Рубрикатор

Cобытия недели «Эрзянь правданть» марто вейсэ...
«Эрзянь правданть» марто вейсэ...

Тундонь ды Трудонь  кенярксчитнестэ республикань келес ульнесть ламо акцият, косо озавтовсть эрьва кодамо чувтот. Те паро тевесь эрямос совавтовсь аволь ансяк Мордовиянь прявт ошсо, истя жо республикань районтнэсэ, вишка ды покш велетнесэяк.

 

«Эрзянь правда» газетась «Саранское территориальное лесничество» ГКУ-нть марто вейсэ вана уш омбоцеде ютавты «Озавтт чувто» акция. Васенцеде истямо покш мероприятиясь ютавтовсь вете иеде икеле Саранск ошонь Октябрьской ёнксонь Куликовка велесэ уликс лисьмапрянть вакссо. Сестэ озавтозельть эрьва кодамо породань малав сизьгемень  чувтот. Вейсэндявкшность Лямбирень муниципальной общеобразовательной учреждениянь Берсеневкань школань лесничествань тонавтницятне.

Те разнэ миненек вейсэндявкшность Новотроицкой средней общеобразовательной школань «Росток» школань лесничествась, «Национальный парк «Смольный» ФБГУ-нь важодицятне. Чувтонь озавтомань таркакс кочказель иневанькс лисьмапрясь, конась Ташто Шайгова райононь Од Акшина велепесэ. Кезэрень шкасто саезь ловови, кодамо таркасто мода потсто бу аволь лисе ванькс ведесь, сон уш анок светязь ды, кода свал эрси, тантей, симемань явавтыця. Мордовиясо лисьмапрятнеде пек ламо, а стяко содавикс экологось, «Зеленый мир» эйкакшонь экологиянь организациянь васенце прявтось ды сонзэ теицясь-пурныцясь В.М.Смирнов 2014 иестэ  сёрмадсь ды нолдась книга-ветиця (путеводитель) республикань лисьмапрятнень коряс.

Од Акшинасо муевсть истямо ломанть, кить вете иеде икеле аволь ансяк ванськавтызь вейке лисьмапрянть, истя жо шкань ютазь чаповтсть-путсть паро сруб ды тейсть тосо алкуксонь экшелямонь ды озномань тарка. Те паро тевентень Шурыгинтнэнь ды Шепаксовтнень семиятнень баславинзе Феодор Санаксарской лемсэ храмонь настоятелесь отец Георгий. Истя жо сон путсь ушодкс те тарканть мазылгавтомантень, казсь тенст кавто покш пазават.

Васень шкастонть саезь лисьмапрянть мельга якицятнень ульнесь покш мелест сонзэ перька чувтонь озавтомадо.  Арсемаст топавтомасо покш таликаст «Саранское территориальное лесничество» ГКУ-нь прявтонть Е.С.Вдовинэнь ды главной лесничеенть Ю.В.Чикнайкинэнь.

Кода мерсь Евгений Сергеевич Вдовин, чувтотнень озавтомсто, те пек паро тев, зярдо истямо иневанькс таркатнесэ паролгавтови пертьпельксэсь. Вирьсэ-косо неть тевтне сеедьстэ ютавтовить, а вана лисьмапрянь перька пек чуросто.

Лисьмапрянть перька озавтомс вирьваныйтне явсть килейть, пичеть, кузт, пизёлкст. Нурькинестэ, сядодо ламо чувтот, конатнень те чистэнть озавтызь «Росток» школань лесничествань эйкакштне ды сынст тонавтыцяст.

