Рубрикатор

Cобытия недели Идить зыянс понгозтнень
Идить зыянс понгозтнень

Толонь мадстицянь тевесь – масторлангонь келес сехте стакатнестэ вейкесь. Эряви маштомс куроксто куземс сэрей кузтематнева, оршамс противогазонть, ютамс тусто качамонть пачк, эрязасто кирнявтнемс, кепедемс сталмот... Сехте прявтось жо – эрьва минутастонть улемс анококс лездамс зыянс понгозтненень, идемс ломанень эрямотнень.

Мордовиянь прявт ошсо, Саранскойсэ, ули истямо кудораське, кить пожарной охранасонть служить уш малав кавто пингеть. Логиновтнень – Митяевтнень – Киселёвтнень кудораськень историясь лиятнень ёнов а молиця. Семиясонть кавксо ломанть алтызь эсь эрямост вейке тевентень – толонь мадстемантень. Династиянь ушодыцясь – Александр Михайлович Логинов. Сон толонь мадстемань системасонть важодсь комсьветее иеть! Ютынзе важодемань весе кузтематнень, рядовой сотрудникстэ пачкодсь подполковникс. Кода видькстась, од шкасто эзь арсекшнеяк те тевденть.




Мон чачинь-касынь Рузаевкасо. Школань прядомадо мейле, кода алкуксонь цёра, молинь служамо армияв. Те ульнесь васоло 1970 иестэ. Службанть кандынь тиринь ёнксонть эйстэ ниле тёжат вайгельпеде ве ёно – Кемеровань областьсэ, – ёвтни Александр Михайлович. – Тосо варчинь виень радиотелеграфистэкс, содамочим-ёрокчим эзть сато, эзия юта кочкамонть. Те монь истя ацирьгавтымим, потсон тол кирвазсь: арази а тонавтнеса те тевенть?! Ды службанть прядовомсто карминь сехте вадря радиотелеграфисттнэнь эйстэ вейкекс. Шождасто топавтынь куш кодат упражненият, аволь весть якинь радиоспортонь коряс пелькстамотнес, конатнесэ минек командась саекшнесь васенце таркат.

Кудов велявтомадо мейле Александр Михайлович васняяк важодсь Саранскоень электроламповой заводсо токарень тонавтницякс, мейле – Рузаевкасо чугункань кинь депосо слесарекс. Зярыя шкань ютазь Александр Михайлович ютась важодеме машинань станцияс, конась истя жо сюлмазель чугункань кинть марто. Тосо од цёранть кучизь тонавтнеме Пермь ошов, машинистэкс.

– Монень истя пек вечкевсь тонавтнемась, секскак, кудов велявтомадо мейле, максынь документэнь М.Е.Евсевьев лемсэ МГПИ-нь физической воспитаниянь факультетс. Истя, комсьветее иесэ карминь васенце курсонь студентэкс, – ледстни Александр Михайлович. – Тонавтнемась ютась шождасто, тосо покш мель явинь спортонтень: налксинь волейболсо, футболсо, сайнимизь эрьва кодамо уровнянь пелькстамотнес. Ды вана меельце экзаментнэнь максомадост мейле кучимизь важодеме Саранск ошонь 24-це школав. Тонавтыцякс важодинь ансяк ие, тосто туинь пожарной охранас, косо важодинь пенсияс лисемс.

Эряви ёвтамс, институтсо Александр Михайлович вастызе уцясканзо – Мария Алексеевнань, сон истя жо тонавтнесь физической воспитаниянь факультетсэнть. Ды уш колмоце курссо од ломантне урьвакстсть-венчасть, институтонть прядомс чачсь васенце цёрынькаст – Василий.

– Ним патязо важодсь пожарной охранасо, самай сон тердимимгак важодеме толонь мадстицякс, – видькстась А.М. Логинов. – Карминь важодеме Саранск ошонь механической заводонь 4№ пожарной частьсэнть. Те ульнесь 1981 иесь. Васняяк ладимизь дымозащитной службань старшей мастерэкс, мейле – караулонь прявтокс, шкань ютазь – отдельной постонь прявтокс, мейле важодинь спортонь ды службань коряс управлениясонть.

Тешкстасынек, Александр Михайлович пенсияс лиссь 2004 иестэ пожарной охранань управлениянь подполковникекс.

