Рубрикатор

Cобытия недели Машиностроителень чись
Машиностроителень чись

Ютазь середасто Республикань Культурань кудосо ютась торжественной промкс, конась алтазель Машиностроителень чинтень. Мордовиянь машиностроительтненень поздоровонь ёвтамо сакшнось республикань Прявтось Владимир Волков. Владимир Дмитриевич тешкстызе, машиностроениянь предприятиятне ней важодить паро лувсо, ды сынь кастызь промышленной производствань индексэнть 112 процентс. Продукциядонть миезь 39 миллиардт целковойть. Те 17 проценттэ седе ламо мелень цифратнень коряс. Пек покш таликаст те важодемасонть «Оптикэнерго» компаниянь группанть, «Рузхиммашонть», «Резинотехниканть», Ковылкинань электромеханической заводонть, «ЭМ-Кабеленть», «ВКМ-Сталенть» ды лиятнень. Кавто иеде теде икеле тевтне ульнесть пек стакат, ансяк неть предприятиятне изнизь стакачитнень ды молить икелев. Кода мерсь Мордовиянь Прявтось, седе товгак республикась карми лездамо тенст эрьва ёндо. Кавто иес экспортось машиностроениянь комплекссэнть кассь 2,5-ксть, ды те цифранть эряви седе кастомс сыця иетнестэ. Эряви совавтомс производствантень од технологият, васенце таркас аравтомс конкуренттэ а пелемань задачатнень, седеяк кепедемс инновациянь продуктань ды услугань производстватнень.

Торжественной промкссонть Владимир Волков явшесь ламо казнеть. «Лауреат Государственной премии Республики Мордовия» лемесь максозь «Сарансккабель-Оптика» ООО-нь директоронь советэнь прявтонтень Э.А.Боксимернэнь. Эвир Аврамовичнень казезель эште «Ключ к успеху» специальной ледстнемань знакось, конась максовсь тензэ вейксэ ковс од заводонь строямонь ды нолдамонь, стака задачатнень парсте решамонь кисэ. Кода мерсь Э.А.Боксимер, паро тевтнес пачкодемась – те кемечись, важодемась ды эсь тиринь ёнксонть вечкемась. Аволь умок Эвир Аврамович тешкстызе эсь 80 иень юбилеензэ, ансяк нейгак сон весе вийсэнзэ важоди тиринь предприятиянть лезэс.

III-це степенень Славань Орденсэ казезель «Ардатовский светотехнический завод» ОАО-нь прявтонь советникесь В.Д.Кудашкин. Меельце 20 иетнес те предприятиясь сонзэ вельде анокстась ды нолдась производствас 2000 ламо валдомтыця приборт, ды Владимир Дмитриевичень прявтокс улема шкасто заводось кузсь эсензэ касомань-кепетемань тёкшс.

«Заслуженный работник промышленности РМ» лемесь максозель «Электровыпрямителень» НТИ-нь отделэнь прявтонтень Л.П.Акимованень, кона важоди заводсонть 40 иеде ламо. Теке лемесь максозель зярыя машиностроительтненень: «Плайтерра» ЗАО-нь автоматизировазь систематнень отделэнь прявтонтень В.В. Аристованень, кона анокстызе ды теизе предприятиянь весе IT-инфраструктуранть; «Электровыпрямитель-ЗСП» ЗАО-нть ИТЦ-нь прявт конструкторонтень А.Н.Бахчиевнень, сон важоди те предприятиясонть 56 иеде ламо, ды сонзэ пингстэ ушодозель силовой полупроводникень преобразовательтнень нолдамось.

Ковылкинань электромеханикань заводонь токаресь В.А. Богданов важоди эсь таркасонзо 42 иеть ды сонзэ ули эсензэ башка тешксэзэ (клеймозо). Те корты Виктор Александровичень покш профессионализмадо. Сонензэ а эряви невтнемс эсь кедьсэ теезь продукциянть ОТК-нтень.

«ЭМ-КАТ» ООО-нь плавильщикесь В.Н.Капустин нолды алюминиень катанкат, содасынзе  педе-пес весе сплавтнень анокстамонь составост, температураст, технологиянь процессэнть ды тонавты тенень од роботниктнень.

