Кода куроксто юты шкась. Ламот юткстонок «Эрзянь правда» газетань сёрмадыцятне ней уш чуросто ледстнить, кода икеле стакасто нолдавсь газетась. Коллективеськак ульнесь аволь вейке таркасо, веенстнэ редакциясо, лиятне типографиясо. Ансяк шкань ютазь чарькодевсь, сехте покш канстось сестэ пракшнось корректортнэнь лангс, сынь типографиясо ульнесть гранкань (газетань сы шкань номерэнь текстэнь) ловныцякс-витницякс. Виде, се шкане ульнесть згилицяткак, келя, чинь ютазь сакшныть  корректортнэ ды подчитчиктне важодеме. Нама, сынсь ансяк неть тевень топавтыцятне содасть, кодамо ответственной тев лангозост путозь. Эдь, бути сынь нолдыть кодамояк ильведевкс, ды Паз илязо мере сонзэ а редясызь сы номерэнь коряс дежурнойтне, васняяк чумондсызь сынст корректортнэнь. Ды зярс а несызь свежа газетанть, седеест сынст, а ойми.

А зяро  газетань истят номерт ульнесть «Эрзянь правда» газетань ответственной секретаренть Татьяна Петровна Гороховань эрямосо, а лововитькак. Бути сынст вейс пурнамс ды ацамс, сынь аволь весть сатыть Кочкурбуень Пакся Тавланть видьс ды одов (сонзэ чачома велензэ видьс).

Октябрянь 15-це чистэ РФ-нь Федеральной Собраниянь Федерациянь Советэнь членэсь, сенаторось Николай Владимирович Петрушкин тешкстызе юбилеензэ. Николай Владимирович кеветее иеде ламо ульнесь Мордовиянь Финансонь министракс, кото иеть важодсь Мордовия Республикань Правительствань Председателень васенце полавтыцякс. Пек ламо тейсь Мордовиянть туртов ды нейгак полады лездамс тиринь республикантень, сеедьстэ вастневи кода сыре ломантнень, истя одтнэнь марто. Николай Владимирович – МР-нь Кадетэнь движениянь попечителень советэнь председатель, ламо тевензэ лангс апак вано, свал муи шка евтамс од ломантненень превспутомат тиринь ёнксонть вечкемга, патриотизмань лувсо прянь ветямга, шумбракс ды виевекс улемга.

2014 иень июлень 31-це чистэ эрзянь содавикс критикентень, литературоведэнтень Василий Владимирович Горбуновнень чачома чистэнзэ саезь топодсть 100 иеть. Те покшчинть кувалма МР-нь Правительстванть юрсо Гуманитарной наукань научно-исследовательской институтсо ютась Учёной советэнь промкс. Тесэ ледстнесть филологиянь наукань докторонть, профессоронть, СССР-нь Писателень союзонь членэнть В.В.Горбуновонь валдо лемензэ. Институтсонть учёноесь ламо иень перть важодсь ды ульнесь тесэ прявтокс.
Вастовоманть ушодызе НИИ-нь прявтось, профессорось В.А.Юрчёнков. Сон тешкстызе, келя, теевсь паро коекс эрьва кемень иень ютазь вана истя пурнавомс ды ледстнемс В.В.Горбуновонь. Сонзэ валонзо поладынзе литературоведэсь, критикесь, педагогось Генрих Иванович Горбунов, учёноенть малавиксэзэ. Лелядонзо ёвтнесь ламо ды домкасто.

Неть читнестэ минек редакцияв совсесь инже. Сусанна Дегоян энялдсь кедьстэнек муемс тензэ рузонь-эрзянь валкс. Мезекс армянонь авантень валксось? Теевинек мартонзо содавиксэкс.
Сусанна Цатуровна чачсь Армениянь Баязетовской райононь Сарухан покш велесэ. Сынст семиясо трясть-кастсть 7 эйкакшт. Тетязо – Ине Отечественной войнань участник, сась фронтсто омбоце группань инвалидэкс. Покштязо эсензэ ёнкссо панжтнесь школат, кудова яказь, пурнась тов тонавтнеме эйкакшт. Сонсь тонавтсь эйсэст ловномо ды сёрмадомо. Сусанна школанзо прядомадо мейле тонавтнесь Ереванонь педагогической училищасо. Мейле комсь иень перть важодсь начальной классонь тонавтыцякс. Те тевесь ульнесь сонензэ оймень коряс.
Аванть мирдезэ важодсь Россиясо, минек республикасо. Шкань ютазь, сон тердизе нинть самс варштамо Мордовияв. Ульнесь мелезэ ускомс семиянзо эрямо тей.