Рубрикатор

Образование Пичингушинь эрзятнень мельспарост
Пичингушинь эрзятнень мельспарост

Лукояновань районсо ламоксть ульнинек. Тесэнь эрицятне панжадо ойметь, эрямонь вечкицят, оянень лездыцят. Арсиндеряйть ютавтомс кодамояк культурно-массовой мероприятия, тень тейсызь весеме ёндо арсезь, вадрясто. Эйзэст сакшныть аволь ансяк ошонь, велень эрицятне, шабра регионстояк ломанть, художественной самодеятельностень артистт, культпросветроботникть.

 

Кодамо тесэ паро, мазый пертьпельксэсь! Тесэнь ламо велетне аштить вирьпотсо. Кой-конатне сравтовсть эрьке чирева. Понгиндерят тезэнь зярскак – мекев туемс мелеть а сы. Ды зярдо Эрзя-мокшонь раськень Регионъютконь общественной организациянь исполкомонь председателесь, исторической наукань докторось, профессорось А.С.Лузгин кевкстимим: молян-арась Пичингуши эрзянь велесэ ютавтовиця научно-просветительской конференцияв, кона алтави масторлангонь келес содавикс учёноенть, мерзлотоведениянь наукань юронь теицянть М.И.Сумгинэнь чачома чистэнзэ 145 иетненень, минь, нама, эзинек отказа. Мероприятияв истя жо тердезель исторической наукань докторось, профессорось Н.Ф.Мокшин, кона эсь обуцянзо кемекстызе Нижней Новгородонь ёнкссо.

Пичингуши, Новоселки, Крапивка велень эрицятне пурнавсть Пичингуши велень Культурань кудонть икелев сень кисэ, штобу ледстямс содавикс ломантнень, кить обуцяст кемекстызь Крапивка эрзянь велесэнть. Научно-просветительской конференциясь ушодовсь мемориалонь лазонь панжомасо. Сынь алтазельть Михаил Иванович Сумгиннэнь – масторлангонь содавикс учёноентень, геолого-минералогической наукань докторонтень, мерзлотоведэнтень. Февралень 25-це чистэ сонензэ топодевельть бу 145 иеть. М.И. Сумгин 1917 иестэ ульнесь Нижегородской губерниянь прявтокс; Захар Иванович Клементьевнень – учёноентень, Томскоень университетэнь профессоронтень, те иень сентябрясто сонензэ топодить 115 иеть; Александр Александрович Куманевнень – Лукояновань педагогической училищань (ней педколледж) икелень директоронтень; Федор Александрович Каргаевнень – паро ломанентень, кие ульнесь педтехникумонть панжицятнестэ вейкекс ды сонзэ прявтсоль 1932 иестэ саезь 1940 иес.

Мемориалонь лазтнэнь панжомсто кортась Лукояновань райононь администрациянь прявтонь полавтыцясь А.А.Долбунова. Сон мерсь, райононь эрицятне парсте содасызь Крапивка велень содавикс ломантнень. Сынст пингеде-пингес ледстнемга панжовитькак мемориалонь лазтнэ.

Крапивка велень содавикс ломантненень мемориалонь лазонь панжомасо эсь мелест-арсемаст ёвтызь Лукояновань педколледжень преподавателесь В.В.Комиссарова, исторической наукань докторось, профессорось Н.Ф.Мокшин, Большеарской велень советэнь администрациянь прявтось Н.И.Щуркова, Земской собраниянь депутатось А.Н. Ефремов.

… Тесэль учёноенть З.И. Клементьевень малавиксэзэ П.П.Нуйкина. Сон ледстни:

– Захар Иванович тиринь ёнксов сакшныль сеедьстэ. Сонзэ мельс пек тукшныль тиринь ёнксонь пертьпельксэсь. Вирьганть якиль куватьс. Содылизе, косо касыть ламо ягодат. Туиндеряй панго мельга, чаво зярдояк а сакшныль. Ледстнян, Захар Ивановичнень ульнесть уш ведьгемень иеть. Урьвакстозь арасель. Кортыль: «Ней, паряк, уш а урьвакстангак. Кие монь экшс моли? Сырян». Вана тусь Томскоев. Зярыя шкань ютазь тенек сась пельдензэ сёрма, косо пачтясь – урьвакстсь. Низэ 25 иеде седе одоль. Авась пек вадряль. Вейсэ эрясть колоньгеменде ламо иеть.