– Васенце пожарось, конань мадстеме мон якинь, лиссь механической заводсонть, кирвазекшнесь склад. Сестэ тосо кавто важодицят маштовсть. Нейгак кирдеви мельсэнь: перькан тусто качамо, мезеяк а неяви, эртевинь мезес-бути чевтес, кедьсэ токия – ломань. Нама, куроксто таргинек толстонть, ансяк вана уш эзь идеве, лепиясь качамонтень, – ледстни важодемадонзо А.М.Логинов. – Важодемань васенце иетнестэ од ульнинь, опытэсь эзь сатно, ламо мезе эзинь чарькоде. Ледстнян: гайневтсть пожарной частентень – кирвазсь комбикоромонь заводось. Мон сыргинь толонь мадстеме шождасто оршазь: чова плащсэ, пильгесэнь – кизэнь карсемапельть. А тосо пожарось пек покшоль, веньберть мадстинек. Зярдо толось палсь, пек псиль, мадстемадонзо мейле а ёвтавияк кода кельминь, сорнан, пеень вейке-вейс а токавить. Седе мейле истя оршазь толонь мадстеме эзинь сыргсе.

Александр Михайлович ламо иеть важодсь личной составонть физической анокстамонзо коряс. Сотрудниктне яксесть пелькстамотнес спортонь ламот видтнэнь коряс: волейболонь, футболонь, столь лангсо теннисэнь, укшномань, леднемань ды истя седе тов.

– Пожарной охранасо важодемстэ стамбарнэстэ ветия эсень мельга весе кудораськенть. Ним, Мария Алексеевна, пожарной частьсэ важодсь колоньгемень иеде ламо, сон топавтсь старшей диспетчерэнь тевтнень. Спортсменка, ламоксть яксесь эрьва кодамо пелькстамотнес ды свал сайнесь казнень таркат, – ёвтни А.М.Логинов. – Пожарной охранасо истя жо важодить лелянок, ялаксонок, эсенек ды сынст эйкакшост, ней уш нуцьканокак кундыть те тевентень.

Семиянь тевенть истя жо поладызе Василий, Логиновтнень покш цёраст. Эйкакшокс улемстэ, сон аволь весть яксесь тетянзо важодема таркав. Ды истямо сельмень сявадома марто вансь толонь мадстемань покш машинатнень лангс!

– Оштё вишка эйкакшокс чарькодинь, кодамо стака ды пек эрявикс тев топавты тетям, – видькстась Василий.

Василий Логиновонь ульнесь покш мелезэ тонавтнемс Ивановань пожарно-спасательной училищасонть, ансяк бажамотне топавтовсть аволь сеске, конкурсось пек виевель. Уцясканть терявтнизе колмоксть, ды вана 1999 иестэ сон кармась студентэкс. Теде мейле заочна прядызе Ивановань МЧС-нь Пожарно-спасательной академиянть. 

Василий Логинов пожарной охранас сась важодеме 2002 иестэ, караулонь прявтокс, важодсь «Резинотехника» заводонь 27-це частьсэнть, мейле – Саранск ошонь Пролетарской райононь пожардо ванстомань коряс 3-це частьсэнть. 2004 иестэ Василий Логиновонь ютавтызь пожарной охранань управленияс, сон кармась важодеме тетянзо, Александр Михайловичень, кабинетсэ. Василий Логинов подполковникесь – Мордовия Республикава МЧС-нь Главной Управлениянь организационной службань, толонь мадстемань-идемань вийтнень анокстамонь отделэнь прявт специалист.

– Монь койсэ, важодеманок аволь стака, прявтось – сон кандозо мелень витема, улезэ вечкевиксэкс, – корты Василий. – Нейгак кирдян мельсэнь васенце пожаронть. Кирвазсь квартира. Кудазоравась пидесь ярсамопель ды тусь шабрантень сал мельга, нупальсэнть кадызе важодиця телевизоронть. Вете минутань ютазь лиссь замыкания, ды телевизорось кирвазсь. Шабратне куроксто гайневтсть «01» службантень. Вадря, квартирась васенце этажсоль, порксынек суликанть ды совинек вальмава. Кирваземась аволь покшоль, ансяк колмо нупалень квартирась весе раужкадсь качамонть эйстэ. Сестэ толстонть таргинек киска.

Василий ледстни, савкшнось улемс кавто покш пожарсо. Васенцесь, зярдо палсь Рузаевкань элеваторось. Кирваземась пек покшоль, ве ёндо варштазь, тандадат. Недлянь ютазь кирвазекшнесь «Резинотехника» заводонь вейке цехесь.

