Рубрикатор

Образование Университетэсь лезды важодема таркань муемасо
Университетэсь лезды важодема таркань муемасо

Вузонь прядыцятнень важодема таркань муемань коряс кевкстемась свал аштесь пштистэ. Те стакачись ульнесь социализмань шкастонть, ули нейгак. Ансяк сестэ тевесь аштесь аламодо лиякс. Ютазь пингень 90-це иетнень самс Россиянь ламот вузтнэсэ, ютксост Мордовиянсетнесэяк, выпускниктненень макснесть важодема таркав направленият. Од специалистэнть, конась прядсь институт эли университет, кучилизь важодеме профессиянзо коряс. Эрявсть роботамс сеть ярмактнень, конатнень государствась ютавтынзе те эли тона ломаненть образованиянзо лангс. Эдь, кода содатано, советской шкатнестэ образованиясь ульнесь питневтеме. Сеедьстэ прядыцятнень арасель мелест молемс тов, конась сермадозель направлениясонть, седеяк пек – велев. Велесэ жо свал эрявсть специалистт. Факультеттнэнь декантнэ тейнесть истяяк: дипломтнень выпускниктненень макссть аволь сеске вузонь прядомадо мейле, а шкань ютазь, зярдо сынь кандыть коневт важодема таркасто.

СССР-нть каладоманзо ды рыночной лувонть ушодовоманзо марто весемесь полавтовсь мекевланк. Кучоматне стувтовсть, исень студенттнэнень эстест савкшны вешнемс важодема таркат. Ансяк практикавтомо од специалисттнэнь а весе саить роботамо. Содамочитнень лангс жо ней кияк а ваны. Веенстнэ кадыть эсь профессияст, конантень тонавтнесть вете иень перть, ды туить важодеме аволь специальностень коряс. Лиятне важодемань кист ушодыть биржасто.

Те пингенть ушодовомсто Россиянь вузтнэсэ кармасть панжовомо истят структурат, конат вешнить важодема таркат эсь выпускникест туртов. Мордовиясо лезкс те тевсэнть теи МР-нь Вузтнэнь прядыцятненень важодема таркань муемань региональной центрась. Прявтсонзо – Алексей Васильевич Макаркин. 2002 иестэ саезь те центрась важодсь ансяк Н.П.Огарев лемсэ МГУ-нь специалисттнэнь марто. Кото иень ютазь кармась лездамо Кооперативной ды М.Е.Евсевьев лемсэ институттнэнь прядыцятнененьгак. Европань мастортнэсэ умок эри кой: университетэнтень максови покш питне сень коряс, кодамо шкань перть сонзэ прядыцянзо муить важодема тарка. Россиянь высшей учебной заведениятнесэ те а ловови невтевксэкс, конань кувалма ваннови университетэнть роботазо. Секс республикань вузтнэсэ ды филиалтнэсэ, Н.П.Огарев лемсэ МГУ-донть башка, мусть эли арась специалисттнэ важодема таркат, мониторинг а ютавтови.

Н.П.Огарев лемсэ МГУ-нть те тевесь ютавтови вете невтевксэнь коряс: вейсэнь занятость, зяро важодить специальностень коряс, зяро аволь специальностень, зяро ломанть аштить учетсо ошонь ды райононь биржатнесэ. Зяро тусть МР-нь томбалев. Теде башка, центрась ваны сень мельгаяк, вешевикст-арась течи Мордовиянь вузтнэнь прядыцятне.

– Эрьва ие 5-це курсонь студенттнэнь туртов минь ютавттано трудоустройствань технологиянь коряс занятият, лиякс меремс, анокстатано сынст лисемс важодемань рынкас. Неть занятиятне ветявить эрьва специальностень прядыцятнень туртов госэкзамендэ икеле обзорной лекциятнень лувсо. Евтнетяно важодемань рынкадонть, кодат специальносттне течи седе эрявикст, ков мольсть роботамо икеле иень выпускниктне, кодамо стакачи марто сави вастовомс, бути арась важодемань опытэть. Неть лекциятнеде икеле минь пурнатано информация миненек пшкадиця роботань максыцятнень коряс. Майстэ уш минь содатано кодат специальносттне седе эрявикст. Ды малав 90 процентт выпускниктне пшкадить минек центрав. Эряви меремс, весе важодемань максыцятне содыть эйстэнек, секскак максыть вакансият косо важодемань опытэсь а эрявикс.

