Рубрикатор

Cобытия недели Пресс-конференция МР-ва Внутренней тевень министранть марто
Пресс-конференция МР-ва Внутренней тевень министранть марто

Неть читнестэ республикань журналисттнэнь марто вастовкшнось МР-ва Внутренней тевень министрась Юрий Васильевич Арсентьев. Ведомствань прявтонть те омбоце пресс-конференциязо, васенценть ютавтызе вете иеде икеле, зярдо ансяк аравтозель МР-ва Внутренней тевень министрань таркантень. Ю.В.Арсентьев кортамонть ушодызе Мордовия Республикасо оперативной обстановкантень питненть максомасто ды ёвтынзе те иень кемень ковтнень перть топавтозь тевтнень. Тешкстызе, тедеде удалась ванстомс республикасонть криминальной ситуациянть мельга ваноманть. Ютазь иенть коряс редязь седе аламо зыянов тевть. Республикасонть сэтьмечинь невтевкстнэнь коряс Мордовиясь сови Равчирень васенце регионтнэнь юткс ды васенцетнень ютксо весе Россиянть келес.

– Седе аламо редязь маштомат, тейтерь-авань нарьгамот, саламот, ярмаконь вешемат, аволь алкуксонь ярмаконь тевс нолдамот, оружия марто зыянов тевть. Весе неть невтевкстнэ кортыть минек важодеманть виевгавтомадо. Эрьва ёнксонть коряс саезь изнявкстнэде эряви ёвтнемс пек куватьс, те покштояк покш важодема, – тешкстызе Ю.В.Арсентьев. – Правань ванстомань лия органтнэнь ды властенть марто кемекстазь тевтнень вельде удалась киртямс ушосо топавтовиця зыянов тевтнень. Ламосо тень коряс лездась «Сэтьме ош» системась. Сонзэ лезэвчизэ редявикс.
МР-ва Внутренней тевень министрась ёвтызе, покш важодема топавтови преступлениятнень панжомаст коряс, истя жо икеле иенсетненьгак. Тешкстызе, тень коряс важодемась виевгавтови.
– Виде, кадовить апак панжо тевть, ломантненень те, нама, а вечкеви, эдь колавить сынст праваст. Монень тень коряс эрси визькс. Зярдо ютавтан эрицятнень марто вастовомат, ломантне пачтить тень: а монь ули-паронь саламось апак панжо. Мон вешан ломантнень кедьстэ нолдамс чумом, – видькстась Юрий Васильевич.
Кевкстеманть лангс: мезе удалась теемс вете иетнень перть, зярс Ю.В.Арсентьев топавты МР-ва Внутренней тевень министрань тевтнень, каршо валось истямоль:
– Весе коллективенть виев важодеманть вельде республиканть келес апак нолда террористической актт, экстремистэнь акцият, общественной сэтьмечинь покш коламот. Бути 2014 иестэ Мордовия Республикава МВД-сь Россиянь Внутренней тевень органтнэнь региононь рейтингсэнть ульнесь пек васоло, течи жо саи 28-це тарка. Весе неть невтевкстнэ кандыть лезэ эрицятненень. Нама, улить эштё пшти кевкстемат, конатнень лангсо эряви важодемс. Неть: наркопреступлениятне, экономикань ёнкссо ды коррупциянь зыянов тевтне ды истя седе тов.
Башка кортамо ветявсь «Сэтьме ош» системанть коряс. Ю.В.Арсентьев ёвтызе, те минек эрямонть а явовиця пельксэзэ. Камерат путозь ошонь куротнесэ ды площадтнесэ, федеральной трассатнесэ ды райононь китнесэ. Тешкстазель, те покш важодеманть ансяк ушодксозо.
– Путозь камератнень лезэвчист пек покш, правань коламотнень ды преступлениятнень профилактикастонть саезь эрьва кодамо ёнксонь зыянов тевтнень панжоманть видьс. Пек покш лезэвчист ульнесь Футболонь коряс масторлангонь чемпионатонь матчтнень Саранскойсэ ютавтоманть шкасто, – ёвтнесь Ю.В.Арсентьев. – Истя, матчтнень ютавтома читнестэ полицияв яволявтома сёрмадсь Перунь эрицясь. Пачтясь, салызь документ ды ярмак марто вишка юдминензэ. Минь абунгадынек: кода салызь?! Ошонь весе куротне-яннэтне ульнесть вановтонок ало. Камератнень вельде ваннынек аванть ютамо кинзэ, пек вадрясто неявсь: молемстэ юдминесь прась ды сонзэ кепедизе мельганзо ютыця эсест масторонь эрицясь. Ёмавксось муезель.
