Рубрикатор

Здравоохранение Александр БУРЛАКОВ: «ШУМБРАЧИДЕНТЬ БАШКА СЕДЕ ПИТНЕЙ АРАСЬ»
Александр БУРЛАКОВ: «ШУМБРАЧИДЕНТЬ БАШКА СЕДЕ ПИТНЕЙ АРАСЬ»

 

Лецицянь профессиясь – те ине тев, сон веши покш виень путома, эсь прянь а жалямо, оймень ваньксчи, седеймарямо. Те тевентень а сыть веёндонь ломанть, сонзэ кочкить оймесэ, седейсэ. Ашо халатсо ломантненень свалшкане явовсь башка мель. Эдь эрьвантень эйстэнек савкшны пшкалемс врачтненень лезкс мельга. Минь учотано пельдест аволь ансяк ормань лецямо, истя жо чарькодема, мелень явома.

Газетань ловныцятненень течи ёвтнетяно Республикань 4№ клинической больницянь прявт врачонть Александр Петрович Бурлаковонь ланга. Видькстаса, понгомс интервьюс те ломанентень ульнесь аволь шожда. Важодемась саи весе шканзо. Эдь Александр Петрович истя жо Саранск ошонь округонь депутатонь Советэнь депутат.

Александр Петрович Бурлаков – эрзя. Чачсь сон 1967 иень октябрянь 29-це чистэ Дубенка велесэ. Тетязо, Пётр Иванович, важодсь агрономокс, авазо, Анастасия Семёновна, – школасо тонавтыцякс. Ансяк Александр уш вишка шкасто саезь содась, сон карми улеме лецицякс. Косто сась превезэнзэ те мелесь? Видькстась, вишкинестэ сеедьстэ сэредсь, ламоксть синдекшнинзе кедензэ-пильгензэ. Секскак бажась тонавтнемс врачонь тевень салавачитнень: эсь прянть лецямс ды малавикстнэненьгак лездамс. Истя жо Пётр Ивановичень малавикс ялганзо ютксо ульнесть врачт, сынь сеедьстэ сакшность инжекс Бурлаковтненень. Александр покш кеняркс марто учось неть вастовоматнень, кунсолось важодемадост ёвтнематнень. Эрьва истямо вастовомадонть мейле сон седеяк кемекстась мельсэнзэ: карми лецицякс.

Александр Бурлаков сырнень медаль марто прядызе Дубенкань средней школанзо. Ды тейсь покш эскелькс вишка шкань меленть топавтомантень – мольсь тонавтнеме Н.П.Огарёв лемсэ МГУ-нь медицинань факультетс. Тонавтнесь покш мель марто. Омбоце курсонть прядомадо мейле Александр Бурлаковонь саизь армияв. Службанзо кандсь стратегической назначениянь ракетань войскатнесэ. Кудов велявтсь старшей сержантонь лемсэ, Советской Армиянь отличникекс. Армиядо мейле Александр Бурлаков поладызе тонавтнеманзо медицинань факультетсэнть, кочкизе хирургонь тевенть.

Врачонь тевенть Александр Петрович ушодызе 1992 иестэ Саранск ошонь 4№ больницясонть. Сисем иень перть важодсь травматологиянь ды ортопедиянь отделениясо врачокс-травматологокс. Александр Петрович нейгак кирди мельсэнзэ профессиясо васень шкань лездыцянзо-тонавтыцянзо. Те – травматологиянь отделениянь се шкань прявтось Александр Николаевич Усанов. Ней уш сон тусь эрямостонть. Пек лездась од лецицянтень Владимир Анатольевич Фадеев, сон неень шкане топавты травматологиянь отделениянь прявтонь тевтнень. А.П.Бурлаковонь валонзо коряс, сынь кемекстызь сонзэ те профессиясонть, путсть лангозонзо покш кемемат. Ды, эряви тешкстамс, эзть маняво.

Теде мейле Александр Петрович аравтозель 10№ поликлиникань, сон ашти Ялга посёлкасонть, прявт врачокс. Важодсь тосо малав кемень иеть. Теде мейле кармась топавтомо «Саранский» санаториянь генеральной директоронь – прявт врачонь тевтнень. 2015 иень декабрянь 3-це чистэ Александр Петрович Бурлаков ладязь Республикань 4№ клинической больницянь прявт врачокс.

