Рубрикатор

Cобытия недели Ю.П.Лияскин: «Участковойтнень тевсэ прявтось – шкастонзо лездамс ломантненень»
Ю.П.Лияскин: «Участковойтнень тевсэ прявтось – шкастонзо лездамс ломантненень»

Ноябрянь 17-це чистэ Россиянь Внутренней тевень министерствань системасонть Полициянь участковой уполномоченноень службантень топодсть 95 иеть. Эрьвась, кие кочкизе те тевенть, чарькоди, кодамо покш ответственность путови сонзэ лавтовонзо лангс. Эдь полициянь участковой уполномоченнойтнень эрьва чинь тевест ашти кеме юрокс, конань лангс нежедить внутренней тевень органонь весе подразделениятне.
Участковойтнень эрьва чинь важодемань башка ёнкстнэде газетань ловныцятненень ёвтнесь МР-ва МВД-нь полициянь участковой уполномоченноень, кемгавксово иеде седе вишкинетнень тевест коряс ды административной надзоронь подразделениянь прявтось, полициянь полковникесь Ю.П. Лияскин.

 

– Юрий Петрович, инескеть, ёвтнеде минек ловныцятненень, косо чачиде-касыде? Мекс эрямонь тевекс кочкинк полициясо важодеманть?
– Мон чачинь 1967 иень чадыковонь 1-це чистэ Кочкурбуень Вирь ало Тавла эрзянь мазый велесэ. Семиянок покшоль, тетям-авам чачтсть-кастсть вете эйкакшт. Эряви ёвтамс, тетям, Пётр Алексеевич, ульнесь Внутренней тевень органонь важодицякс. Кавонест лелян истя жо кочкизь полициясо важодеманть, неень шкане сынь Мордовия Республикава МВД-нь ветерант.
Школанть прядомадо мейле молинь тонавтнеме Саранскоень электронной приборонь техникумов. Мейле, 1986-1988 иетнестэ, ульнинь армиясо, кандынь служба пограничной войскатнесэ. Кудов велявтомадо мейле зярыя иеть важодинь специальностенть коряс, конантень тонавтнинь техникумсо. Эйкакшпорасто саезь минек тонавтымизь певтеме вечкемс тиринь масторонть, ванстомс чачома ёнксонть. Эрямонть лангс неть вановтне седеяк кемекставсть армиясо служамсто – те кармась башка тердемакс: эрямс ды служамс тиринь масторонть лезэс. Секскак заочна карминь тонавтнеме Н.П. Огарёв лемсэ МГУ-нь юридической факультетсэ. Ды 1990 иестэ сынь важодеме Саранск ошонь Октябрьской райононь милицияв, карминь топавтомо участковой уполномоченноень тевенть. Ульнесь покш мелем ды бажамом важодемс те ёнкссонть, кандомс лезэ тиринь ёнксонтень ды эрицятненень. Эряви ёвтамс, внутренней тевень органтнэсэ важодемась лиятнень ёнов а молиця, ды шкатнеяк сестэ ульнесть а шождат. Важодемань васенце иетнестэ пек лездасть тень мартон важодицятне – превс путыцятне. Башка тешкстаса Сергей Иванович Бикаевень, сон ульнесь старшей участковоекс, сонензэ пикетс важодеме сыньгак. Самай Сергей Иванович тонавтымим милициянь службань ушодкстнэнень. Истя жо лездасть тень райотделэнь прявттнэ: Евстифеев Владимир Александрович, Качанов Александр Филиппович. Сынст лезксэст вельде пурныя профессиональной ёрокчинть ды тонадынь важодеме.
1996 иестэ Юрий Петровичень аравтызь Саранск ошонь Октябрьской районганть милициянь участковой уполномоченноень отделэнь прявтокс. 2003 иестэ – Кочкурова ёнксонь внутренней тевень отделэнь прявтокс. 2006 иестэ Ю.П.Лияскин кармась топавтомо Саранск ошонь Пролетарской районганть ОВД-нь прявтонь тевтнень. Мейле зярыя иеть важодсь лия службатнесэ. 2017 иестэ Юрий Петрович аравтозь Мордовия Республикава полициянь участковой уполномоченноень, кемгавксово иеде седе вишкинетнень тевест коряс ды административной надзоронь подразделениянь прявтокс.
– Инескеть, ёвтынк участковой уполномоченноень службанть важодемасо невтевкстнэнь.
– Минек службантень совить 300 ламо участковойть, 70 ламо ПДН-нь важодицят ды административной надзоронь коряс 20 инспекторт. Стака максомс питне участковой уполномоченноень службантень республикань эрицятнень сэтьмечист ванстомасонть. Истя, те иень кемень ковтнень перть участковойтне панжсть малав 1500 зыянов тевть, редясть 15 тёжат административной правань коламот, истя жо аволь закононь коряс наркотиктнень тевс нолдамонть ёнкссо, семиясо-кудосо лисезь правань коламотнень.