Мемориалонь лазтнэнь панжомадо мейле весе совасть Пичингуши велень Культурань кудос. Тесэ Лукояновань краеведениянь музеень ды Пичингуши велень библиотекань фондтнэстэ анокстазель фотовыставка, сон алтазель вадря, содавикс ломантненень. М.И.Сумгинэнь нетяно од порасто, зярдо тонавтнесь университетсэ, Якутиясо экспедициясо ды истя седе тов.

Невтезель «Их имена – часть нашей истории» кинофильмась, конась ёвтнесь М.И.Сумгиндэ, З.И.Клементьевде, А.А.Куманевдо, Ф.А.Каргаевде.

Мейле ушодовсь кругловой столесь, конань лемезэль: «От сохранения истории малой родины к возрождению исторической памяти народа». Пурнавозтненень шумбракстнемань валт ёвтась Лукояновань райононь администрациянь  культурань ды спортонь отделэнь прявтось Л.В.Семьина. Сон арсесь лезэв важодема.

– Паро, зярдо велень эрицятне а стувтнить эсест ломантнень, кить славизь эсь раськенть масторонь келес, – ёвтни Нижней Новгородонь областень Законодательной собраниянь депутатось Н.П.Шкилев. – Арсян, Крапивка велень содавикс ломантнень лемест Лукояновань райононь ды целанек Нижней Новгородонь областень эрицятнень седейсэ кармить эрямо пингеде-пингес.

Историянь наукань докторось, профессорось Н.Ф.Мокшин ёвтнесь сеть китнеде, зярдо тонавтнесь Лукояновань педагогической училищасо, конань прявтсоль А.А.Куманев. Николай Федоровичень валонзо коряс, Александр Александрович ульнесь алкуксонь тонавтыцякс. Сон важодемстэ зярдояк кинь лангскак вайгель эзь кепсе.

Эрзя-мокшонь раськень Регионъютконь общественной организациянь исполкомонь председателесь А.С.Лузгин пек шнынзе кругловой столень пурныцятнень ды ёвтась истямо мель: мекс Сумгинэнь одс а калмамс Крапивка велень эли Лукояновань калмазырьс.  М.И.Сумгин учёноесь калмазь Ташкентсэ. Тень кувалма малавикс раськензэ а содыть, косо калмозо. Истямо тев уш теезь. Казаньстэ Мордовиянь калмазырьс одс калмазь эрзянь раськень просветителесь М.Е.Евсевьев, кинь лементь кандтни Мордовиянь педагогической институтось.

М.И.Сумгин учёноенть эрямонь ды творческой кинзэ марто пурнавозтнень теинзе содавиксэкс Лукояновань краеведениянь музеень директорось Е.В.Кузнецова.

М.И.Сумгин чачсь 1873 иень февралень 24-це чистэ Нижней Новгородонь губерниянь Лукояновань уездэнь Крапивка велесэ. Тетязо, Иван Игнатьевич, ульнесь крестьянинэкс. Приходской школанть прядомадо мейле кармась волостной писарекс. Те чуросто вастневиця тев, зярдо сестэнь грамотас а содыця эрзятнестэ муевсь ломань, кие маштсь ловномо ды ловомо. Сы шкань учёноенть авазо, Анна Федоровна Гаранькина, ловномо маштсь, ансяк сёрмадомо эзь тонадо. Тетязо ды авазо несть: Михаил пек бажась тонавтнемантень. Те меленть эзизь кола. Велень приходской школанть прядомадо мейле Миша поладызе тонавтнеманзо Лукояновань ошонь училищасо. Миша сонзэ прядызе парсте ды кармась важодеме писарекс.

