Рубрикатор

Cобытия недели Мордовиянь читне – Оренбургсо
Мордовиянь читне – Оренбургсо

Те иень сентябрянь 24-26 читнестэ Оренбург енкссонть «Россиясь – те весе минь» лозунгонть ало ютасть Мордовиянь чить, конат алтазельть эрзя-мокшонь раськенть Россиянь государствань лия раськетнень марто вейсэндямонь 1000 иетнень кенярксчинтень.

 

Ледстясынек, Оренбургонь областесь теезель 1934 иень декабрянь 7-це чистэнть. 1938 иестэнть саезь 1957 иенть самс регионось кандтнесь Чкаловонь областень лементь. XVIII пингестэнть, зярдо Россиянь государствантень уставасть совамо казахонь раськетне, Оренбургонь енксонтень кармасть само ломанть минек масторонь центральной ды Рав чирень районтнэстэ. Самай неть шкатнестэ те енксонтень пачкодсть Оренбургонь васень эрзятне ды мокшотне. Ламот минек раськень ломантнень эйстэ састь тей крепостной праванть лоткавтомадонзо, 30-це иетнень коллективизациянть ютавтомадонзо мейле, ютазь пингень 50 иетнень целинань модатнень сокамо шкастонть. Тесэнь эрзятне ней эрить Абдулинань, Северэнь, Пономаревань, Бузулуконь, Бугурусланонь, Ташлань, Новосергиевань, Грачевань ды лия районтнэсэ.

Оренбург ошось, кода крепость, теезель 1743 иестэнть. Губерниянь центракс ошось кармась улеме 1744 иестэнть Анна Иоанновна инязораванть указонзо коряс. Енксонть кемекстамосо покш талика налксесть В.Н.Татищев, И.К.Кириллова, П.И.Рычков, И.И.Неплюев, конась теевсь седе тов васень губернаторокс. Тешкстасынек, областенть покшолмазо 123 тежат 703км2, 2010 иенть самс эрить тесэ 2.112910 ломанть. Сынст ютксо сехте ламотне 1.611509 эли 73,9% – рузтнэ, мельгаст молить 165.967 эли 7,6% – татартнэ, казахтне 125.568 эли 5,8%, украинецтнэ, башкиртнэ ды минь, эрзятне ды мокшотне, эйстэнек 2002 иень сермадстомадонть мейле лиядсть ансяк 52458 эли 2,4%. 1989 иень сермадстома иестэнть эйстэнек тесэ ульнесть 68879 эли 3,2 процентт. Кемголмово иес эрьва кодамо тувталтнэнь коряс минек эйстэ емасть малав 16 тыщат ломанть. Васенце тувталось – эсь раськенть эйстэ виздемась, ламот эйстэнек бажить улемс рузокс, мезесь, койсэнек, ловови покш пежетекс, зярдо ломанесь отказы эсензэ ундоксонзо эйстэ. Тень каршо эряви стямс весе рунгонть ды ойменть вийсэ. Те а мазы тевенть лангс апак вано, татартнэ теке жо шкастонть ламолгадсть малав 8 тежас, казахтне – 14 тежас, истя жо ламолгадсть армянтнэ, азербайжанецтнэ, узбектне, таджиктне, чеченецтнэ ды лиятне.

Оренбургось ловови уштомапелень промышленностень, раужо металлургиянь, химиянь, нефтехимиянь ды ярсамопелень нолдамонь отраслянь центракс. Тесэ ашти Россиянь сехте покш газоконденсатонь чачовксось. Областьсэнть таргить нефта, кшнинь, кивень, никелень, асбестэнь чачовкст, важодить покштояк покш масторонь келес содавикс предприятиятне, кода «Оренбургнефтесь», «Оренбурггазпромось», «Орскнефтеоргсинтезэсь», «Оренбургские минералысь», «Южуралникелесь» ды ламот, ламот лиятне.

Сентябрянь 24-це чистэнть Мордовия Республикань Госсобраниянь Председателенть В.В.Конаковонь прявтсо делегациясь сась Оренбургов. Конаковдо башка делегациянтень совасть МР-нь Правительствань Прявтонь полавтыцясь – Культурань министрась П.Н.Тултаев, Правительствань Прявтонь полавтыцясь – Предпринимательствань ды торговлянь министрась В.В.Руженков, МР-нь Национальной политикань коряс министрась А.С.Лузгин, Ковылкинань муниципальной райононь прявтось В.И.Ташкин, СМИ-нь, культурань, творчествань, бизнесэнь важодицятне ды ламот лиятне.

