Рубрикатор

Cобытия недели ТЕЛЕСЬКАК НЕВТИЗЕ ПРЯНЗО...
ТЕЛЕСЬКАК НЕВТИЗЕ ПРЯНЗО...

Телесь меельце читнестэ невтизе эсь виензэ. Мордовиянть ды Саранск ошонть лангс прась зняро лов – телень кавто ковтнес зняро эзь пракшно. Минек туртов покш кеняркс, коммунальщиктненень жо пек стака важодема. Чинек -венек савкшны ванськавтомс ошонь ульцятнень ды киланготнень. Те тевенть тееме лиссть малав весе ловонь урядыця техникась ды Саранск ошонь коммунальщиктне. Веньперть трактортнэ ванськавтыть покш трассатнень, валске рана робочейтне васняяк ловонть ёртнесызь тротуартнэнь лангсто ды автобусонь лотксема павильонтнэстэ. Пондельникстэ цела чи «Спецавтохозяйство», «Зеленое хозяйство» МП-тнень, управляющей компаниятнень важодицятне роботасть Саранск ошонь куншкакурованть ды ошонь округонь районтнэва.

 

Пек ламо лов валякшнось Советской ды Изнямонь площадтнес, секскак тов кучозельть зярыя бригадат. Машинатне, вишка экскаватортнэ, трактортнэ ды ожо специальной оршамопельсэ важодицятне пештизь весе куншкакуронть. Тосто минь вастынек «Зеленое хозяйство» МП-нь мастерэнть М.К.Чигаевань ды робочеенть А.А.Степунинэнь. Александр Алексеевич мизолдозь мерсь, те ловонть сынь изнясызь, аволь весть истят «тамашат» пракшность ошонть лангс. Важодить сынь валскень 5 чассто саезь чополгадомс. Мария Константиновна кемевтимизь, зярс, келя, ловонть тестэ весе а сайсынек – а тутано.

Истя жо пондельникстэ Саранск ошонь мэрэсь Пётр Тултаев ютавтсь промкс те мелявксонть кувалма ды валске марто ютынзе ошонь ульцятнень. Сон тешкстызе, тевтне ошонть ловдонть ванськавтомань коряс молить а беряньстэ. Килангтнесэ ды сэдтнесэ ситуациятнень мельга эряви ваномс пек пштистэ. Истя жо васенцекс эрявить урядамс ардомань ды ялго ютамонь киланготнень школатненень, эйдень кужотненень, больницятненень ды лия социальной учреждениятненень. Пётр Николаевич сёвнынзе частной управляющей компаниятнень, конатне роботыть а весе вийсэст, секскак Администрацияв секе-тев лангозост сакшныть пеняцямот, социальной сеттнесэ эрьва чистэ ломантне невтить сынст минень-сюнонь роботаст. «МП-тне ды ГУК-тне важодить чинек-венек, а частнойтне, лисни, веёно аштить. Те лувонть эряви витемс ды роботамс «на совесть», – мерсь П.Н.Тултаев.

Кода ёвтнесь Ошонь благоустройствань ды коммунальной хозяйствань дирекциянь прявтось Игорь Бутяйкин, весемезэ килангтнес ливтезь муниципальной предприятиятнень ды ошонь управляющей компаниятнень техникань 180 единицат. Важодеме коммунальщиктне лиснить валскень 4 чассто.

Кода кортыть метеорологтне, ловось минек ёнксов сась куватьс ды а ськамонзо. Седе товгак эйсэнек учить виев вармат, даволт ды кельме коштось. Телесь саинзе праванзо эсензэ кедьс, секскак ней оршнеде-карседе седе лембестэ, эждинк потмоёжонк пси чайсэ ды паро мельсэ.

 

М.ДЕВЯТОВА

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...