Рубрикатор

Здравоохранение МВД-нь медсанчастесэнть – од оборудования
МВД-нь медсанчастесэнть – од оборудования

 

Од иенть каршо Мордовия Республикань Внутренней тевень министерствань Медико-санитарной частесэнть панжовсть одт, неень шкань оборудования марто кабинетт. Сынст панжомо-ванкшномо сакшность МР-нь МВД-нь министранть полавтыцясь Владислав Смирнов, МВД-нь Тылэнь прявтось Юрий Бражин.

 

Владислав Смирнов тешкстызе:

– Мордовия Республикань МВД-нь кирдийтнень прявт тевтнестэ вейкесь – важодицятнень, сынст семиятнень, ветерантнэнь шумбрачист ванстомась ды кемекстамось. Весе вешематнень коряс, медицинань неть учреждениятнесэ улезэ путозь неень шкань оборудования. Тесэ тееви диагностика, ютавтови лецямо, реабилитация. Витнемань тевтне тесэ ушодозь 2015 иестэнть. Те шканть перть удалась витнемс ташто кабинеттнэнь ды теемс одт. Педе-пев витнемань тевтнес ютавтозь малав 7 млн. целковойть. Ней тесэ теезь пек вадря нупальть, кодат арасть республикань лецямонь лия учреждениятнесэ. Тень туртов медсанчастентень рамазь неень шкань вешематненень ладиця оборудования ды мебель, неть тевтнес ютавтозь малав 10 млн целковойть. Теде башка отделениятнэсэ теезь медиктнень оймсемаст туртов башка нупальть.

Медико-санитарной частень прявтось Надежда Мельник ёвтызе, меельце иетнень перть лецямонь те учреждениясонть кемекстазь материально-технической базась, тевс нолдавить сэредицятнень лецямонь од технологият, рамазь неень шкань оборудования.

– Нурька шкань перть минь теинек вадря ремонт, течи минь панжтано физиотерапевтнэнь, стоматологонь, стерилизациянь, хирургонь, ЛОР-нь ды лия специалистэнь кабинетт, – мерсь Надежда Мельник.

Эряви тешкстамс, МВД-нь Медико-санитарной частенть витнемась-одкстомтомась аштесь республикань Внутренней тевень министранть Юрий Арсентьевень пшти ванновтонзо алов.

Од оборудованиясь лезды медицинань учреждениянь важодицятненень седеяк видестэ ды шкастонзо теемс диагностика ды лецямс сэредицятненень.

МР-нь МВД-нь министранть полавтыцясь ваннкшнынзе одкстомтозь кабинеттнэнь, максь покш питне тозо путозь оборудованиянтень ды мебелентень. Невтемга, ЛОР-нь кабинетсэнть путозь вишка операциянь теемань оборудования. Истямо арась республикань вейкеяк поликлиникасо. Теде башка, од отделениятнесэ теезь пек вадря условият лецямонь учреждениянь важодицятнень туртов.

Од кабинеттнэнь ванкшномадост мейле Владислав Смирнов кортась медиктнень марто, кунсолынзе сынст талновтыця кевкстематнень. Зярыя пшти тевтнень коряс сеске максозельть кармавтомат.

Министранть полавтыцясь тешкстызе, МР-нь МВД-нь прявтнэ седе товгак поладсызь важодеманть медико-санитарной частенть одкстомтоманть коряс. Тевс нолдавить од технологиятне, рамавить неень шкань вешематненень ладиця оборудованият.

Т.Аксенова

 

Новости

Путин казизе Волковонь Александр Невскоень орденсэ

Россиянь Президентэсь Владимир Путин тешкстась Указ «О награждении государственными наградами Российской Федерации». Зярыя кементь фамилиятнень ютксо Мордовиянь Прявтось Владимир Волков. Государствань руководителенть Указонзо коряс сонензэ максови Александр Невскоень орденэсь.

Подробнее ...
 
Кулят мэриясто

Ошонь Администрациясо ютась промкс, кона ушодовсь коммунальной техниканть телентень анокстамодо кевкстематнестэ. РФ-нь МЧС-нь ГУ-нь МР-нь представительтне пачтясть, маласо читнестэ Саранскойсэ температурась валги -5 градусос, чить термометрась невти +1, +2 градуст. Карми прамо начко лов. Ошонь прявтось Пётр Тултаев тешкстызе, машинань ветницятне чарыст зярс эзизь полавто. ГИБДД-нь важодицятне мерсть, ветницятненень ютавтыть профилактической кортамот. «Чуваронь-салонь почодыця машинатне телень шкане улест весе зыянов таркатнесэ, сэдтнень вакссо, пандопряв молиця килангтнесэ. Ошонь хозяйствань департаментэнь важодицятне кадык стувтсызь оймсема читнень. Субутась тынк туртов – важодемань чи», – мерсь Пётр Тултаев.

Подробнее ...
 
Литературанть марто вейсэ

А.С.Пушкин лемсэ республикань Национальной библиотекасо ютась «Литература и природа – рука об руку» эрьва иень акциясь. Сон юты колмоцеде ды тедеде алтавсь Экологиянь иентень. Сонзэ ютавтыцятне – Ицялбуень куншкакуронь библиотекась, «Смольный» национальной паркось ды А.С. Пушкин лемсэ библиотекась.

Подробнее ...
 
Сюкпрянь валт

Мордовия Республикань Прявтонть Владимир Волковонь лемс сась благодарность Адмирал Ушаков эскадрань миноносецэнь командирэнть Игорь Никитинэнь пельде. Мордовия Республикань подшефной миноносецэнь экипажонь прявтось республикань руководителентень ёвтась сюкпрянь валт военной моряктнень эрямост ды бытэст коряс мелявтоманть кисэ.

Подробнее ...
 
Сайсть медальть

Аволь умок Московсо ютавтозель «Сырнень сёксь» 19-це весероссиянь агропромышленной выставкась. Тосо эсь продукцияст невтизь Мордовиянь комсте ламо велень хозяйствань предприятиятне. Вана «Хорошее дело» агрогруппась тов усксесь «Мечта» ды «Юбилейное» кавто предприятиятнень продукцияст.

Подробнее ...