Эрьва чистэ участковойтне ваныть вете тёжадо ламо ломантнень мельга, кить аштить профилактикань учётсо, меельцетнень ёндо редязь 2 тёжадо ламо правань коламот, конат сюлмавозь судсонть кемекстазь кардамотнень коламост марто.
– Юрий Петрович, тынк вановтонк коряс, мезе сехте прявтось участковойтнень тевсэнть?
– Участковойтнень тевсэ прявтось – те маштомс чарькодемс ломантнень эрямосо лисезь стакачинть ды шкастонзо явомс лезкс. Ванстомс ломантнень праваст, мелест-вановтост, ванстомс ули-парост. Ладямс вейке-вейкень чарькодема внутренней тевень органтнэнь ды эрицятнень ютксо.
Участковойтне – те МВД-нь структурасо прявт службатнестэ вейкесь. Истя ульнесь икелень шкатнестэ ды истя кадовсь нейгак. Внутренней тевень органтнэнь важодицятненень чинтень алтазь интервьюсонть РФ-нь Внутренней тевень министрась В.А.Колокольцев ёвтызе участковоень службанть полициянь весе службатнень юрокс. Теде башка, участковойтне – те се рисьмесь, кона кемексты внутренней тевень органтнэнь авторитетэнть. Кода участковойтне важодить, кода лездыть эрицятненень лисезь стакачитнесэ – истямо «чачозо» кармияк полициянь службанть.
Кода корты МР-ва Внутренней тевень министрась Ю.В.Арсентьев, участковойтнень эйстэ ашти, кодамо сэтьмечи ошонь ды велень куротнесэ чить ды веть. Неень шкане ломантне а пелить веть лисемс ушов, а мелявтыть вальмалов кадозь машинаст кисэ: кияк а каясынзе чарытнень, а токасы сынст ули-парост. Неть тевтнень а нолдамга, участковойтне пек ламо важодить, ютавтыть эрьва кодат оперативно-профилактической мероприятият, операцият.
– Юрий Петрович, кода молить тевтне участковой уполномоченноень службанть материально-технической базанзо топавтоманть коряс?
– Тень коряс тевтне молить вадрясто. Теньсэ покш путовксост Россиянь МВД-нть, МР-ва Внутренней тевень министранть Ю.В.Арсентьевень, республикань кирдийтнень ды башка В.Д.Волковонь. Участковойтнень улить транспортост, автомашинань паркось эрьва ие одкстомтови, куш кона шкастонть участковойтне ардовить эрицятнень тердемаст коряс ды ютавтыть эрявикс мероприятият. Участковой уполномоченнойтнень улить сотовой телефоност. Эдь ломантне гайневтить чинек-венек.
2015 иестэнть саезь республикань кирдийтнень лезксэст вельде Мордовиясо топавтови велень участковойтнень туртов административной-эрямонь комплекстнэнь строямонь коряс программась. Сонзэ прявт смустекс ульнесь ды кадови теемс вадря условият участковойтнень важодемаст туртов, сынь эрить вановт ало аштиця административной участкатнесэ. Колмо иетнень перть те программанть вельде стявтозь ды панжозь административной-эрямонь ниле комплекст. Васенцесь теезь Орданьбуе ёнксонь Тургенева посёлкасонть 2015 иень сёксня, кавто иень ютазь од комплекст панжозь Краснослободской ёнксонь Рузонь Маскино велесэ, Ромоданова ёнксонь Белозерья велесэ ды Зубова-Полянань Умёт посёлкасонть.
Те пек покш лезкс участковоень важодемасонть. Неень шкантень участковой уполномоченнойтне ютыть модуль «Участковый» сервисэнтень, весе документтнэ сёрмадовить электронной лувсо, тевс нолдави электронной документооборотонь сервисэсь.
Миненек мельспаро, Мордовиянь эрицятнень пельде сеедьстэ сыть шнамонь валт участковойтнень лемс. Те невти, участковой уполномоченнойтне лезэвстэ важодить эсест участкасонть, явить мель эрицятнень талновтыця кевкстематненень, лисезь стакачитненень ды лездыть. Ломантнень пельде шнамонь валтнэ – те участковойтнень важодемантень максозь питнесь.
Интервьюсь саезь Полициянь участковой уполномоченноень службанть теевемань чинть каршо. Ю.П.Лияскин МР-ва Внутренней тевень министерствань весе руководстванть пельде ёвты поздоровт участковоень службань важодицятненень ды ветерантнэнень профессиянь кенярксчинть кувалма. Арси кеме шумбрачи, паро эрямо ды изнявкст Тиринь масторонтень служамонь тевсэнть.
Т.Аксенова