Пертьпельксэнь сюпавчитнень ванстомадо, минек республикасо уликс башка ванстовиця таркатнеде, эйсэст уликс чуросто вастневиця ракшатнеде ды касовкстнэде пурнавозтненень пачтясь «Национальный парк «Смольный» ФГБУ-нь прявтонь полавтыцясь Н.М.Зубова. Наталья Михайловна нурькинестэ ёвтнесь седе, кодат экскурсият ютавтовить «Смольный» Национальной парксонть эйкакштнень ды покштнень туртов. Кенярксчинтень сон сась аволь чавонь кедть, школань лесничествас совицятненень, чувтонь озавтыцятненень казсь Шнамонь грамотат ды казнеть. Тешкстасынек, «Ростокось» аволь весть лиснесь изницякс кода эсенек республикань школань лесничестватнень пелькстамосо, истя жо весероссиянь конкурстнэсэ.

Школань лесничествань прявтось, география предметэнь тонавтыцясь Антонина Ивановна Пронина эйкакштнень марто свал ютавты ванкшномань (исследователень) важодевкст. Теде башка, сынь тешкстыть моданть, веденть ды целанек пертьпельксэнть марто сюлмавозь кенярксчитнень…

Пурнавозтненень ламо лембе валт ёвтась те велень священнослужителесь о.Михаил. Чувтонть сон лемдизе эрямонь смустекс, тердсь пертьпельксэнть вечкеме ды седейшкава мельганзо якамо. Священнослужителесь ёвтнесь духовно-нравственной питнейчитнеде, конат лездыть касомс алкуксонь ломанекс.

Веленть мазылгавтомасо лездыцятненень сюкпрянь вал марто пшкадсь Од Акшинань велень поселениянь прявтось Н.А.Маркелова. Сон алтась маласо шкастонть седеяк паролгавтомс те оймсема тарканть, штобу эрьва сыцясь тосо маряволь прянзо алкукс уцяскав ломанекс. Ютыть иеть, прядсызь школанть, вузонть, мусызь эрямонь эсь кист течинь тонавтницятне, кить сакшность чувтонь озавтомо. Ули кемема: сынст ютксто вейкеськак а карми стяко чувтонь керямо, тарадонь синдтреме. Эдь пертьпельксэнь вечкемань се толнэсь, конась кирвазсь эрьванть мештесэ, а нардави ламо иень перть.

 

В.Юдина

 

Новости

Чувашиясто – казне марто

 

Мартонь 24-це чистэ И.Я.Яковлев лемсэ Чувашиянь государственной педагогической университетсэ ютась этнопедагогикань ды поликультурной образованиянь коряс студентэнь Весероссиянь олимпиада. Сон алтавсь РАО-нь академикенть Г.Н.Волковонь 90 иетненень.

Подробнее ...
 
Од ломанень ассамблея

 

Мордовия Республикасо теезь «Молодежная Ассамблея народов России «МЫ – РОССИЯНЕ» Общероссийской общественной движениянь региональной отделения. Республикасонть од ломанень движениянь теемась карми общероссийской гражданской идентичностень формированиянть коряс ушодкстнэнень, раськетнень ютксо ояксчинь кемекстамонтень ды  межкультурной вейсэнь важодеманть келейгавтомантень лездамонь площадкакс.

Подробнее ...
 
Диктантось – эрявикс тев

Те иень апрелень 8-це чистэ Саранскойсэ малав 400 ломантне кармить «Тотальной диктантонь» участникекс. Мероприятиянь ютавтомань меленть шнызе Мордовиянь Прявтось Владимир Волков.

Подробнее ...
 
Сценанть лангсо Ицялбуесь...

 

Неть оймсема читнестэ Республикань Культурань Кудосо ютасть «Шумбрат, Мордовия!» народной творчествань фестивалень меельце концерттнэ. Кадовсь ансяк Гала-концертэсь, кона карми декабрянь 11-це чистэ. Сценанть лангс лиснесть Ицялбуень, Ковылкина ёнксонь ды Саранск ошонь округонь артисттнэ.

Подробнее ...
 
Мамаева омбоце

 

Ноябрянь васенце пельксстэнть евтазельть Россиянь республикатнень государственной кельтнень коряс школасо тонавтницянь ды студентэнь Весероссиянь васенце олимпиадань итогтне.

Подробнее ...