Рубрикатор

Домашнее хозяйство Одксчинь ванстомань салавачить
Одксчинь ванстомань салавачить

Ламот эйстэнек арсить: кода ванстомс одксчинть? Улемс мазыекс ды одокс ламо иень перть? Кой-кить кемить питней косметикань процедуратненень, лиятне кекшить иест артоманть алов, парсте оршнить… Ансяк улить истят ават, конатнеде апак кавтолдо мерят, эйсэст шкась а токши! Истятнэнь ютксто вейкесь Саранскоень эрицясь Ирина Яковлевна Ларина. Мейсэ салавачизэ? Нама, аволь ризкстэме эрямосонть. Весе стакачитне ды мелявкстнэ, зяро пурнавсть эрямосонзо – сатовольть ламо ломаннень…

«Ледстяса зыянов войнанть…»



Ирина Яковлевнань прянь ветямосонзо, эскелькссэнзэ, кутьмерень кирдемасонть а неяви кодамояк сизема, а содави, зяро сонензэ иеть (те авантень 80-де ламо!), эряза, мизолдыця... Маряви, буто икелеть тейтерне, кодамокс сон ульнесь Ине Отечественной войнадонть икеле. Войнась мольсь самай од шкастонзо, ды те васенце цидярдоманть сон кирдизе.
– Мон чачинь Одессасо, тосо эриньгак, зярдо ушодовсь войнась, – ледстни тылэнь труженицась. – Ульнинь пек од, мелявкстомо эрямось полавтовсь сеске. Сестэ минек, советэнь ломантнень, ульнесь ансяк вейке меленек: изнямс фашисттнэнь! Эрьвась бажась теемс кодамояк путовкс те тевсэнть. Мон молинь важодеме заводов.
Парсте аштить мельсэнь сеть ковтне, зярдо Украинась фашисттнэнь кедьсэль. Паряк, эрьвась эйстэнк чарькоди, мезе те: якшамо, вачочи ды пелема… Ансяк тень лангс апак вано, эйсэнек свал эрясь Изнямос кемема! Читне мольсть мельга-мельцек. Ды вана фашистэнь оккупациясь прядовсь, мейле сась сехте учовикс чись – Изнямонь чись!
Эрямось таго полавтовсь, ды од Ирина прянек-пильгенек копачавсь войнадо мейлень уцяскав читненень. Ней ломантне вельмевтсть весе сень, мезесь колазель, – оштнень, кудотнень ды, нама, эсест эрямост… Ней эрявсь арсемс седе тов эрямодонть.

Сынь аволь преступникть, сынь – эйкакшт…
Авась видьксты: бути шканть велявтомс мекев ды одс кочкамс эстеть уцясканть, сон бу мезеяк аволь полавто ды эрявлизе стака, но валдо теке эрямонть!
Ирина Яковлевнань вейкине вечкемазо ульнесь кувака ды уцяскав. Лев Сергеевич мирдензэ марто сынь вастовсть Московсо ды сеске чарькодсть, вейкесь омбоценть пелькскезэ. Мейле Ларинтнэ састь эрямо Саранскоев, Ирина Яковлевна ушодсь важодеме 18 иеде седе вишкине эйкакштнень тевест коряс инспекторокс.
– Эсь важодеманть эряви вечкемс. Теде башка, мон пек вечкан эйкакшт. Стака эйкакштнень марто свал муилинь кель-вал. Неинь эйстэст аволь вишка преступникть, виде ки лангсто туевезь цёрынеть ды тейтернеть… Кортылинь тетяст-аваст марто, бажинь витемс кудоютконь сёвноматнень. Эрсесь, эйкакштненень морот морсинь, – пейди Ирина Яковлевна. – Кандтнинь ловномс литератураяк…
– Туинь пенсияв 30 иеде икеле, МВД-нь трудонь ветеран званиясо, – полады Ирина Яковлевна. – Мирдем важодсь механической заводонь прявтокс, теевсь университетсэ профессорокс… Пенсияв лисемадо мейле карминь эрямо мирдем туртов ды, кода васенце читнестэ, кецнинь, сон ули монь вакссо! Мирдем, кода монгак, вечксь морамо, минь сеедьстэ ютавтнинек кудосо концертт!
Лиссь зыян – зярыя иеде икеле Лев Сергеевич тусь эрямосто. Мода-масторось прок велявтсь прянзо лангс…