20.11.2018

 

Новости

Премьера!

Декабрянь 8-це чистэ 17:00 чассто Эрзянь ды мокшонь национальной драматической театрасо ваныцятнень учи премьера. Тесэ невтить М.Камолеттинь «Играем в дружную семью, или гарнир по-французски» од путовкс. Спектаклясь алтави МР-нь заслуженной артисткатнень Марина Аверкинань ды Галина Самаркинань юбилеень тешкстамонтень. Режиссёрось-путыцясь МР-нь заслуженной артисткась Л.Шахова.

 
Ардоманть кис питнетне яла касыть

Саранск ошонь общественной транспортонь частной предприятиятне бажить кепедемс ардоманть кис питнетнень декабрянь 25-це чистэ саезь. Теде сынь пачтясть ошонь администрацияв. 2, 5, 10, 15, 16, 18, 19, 21, 22, 24, 25, 28, 32, 35, 36, 37, 38, 40, 41, 44 ды 45№ маршурттнэсэ питнесь карми 25 целковойть (ней – 20). 23, 34 ды 66№ – 23 целковойть. Мэриясо пачтясть: неень шкане Саранскойсэ важодить кавто ООО-т («Сигнал С» ды «ПАТП»), конат усксить ломанть, истя жо индивидуальной кавксо предпринимательть. Частной усксицятнеде 35%.

Подробнее ...
 
Важоди Якшаматянь почта

Мордовиянь Главпочтамтсо декабрянть прядовомс карми важодеме Якшаматянь Почтась. Сёрмадомс ды нолдамс почтань ящикс телень прявт волшебникентень пачтямо мереви эрьвантень, иетнень лангс апак вано.

Подробнее ...
 
Партийцы ждут от Съезда конструктивных дискуссий

  - Именно в первый день  XVIII  Съезда Партии, который пройдет  7-8 декабря в Москве, состоится работа трех дискуссионных площадок «Обновление», «Открытость», «Партия и выборы», на которых мы сможем обсудить свои предложения и принять  решения, действительно позволяющие   наладить более эффективную и открытую работу партийных структур», -  сказал секретарь  Регионального отделения  «Единой России», Председатель Государственного Собрания республики Владимир Чибиркин.

Подробнее ...
 
В рамках приема граждан Председатель ЕР поддержал социально значимые инициативы

Ряд социально значимых поручений дал Председатель «Единой России», премьер-министр Дмитрий Медведев в ответ на обращения, поступившие в рамках прима граждан, который прошел 30 ноября в Центральной общественной приемной Партии.

Подробнее ...