Седе тов августстонть-сентябрястонть минь одс сюлмавтано сетнень марто, кие пшкадекшнесь центразонок. Гайневттяно тенст эли Интернет вельде кевкстнетяно мусть эли эзть сынь важодема тарка. Истя жо тесэ вантано кодамо специальностень коряс седе ламо роботавтомотнеде ды снартнетяно сыненст муемс тев.

Истямо лувсо январьстэ минек улить весе максовкстнэ. Малав весе роботавтомотне муить важодема таркат. Нама, улить од церат, конат туить армияв, лият тейтертне аштить декретсэ. Теке марто, сынсткак минь ловтано тевсэ.

Кие важодема тарка мусь аволь специальностень коряс седе аламолгадсть, 2010 иенть коряс малав кавксть. Покш мель явови сетненень, кие роботавтомокс сермадозь Эрицятнень занятостень центрасо. Истятнэде тедеде 1,3 процентт, косо-бути 20-25 ломанть. Эряви меремс, те аволь ламо. Улить истят, конат лововить роботавтомокс, ансяк биржасо а аштить. Вантано тувталонть, паряк, сон аволь официальна роботы: кудосо, Интернетсэ сайт теи. Мутано тензэ робота, мертяно, 10 тыщат зарплата лангс, сон отказы. Минек жо базатнесэ ловови роботавтомокс.

Те иень ваноматнень коряс важодема тарка мусть 86 процентт выпускниктне, 73 процентт – специальностень коряс. Бути ваномс специальносттнень коряс, малав эрьва иестэ васенце тарканть саи Медицинской институтось. Тесэ ванови сеяк, кие юты интернатурав ды ординатурав. Малав весе технической факультеттнэ саить васень таркатнень. Меельцетнесэ жо седе сеедьстэ гуманитарнойтне. Неень шкасто важодемань рынкасо седе эрявикст технической специальносттне. Целанек жо икеле иенть коряс важодицятне ламолгадсть. Бути ваномс кода ашти тевесь 2003 иестэнть саезь, несынек, кризисэнть самс важодемавтомотнеде аламольть. Важодемань рынкась веши специалистт. 2008-2009 иетнестэ тешкстави роботавтомотнень ламолгадомась. 2010 иестэнть тевесь мекев вадрялгадсь, – корты МР-нь Вузтнэнь прядыцятненень важодема таркань муемань региональной центрань прявтось Алексей Васильевич Макаркин.

Нама, центрась ванны сеть выпускниктнень мельгаяк, кить тусть республиканть томбалев. 2008 иенть самс истятнэде ульнесть ламо. 2008 иестэнть тешкстазь 17 процентт. Седе тов моли аламолгадома. Эдь кризисэнь шкастонть Московсо эсестнэньгак пансизь, а минек республикасо роботасть башка программат выпускниктненень важодема таркань явоманть коряс. Неть программатне вадрясто лездасть. 2010 иень январьстэнть республикань томбалев тусть 13,2 процентт высшей учебной заведениянь прядыцят. Тедеде зярс тешкстазь 8,2 процентт, январьстэ жо учови косояк 10-11 процентт. Центрасонть свал саить пель иень невтематнень. 2009 иестэнть центрась ютавтсь исследованият зяро тусть республиканть томбалев сетнень эйстэ, кить прядызь университетэст вете иеде теде икеле. Эйстэдест тешкстазь 24 процентт. Эрьва нилеце выпускникесь тусь.

