонь главной ветеринарной врачтонть В.Н.Афанасьевадо, Дубёнкань – Р.П.Юртаевадо, Теньгушевань – М.И.Воробьевадо, Кочкуровань – И.В.Асташкиндэ, Краснослободскоень – П.М.Федосеевде, Саранскоень Октябрьской райононь – А.В.Лабушкиндэ.

– Содатадо, районтнэсэ-косо ветеринарной врачтнень тевест зярдояк а прядовкшныть. Сынь кеме сюлмот кирдить велень эрицятнень марто, кить эсь кардазсо кирдить скалт, – ёвтни ветстанциянь прявтось А.Н.Кечайкин. – Минек специалисттнэ якить велетнева, сёрмалить ракшатнень, истя жо ванкшныть, ютавтыть диспансеризация.  Вешнить ракшатнестэ орманть. Эдь кизна ловсонть питнепезэ арась! Велетне  пешксеть эйкакштнеде! Вантано, ловсось улезэ паро, эйсэнзэ бактерият-мезть илязт уле. А карминдерятано тень мельга ваномо – сестэ учок апаро тевть. Тень нолдамс кодаяк а эряви. Эрицятне а простясамизь.

«А мезть сёпомс, ней велень ламот эрицятне тувонь, скалонь сывель микшнить кода мелест: базарсо эли кудосо. Икелепелевгак тевтне истя кармить молеме?» – кевкстинек ветстанциянь прявтонть А.Н.Кечайкинэнь.

– Седе тов истя тевтне а кармить молеме. 2013 иень омбоце пельксстэнть сывелень микшнемась ушодовсь промышленной лувсо. Печкемс тувонть эли скалонть эряви ускомс колбасной заводов, сывелень комбинатов. Бути велетнесэ арасть истят пунктт, косо печксевить ракшатне, сынст эряви строямс. Ней сывелесь миемс карми ильтявомо аволь эрицянть, крестьянско-фермерской хозяйствань азоронть кардазсто, ракшань печкемань пунктсто. Мельспаро, истят пунктт уш улить Отяжелень, Орданьбуень, Дубёнкань, Краснослободскоень, Ковылкинань районтнэсэ, – ёвтнесь Александр Николаевич.

Тешкстасынек, Республикань ветеринарной службанть мельга кемекстазь ракшань орматнень каршо бороцямонь коряс 22 районной станцият, 40 – ветеринарной участкат, 1 – Саранскоень ветеринарной поликлиника, 3 – ветеринарной пунктт, 51 – участковой ветеринарной лечебница, 12 – районной ветеринаронь лабораторият. Истя, ветеринаронь службасонть важодить 416 ветеринарной врачт, 100  фельдшерт ды 50 лаборантт. Весемезэ минек шумбрачинек ванстомга важодить малав тёжа ломанть.

А мезть сёпомс, Республикань ветеринаронь службанть мельспарозо – ветеринарной лабораториясь, конань прявтсо главной ветеринарной врачось М.А.Пономарёв. Сон те тевсэнть важоди уш малав 10 иеть. Те шканть перть ламо теезь лабораториясонть. Истя, республикасонть 17 лабораторият: вейке – республикань, ниле – межрайоннойть, 12 – районнойть. Весе лабораториятнень улить санитарно-эпидемиологиянь лицензияст, кавксотненень максозь аккредитациянь аттестатт.

Аккредитациянь аттестаттнэ лездыть ютавтнемс ярсамопелень ванкшномат, тень ютксо ловсоньгак. Истя, ютавтозь уш 900 тёжат ванкшномат, тень ютксо 100 тёжат бактериологическойть, малав 270 тёжат химико-токсикологическойть ды биохимическойть, 21 тёжа микроскопическойть, 6 тёжат биологическойть ды лия ванкшномат. Тень экшсэ, нама, лабораториятнесэ специалисттнэнь виев важодемаст.

Видькстатано, лабораториятнесэ оборудованиясь неень шкань ды пек кеме. Вана аволь умок рамазь прибор. Сон пек питней. Те приборонть вельде лангс ливтевить стака металлтнэ. Сынь покш зыян кандыть ломантненень ды ракшатненень. Лабораторияв лезкс мельга сакшныть аволь ансяк велень хозяйствань предприятиянь прявттнэ, истя жо сетнеяк, кить эсь кардазсо кирдить скалт, тувот, реветь. Лабораториянь специалисттнэ ваныть ракшатненень коромонь анокстамонть мельга. Рационсонть улезт белок, сахар, кальций, фосфор, клетчатка ды лия компонентт.

