Рубрикатор

Здравоохранение Сэредицятненень лездамга
Сэредицятненень лездамга

 

Неень шкане од семиятнень пельде савкшны марямс кевкстемат-пшкадемат седе, кода кастомс эйкакштнень седеймарицякс, тонавтомс лиятненень лезксэнь максыцякс. Ламот од тетятне-аватне пеняцить неть ёнкстнэнь эрямос совавтоманть лангс. Нать, истятнэ а содыть, кодамо стакачи марто вастневить течи сеть, кинь семиясо трявить-кастовить стакасто сэредиця (инвалидность марто) эйкакшт. Виде, государствась, ков сатыть виензэ, лезды неть семиятненень, васняяк а кады вановттомо сетнень, кинь кадызь эйдень кудос. Ансяк тетянь-авань маласо улемась мейсэяк а полавтови.

Чарькодеви, сеть семиятненень, косо трявить-кастовить сэредиця эйкакшт, эряви лездамс эрьва ендо ды аволь ансяк пособиянь пандомасо, истя жо шумбрачист витемасо, шкаст парсте ютавтомасо. Течи тиринь газетань ловныцятненень пачтятано вейке семиядонть, косо вейкине эйкакшост стакасто сэредиця.

 

Ивановтнень (фамилиясь полавтозь) семиясо эйкакшось ульнесь пек учовиця. Весе малавикстнэ пек кенярдсть тейтерьканть чачомадо кулянть марямсто. Васень шкасто мезеяк зыянов эзть редя. Ансяк шкань ютазь, шумбрачинзэ домкасто ванкшномадо мейле, пачтясть тенст аутизмань стака ормадонть.

Нама, кинь семиясо арасель стакасто сэредиця эйкакш, те сэредьксэсь истя пек а чарькодеви, кода сон токизе сетнень, кить чинь-вень перть талныть-ризныть аволь шумбра эйкакшонть кувалма.

Минек редакциянь течинь инжесь Елена И.

– Елена, кода ютавтынк кизэнть?

– Те иень кизна ульнесь покш мелем тейтерем марто пачкодемс иневедь чирев. Кодашка покш кенярксонок ульнесь, зярдо Эрицятненень социальной лезксэнь максомань Пролетарской отделстэ тенек гайневтсть ды пачтясть меленек топавтомань кулядо. Те ульнесь алкуксонь казнекс. Аволь ансяк шумбрачинек витинек, истя жо пурнынек вийть цела иес, куш аламошкас полавтынек тонадовозь тарканть. Койсэнек, неть путёвкатне, конат максовить стакасто сэредиця эйкакштненень, – те пек паро тев.

– Икеле тыненк савкшнось ковгак оймсеме яксемс?

– Колмо иень перть тердтнимизь Саранск ошонь округонь Октябрьской районсо Иоанно-Богословонь лемсэ цёрань монастырень паломникень куншкакуросонть эйкакштнень-инвалидтнэнь туртов теезь лагерев. Сон аволь весть ютавтовкшнось «Надежда» эйкакшонь приютонть ды Казанень Пазонь Авань Пазаванть лемсэ храмонь проекттнэнь эрямос совавтомсто.

Эрьва разнэ кемень чинь перть минь тосто амольдинек ансяк паронть ды валдонть. Эрьва чись лагерьсэ ушодовиль Пазонь литургиясто. Те проектэнть ветясть духовной тетятне, васня ульнесь Валерий иереесь, омбоце иестэнть – Василий протоиереесь, причастясть эйкакштнень, тонавтсть сынст пазморонь моравтомо, ловномо.

Монастырьсэ улемстэ эйкакштне аволь ансяк священниктнень ды тосо эриця монахтнень Пазонь валост (проповедест) кунсолость, истя жо лездасть сыненст топавтовикс тевтнесэ. Юткошкасто ульнинек Феофан старецэнть калмонзо лангсо ды эрямо таркасонзо (кельясонть). Мельспаросо эйкакштне укшность венчсэ Макаровкань эрькеванть.

Лагерьсэ улемстэ эйкакштнень марто содавтынек ине таркатнень. Минь ульнинек Орданьбуе ёнксонь Тургеневань Ключевской цёрань пустыньсэнть, косо эйкакштне экшелясть лисьмапрясонть. Вейсэ якинек Рузаевка ёнксонь Пайгармань тейтерьавань монастырев.

