Рубрикатор

Cобытия недели Пискарёв депутатось Мордовиясоль
Пискарёв депутатось Мордовиясоль

Ютазь недлясто минек республикав сакшнось Мордовиянть пельде  РФ-нь Госдумань депутатось, Безопасностень ды коррупциянь а нолдамонь комитетэнь прявтось В.И.Пискарев. Важодемань тевенть коряс сон васняяк якась Рузаевка ёнксов, тесэ ваннызе культурань ды оймсемань одкстомтозь парконть, конанть арсеви панжомс маласо читнестэ. Рузаевка ёнксонь прявтонть В.Ю.Кормилицын марто сынь ваннызь оймсема таркасонть вадрялгавтомань тевтнень.

 

Рузаевкань паркось кармась «Парки малых городов» «Единая Россия» партиянь проектэнь участникекс. Софинансированиянь лувонть коряс вадрялгавтомань тевтнес явозельть ярмакт федеральной ды республикань бюджетнэстэ, весемезэ 2 млн. 300 тёжат целковойть.

Тешкстазель, проектэнь вешематнень коряс, васняяк кунсолозельть ломантнень мелест-арсемаст сень коряс, кодамокс сынь бу невтевлизь сынст райононь паркосонть, мезенть эряви одкстомтомс васняяк. Секскак Рузаевкань администрациясь эсензэ сайтсэ зярыя ковонь перть ванкшнось эрицятнень пельде яволявтоматнень.

Проектэнть топавтоманть вельде ацазь асфальт ялго якамонь яннэтнева ды строязь налксемань кавто площадкат. Вейкесь эйстэст – шахматонь покш фигура марто. Омбоцесь – эйкакшонь налксемань зонась.

Парконть ванномадонзо мейле В.И.Пискарев тешкстызе, сонензэ вечкевить тесэ ютавтовиця одкстомтомань тевтне.

– Монь вановтом коряс, строямонь тевтне топавтозь вадрясто. Ней эйкакштненень ули косо налксемс. Кадовсь ацамс чевте вельтявксонть – эйкакштне илязт томбаво налксемстэ, – мерсь Василий Пискарев. – Аволь стяко Рузаевкась кармась те проектэнь участникекс, те райононть виевть перспективанзо.

 

Вастовома Покш Игнатбуень эрицятнень марто

 

Чинь омбоце пельксстэнть В.И.Пискарев содавтызе Покш Игнатбуенть. Райононь прявтонть Т.Н.Полозова марто сынь кортасть те ёнксонть социально-экономической виевгавтомадонзо, башка мель явозель сеть вадря тевтненень, конат топавтовить неень шкане. Истя, ютазь иестэ Покш Игнатбуесэ панжозь неень шкань вешематненень ладиця од школа ды сонзэ вакссо – искусственной ацавкс марто мини-футболонь площадка. 2017 иень васенце кото ковтнень перть «Устойчивое развитие сельских территорий» программанть лувсо Пушкинэнь ульцясонть строязь эрямонь кудо. Иенть прядовомс районсонть арсеви максомс эштё 6 кудот. Эскельксэнь эскелькс одкстомтови-мазылгавтови аволь ансяк райононь куншкакурось, истя жо маласо аштиця велетне. Невтемга, Ташто Чамзина ды Кучкаева велетнесэ теезь спортонь-налксемань эйкакшонь площадкат, Андреевка велень школасонть витнезь спортзалось. Т.Н.Полозовань валонзо коряс, прявт кевкстемакс райононть туртов аштить берянь китне, конат а вечкевить аволь ансяк эрицятнененень, истя жо велень хозяйствань ветицятненень.

Теке жо чистэнть В.И.Пискарев кунсолынзе Покш Игнатбуень эрицятнень талновтыця кевкстемаст. Васенцекс депутатонтень пшкадсь А.П.Яушева пенсионеркась. Авась ёвтнесь, сонзэ важодемань стажозо 40 иеть, тень лангс апак вано сонензэ а максыть «Ветеран труда» званиянть, секс мекс арасть правительствань казнесэ. Кода редязель кортамонть шкасто, Покш Игнатбуесэ аволь аламо пенсионерт, конатнень покш стажост, ансяк истямо званияст арась. Пенсионеркась энялдсь лездамс те тевсэнть. Депутатось алтась ванкшномс те кевкстеманть.

