Рубрикатор

Cобытия недели Вастовома Пискарёв депутатонть марто
Вастовома Пискарёв депутатонть марто

 

Апрелень 27-це чистэ Саранск ошонь эрицятнень марто вастовкшнось Мордовиянть пельде РФ-нь Госдумань депутатось В.И.Пискарёв. Ломантне сакшность депутатонтень сынст талновтыця кевкстематнень марто. Васенцекс энялдома марто пшкадсь Мордовская ульцясонть аштиця вейке кудонь ТСЖ-нь прявтось В.Я.Астайкина, конась толковизе, сынст кудонтень путозь башка котельной. Меельце иетнестэ сон важоди пек беряньстэ, сеедьстэ лиснить аварият, эрицятне мелявтыть, илязо лисе покш зыян. Уштомапеленть витнемс эрицятнень ярмакост арасть. ТСЖ-нь прявтось пшкадекшнесь ламонень, ансяк кияк эзь лезда те кевкстеманть витемс.

 

Депутатось В.И.Пискарёв тешкстызе, прявт тевекс ашти те кудонь эрицятнень сэтьмечист ванстомась, тень кувалма эряви ванномс те котельноенть, мереви-арась сонзэ нолдамс тевс седе тов. Василий Иванович кармавтсь тень коряс анокстамс сёрма МР-нь Жилищно-коммунальной хозяйствань ды эрицятнень гражданской защитань министерствав. Истя жо В.И.Пискарёв тешкстызе, судонть вельде вешемс ярмакт домоуправлениянть пельде, конась зярыя иень перть сайсь ярмакт эрицятнень кедьстэ котельноенть мельга ванноманть кисэ, ансяк эсензэ тевензэ эзь топавто. Истя жо ванкшнозельть те стакачинть витемань лия мельтне-арсематне.

Депутатонтень лезкс мельга истя жо пшкадекшнесь ламо эйкакшонь кастыця авась, конась понгсь эрямонь стакачис. Сон, мирдезэ ды ниле эйкакшонзо эрить вейке квартирасо мирдензэ лелянзо марто, конась сеедьстэ копорды иредьстиця симемапельде ды вишка эйкакштнень икеле устави рангомо. В.И.Пискарев сеске гайневтсь МР-со МВД-нь министранть полавтыцянтень ды энялдсь лездамс те тевсэнть. Ламо эйкакшонь семиясь ашти очередьсэ эрямо таркань условиятнень вадрялгавтомс субсидиянь кис. Депутатось алтась лездамс те тевсэнтькак. Лездыцянтень сон кармавтсь маласо шкастонть анокстамс сёрма МР-нь Эрицятнень социальной защитань министранть И.В.Князьковонь лемс.

Депутатонтень лездамонть кисэ сюкпрянь валонь ёвтамо сакшнось Саранск ошонь эрицясь А.Р.Мязитова, сон ниле эйкакшонь ава. В.И.Пискарёв лездась сынст семиянтень  получамс субсидият эрямо таркань рамамс. Тевесь сеньсэ, авась чачтась колмоськеть, ды сынст покш семиясь эзь кельге кавто нупалень квартирантень. Депутатось лездась субсидиянть марто, ней семиясь аноксты од кудос совамонтень.

Эрицятне пшкалесть депутатонтень лия кевкстема мартояк.

Седе тов Мордовиянть пельде РФ-нь Госдумань депутатось В.И.Пискарев вастовкшнось «Российская академия народного хозяйства и государственной службы при Президенте Российской Федерации» Саранскоень филиалонь тонавтыцятнень ды студенттнэнь марто. Академиясонть тонавтнить сы шкань чиновниктне. Секскак вастовомань покш пельксэсь алтазель кортамонтень, кодамокс улемс алкуксонь чиновникентень, кодат содамочить-ерокчинть эрявить государственной властень органтнэсэ важодеманть туртов. Студенттнэ макснесть депутатонтень сынст талновтыця кевкстематнень. Депутатось покш мельсэ кунсолызе эрьва студентэнть.

Уш обедтэ мейле В.И.Пискарёв депутатось вастовкшнось МР-нь ЖКХ-нь ды эрицятнень гражданской защитань министрань васенце полавтыцянть В.Н.Чудайкин ды «Городские парки» МАУК-нь прявтонть, «Единая Россия» партиянь «Парки малых  городов» проектэнь МР-со координаторонть А.В.Дергунов марто. Кортамось мольсь  «Парки малых городов» проектэнть топавтомадонзо. Сонзэ лувсо витневить-вадрялгавтовить парктне сеть оштнесэ, косо эрить 250 тёжадо аламо ломанть. Мордовиясто те проектэнтень понгсь Рузаевка ошонь паркось. Сонзэ витнемантень явовить ярмакт кода федеральной, истя жо республикань бюджетстэ. Вастовомасонть тешкстазель, важодематне маласо шкастонть ушодовить. Неень шкане моли кортамо Рузаевкань эрицятнень марто. Ванкшновить-кунсоловить ломантень мелест-арсемаст.

Т.Аксенова

 

Новости

Чувашиясто – казне марто

 

Мартонь 24-це чистэ И.Я.Яковлев лемсэ Чувашиянь государственной педагогической университетсэ ютась этнопедагогикань ды поликультурной образованиянь коряс студентэнь Весероссиянь олимпиада. Сон алтавсь РАО-нь академикенть Г.Н.Волковонь 90 иетненень.

Подробнее ...
 
Од ломанень ассамблея

 

Мордовия Республикасо теезь «Молодежная Ассамблея народов России «МЫ – РОССИЯНЕ» Общероссийской общественной движениянь региональной отделения. Республикасонть од ломанень движениянь теемась карми общероссийской гражданской идентичностень формированиянть коряс ушодкстнэнень, раськетнень ютксо ояксчинь кемекстамонтень ды  межкультурной вейсэнь важодеманть келейгавтомантень лездамонь площадкакс.

Подробнее ...
 
Диктантось – эрявикс тев

Те иень апрелень 8-це чистэ Саранскойсэ малав 400 ломантне кармить «Тотальной диктантонь» участникекс. Мероприятиянь ютавтомань меленть шнызе Мордовиянь Прявтось Владимир Волков.

Подробнее ...
 
Сценанть лангсо Ицялбуесь...

 

Неть оймсема читнестэ Республикань Культурань Кудосо ютасть «Шумбрат, Мордовия!» народной творчествань фестивалень меельце концерттнэ. Кадовсь ансяк Гала-концертэсь, кона карми декабрянь 11-це чистэ. Сценанть лангс лиснесть Ицялбуень, Ковылкина ёнксонь ды Саранск ошонь округонь артисттнэ.

Подробнее ...
 
Мамаева омбоце

 

Ноябрянь васенце пельксстэнть евтазельть Россиянь республикатнень государственной кельтнень коряс школасо тонавтницянь ды студентэнь Весероссиянь васенце олимпиадань итогтне.

Подробнее ...