Койсэнек, покш лезэ весе сэредиця эйкакштненень ульнесь реабилитациянь программадонть, физкультурань-шумбрачинь витемань, коррекциянь-тонавтомань, иппотерапиянь ды ёрокчинь занятиятнеде.

Мейсэяк а онкставить сеть паро ёжомарямотне, конат совасть эйкакштнень оймес монастырьганть якамсто, пертьпельксэнь мазычитнень ванкшномсто, ванькс кошттонть лексемстэ.

– Елена, чарькодеви, стакасто сэредиця эйкакшонтень эрявить башка условият, кодат тевенк эрямо таркань коряс?

– Минь васня 11 ие эринек сиведезь квартирасо. 2014 иестэ «Од семия» программанть коряс макссть тенек субсидият эрямо таркань рамамс. Нама, сынь эзть сато, секс савсь саемс кредит 20 иес. Эрьва ковсто сави пандомс 15 тёжат целковойть ды эште квартплатаськак аволь вишкине. Минь кинь лангскак а пеняцятано, эрятано ояксчисэ, стакачитнень изнятано вейсэ.

В.Юдина

 

Новости

«Маска» АРТ-кафесэнть – кулинаронь-футболонь матчт

 Мейсэ Мордовиясь карми андомо ды дивавтомо 2018 иень Футболонь коряс масторлангонь чемпионатонь инжетнень? Неть салавачитнень панжомга «Маска» АРТ-кафесь ютавты кулинаронь-футболонь матчт. Кафень инжетнень туртов тесэ пидевить-паневить чемпионатонь мастортнэнь-участницатнень раськень ярсамопельть. Сынст варчамодост мейле эряви максомс вайгель вечкевикс ярсамопеленть кисэ ды анокстамс-пурнамс 2018 иень Футболонь коряс масторлангонь чемпионатонь ваныцятнень ды эсенк туртов меню.

Подробнее ...
 
Инжетненень невтема национальной культуранть мазычинзэ

Мордовиянь Прявтось Владимир Волков неть читнестэ вастневсь «Ассоциация финно-угорских народов» общественной вейсэндявксонь председателенть, Саранск ошонь администрациянь прявтонть Пётр Тултаев, ды эрзя-мокшонь раськетнень регионъютконь общественной вейсэндявксонь исполкомонь председателенть Александр Лузгин марто.

Подробнее ...
 
Кулят Ошонь Администрациясто

Пондельникстэ, мартонь 26-це чистэ, ошонь Администрациясо ютась оперативной совещания, конань ветясь ошонь округонь прявтось Петр Тултаев. Промксось ушодовсь Кемерова ошсо чавовозтнень коряс чатьмонемань минутасто. Саранскоень мэрэсь тешкстызе: «Объекттнэнь эксплуатацияс совавтомга вешематнень эрявить полавтомс. Минек ошсояк, койсэнь, микшнемань ламо комплекстнэ кандыть зыян. Саемга, ульнинь «Киномакс-Победа» кинотеатрасо ды сеансто мейле дивазевинь, лисема таркась вейке! Бути мезеяк тееви, арседе тынсь, мезе карми! Икелень шкатнестэ тосо ульнесть совамонь-лисемань кавто таркат. Сестэ строительтне арсесть зыяндо ванстоманть коряс. Паряк эряви анокстамс законодательной инициатива, проектно-сметной документациясь ютаволь экспертиза безопасностень лувтнень коряс».

Подробнее ...
 
Шумбрачинь чи

Эйзюрковонь 3-це чистэ Саранскойсэ ютавтови ошонь Шумбрачинь чи. Ленинской ды Пролетарской райононь парктнесэ, Экопарксонть ды конькасо кирякстнема таркатнесэ (Коваленконь, Гожувской куротнесэ ды «Саранск» стадионсонть) 11.00 чассто ушодовить концерттнэ, 12.00 чассто – спортонь пелькстамотне. Ленинской районсо арсевить «Тетям, авам, мон – спортонь семия» стартось, эрьва кодат пелькстамот ды квестт.

Подробнее ...
 
Чемпионатонть шкасто транспортонть ды общественной таркатнень важодемадо

Ошонь мэрэнтень эрицятнень пельде сеедьстэ максовить кевкстемат, кода Футболонь коряс масторлангонь чемпионатонь шкастонть кармить важодеме общественной транспортось, рынкатне ды микшнемань лия таркатне.

Подробнее ...