Оренбургось вастызе минек делегациянть апокшке пиземесэ. Вастыцятне редизь, што те, келя, пек паро тешкс ды секскак Мордовиянь читне алтыть улемс лезэвекс ды эрявиксэкс. Неть арсематне, кода рединек, топавтовсть педе-пев. Кемгавтово чассто (тесэнь шканть коряс) ушодовсть кругловой стольтне. Вейкесь эйстэст – «Культура мордовского народа – достояние многонациональной России», ютавтовсь Н.К.Крупская лемсэ областной библиотекасонть ды сыремтинзе течинь чине пек эрявикс теманть коряс пси кортамотнень. Кругловой столенть панжизе ды ветясь Оренбургонь областень культурань, общественной ды внешней сюлмонь министрань полавтыцясь Веналий Владимирович Амелин. Сон евтнизе, мезе тееви регионсонть тесэ эриця раськетнень культураст, келест, коест-кирдаст ванстомга. Васняяк се, ледстизе сон, што сыненст, конатнень ютксо эрзя-мокшонь раськеськак, явови меельце шкастонть покштояк покш мель. Сеть таркатнесэ, косо сынь эрить – Северэнь, Абдулинань, Бугурусланонь, Пономаревань районтнэсэ, важодить эрзянь культурань музейть, ветявить самодеятельной творчествань кружокт, косо путневить С.Люлякинань, П.Кирилловонь, К.Абрамовонь пьесаст лангс спектаклят, тесэ теевть фольклорной ансамблятне морсить тиринь морот, школатнесэ ветяви эрзянь келесь ды истя седе тов. Национальной кевкстематнень коряс ламось-мезесь полавтовсь, зярдо енксонтень губернаторокс важодеме сась мокшонь церась Алексей Андреевич Чернышев. Самай сонзэ мелензэ-арсеманзо коряс кавто иеде теде икеле Оренбургсо панжозель «Национальной веле» велинесь. Тесэ, кода содатано, стявтозь кудот сеть национальносттненень, конат а вейке пинге эрить областьсэнть. Сехте покш кудось стявтозь тесэ, чарькодеви, рузтнэнень секс, мекс эйстэст сехте ламо. Мерьсынек, истят кудот велесэнть стявтсть татартнэнень, казахтненень, башкиртнэнень, чуваштненень, украинецтнэнень, белорустнэнень ды лия раськетненень. Истямо национальной кудо стявтозь эрзя-мокшотнененьгак. Весемесь те корты тесэнь эриця раськетненень явовиця покш мельденть, мезенть апак кавтолдо можна кандомс раськень вейсэндявомань лезэв символокс. Эдь Оренбургсо эрить 118 ламо раськеть. Столенть экшсэ кортыцятне: МР-нь Национальной политикань коряс министрась А.С.Лузгин, НА-нь «Поволжский центр культур финно-угорских народов» директоронь полавтыцясь Н.В.Османова, Оренбург енксонь эрзя-мокшонь вейсэндявксонь прявтось М.Д.Кузьмин ды лиятне, кортасть эрзятнень ды мокшотнень покштояк покш путовкстост Россиянь культурантень, спортонтень, искусствантень, военной тевентень, дипломатиянтень ды наукантень. Эряви весементь теемс сень туртов, штобу минек раськесь седе товгак касоволь, виензаволь ды эряволь пингеде пингес – састь вейкине мельс пурнавозтне. Теде башка, тесэтненень невтезельть видеофильматне «Мы мордва!», «Мордовия – мой дом», «Поющая Мордовия», «Великие земляки» ды лиятне. Тесэнь эрзятненень ды мокшотненень казезельть «Эрзянь правда» ды «Мокшень правда» тиринь кельсэ лисиця газетань номертнэ, книгат, альбомт, справочникть, конат евтнить койтнеде-кирдатнеде, кельденть, Мордовиянь историядонть ды лиядо мезде.

Теке жо шкастонть В.В.Руженковонь прявтсо делегациясь Оренбургонь областень деловой кругонь, бизнесэнь ды предприниматель ломантнень марто ютавтсь «Торгово-экономическое сотрудничество регионов» кругловой столь. Те вастовомасонть евтневсь Мордовиянь экономикань потенциалдонть, сонзэ эйсэ теевиця лезэв енкстнэде ды касомань-кепетемань китнеде-янтнэде.