– Александр Петрович, 4№ больницянь прявтонь тевтнес тынь кундыде аволь умок. Мезе лангсо карматадо важодеме васняяк?

– Эряви тешкстамс, Республикань 4№ больницясь покш. Сонзэ юрс истя жо совавтозь региононь Санонь куншкакурось, травмпунктось. Истя жо тесэ улить зярыя лия отделеният, конат Мордовиянь келес вейкинеть. Секскак тевтнеяк икеленек аштить пек покшт. Сехте прявтось ды эрявиксэсь – медицинань лезкс мельга тенек пшкадицятнень мелест витемась, минек лангс путозь кемематнень топавтомась.

Покш важодема тенек эряви топавтомс больницянть одкстомтоманзо коряс. Маласо шкастонть витнема хирургиянь корпусонть, тесэ пек умок арасель ремонт. Эряви одкстомтомс больницясонть улиця оборудованиянть, нолдамс тевс од технологиятнень, конат лездыть эрицятненень неень шкань вешематненень ладиця медицинань лезксэнь максомасонть. Эрявить путомс весе вийтнень, больницясонок максовиця медицинань лезксэсь мейсэяк аволь явово Россиянь икеле молиця больницятнень ды куншкакуротнень эйстэ. Нама, ламо эряви теемс сень коряс, илязт туе минек сэредицятне шабра региононь больницятнес. Тень коряс покш эскелькс теезь кардиохирургиянь отделениясонть. Неень шкане тесэ теевить стака операцият седейс. Икеле истямо орма марто ломантненень лезкс минек больницясонть эзь явово, сынь туильть лия регионов.

– 4№ больницясь истя жо ашти сы шкань врачтнень анокстамонь таркакс.

– Виде. Тесэ важодить Н.П.Огарёв лемсэ МГУ-нь Медицинань институтонь госпиталень хирургиянь, госпиталень терапиянь, акушерствань ды гинекологиянь ды зярыя лия кафедратне. Тесэ студенттнэ пурныть тенст эрявикс содамочитнень практикатнень вельде. Сынь якить операциятнес. Учёнойтнень ды практиктнень вейсэнь важодемась максы покш лезкс ды содамочить.

Истя жо вейсэнь важодема ветятано Саранскоень медицинань колледженть марто.

– Александр Петрович, тынк койсэ, кодамокс эряви улемс алкуксонь лецицянтень?

– Васняяк, лецицясь улезэ тевензэ вадрясто содыцякс, алкуксонь специалистэкс. Ломанекс покш буквасто. Врачось улезэ тензэ пшкадицятнень кисэ мелявтыцякс, маштозо чарькодемс лия ломантнень стакачист. Эдь эрьва ломанесь сы лецицянтень лезкс мельга, секскак миненек эряви путомс эсь прянок пшкадицянть таркас ды муемс эрявикс решениянть. Шумбрачиденть башка седе питней ды эрявикс арась. Врачонь профессиясь а вечки ильведевкст: эдь лецицянть кедьсэ аволь ансяк ломаненть шумбрачизэ, сонзэ эрямозо.

Минек ломантнень обуцяст истямо, медицинань лезкс мельга пшкадить ансяк сестэ, зярдо ормась педи эйзэст. А ули одокс, бути ёвтаса, орманть седе шожда а нолдамс, ков седе стака – лецямс. Стака кармавтомс ломантнень теемс профилактика. Сеедьстэ эрси истяяк, ломантне сынсь эстест путыть диагноз ды ушодыть эсест пряст лецямо. Те пек а виде. Бути ломанесь мари прянзо ормалгадозь, эряви куроксто пшкадемс медицинань лезкс мельга, а нолдамс орманть.

– Александр Петрович, тынь истя жо Саранск ошонь округонь депутатонь Советэнь депутат. Зярдо ушодынк депутатонь важодеманть?

– Васенцеде депутатокс кочкавинь, зярдо важодинь 10№ поликлиникасо. Сестэ кочкакшнымизь Октябрьской райононь Советэнь депутатокс. Теде мейле кочкимизь Саранск ошонь округонь депутатонь Советэнь депутатокс. Тосо неть тевтнень топавтан омбоце тердема.