Сась 1917 иесь. Февралень событиятнеде мейле М.И. Сумгин сась тиринь велев. Апрелень 9-це чистэ Лукояновань крестьянтнэ кочкизь сонзэ Лукояновань уездэнь комиссарокс. Куроксто Михаил Ивановичень тердизь Нижней Новгородов. Эсертнэ эзизь стувто Сумгинэнь паро тевензэ партиянть икеле ды кочкизь эсь центральной комитетс, косо сон ульнесь Крестьянской отделэнь прявтокс. М.И. Сумгин партиянть пельде ульнесь Крестьянской депутатонь Советэнь Весероссиянь васенце съездсэ, кона ютавтозель Петроградсо 1917 иень маень 4-28-це читнестэ.

Местной краеведэсь В.Г.Федорушкин ледстнесь седе, кода тешкстазельть М.И.Сумгинэнь 100 иетне.

Научно-просветительской конференциясо эсест мелест-арсемаст ёвтызь Нижней Новгородонь архитектурно-строительной университетэнь учёнойтне А.Н.Ежков, Д.В.Монич, Лукояновань райононь Законодательной собраниянь депутатось А.Н.Ефремов, Лукоянова ошонь 1 № школань директорось В.А.Трохин, Лукояновань краеведениянь музеень эрзянь культурань отделэнь прявтось Н.И.Аношкин.

Кругловой столень важодемась прядовсь. Меельцекс пурнавозтнень кецявтынзе Пичингуши велень «Эрзяночка» тейтерь-авань ансамблясь, конась  морась эрзянь, рузонь морот.

Пётр Зиновьев.

Нижней Новгородонь областень Лукояновань райононь Пичингуши веле

 

Новости

Предложенный ЕР законопроект о зачислении в ПФР конфискованных средств коррупционеров принят Госдумой в первом чтении

Госдума приняла в первом чтении законопроект, позволяющий перечислять в Пенсионный фонд Российской Федерации средства от реализации конфискованного имущества коррупционеров. С данным предложением ранее, 20 августа, на совместном заседании Генерального совета Партии и Совета руководителей фракций «Единой России» выступил секретарь Генерального совета Партии, вице-спикер Совета Федерации Андрей Турчак.

Подробнее ...
 
А.С.Пушкин лемсэ библиотекась тешкстызе чачома чинзэ

Сентябрянь 14-це чистэ Мордовия Республикань А.С.Пушкин лемсэ Национальной библиотекантень топодсть 119 иеть. Кенярксчинть кувалма библиотекань важодицятненень поздоровт ёвтась МР-нь Культурань, национальной политикань, туризмань ды архивень тевень министрась Анатолий Чушкин. Сон ёвтась покш сюкпря топавтовиця важодеманть кисэ, арсесь библиотекантень ансяк касомс-кепетемс ды муемс седе ламо од ловныцят.

Подробнее ...
 
Госдума приняла в первом чтении президентский законопроект о защите людей предпенсионного возраста

Рассматриваемый в Госдуме президентский законопроект, которым устанавливается уголовная ответственность за необоснованный отказ в приеме на работу или необоснованное увольнение лица по мотивам достижения им предпенсионного возраста, призван изменить отношение работодателей к сотрудникам старшего возраста. Об этом заявил первый заместитель руководителя фракции «Единой России» Андрей Исаев в ходе рассмотрения Госдумой законопроекта в первом чтении 13 сентября.

Подробнее ...
 
Лиседе чиеме!

Сентябрянь 15-це чистэ Саранскойсэ, Советской площадьсэ, ютавтови «Кросс-нации – 2018» Чиемань весероссиянь чись. Те  мероприятиясь карми молеме «Спорт против терроризма» девизэнть ало. Те тердеманть ало шожда атлетикань стартс лисить малав 4500 ломанть, юткозост совить шабра регионтнэстэ сазь инжетнеяк.

Подробнее ...
 
Ванстынк прянк грипптенть

Республикасонть ушодовсь грипптенть иммунизациясь. Кода пачтясть Роспотребнадзоронь региональной управлениясо, неть тевтнес нолдавить минсенек масторсо нолдазь вакцинатне, конатне ванкшнозельть парочинть ды зыяновчинть коряс. Неть: «Совигрипп» покштнень туртов ды «Совигрипп», конасонть арасть консервантт, эйкакштнень ды пешксесэ аватнень туртов. Вакцинатнень составс совить гриппень вирустнэнь актуальной штаммтне.

Подробнее ...