Мордовия Республикань Почетонь грамотасо казезельть «Орбитань» 7-це цехень технологиянь оборудованиянь наладчикесь А.В.Андриянов, Саранскоень телевизионной заводонь 4 разрядонь малярось И.И.Горлышкина ды ламот лият.

Теде мейле поздоровт машиностроительтненень ёвтасть МР-нь Промышленностень, наукань ды од технологиянь министрась А.И.Седов, МР-нь Госсобраниянь Председателень полавтыцясь В.В.Алехин ды Мордовиянь Профсоюзонь федерациянь прявтось М.С.Голиченко.

Коень коряс те профессиональной кенярксчистэнть тешкстазельть истя жо машиностроителень отраслянь ветерантнэ: Е.Е.Анютина, кона важодсь заводсо 45 иеть токарекс, «Электровыпрямитель-ЗСП» ЗАО-нь прявт конструкторось А.Н.Бахчиев, Социалистической Трудонь Героесь Р.И. Жидкова ды тылсэ важодицясь Ю.Н.Козлов.

Эште вейке паро кой ули машиностроительтнень. Эсь кенярксчистэст сынь ёвтызь «Обрабатывающие производства» номинациянть коряс промышленной предприятиятнень ютксо изницятнень. Тедеде васенце тарка сайсь «Оптикэнерго» ООО-сь, ды сценанть лангс тердезельть «ЭМ-КАБЕЛЬ» ООО-нь прявтось Е.А.Бурканов ды «ЭМ-ПЛАСТ» ООО-нь прявтось П.Л.Волков. Омбоце тарканть саизе «Ковылкинский электромеханический завод» ПАО-сь, казнесь максозель финансонь директоронтень В.Ш.Абдулаевнень. Колмоце таркась максозель «Плайтерра» ЗАО-нтень ды предприятиянь прявтонтень С.А.Никоноровнень.

Меельцекс машиностроительтненень невтезель концерт.

 

М.Девятова

 

Новости

Инжетне содавтовить эрзятнень эрямо коест марто

Мордовия Республикасо Эрзянь культурань ды ремеслань куншкакуронь теемань коряс дизайнерэнь арсемань объектэкс кармась Отяжелесэ пичень чочксто чапозь сокицянь-видицянь семиянь кудось. Сонзэ вакссо анок уш баняськак, кона уштови «раужосто», тунда путневить эмеж марто пандяткак.

Подробнее ...
 
Саранскойсэ панжови приют

Саранскойсэ панжови приют азортомо ракшатнень туртов. Кода пачтясть ошонь администрациясто, ней уш ули тень туртов таркаяк. Панжома шкась – те иень июнь ковс.  Приютонтень кармить кельгеме 100 каткат ды 300 кискат.

Подробнее ...
 
Удостовереният – судьятненень

Ютазь пецясто Мордовиясо Прявт федеральной инспекторось Михаил Сезганов МР-нь судьянь сообществань представительтненень явшесь удостовереният, конатнень лангс кедьчелькензэ путызе сонсь РФ-нь Президентэсь Владимир Путин. Мероприятиянтень сакшнось МР-нь Верховной судонь прявтось Сергей Штановгак.

Подробнее ...
 
Московсо гайгить эрзянь морот!

Москов ошсо поладовить концерттнэ, конатнень анокстыть МР-нь заслуженной артисткась, «Садко» рузонь музыкань ды киштемань государственной ансамблянь морыцясь Вера Прохорова ды «Эрзянь вайгель» культурно-просветительской вейсэндявксось. Эряви меремс, васенце истямо концертэсь ютась декабрянь 17-це чистэ Московонь Раськетнень кудосо. Сон алтавсь велень моротненень.

Подробнее ...
 
Мордовиянь сехте вадря сувенирт

Декабрянь 22-це чистэ яволявтозельть «Мордовия Республикань туристической сувенир» конкурсонь изницятнень лемест. Истямо пелькстамонть ютавтсть МР-нь Культурань, национальной политикань, туризмань ды архивень тевень министерствась, Туристэнь-информациянь куншкакурось. Конкурсонть вельде эрявсть муемс сувенирэнь сехте вадря продукциянть, тешкстамс производительтнень, кочкамс лия ёнов а молиця сувениртнэнь ды невтемс сынст FIFA-нь болельщикень фестивальсэ.

Подробнее ...