Саранск ошонь депутатонь Советс кочкавинь 5№ студентэнь округонть пельде, сон ашти Октябрьской районсонть. Ёвтаса, округось аволь шожда, тей совавтозь кода ошось, истя жо маласо аштиця велетне. Кочкицятне пшкалить тенек эрьва кодамо энялдома марто. Седе ламотне эйстэст сюлмавозь ЖКХ-нть, китнень витнеманть, куротнень валдомтомань кевкстематнень марто.

Те иесь минек туртов аволь шожда. Депутатонь шкась прядовома лангсо, кармить од кочкамот, ды ней кирдема вал кочкицятнень икеле, невтема топавтозенть. Ёвтаса, минек округсонть ламо теезь эрицятнень пшкадемаст топавтомга. Ломантне тень неить ды максыть питне минек важодемантень. Нама, весе кевкстематнень ванкшномс ды эрьва пшкадицянтень лездамс кодаяк а лиси: бюджетстэ явозь ярмактне весемес а сатыть. Ломантне тень чарькодить, васняяк топавттано сетнень, кона кевкстематнень а мереви кадомс кувать шкас.

– Александр Петрович, инескеть, ёвтнеде семиянк ланга.

– Ним – Регина Борисовна, сонзэ кавто высшей образованиянзо: педагогонь ды экономистэнь. Зярыя иеть важодсь школасо тонавтыцякс, ней роботы банксо экономистэкс. Минек кавто цёранок. Покшось – Пётр, – строитель, ули эсензэ семиязо. Омбоце цёрам – Андрей, тонавтни 11-це классо. Иесь сонзэ туртов стака – эрявить максомс ЕГЭ-ть. Арси молеме тонавтнеме юристэкс. Вана истямо семиянок. Мон а мелявтан сень кисэ, мекс цёран эзизь поладо лецицянь тевенть. Эрьванть эсензэ вановтонзо эрямонть лангс, эсензэ мелензэ-арсеманзо. Минек семиясо арась истямо кой, кармавтомс малавиксэнть мезеяк теемс эсензэ мелензэ апак лово, покордазь. Эрьвась кочки истямо тев, конантень тердьсы седеезэ, конантень пры оймезэ.

 

– Сюкпря кортамонть кисэ, Александр Петрович.

Т.Аксенова

 

Новости

Чувашиясто – казне марто

 

Мартонь 24-це чистэ И.Я.Яковлев лемсэ Чувашиянь государственной педагогической университетсэ ютась этнопедагогикань ды поликультурной образованиянь коряс студентэнь Весероссиянь олимпиада. Сон алтавсь РАО-нь академикенть Г.Н.Волковонь 90 иетненень.

Подробнее ...
 
Од ломанень ассамблея

 

Мордовия Республикасо теезь «Молодежная Ассамблея народов России «МЫ – РОССИЯНЕ» Общероссийской общественной движениянь региональной отделения. Республикасонть од ломанень движениянь теемась карми общероссийской гражданской идентичностень формированиянть коряс ушодкстнэнень, раськетнень ютксо ояксчинь кемекстамонтень ды  межкультурной вейсэнь важодеманть келейгавтомантень лездамонь площадкакс.

Подробнее ...
 
Диктантось – эрявикс тев

Те иень апрелень 8-це чистэ Саранскойсэ малав 400 ломантне кармить «Тотальной диктантонь» участникекс. Мероприятиянь ютавтомань меленть шнызе Мордовиянь Прявтось Владимир Волков.

Подробнее ...
 
Сценанть лангсо Ицялбуесь...

 

Неть оймсема читнестэ Республикань Культурань Кудосо ютасть «Шумбрат, Мордовия!» народной творчествань фестивалень меельце концерттнэ. Кадовсь ансяк Гала-концертэсь, кона карми декабрянь 11-це чистэ. Сценанть лангс лиснесть Ицялбуень, Ковылкина ёнксонь ды Саранск ошонь округонь артисттнэ.

Подробнее ...
 
Мамаева омбоце

 

Ноябрянь васенце пельксстэнть евтазельть Россиянь республикатнень государственной кельтнень коряс школасо тонавтницянь ды студентэнь Весероссиянь васенце олимпиадань итогтне.

Подробнее ...