Ю.Еремина

 

Новости

Единороссы высадили еловую аллею в Саранске
Акция по высадке саженцев, посвященная 75-летней годовщине Великой
Победы, состоялась сегодня в Саранске в микрорайоне Юбилейный.
Представители регионального отделения Партии «Единая Россия», МГЕР
Мордовии, молодежных общественных организаций, студотрядов,
юнармии, поисковых отрядов посадили более 40 саженцев, которые
доставили из Краснослободского района республики.


Подробнее ...
 
В Краснослободском районе успешно реализуется проект «Наследники Гиппократа»
Сегодня в медицинском колледже прошло занятие для волонтеров-медиков
Одним из победителей конкурса общественно-значимых проектов первичных отделений Партии «Единая Россия» стал проект первичного отделения №381 Краснослободского района «Наследники Гиппократа». Этот проект уже успешно реализуется в медицинском колледже в рамках реализации партийных проектов «Здоровое будущее» и «Старшее поколение», его участниками стали студенты-волонтеры.
Как отмечает секретарь первичного отделения 381 Краснослободского района Татьяна Кутузова, на средства, полученные в рамках гранта, были закуплены тонометры для измерения артериального давления, медицинская литература.
Подробнее ...
 
Съезд «Единой России» будет посвящен старту избирательной кампании в Госдуму в 2021 году
Предстоящий Съезд «Единой России» будет посвящен подготовке к
избирательной кампании в Государственную Думу в 2021 году и оценке
результатов прошедших выборов. На Съезде также предстоит обновление
партийных институтов с акцентом на электоральную составляющую. Об этом
заявил секретарь Генерального совета «Единой России» Андрей Турчак на
заседании Президиума Генсовета Партии.
Подробнее ...
 
В Мордовии стартовала акция «Круг добра»
Акция «Круг добра» проводится в рамках сотрудничества Центра
поддержки гражданских инициатив, сторонников «Единой России» и
благотворительного фонда «ДаДобро». Это еще один этап реализации
Календаря Добрых дел.

Подробнее ...
 
Кочкицятне ёвтызь мелест


Сентябрянь 8-це чистэ Россиясо ютасть кочкамот местной самоуправлениянь органтнэс. Тенень алтазель журналисттнэнь туртов пресс-конференциясь, конань сентябрянь 9-це чистэ Саранскойсэ, Союзонь кудосо ютавтызе «Единая Россия» политической партиянь региононь отделениясь. Журналисттнэнь кевкстемаст лангс отвечась МР-нь Государственной Собраниянь Председателесь, «Единая Россия» Мордовиянь региононь отделениянь прявтось В.В.Чибиркин.

Пачтязель, Мордовиясо истя жо ульнесть кочкамот. 407 мандаттнэнь кис снартнесть 1054 ломанть. Республикань келес вайгелест максомо сакшность 63 % эрицят. Вайгелест максомо сехте ламо сакшность Ромодановань районсо – 74,24 %. Аламодо эйстэст кадовсть Инсаронь райононь эрицятне. Тосо – 73,01 %. Вейке проценттэ аламо сакшность Отяжелень районсо. Ламо кандидаттнэнь ютксо 98 % вайгельтне максозь «Единая Россия» политической партиянь представительтнень кис. Ды те а стяко. Ламо шкань перть мольсь анокстамонь робота. Сехте паро кандидаттнэнь эрицятне тешкстакшнызь эштё маень 26-це чистэ, зярдо ютавтозель предварительной вайгелень максомась. Сондензэ икеле ютавтозельть эрицятнень марто вастовомат, конатнесэ ломантне теевсть содавиксэкс кандидаттнэнь ды сынст проекттнэнь марто. Сестэнь изницятне вастовоматнень поладокшнызь велесэ эрицятнень марто. Ютавтозельть 114 вастовомат. Эрицятнень ламо кармавтоматне топавтозельть.

Мордовиясо кочкамотне ютатсть закононь колсемавтомо.

Подробнее ...