Сергей, Логиновтнень омбоце цёраст, истя жо важоди пожарной охранасо, сон – вольнонаёмной диспетчер. Ульнесь покш мелезэ тонавтнемс МЧС-нь академиясо, ансяк шумбрачизэ лавшо, вишкинестэ томбавкшнось. 2018 иестэ Сергей Логинов яволявтозель пожарной охранань сехте вадря диспетчерэкс.

Покш кудораськентень стака сеедьстэ пурнавкшномс вейсэ, эдь весе сынь кандыть службаст башка подразделениятнесэ, эрьванть эсензэ важодемань графикезэ. Династиянть стажось эрьва ие яла ламолгавтови, сон малавгали кавтосядтнэс. Ды, мезесь кенярдовты, сонзэ яла поладыть. Весе сынь топавтыть покш тев – идить зыянс понгозтнень!

Татьяна Аксенова


30.05.2019

 

 

Новости

Эрицятнень сёрмадстомантень анокстамотне ушодовсть



Малав ие кадовсь эрицятнень Весероссиянь сёрмадстоманть самс. Аволь умок МР-ва Федеральной службань государственной статистикань территориальной органсонть ютавтовсь вастовома, конанть шкасто видео-конференциянь лувсо ветявсь кортамо Росстатонь прявтонть Павел Малков марто. Вановсть сёрмадстомань шкатне ды невтевсь официальной тешксэсь.


Подробнее ...
 
В Мордовии собрано более 700 подписей на запрет «наливаек»
 
В Республике Мордовия завершились мероприятия по сбору информации и
подписей в поддержку инициативы об ограничении работы питейных заведений,
расположенных на первых этажах многоквартирных домов и придомовых
территориях в Республике Мордовия.

Подробнее ...
 
Награждение победителей акции «Здоровое питание - активное долголетие»
 
  Уже сегодня, 17 октября,  34 ученика из Мордовии отправятся на 12-ю  смену  
Международного детского центра «Артек». Победителей акции, их наставников и кураторов 
поприветствовал  секретарь Регионального отделения «Единой России» Владимир
Чибиркин. Он  подчеркнул, что пропаганда  здорового образа жизни и оздоровление нации 
являются одними из ведущих направлений деятельности «Единой России», акция 
реализуется в рамках партийного  проекта «Здоровое будущее».  Это дает свои плоды - с
каждым годом в нашей стране увеличивается  число неравнодушных людей,  которые 
начинают сами вести здоровый образ жизни и ведут за собой других.

Подробнее ...
 
В республике успешно реализуются социально значимые проекты первичных отделений «Единой России»
 
Первичные отделения поселка  Ромоданово и поселка  Зубова Поляна   успешно
реализуют на практике  свои социально  значимые проекты, удостоенные грантовой
поддержки по итогам конкурса проектов первичных отделений, инициированного 
«Единой Россией»
  Цель проекта  «Мы рядом», реализуемого в Ромоданове - помощь пожилым людям и 
инвалидам, имеющим  заболевания опорно-двигательного  аппарата.   Прокат технических 
средств реабилитации  организован на бесплатной основе для граждан пожилого возраста, не 
имеющих группы инвалидности, но,  в силу возрастных изменений или перенесенных 
заболеваний, травм, потерявших способность свободно передвигаться. В июле этого года в 
Ромодановском  местном отделении партии прошла  презентация проекта.  Открывая
презентацию,  секретарь  Ромодановского местного отделения Партии  Наталья Хомякова  
отметила, что  основная  задача проекта   помочь людям в трудный для них период 
реабилитации.


Подробнее ...
 
Баталина: Предложение Минтруда о новых правилах выплаты пособий по уходу за ребёнком создаст проблемы родителям
 
Предложение Минтруда, согласно которому претендовать на выплату 
пособия по уходу за ребенком до полутора лет может только тот, кто 
фактически ухаживает за ребенком, избыточно и может создать лишние 
проблемы родителям. Не исключено, что Фонд социального страхования при 
назначении будет требовать документально подтвердить, что именно 
заявитель (мать или отец ребенка) фактически за ним ухаживает. Об этом 
заявила первый заместитель секретаря Генерального совета «Единой России»
Ольга Баталина.
Подробнее ...