Зарядка, моро ды мизолкс!
– Сестэ прок эсь прям ёмавтыя…– укстась авась. – Сюкпря Людмила тейтерем, Толя цёрам (ней сон истя жо тусь эрямосто…) ды Андрей нуцькам туртов – эзимизь кадно ськамон се стака шкастонть, свал аштесть вакссон. Минек семиясь паро, эрятано покш ялгаксчисэ, монь правнукомгак ули!
Монь тейтерем – содавикс косметической компаниянь местной представительствань прявт, – ёвтни Ирина Яковлевна. – Тосо роботы нуцькамгак. Вана монгак карминь тенст лездамо ды уш топавтан прявтонь тевть. Теде башка, яван мель творчествантень. Карминь морсеме «Крыныця» народной ансамблясо. Те коллективсэнть тень пек вечкеви, якан тов прок тиринь семияв.
Ды, окойники, те мазый авась ёвтни одксчинь салавачитнень.
– Нама, эряви ваномс эсь прянть мельга, – тешксты Ирина Ларина. – Теде башка, эрьва чи тейнян зарядка. Мон арсян, эрямосонть ламо мезесь ашти ойменть ёжонзо эйстэ. Кода берянь илязо уле, а нусмакалян. Свал эрязан ды пильге лангсан! Ансяк эрязачисэнть кармат улеме од. Чамасонть свал улезэ мизолкс. Сонзэ марто аванть чамасто ёмить весе сормсевкстнэ, тееват мазыекс!

 

Новости

Од иень ярмунка

Од иень кенярксчитнеде икеле, ацамковонь 22-це чистэ, Саранскойсэ ютавтови ярмунка, косо кармить микшневеме эрьва кодат товарт ды велень хозяйствань продукция.
Ярмункасонть кармить Мордовиянь микшнемань сферань, общественной питаниянь, перерабатывающей промышленностень ды велень хозяйствань предприятиятне.

Подробнее ...
 
Турчак: Власти компенсируют гражданам затраты на покупку приставок для цифрового ТВ

Правительство РФ и региональные власти предусмотрели исчерпывающий набор компенсирующих мероприятий при переходе с аналогового на цифровое телевещание для малозащищенных слоев населения. Также в региональных бюджетах предусмотрены денежные компенсации или закупка необходимого оборудования. Совет по развитию цифровой экономики при Совете Федерации представит на ПМЭФ-2019 свой рейтинг цифровизации регионов и предложит механизм поддержки лучших региональных практик. Об этом заявил вице-спикер Совета Федерации, секретарь Генерального совета «Единой России» Андрей Турчак по итогам второго заседания Совета по развитию цифровой экономики в Новосибирске.

Подробнее ...
 
Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.

 
Ардоманть кис питнетне яла касыть

Саранск ошонь общественной транспортонь частной предприятиятне бажить кепедемс ардоманть кис питнетнень декабрянь 25-це чистэ саезь. Теде сынь пачтясть ошонь администрацияв. 2, 5, 10, 15, 16, 18, 19, 21, 22, 24, 25, 28, 32, 35, 36, 37, 38, 40, 41, 44 ды 45№ маршурттнэсэ питнесь карми 25 целковойть (ней – 20). 23, 34 ды 66№ – 23 целковойть. Мэриясо пачтясть: неень шкане Саранскойсэ важодить кавто ООО-т («Сигнал С» ды «ПАТП»), конат усксить ломанть, истя жо индивидуальной кавксо предпринимательть. Частной усксицятнеде 35%.

Подробнее ...
 
Важоди Якшаматянь почта

Мордовиянь Главпочтамтсо декабрянть прядовомс карми важодеме Якшаматянь Почтась. Сёрмадомс ды нолдамс почтань ящикс телень прявт волшебникентень пачтямо мереви эрьвантень, иетнень лангс апак вано.

Подробнее ...