Сонзэ кудонь кенкшензэ свал панжадот весень туртов. Ломантне чиить тензэ мелявксост-ризнэмаст эли кецямост марто. Эрьвантень муи лембе вал, максы превс путома эли жо лезды тевсэ. Зяро ломанть сон идесь, лецясь, стявтсь пильге лангс – а лововияк. Течинь ловныцятнень ули меленек содавтомс Мария Григорьевна Славкинань марто, конань велесэ кармасть лемдямо доктор Лизакс (Елизавета Глинка содавикс врачонть коряс). Сон истя жо весе седейсэ капши весенень лездамо.

Мария Григорьевна чачсь Орданьбуень Орозбие велесэ. Пингензэ перть важодсь медпунктсо фельдшерэкс. Ды кадык ней уш пенсиясо, ялатеке полады вечкевикс тевензэ.

Школасо Мария тонавтнесь парсте, сонзэ прядомадо мейле бажась улемс агрономокс. Сеть шкатнестэ те профессиясь ульнесь мельстуиця, вешевикс. Ансяк эзь саво тонавтнемс агрономокс. Вейке ие важодсь Алатырь ошонь «Электровыпрямитель» заводсо регулировщикекс. 1973 иестэ мольсь тонавтнеме Орданьбуе ошонь медицинань ущилищав, сонзэ прядомадо мейле кучизь важодеме теке жо райононь Кеченьбие велев, кона ашти Орозбие веленть шабрасо, кавто вайгельпень тарка.

Мария Григорьевна 36 иень перть важодсь Кеченьбиесэ фельдшерэкс, пенсияв лисемадо мейле эштё кавто иеть роботась. Эрьва чи, кодамо илязо уле ушось –  якшамо эли варма, пиземе эли кандылов, сон чииль-капшиль шабра велев. Те ней ули асфальтонь ки, сестэ китькак арасельть. Орданьбуев истя жо паро ки арасель. Весе надобиятнень савкшнось ускомс эстензэ, ардомс попуткасо, молемс ялгояк. Бути машинась пезны, тракторось таргасы. Те ней маряви дивань тевекс, сестэ эрямось ульнесь лия. Медпунктсонть газ арасель, медроботниктне уштнесть сонзэ сынсь.

– Кеченьбиень ломантне парт, важодинь тосо паро мельсэ, – ледстни Мария Григорьевна, – свал ульнесь ламо важодема. Кодат ансяк зыянов тевть эзть лисне неть иетнень перть, весе а ледстявитькак… Эрявсь куроксто максомс медицинань лезкс. Ульнесть инсультт, инфарктт, кедень-пильгень синдемат, ламо эрьва кодат томбавомат, гипертонической кризт, морявомат, онкологиясо сэредицят, мекшень пупамодо аллергият ды седе тов. Зыянов тевть лиснесть аволь ансяк покштнень, эйкакштнень мартояк. Бути тон куроксто максат лезкс, сат шкастонзо, кучсак больницяв – ловт, ломанесь идезь.

Те авась парсте содасы эсь тевензэ, сон мездеяк а тандады. Бути кие апак учне стардови чачтамо – чачтавтсы. Истят тевть эрямосонзо ульнесть аволь весть. Фельдшерэсь якси кудова стакасто сэредицятнень ланга, путни уколт, ёвты, кодат симемс таблеткат ды, нама, эрьвантень муи чевте вал. Бути сави тензэ пшкадемс, сон кувать а арси, сеске редясы, мезе теевсь ломаненть марто, кода тензэ лездамс, кодамо надобия максомс, ускомс больницяв эли кадомс тарказонзо. Сон машты ломантнень марто кортамо, соды, кода оймавтомс ормалгадозенть. Свал мизолдыця, сови кудос паро ёжо марто ды кази те ёжонть весенень.

Кавто велень эрицятне нейгак зыянов тевстэ чиить М.Г.Славкинанень. Чить пшкадить эли веньперть, сон киньгак зярдояк а пани. Пурны-сэрни ды сырги лездамо. Кудозояк а эрси чаво, ломантне сакшныть тензэ лезкс мельга. Важодеманзо лангс вестькак эзть пеняця. Ломантне ёвтыть ансяк сюкпрянь валт. Мария Григорьевна чуросто ашти тевтеме, сестэяк сон муи шка молемс церьковав моравтомо.

М.Г.Славкина казезь ламо сюкпрянь сёрмасо, кода райононть, истя жо «Красный крест» вейсэндявксонть пельде.

Ютазь кизна сонзэ шабранзо пупизе мекш. Ушодовсь виев аллергия. Мария Григорьевна чийсь, сеске макссь медицинань лезкс. Сонзэ практикасо те аволь васенцеде. Сась «скороесь» ды врачтне мерсть: «Сюкпря ёвтадо Мария Григорьевнанень. Бути аволь сон, ломанесь куловоль, минь а кенеревлинек».

Те телестэнть Мария Григорьевна сонсь понгонесь зыянс. Эйгажа киланга ютамсто прась ды томбавсь. Сон эзь арсеяк, эзь учнеяк, зяро ломанть сыть варштамонзо, гайневтить телефонга. Весе ризнэсть вечкевикс медичканть кис. Кода сонтемензэ, «якиця доктортомонть»?

– Мон а янксян, мекс кочкия медицинанть, сюкпря Пазонтень, мельстуиця важодемам кисэ. Мельспаросо лездан весенень. Зярдояк а аштян тевтеме, свал ломань ютксо ды ломань марто, – корты М.Г.Славкина.

Т.Маторкина