Юрий Александрович Берг од губернаторонть марто вастомсто Мордовиянть (республиканть пельде ульнесь МР-нь Госсобраниянь прявтось В.В.Конаков) ды Оренбургонь областенть ютксо тешкстазель сотрудничествань коряс соглашения.

Теде мейле Оренбургонь областень татаронь драмань театрасонть панжозельть Мордовия Республикань читне. Сынст панжизь Оренбургонь областень Законодательной Собраниянь прявтось Д.В.Кулагин ды Мордовия Республикань Государственной Собраниянь прявтось В.В.Конаков. Торжественной мероприятиясь поладовсь вадрядояк вадря, мельстуиця концертсэ, косо морасть ды киштсть «Умарина», «Девчата» ансамблятне ды Мордовиянь содавикс артистэсь Сергей Иванович Эскин.

17 чассто эрзя-мокшонь раськенть Россиянь государствань лия раськетнень марто вейсэндямонь 1000 иетнень кенярксчись поладовсь Оренбург енксонь национальной велесэнть. Ваныцятнень икеле тесэ истя жо морасть ды киштсть башкирэнь, татаронь, эрзянь, мокшонь, чувашонь, украинецэнь, белорусонь ды лия раськень национальной коллективтне. Эрзя-мокшонь кудосонть ютавтовсть национальной кухнянь ярсамопелень дегустация ды Мордовия Республикань народной потреблениянь выставка-ярмунка.

25-26 читнестэ Мордовиянь читне поладовсть Бугурусланонь, Северэнь, Абдулинань ды Новосергиевань районтнэсэ, косо вастасть минек творческой коллективтнень истя лембестэ, што натой кой-кинь сельмстэ уставасть чудеме сельведть. Ансяк сынь, евтнемань коряс, ульнесть кенярксовт ды казсть минек раськень ломантненень лембедеяк лембе, мельстуиця ды зярдояк а стувтовиця, валдодояк валдо ледстнемат минек тиринь Мордовиядонть. Эдь Мордовиясь тосонь эрзятненень ды мокшотненень ашти истямо жо мейсэяк а явовиця, кенярксов, питнейдеяк питней пельксэкс, кодамокс ашти тенст Оренбургось.

С.Алтаев

 

Новости

Чувашиясто – казне марто

 

Мартонь 24-це чистэ И.Я.Яковлев лемсэ Чувашиянь государственной педагогической университетсэ ютась этнопедагогикань ды поликультурной образованиянь коряс студентэнь Весероссиянь олимпиада. Сон алтавсь РАО-нь академикенть Г.Н.Волковонь 90 иетненень.

Подробнее ...
 
Од ломанень ассамблея

 

Мордовия Республикасо теезь «Молодежная Ассамблея народов России «МЫ – РОССИЯНЕ» Общероссийской общественной движениянь региональной отделения. Республикасонть од ломанень движениянь теемась карми общероссийской гражданской идентичностень формированиянть коряс ушодкстнэнень, раськетнень ютксо ояксчинь кемекстамонтень ды  межкультурной вейсэнь важодеманть келейгавтомантень лездамонь площадкакс.

Подробнее ...
 
Диктантось – эрявикс тев

Те иень апрелень 8-це чистэ Саранскойсэ малав 400 ломантне кармить «Тотальной диктантонь» участникекс. Мероприятиянь ютавтомань меленть шнызе Мордовиянь Прявтось Владимир Волков.

Подробнее ...
 
Сценанть лангсо Ицялбуесь...

 

Неть оймсема читнестэ Республикань Культурань Кудосо ютасть «Шумбрат, Мордовия!» народной творчествань фестивалень меельце концерттнэ. Кадовсь ансяк Гала-концертэсь, кона карми декабрянь 11-це чистэ. Сценанть лангс лиснесть Ицялбуень, Ковылкина ёнксонь ды Саранск ошонь округонь артисттнэ.

Подробнее ...
 
Мамаева омбоце

 

Ноябрянь васенце пельксстэнть евтазельть Россиянь республикатнень государственной кельтнень коряс школасо тонавтницянь ды студентэнь Весероссиянь васенце олимпиадань итогтне.

Подробнее ...