Ёвтазель, «Сэтьме ош» системанть лувсо путозь камератне пек лездыть ламот зыянов тевтнень коряс: килангсо лисезь тамашатнесэ, автомашинатнень саламотнень редямсто ды истя седе тов. Ёвтазель, ков седе ламо камерат путовить ошонь куротнес ды целанек республиканть келес, тов седе сэтьместэ кармить эрямо ломантне.
Министрантень максозельть кевкстемат, конат сюлмавозь уголовной тевтнень ванкшномаст, киланга ардомсто сэтьмечинь ванстоманть, коррупциянть каршо бороцямонть марто. Кортамонть лувсо тешкстазель, меельце ковтнестэ республикань китнень лангсо лиссть ламо зыянов тевть, конатнесэ маштовсть ломанть. Тень коряс Юрий Васильевич мерсь:
– Меельце иетнестэ республикань китнень лангсо лисезь зыянов тевтнесэ маштовозтне киртявсть. Минь свалшкане те кевкстемантень явтано сатышка мель, те ёнкссонть топавтови профилактикань виев тевдеема. Тедеде лисезь эрьва зыянов тевесь ваннозь башка. Мейсэ тувталтнэ: кись вадря, коське, виде, водителесь лиси каршо молиця полосантень ды эртеви каршонзо ардыця машинантень. Мезе сонзэ кармавтызе истя тееме? Эзизе лово ардомань виевчинть, эзизе нее каршонзо ардыця машинанть. Кие соды мезе. Лиясто машинатне прыть кюветс. Килангонь тамашатнень тувталось – ардомань правилатнень а топавтомась. Китнень лангсо улить разметкат, эряви ванстомс дистанциянть. Вишкинестэ саезь тонавтнемат киланга ардомань правилатнень ды а колсема сынст.
Кортамось ветявсь аволь ансяк ведомстванть тевдеемадонзо, истя жо министранть эрямодонзо.
Минь кевкстеманть максынек тиринь кельсэ:
– Юрий Васильевич, эрзякс кортатадо? Келенть эзинк стувто?
– Кортан, ансяк аволь ваньксстэ, ламот валтнэ стувтовсть. Мон эдь 37 иеть эринь ве ёно. Ним истя жо эрзява. Ды минь эсь юткованок кудосо лиясто кортатано эрзякс. Цёрам мондень парсте содасы эрзянь келенть, кортавксонть лади лия лувсо, литературной кельсэнть. Зярдо сонензэ ульнесть ниле эли вете иеть, мон вейке ды пель ковс усксия сонзэ Баеньбуев. Зярдо сась велев, ве вал эзь сода эрзякс, зярдо жо сынь кисэнзэ – эрзякс кортась монденьгак парсте! Нейгак келенть эзизе стувто ды шождасто корты.
– Тиринь велев пачколетядо?
– Якан чачома велев, ансяк пек чуросто. Авам, сонензэ ней 83 иеть, яла корты: «Юра, тон Сахалинстэ сакшнылить седе сеедьстэ». А мезть сёпомс, зярдо сан малавикстнэнь варштамо, монь вастомо пурнавить цела делегацият, энялдыть лездамс эрьва кодамо тевтнесэ. Ламот покордавить. Кортан яла, вана лисян пенсияв ды карман сеедьстэ сакшномо инжекс.
Тиринь ёнксом мон вечкса ды пек тошнакалинь кисэнзэ, зярдо эринь Сахалинсэ. А чарькодян сеть ломантнень, конат кортыть: мон а ледстнян чачома ёнксом, монень сельведьс жальть неть ломантне. Кирдян каштанчи сень кувалма – чачинь Мордовиясо.
Пресс-конференциянть лувсо тешкстазель, те иень декабрясто топодить вете иеть, кода Ю.В.Арсентьев топавты Внутренней тевень министрань тевтнень. Журналисттнэ кевкстсть: «Тынь содатадо, кода уцяскась ладяви седе тов? Косо карматадо служамо?»
– Те сехте шожда кевкстемась, – пейдезевсь Ю.В.Арсентьев. – Секс мекс мон мезеяк а содан. Ламот меельце шкастонть макснить тень те кевкстеманть. Мон толкован, Внутренней тевень министерствань системасонть истямо арась – вете, колмо, кавто иеть, чинь ютазь сыть ды яволявтыть: «Юрий Васильевич, олякстомтык должностенть». Те ашти ламот тевтнень эйстэ.
Видькстан, мон виздян кевкстемс Россиянь Внутренней тевень министранть Владимир Александрович Колокольцевень, зяро сон максы тень важодемс. Зярс пшти кевкстемат минек региононтень арасть, тевтне молить сэтьместэ. А карман сёпомо, республикастонть туемс мелем арась. Ули покш мелем кадовомс теске ды эрямс вечкевикс Мордовиясо. Ансяк кода лиси эрямосонть, вансынек. Бути кармить ловомо, тиринь региононть лезэс мон теинь весементь, ды мерить мель служамс лия таркасо, карман арсеме тень лангсо.
Т.Аксенова