Эрицятне истя жо пшкалесть лия кевкстема марто.

Вастовоманть прядовомга ютавтовсь пек мельстуиця тев. Максовсть ключт од квартирастонть Покш Игнатбуесэ эриця уроз тейтерентень. Неень шкане Галина Петаева тонавтни М.Е.Евсевьев лемсэ МГПИ-сэ. Тейтересь видькстась депутатонтень, сон ашти покш мельспаросо: ней ули эсензэ эрямо тарказо. Сы шкастонть сон бажи улемс аволь ансяк вадря тонавтыцякс, истя жо пурнамс кеме семия, истямо, кодамо сонзэ, ризксэнтень, арасель, кармамс вадря авакс. В.И.Пискарёв арсесь тейтерентень, штобу весе мелензэ-бажамонзо топавтовольть, ды макссь тензэ казнеть. Тейтересь алтась тердемс депутатонть инжекс од квартирантень.

Поздоровт – тонавтыцятненень

В.И.Пискарёв депутатось Покш Игнатбуев якась октябрянь прявт кенярксчинть – Тонавтыцянь чинть каршо, секскак сон бажась вастовомс райононь педагогонь коллективенть марто.

Кенярксчинь вастовомась ютавтовсь Покш Игнатбуень средней школасонть, конась панжозель ютазь иестэнть. Одс строязь кавто этажонь зданиясь лади тонавтомань неень шкань весе вешематненень. Сонзэ покшолмазо 2590 кавонзазь метрат. Школасонть улить лаборатория марто химиянь, физикань, информатикань кабинетт, косо путозь компьютерт, интерактивной лазт, проекторт, трудонь уроконь мастерской, стамонь машинка марто нупаль, ярсамопелень пидемань тонавтомань нупаль, косо путозь кухнянь весе мебелесь, истя жо улить тонавтомань аудиторият. Теде башка, школасонть теезь актовой мазый зал, ловномань зал марто библиотека.

Строямонь тевтнес ютавтозь 78 миллиондо ламо целковойть, ды 8 млн. целковойде ламо ютавтозь оборудованиянь рамамс, конат явозь «Устойчивое развитие сельских территорий» федеральной программанть лувсо, конась топавтови РФ-нь Минсельхозонть ды республикань Правительстванть лезксэст вельде.

В.И.Пискарёв видькстась, тонавтыцянь профессиясь сонзэ семиясо саи башка тарка, эдь депутатонть авазо ды низэ эрямост алтызь эйкакштнень марто важодемантень, кавонест сынь тонавтыцят. Тешкстызе, тонавтыцянть тевезэ а прядови, зярдо сон лиси важодемань кабинетстэнзэ.

– Мон кирдян мельсэнь, кода монь авам чокшне ланга аштесь тонавтницятнень тетрадест велькссэ. Кода сынь сакшность тензэ талновтыця кевкстематнень марто. Улить кавто профессият, конатненень эряви явомс мель васняяк, те – лецицят ды тонавтыцят, – мерсь депутатось.

В.И.Пискарёв арсесь тонавтыцятненень кеме шумбрачи, важодемасо од изнявкст ды весе паронть.

Т.Аксенова

 

 

Новости

«СЯТКО» ДЫ «МОКША» журналтнэнень – 90!

Неть читнестэ МР-нь Пресс-центрасо ютась промкс, кона алтавсь «Сятко» ды «Мокша» журналтнэнь 90 иень топодемантень. Мокшонь кельсэ «Валда ян» журналось лиссь Пензасо, эрзянь «Сяткось» – Самарасо. Самай неть изданиятнесэ лиснесть минек ушодыця поэттнэнь ды писательтнень произведенияст.

Подробнее ...
 
Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...