Эряви ледстямс эштё вана мезенть. Пек парсте важодить государственной ветеринарной контролень отделтнэ. Сынь ванкшныть переработкань предприятиятнень. Ютксост «Талина» покш холдингесь, «Велень кемекстамо» МР-нь ГУП-сь, Саранскоень пищекомбинатось, «Саранскрыба», «Оброченский» ООО-тне ды ламо лиятне.

Тешкстасынек, Республикань ветеринаронь лабораториясонть важодить колоньгеменде ламо врачт, конатне свалшкань вешнемасот. Сынь эсь ёрокчист кастыть-кемекстыть Московсо ды лия оштнесэ. Эдь тенень дивсемс а эряви. Тень веши неень шкась, зярдо минек рынкатнес, лавкатнес, лияв-ков ярсамопель ускить эрьва косто. Кодамо сон? Тень эряви содамс ветспециалисттнэнень.

…Мельспаросо сыргинек Республикань ветеринаронь службасо важодицятнень кедьстэ. Прявтось А.В. Еделькин кемевтимизь, келя, эрьва чистэ минек республикань государственной ды производственной службань малав тёжа специалистт лиснить важодеме, штобу лецямс ракшатнень, анокстамс ды ютавтнемс профилактикань эрьва кодат мероприятият, ванкшномс коромтнень, коромонь добавкатнень качестваст. Тесэнь важодицятнень вейсэнди се, весе сынь – ветеринариянь специалистт ды совить Мордовия Республикань ветеринаронь службантень. Кадык истя улияк!

 

Пётр Зиновьев

 

Новости

«Единая Россия» запускает новый проект по поддержке региональных НКО

 Совет Сторонников «Единой России» запускает новый проект по поддержке региональных НКО – Центр поддержки гражданских инициатив (ЦПГИ). Центр займется поддержкой гражданских инициатив и проектов НКО, региональных лидеров общественного мнения и активных граждан. Каждый проект должен быть направлен на развитие территорий и иметь социальную направленность. Центр позволит обеспечить более четкое взаимодействие между волонтерами, организаторами волонтерской деятельности, благополучателями, органами государственной власти и органами местного самоуправления. Об этом заявил секретарь Генсовета «Единой России» Андрей Турчак, выступая на молодежном форуме «Машук-2018», который проходит в эти дни в Пятигорске.  

Подробнее ...
 
Уведомление

 Государственное бюджетное учреждение Республики Мордовия «Редакция газеты «Эрзянь правда» информирует регистрированных кандидатов в депутаты Госсобрания РМ о проведении 9 августа 10.00 часов жеребьевки по предоставлении печатной площади  на дополнительные выборы в Госсобрание Республики Мордовия  9 сентября 2018 года.

 
Единый «налоговый патент» для ЛПХ поможет фермерам развивать хозяйства
Патентная система станет оптимальным решением для тех фермеров, которые сегодня боятся
регистрировать ИП из-за бюрократических препон, но задумываются о развитии своего
хозяйства или пытаются найти решение вопроса сбыта продукции. Об этом заявила член
комитета нижней палаты парламента по аграрной политике Светлана Максимова,
комментируя находящийся на рассмотрении в Госдуме законопроект, который предоставит
владельцам личных подсобных хозяйств право в случае необходимости купить «налоговый
патент» на срок от месяца до года.
Подробнее ...
 
Андрей Турчак: Совет по развитию цифровой экономики поможет регионам разработать соответствующие программы

Основными функциями Совета по развитию цифровой экономики при Совете Федерации станут экспертная поддержка законотворческой деятельности Совфеда в сфере цифровой экономики, а также помощь верхней палате в разработке соответствующих программ на региональном уровне. Также Совет будет помогать регионам разрабатывать свои местные программы по развитию цифровой экономики. Об этом заявил вице-спикер верхней палаты парламента, председатель Совета, секретарь Генерального совета «Единой России» Андрей Турчак, выступая в городе Гусеве Калининградской области на первом заседании Совета.

Подробнее ...
 
Саранскоесь – сехте вадря оштнень ютксо

2018 иень Футболонь коряс масторлангонь чемпионатонь невтевкстнэнь коряс, Саранскоесь совась сеть оштнень юткс, конат пек вечкевсть туристтнэнень. Ошонтень сазь инжетнень ламочист коряс сон саизе сисемеце тарканть, конань явизе Волгоградонть марто.

Подробнее ...