20.11.2018

 

Новости

Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.

 
Ардоманть кис питнетне яла касыть

Саранск ошонь общественной транспортонь частной предприятиятне бажить кепедемс ардоманть кис питнетнень декабрянь 25-це чистэ саезь. Теде сынь пачтясть ошонь администрацияв. 2, 5, 10, 15, 16, 18, 19, 21, 22, 24, 25, 28, 32, 35, 36, 37, 38, 40, 41, 44 ды 45№ маршурттнэсэ питнесь карми 25 целковойть (ней – 20). 23, 34 ды 66№ – 23 целковойть. Мэриясо пачтясть: неень шкане Саранскойсэ важодить кавто ООО-т («Сигнал С» ды «ПАТП»), конат усксить ломанть, истя жо индивидуальной кавксо предпринимательть. Частной усксицятнеде 35%.

Подробнее ...
 
Важоди Якшаматянь почта

Мордовиянь Главпочтамтсо декабрянть прядовомс карми важодеме Якшаматянь Почтась. Сёрмадомс ды нолдамс почтань ящикс телень прявт волшебникентень пачтямо мереви эрьвантень, иетнень лангс апак вано.

Подробнее ...
 
Партийцы ждут от Съезда конструктивных дискуссий

  - Именно в первый день  XVIII  Съезда Партии, который пройдет  7-8 декабря в Москве, состоится работа трех дискуссионных площадок «Обновление», «Открытость», «Партия и выборы», на которых мы сможем обсудить свои предложения и принять  решения, действительно позволяющие   наладить более эффективную и открытую работу партийных структур», -  сказал секретарь  Регионального отделения  «Единой России», Председатель Государственного Собрания республики Владимир Чибиркин.

Подробнее ...
 
В рамках приема граждан Председатель ЕР поддержал социально значимые инициативы

Ряд социально значимых поручений дал Председатель «Единой России», премьер-министр Дмитрий Медведев в ответ на обращения, поступившие в рамках прима граждан, который прошел 30 ноября в Центральной общественной приемной Партии.

Подробнее ...